Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele​—Yi Tamele Rungula Rihi?

 XIYENGE 14

Xikwembu Xi Vulavule Hi Ku Tirhisa Vaprofeta Va Xona

Xikwembu Xi Vulavule Hi Ku Tirhisa Vaprofeta Va Xona

Yehovha u hlawule vaprofeta leswaku va yisa marungula lama vulavulaka hi vuavanyisi, vugandzeri lebyi tengeke ni ntshembo wa Mesiya

HI NKARHI wa tihosi ta le Israyele na Yuda, a ku ri ni ntlawa wo hlawuleka wa vavanuna, ku nga vaprofeta. Vavanuna volavo a va ri ni ripfumelo lerikulu ni xivindzi naswona a va twarisa marungula ya nkoka ya Xikwembu. Xiya tinhloko-mhaka ta mune leti vaprofeta va Xikwembu va vulavuleke ha tona.

1. Ku lovisiwa ka Yerusalema. Loko ka ha sele malembe yo tala swinene, Esaya na Yeremiya lava a va ri vaprofeta va Xikwembu, va sungule ku lemuxa leswaku muti wa Yerusalema a wu ta lovisiwa ivi ku nga ha tshami munhu. Va paluxe xivangelo xo va muti wolowo wu weriwa hi vukarhi bya Xikwembu hi ndlela leyi twisisekaka. Leswi muti wolowo a wu vula leswaku wu yimela Yehovha swi tikombe ku ri mavunwa hikuva vaaki va wona a va endla mikhuva ya vukhongeri bya mavunwa, va onhakile naswona a va ri ni madzolonga.—2 Tihosi 21:10-15; Esaya 3:1-8, 16-26; Yeremiya 2:1–3:13.

2. Ku vuyeteriwa ka vugandzeri lebyi tengeke. Endzhaku ka malembe ya 70 vanhu va Xikwembu va ri evuhlongeni, a va ta ntshunxiwa eBabilona. A va ta tlhelela etikweni ra vona leri a ri ri rhumbi ivi va ya pfuxeta tempele ya Yehovha le Yerusalema. (Yeremiya 46:27; Amosi 9:13-15) Loko ka ha sele malembe ya 200 leswaku sweswo swi endleka, Esaya u profete leswaku Korexe hi yena loyi a a ta hlula muti wa Babilona ivi a pfumelela vanhu va Xikwembu leswaku va ya vuyetela vugandzeri lebyi tengeke. Esaya u tlhele a hlamusela ndlela leyi nga tolovelekangiki leyi Korexe a a ta wu hlula ha yona muti wolowo.—Esaya 44:24–45:3.

3. Ku fika ka Mesiya ni swilo leswi a swi ta n’wi humelela. Mesiya a a ta velekeriwa emutini wa Betlehema. (Mikiya 5:2) A a ta titsongahata, a fika eYerusalema a gade mbhongolo. (Zakariya 9:9) Hambileswi a a ri ni moya wo rhula naswona a ri ni musa, vanhu a va nga ta n’wi tiva naswona vo tala a va ta n’wi ala. (Esaya 42:1-3; 53:1, 3) A a ta dlayiwa hi ndlela yo vava swinene. Xana vutomi bya yena a byi ta helela kwalaho? Doo, hikuva xitlhavelo xa yena a xi ta endla leswaku swidyoho swa vanhu vo tala swi rivaleriwa. (Esaya 53:4, 5, 9-12) Sweswo a swi ta endleka endzhaku ka loko a pfuxiwile eku feni.

4. Ku fuma ka Mesiya emisaveni. Vanhu lava nga hetisekangiki a va swi koti ku tifuma hi ku rhula kambe Hosi leyi nga Mesiya yi vitaniwa Hosana ya Ku Rhula. (Esaya 9:6, 7; Yeremiya 10:23) Loko ku fuma yena, vanhu hinkwavo va ta hanyisana hi ku rhula va tlhela va hanyisana kahle ni swiharhi hinkwaswo. (Esaya 11:3-7) Vuvabyi byi ta va byi nga ha ri kona. (Esaya 33:24) Hambi ku ri rifu ri ta miteriwa makumu. (Esaya 25:8) Loko ku fuma Mesiya, vanhu lava feke va ta pfuxiwa leswaku va hanya laha misaveni.—Daniyele 12:13.

Xi sekeriwe ebukwini ya Esaya, Yeremiya, Daniyele, Amosi, Mikiya ni ya Zakariya.