Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele—Yi Tamele Rungula Rihi?

 XIYENGE 21

Yesu U Pfuxiwile!

Yesu U Pfuxiwile!

Yesu u humelele eka valandzeri va yena leswaku a va letela ni ku va khutaza

ENDZHAKU ka masiku manharhu Yesu a file, vavasati van’wana lava a va ri vadyondzisiwa va yena va kume leswaku ribye leri a ri pfale nomu wa sirha ra yena ri susiwile. Ku tlula kwalaho, sirha-bako a ri nga ri na nchumu!

Ku humelele tintsumi timbirhi. Yin’wana yi te: “Mi lava Yesu wa Munazareta. . . . U pfuxiwile.” (Marka 16:6) Vavasati volavo va nambe va tsutsuma va ya byela vaapostola. Loko va ha ri endleleni va hlangane na Yesu. U te: “Mi nga chavi! Fambani, mi ya vikela vamakwerhu, leswaku va ya eGaleliya; va ta ndzi vona kwale.”—Matewu 28:10.

Hi rona siku rero, vadyondzisiwa vambirhi a va huma eYerusalema va ya eximutanini xa Emawusi. Munhu loyi va nga n’wi tiviki u fambisane na vona kutani a va vutisa leswaku va vulavula hi yini. Entiyisweni, munhu yoloye a ku ri Yesu la pfuxiweke loyi a humeleleke eka vona hi xivumbeko lexi eku sunguleni a va nga xi xiyi. Va hlamule va ri ni gome va vula leswaku a va vulavula hi Yesu. Munhu yoloye loyi va nga n’wi tiviki u sungule ku va hlamusela swilo leswi khumbaka Mesiya eMatsalweni hinkwawo. Hakunene, Yesu u hetisise vuxokoxoko hinkwabyo bya vuprofeta lebyi khumbaka Mesiya. * Loko vadyondzisiwa volavo va swi xiya leswaku munhu yoloye a ku ri Yesu la pfuxiweke a ri xivumbiwa xa moya, Yesu u nyamalarile.

Vadyondzisiwa lavambirhi va nambe va tlhelela eYerusalema. Va fike va kuma vaapostola va hlengeletanile va lotlele tinyangwa. Loko vaapostola lavambirhi va ri karhi va hlamusela leswi humeleleke, Yesu u humelerile. Valandzeri va yena lava hlamaleke a swi va tikela ku tshemba mhaka leyi! Yesu u vutisile a ku: “Ha yini mi kanakana etimbilwini ta n’wina? . . . Ku tsariwile leswaku Kreste a a ta xaniseka kutani a pfuka eka lava feke hi siku ra vunharhu.”—Luka 24:38, 46.

Yesu u humelele eka vadyondzisiwa va yena hi minkarhi yo hambana-hambana ku ringana masiku ya 40 endzhaku ka loko a pfuxiwile. Siku rin’wana u humelele eka vadyondzisiwa vo tlula 500! Swi nga ha endleka leswaku hi nkarhi wolowo u va nyike ntirho lowu wa nkoka, loko a ku: “Fambani mi ya endla vanhu va matiko hinkwawo va va vadyondzisiwa, . . . mi va dyondzisa ku hlayisa swilo hinkwaswo leswi ndzi mi leriseke swona. Kutani, maswivo, ndzi na n’wina masiku hinkwawo ku fikela emakumu ka mafambiselo ya swilo.”—Matewu 28:19, 20.

Loko a hlangane ro hetelela ni vaapostola va yena va 11 vo tshembeka, Yesu u tshembise a ku: “Mi ta amukela matimba loko moya lowo kwetsima wu fika ehenhla ka n’wina, naswona mi ta va timbhoni ta mina . . . ku ya fika endhawini ya le kule swinene ya misava.” (Mintirho 1:8) Hiloko Yesu a tlakuseriwa ehenhla, ivi papa ri va sivela leswaku va nga ha n’wi voni loko a tlhandlukela etilweni.

—Xi sekeriwe eka Matewu ndzima 28; Marka ndzima 16; Luka ndzima 24; Yohane ndzima 20 na ndzima 21; 1 Vakorinto 15:5, 6.

^ ndzim. 6 Leswaku u kuma swikombiso swa vuprofeta lebyi vulavulaka hi Mesiya lebyi hetisekeke eka Yesu, vona Xiyenge 14, Xiyenge 15 ni Xiyenge 16 eka broxara leyi swin’we ni xihloko xa xiengetelo lexi nge “Yesu Kreste I Mesiya La Tshembisiweke” ebukwini leyi nge Xana Bibele Yi Dyondzisa Yini Hakunene?

DYONDZA SWO TALA

XIHONDZO XO RINDZA

Ku Pfuxiwa Ka Yesu Ku Vula Vutomi!

Ehleketa hi vutomi lebyi eka byona ku nga riki ni switlhavi, ku xaniseka ni mahlomulo.