Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele—Yi Tamele Rungula Rihi?

 XIYENGE 4

Xikwembu Xi Endle Ntwanano Na Abrahama

Xikwembu Xi Endle Ntwanano Na Abrahama

Abrahama u ve ni ripfumelo ivi a yingisa Yehovha naswona U n’wi tshembise leswaku u ta n’wi katekisa ni ku endla leswaku vatukulu va yena va andza

SE A ku hundze malembe ya kwalomu ka 350 endzhaku ka Ndhambi ya Nowa. Wanuna wo tshembeka Abrahama a a tshama emutini lowu a wu fuwile wa Ura, lowu namuntlha wu nga tiko ra Iraq. Abrahama a a ri ni ripfumelo lerikulu. Kambe ripfumelo ra yena a ri ta ringiwa.

Yehovha u byele Abrahama leswaku a rhurha etikweni leri a nga velekeriwa eka rona a ya etikweni rimbe leri a ri ri tiko ra Kanana. Handle ko kanakana, Abrahama u yingisile. U fambe ni ndyangu wa yena ku katsa na Sara nsati wa yena na Lota n’wana wa makwavo wa yena, naswona endzhaku ka loko va fambe mpfhuka wo leha, u tshame emintsongeni eKanana. Eka ntwanano lowu Yehovha a wu endleke na Abrahama, u n’wi tshembise leswaku matiko hinkwawo ma ta huma eka yena, leswi vulaka leswaku mindyangu hinkwayo a yi ta katekisiwa hikwalaho ka yena ni leswaku vatukulu va yena a va ta dya ndzhaka ya tiko ra Kanana.

Abrahama na Lota a va fuwile naswona a va ri ni mintlhambi ya tinyimpfu ni ya tihomu. Hi ku titsongahata Abrahama u pfumelele Lota leswaku a hlawula ndhawu leyi a a ta yi rhandza. Lota u hlawule ndhawu ya kahle leyi a yi ri eNambyeni wa Yordani hiloko a ya tshama ekusuhi ni muti wa Sodoma. Hambiswiritano, vavanuna va le Sodoma a va tikhome hi ndlela yo biha—a va dyohele Yehovha hi ndlela leyikulu swinene.

Hi ku famba ka nkarhi Yehovha u tlhele a tiyisekisa Abrahama leswaku vana va yena a va ta tala ku fana ni tinyeleti ta le tilweni. Abrahama u xi tshembile xitshembiso xexo. Hambiswiritano, Sara loyi a a ri nsati wa Abrahama a a nga ri na vana. Kutani loko Abrahama a ri ni malembe ya 99 hi vukhale naswona Sara a ri ni malembe ya kwalomu ka 90 hi vukhale, Xikwembu xi byele Abrahama leswaku Sara u ta va ni n’wana. Marito ya Xikwembu ma hetisekile, hiloko Sara a va ni n’wana ivi a n’wi thya vito ra Isaka. Abrahama u ve ni vana van’wana, kambe Mukutsuri loyi a nga tshembisiwa aEdeni a a ta huma erixakeni ra Isaka.

Hi nkarhi wolowo, Lota ni ndyangu wa yena a va tshama emutini wa Sodoma kambe Lota a a nga fani ni vaaki va muti wolowo lava a va hombolokile. Loko Yehovha se a lava ku avanyisa muti wa Sodoma, u rhumele tintsumi leswaku ti ya lemuxa Lota hi ndzoviso lowu a wu ta fika. Tintsumi teto ti khutaze Lota ni ndyangu wa yena leswaku va baleka emutini wa Sodoma nileswaku va nga languti endzhaku. Kutani Xikwembu xi lovise vaaki va muti wa Sodoma swin’we ni va muti wo homboloka wa Gomora. Lota swin’we ni vana va yena vambirhi va vanhwanyana va ponile. Kambe nsati wa Lota u langute endzhaku kumbexana a a navela swilo leswi a nga swi siya. Leswi a nga yingisangiki, u file.

—Xi sekeriwe eka Genesa 11:10–19:38.

DYONDZA SWO TALA

Abrahama—“Tata Wa Hinkwavo Lava Nga Ni Ripfumelo”

Abrahama u ri kombise njhani ripfumelo? U nga lava ku tekelela ripfumelo ra Abrahama hi tindlela tihi?