Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele—Yi Tamele Rungula Rihi?

 XIYENGE 8

Vaisrayele Va Nghene eTikweni Ra Kanana

Vaisrayele Va Nghene eTikweni Ra Kanana

Yoxuwa u rhangele Vaisrayele loko va ya hlasela ni ku hlula tiko ra Kanana. Yehovha u nyike vaavanyisi matimba leswaku va kutsula vanhu va yena

LOKO ka ha sele madzana ya malembe leswaku Vaisrayele va nghena etikweni ra Kanana, Yehovha u tshembise vatukulu va Abrahama tiko rero. Loko Vaisrayele va rhangeriwa hi Yoxuwa, a va lunghekele ku teka Tiko leri Tshembisiweke.

Xikwembu a xi avanyise Vakanana naswona a va fanele va lovisiwa. Etikweni hinkwaro a va tikhome hi ndlela yo biha hi tlhelo ra masangu va tlhela va halata ngati. Hikwalaho miti ya Vakanana leyi hluriweke hi Vaisrayele a yi fanele yi lovisiwa hi ku helela.

Hambiswiritano, loko va nga si hlasela tiko rero, Yoxuwa u rhumele tinhlorhi timbirhi leti nga fika emutini wa Yeriko ti tshama ni wansati la vuriwaka Rahava. Wansati yoloye u ti amukerile tinhlorhi teto endlwini yakwe a tlhela a ti sirhelela hambileswi a a swi tiva leswaku a ti ri Vaisrayele. Rahava a a ri ni ripfumelo eka Xikwembu xa Vaisrayele hikuva a a twile hi ndlela leyi Yehovha a va poniseke ha yona vanhu va yena. U hlambanyise tinhlorhi teto leswaku ti vula leswaku yena ni ndyangu wa yena a va nge lovisiwi.

Endzhaku ka nkarhi loko Vaisrayele va nghena etikweni ra Kanana leswaku va hlasela muti wa Yeriko, hi singita Yehovha u endle leswaku makhumbi ya muti wa Yeriko ma wa. Hiloko mavuthu ya Yoxuwa ma hlasela ni ku lovisa muti wolowo kambe ku pone ntsena Rahava ni ndyangu wa ka vona. Kutani, eka malembe ya tsevu lama landzeleke, Yoxuwa u hlule swiyenge leswikulu swa Tiko leri Tshembisiweke. Endzhaku ka loko va hlurile, tiko rero ri averiwe tinyimba ta Israyele.

Endzhaku ka loko Yoxuwa a ri ni nkarhi wo leha a tirhela Xikwembu, u hlengelete vanhu. U va tsundzuxe ndlela leyi Yehovha a tirhisaneke ha yona ni vakokwa wa vona naswona u va khutaze leswaku va gandzela Yehovha. Loko Yoxuwa ni vakulukumba lava tirheke na yena se va file, Vaisrayele va fularhele Yehovha kutani va gandzela swikwembu swa mavunwa. Va hete malembe ya kwalomu ka 300 va nga yingisi milawu ya Yehovha. Hi nkarhi wolowo Yehovha u pfumelele valala va Israyele, vo tanihi Vafilista leswaku va va tshikilela. Kambe loko Vaisrayele va kombela Yehovha leswaku a va pfuna, u va hlawulele vaavanyisi va 12 leswaku va va ponisa.

Nkarhi wa Vaavanyisi lowu tsariweke ebukwini ya Vaavanyisi wu sungule hi Otiniyele kutani wu hetelela hi Samsoni wanuna wa matimba swinene la tshameke a hanya. Mhaka ya nkoka leyi phindha-phindhawaka eka rungula leri tsakisaka leri nga ebukwini ya Bibele ya Vaavanyisi hi leyi: Ku yingisa Yehovha swi tisa mikateko kambe ku nga n’wi yingisi swi tisa khombo.

Xi sekeriwe ebukwini ya Yoxuwa; Vaavanyisi; Levhitika 18:24, 25.