Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Tlhelela Eka Yehovha

Papila Leri Humaka Eka Huvo Leyi Fumaka

Papila Leri Humaka Eka Huvo Leyi Fumaka

Eka mupfumerikulorhi la rhandzekaka:

Tanihi leswi u swi tivaka, Bibele i buku leyi vulavulaka swinene hi vanhu. Vo tala a va ri vavanuna ni vavasati vo tshembeka lava langutaneke ni swiphiqo swo fana ni swa hina. A va ri ni “mintlhaveko yo fana ni ya hina.” (Yakobo 5:17) Van’wana a va nga dyi byi rhelela hikwalaho ka swiphiqo ni ku vilela. Van’wana a va twisiwa ku vava hi swirho swa ndyangu kumbe vapfumerikulobye. Vo tala a va kingindziwa hi ripfalo hikwalaho ka swidyoho leswi va nga tshama va swi endla.

Xana vanhu vo tano va tshike ku tirhela Yehovha? Doo! Vo tala va fane ni mupisalema loyi a khongeleke a ku: “Ndzi tsendzeleke kukota nyimpfu leyi lahlekeke. Oho, lava nandza wa wena, hikuva a ndzi swi rivalanga swileriso swa wena.” (Pisalema 119:176) Xana na wena u titwa hi ndlela yoleyo?

Yehovha a nga va rivali vagandzeri vakwe lava humeke etshangeni. U tshinela eka vona hi ku tirhisa vapfumerikulobye. Hi xikombiso, xiya ndlela leyi Yehovha a pfuneke nandza wakwe Yobo ha yona, loyi a langutaneke ni maxangu yo tala—lama katsaka ku lahlekeriwa hi rifuwo, ku feriwa hi varhandziwa vakwe ni ku tlhela a vabya swinene. Yobo u tlhele a tiyisela marito yo tlhava lawa a a byeriwa wona hi vanhu lava a va fanele va n’wi chavelela. Kambe a nga kalanga a fularhela Yehovha, hambileswi minkarhi yin’wana a a pfa a va ni langutelo leri hoxeke. (Yobo 1:22; 2:10) Xana Yehovha u n’wi pfune njhani Yobo leswaku a lulamisa langutelo rakwe?

Yehovha u pfune Yobo hi ku tirhisa mupfumerikulobye loyi a vuriwaka Elihu. Loko Yobo a phofula leswi a swi n’wi vilerisa, Elihu u rhiye ndleve ivi endzhaku a vulavula. I yini leswi a ta swi vula? Xana a ta n’wi tseketsela kumbe a n’wi chavelela hi ku n’wi endla a titwa nandzu kumbe a khomiwa hi tingana? Xana Elihu a a titwa a ri loyi a tlakukeke eka Yobo? Nikatsongo. Hi ku susumetiwa hi moya wa Xikwembu, Elihu u te: “Na mina ndzi fana na wena emahlweni ka Xikwembu xa ntiyiso; na mina ndzi vumbiwile hi misava.” Kutani u tiyisekise Yobo a ku: “Ku hava ku chavisa ko karhi loku nga eka mina loku nga ku chavisaka, naswona ku hava xilo lexi tshikilelaka eka mina lexi nga ku tikelaka.” (Yobo 33:6, 7) Elihu u n’wi laye hi rirhandzu ni ku n’wi khutaza, naswona a nga n’wi engetelelanga swiphiqo.

Hi lunghiselele broxara leyi hi ri ni mianakanyo leyi fanaka. Xo sungula, hi rhiye ndleve kutani hi kambisisa kahle swiyimo ni leswi vuriweke hi vanhu vo tala lava tshikeke nhlengeletano. (Swivuriso 18:13) Kutani hi kambisisa Matsalwa, hi xikhongelo hi ni ndlela leyi Yehovha a ma pfuneke ha yona malandza yakwe lama langutaneke ni swiyimo leswi fanaka enkarhini lowu hundzeke. Eku heteleleni, hi hlanganisa marungula lama nga eMatsalweni ni mintokoto ya manguva lawa leswaku hi humesa broxara leyi. Ha ku khutaza leswaku u yi hlaya. Tiyiseka leswaku ha ku rhandza swinene.

Huvo leyi Fumaka ya Timbhoni ta Yehovha