Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele—Yi Tamele Rungula Rihi?

 XIYENGE 17

Yesu U Dyondzise Hi Ta Mfumo Wa Xikwembu

Yesu U Dyondzise Hi Ta Mfumo Wa Xikwembu

Yesu u dyondzise vadyondzisiwa vakwe swilo swo tala, kambe a a kandziyisa mhaka yin’we ntsena, ku nga Mfumo wa Xikwembu

HI WIHI ntirho lowu Yesu a a wu endla emisaveni? Yena hi byakwe u te: “Ndzi fanele ku vula mahungu lamanene ya Mfumo wa Xikwembu, hikuva hi swona leswi ndzi rhumeriweke swona.” (Luka 4:43) Xiya swilo swa mune leswi Yesu a a swi dyondzisa hi Mfumo wolowo, lowu a ku ri wona nchumu wa nkoka lowu a a wu kandziyisa loko a chumayela.

1. Yesu a a ta va Hosi ya wona. Yesu u vule hi ku kongoma leswaku hi yena Mesiya la tshembisiweke. (Yohane 4:25, 26) U tlhele a vula leswaku hi yena Hosi leyi muprofeta Daniyele a nga yi vona exivonweni. U tshame a byela vaapostola vakwe leswaku siku rin’wana u ta tshama ‘exiluvelweni lexi vangamaka’ ni leswaku na vona va ta tshama eswiluvelweni. (Matewu 19:28) U vitane ntlawa wolowo wa vafumi a ku i “ntlhambinyana,” naswona u tlhele a vula leswaku u ni “tinyimpfu tin’wana” leti tona ti nga riki ntlawa wa ntlhambinyana.—Luka 12:32; Yohane 10:16.

2. Mfumo wa Xikwembu wu ta tisa vululami bya ntiyiso. Yesu u vule leswaku Mfumo wu ta susa vuhomboloki hinkwabyo ivi wu kwetsimisa vito ra Yehovha Xikwembu wu tlhela wu ri basisa eka swihehlo leswi Sathana a nga ri tota swona ku sukela loko a xandzukile le Edeni. (Matewu 6:9, 10) U tlhele a kombisa leswaku a nga na xihlawuhlawu hileswi siku ni siku a a dyondzisa vavanuna ni vavasati, vanhu lava fuweke ni swisiwana. Hambileswi a a rhumiwe ku ya chumayela Vaisrayele ntsena, u tlhele a chumayela ni Vasamariya, Vamatiko swin’we ni vanhu lava nga riki Vayuda. Ku hambana ni varhangeri va vukhongeri va le sikwini rakwe, Yesu a a nga ri na xihlawuhlawu.

3. Mfumo wa Xikwembu a wu nga ta va xiphemu xa misava leyi. Yesu u hanye hi nkarhi lowu a ku ri ni ku kwetlembetana etimhakeni ta tipolitiki. Tiko ra ka vona a ri lawuriwa hi mfumo wa le tikweni rin’wana. Loko vanhu va ringeta ku n’wi yenga leswaku a nghenelela etimhakeni ta tipolitiki, u balekile. (Yohane 6:14, 15) U byele n’watipolitiki un’wana a ku: “Mfumo wa mina a hi xiphemu xa misava leyi.” (Yohane 18:36) U tlhele a byela valandzeri vakwe a ku: ‘A mi xiphemu xa misava.’ (Yohane 15:19) Kutani a a nga ta va pfumelela ku tirhisa matlhari ya nyimpi, hambi ku ri ku n’wi sirhelela ha wona.—Matewu 26:51, 52.

“A famba . . . hi ximutana ni ximutana, a chumayela ni ku vula mahungu lamanene ya mfumo wa Xikwembu.”—Luka 8:1

4. Kreste u ta fuma hi rirhandzu. Yesu u tshembise vanhu leswaku u ta va phyuphyisa ni ku va olovisela mindzhwalo ya vona. (Matewu 11:28-30) A a endla hi ku pfumelelana ni leswi a a swi dyondzisa. U nyikele ndzayo leyi pfunaka malunghana ni ndlela leyinene yo langutana ni mivilelo, ku hanyisana ni vanhu van’wana, ku hlongorisa rifuwo ni ndlela yo kuma ntsako. (Matewu, tindzima 5-7) Hikwalaho ka leswi Yesu a a ri ni rirhandzu, vanhu hinkwavo a va nga chavi ku vulavula na yena. Hambi ku ri lava tshikileriweke swinene a va khitikanela eka yena, va tiyiseka leswaku u ta va khoma hi musa ni hi xindzhuti. Hakunene Yesu u ta va Mufumi lonene!

Ku ni ndlela yin’wana leyi a yi ri ni matimba swinene leyi Yesu a dyondziseke ha yona malunghana ni Mfumo wa Xikwembu. U endle masingita yo tala. Ha yini a endle masingita? A hi voneni.

—Xi sekeriwe eka Matewu, Marka, Luka na Yohane.

DYONDZA SWO TALA

Mfumo Wa Xikwembu—Lexi Endlaka Wu Va Wa Nkoka Eka Yesu

A ku nga ri xihoxo leswi Yesu a vulavuleke hi Mfumo ku tlula timhaka letin’wana hinkwato.

Mfumo Wa Xikwembu I Yini?

Vanhu vo tala va tiva Xikhongelo xa Hosi. Xana marito lama nge: “Mfumo wa wena a wu te” ma vula yini?