Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele—Yi Tamele Rungula Rihi?

 XIYENGE 12

Vutlhari Bya Xikwembu Lebyi Hi Kongomisaka eVuton’wini

Vutlhari Bya Xikwembu Lebyi Hi Kongomisaka eVuton’wini

Ebukwini ya Swivuriso ku ni ndzayo leyi huhuteriweke—leyi yo tala ya yona yi tsariweke hi Solomoni—leyi kongomisaka evuton’wini bya siku ni siku

XANA Yehovha i Mufumi la tlhariheke? Ndlela ya nkoka yo hlamula xivutiso lexi i ku anakanyisisa hi ndzayo leyi a hi nyikaka yona. Xana ndzayo yoleyo ya tirha? Xana ku yi tirhisa swi endla leswaku vutomi bya hina byi tsakisa naswona byi va ni xikongomelo? Hosi Solomoni wo tlhariha u tsale swivuriso swo tala. Swivuriso leswi swi vulavula hi swilo swo tala swa vutomi. Xiya swikombiso swin’wana.

Hi fanele hi tshemba Xikwembu. Leswaku munhu a va ni vuxaka lebyinene na Yehovha u fanele a n’wi tshemba. Solomoni u te: “Tshemba Yehovha hi mbilu ya wena hinkwayo naswona u nga titshegi hi ku twisisa ka wena n’wini. N’wi tivise tindlela ta wena hinkwato, kutani yena u ta lulamisa tindlela ta wena.” (Swivuriso 3:5, 6) Ku tshemba Xikwembu hi ku lava nkongomiso wa xona ni ku yingisa swileriso swa xona swi endla leswaku vutomi bya hina byi va ni xikongomelo. Sweswo swi endla leswaku munhu a tsakisa mbilu ya Yehovha naswona swi nyika Yehovha nhlamulo yo hlamula mintlhontlho leyi pfuxiweke hi nala wa Yena, Sathana.—Swivuriso 27:11.

Ku tirhisana ni van’wana hi vutlhari. Ndzayo ya Xikwembu eka vavanuna, vavasati ni vana yi tirha swinene namuntlha ku tlula rini na rini. Xikwembu xi byela wanuna xi ku: “Tsaka hi nsati wa vuntshwa bya wena,” leswi vulaka leswaku u fanele a tshembeka eka nsati wa yena. (Swivuriso 5:18-20) Ebukwini ya Swivuriso, vasati lava tekiweke va kuma nhlamuselo leyinene ya wansati la nga ni vuswikoti, loyi a xiximiwaka hi nuna ni vana va yena. (Swivuriso, ndzima 31) Naswona vana va kuma nkongomiso wo yingisa vatswari va vona. (Swivuriso 6:20) Buku leyi yi tlhela yi kombisa leswaku xinakulobye i xa nkoka hikuva ku tihambanisa ni van’wana swi vanga vutianakanyi. (Swivuriso 18:1) Hi fanele hi hlawula vanghana hi vutlhari hikuva vanghana va nga va nkucetelo lowunene kumbe wo biha eka hina.—Swivuriso 13:20; 17:17.

Ku tikhathalela hi vutlhari. Buku ya Swivuriso yi ni ndzayo ya risima leyi vulavulaka hi ku papalata ku tirhisa byala hi ndlela yo biha, ku va ni mikhuva leyi nga hi pfunaka ni ku lwisana ni mikhuva yo biha ni ku tirha hi matimba. (Swivuriso 6:6; 14:30; 20:1) Yi hi tsundzuxa leswaku ku tshemba vuavanyisi bya vanhu lebyi nga humiki eka Xikwembu swi ni khombo. (Swivuriso 14:12) Yi tlhela yi khutaza leswaku hi sirhelela mbilu ya hina eka minkucetelo yo biha, yi hi tsundzuxa leswaku “swihlovo swa vutomi swi le [mbilwini].”—Swivuriso 4:23.

Vanhu va timiliyoni emisaveni va kume leswaku ku hanya hi milawu yoleyo swi endla leswaku va hanya vutomi byo antswa. Sweswo swi endla leswaku va va ni swivangelo swo tala swo amukela Yehovha tanihi Mufumi wa vona.

—Xi sekeriwe ebukwini ya Swivuriso.

DYONDZA SWO TALA

Xana Wa Byi Tirhisa “Vutlhari Lebyi Humaka eHenhla”?

Bibele yi nyikela minkongomiso ya mune leswaku yi ku pfuna ku hlakulela vutlhari lebyi humaka eka Xikwembu.