Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele—Yi Tamele Rungula Rihi?

 XIYENGE 3

Vanhu Va Pone Ndhambi

Vanhu Va Pone Ndhambi

Xikwembu xi lovise misava yo homboloka kambe xi ponise Nowa ni ndyangu wa yena

LOKO vanhu va ri karhi va andza, xidyoho ni vubihi swi andze swinene emisaveni. Enoko Muprofeta loyi a a ri yexe hi nkarhi wolowo, a a ri karhi a lemukisa vanhu leswaku siku rin’wana Xikwembu xi ta lovisa vanhu lavo homboloka. Hambiswiritano, vubihi a byi ri karhi byi nyanya. Tintsumi tin’wana ti xandzukele Xikwembu hi ku tshika ndhawu ya tona ya le tilweni ivi ti tihundzula vanhu va nyama kutani ti titekela vavasati. Vuxaka byebyo byi endle leswaku ti velekeriwa vana lava nga swihontlovila lava vuriwaka Manefilimi, lava endleke leswaku madzolonga ni ku dlayana swi andza hi nkarhi wolowo. Xikwembu xi twe mbilu ku vava swinene loko xi vona misava leyi xi nga yi tumbuluxa yi ri karhi yi onhiwa.

Endzhaku ka loko Enoko a file, a ku ri ni wanuna un’we loyi a a hambanile ni vanhu volavo vo homboloka. Vito ra yena a ku ri Nowa. Yena ni ndyangu wa yena va ringetile ku endla leswinene emahlweni ka Xikwembu. Loko Xikwembu xi lava ku lovisa vanhu va misava yoleyo yo homboloka, a xi lava ku sirhelela Nowa swin’we ni swiharhi leswi a swi ri kona emisaveni. Hiloko Xikwembu xi byela Nowa leswaku a aka ngalava, ku nga nchumu lowukulu lowu fanaka ni bokisi. Nowa ni ndyangu wa yena swin’we ni swiharhi swo tala leswi a va ri na swona, a va ta pona loko va ri endzeni ka yona loko ku fika ndhambi emisaveni hinkwayo. Nowa u yingise Xikwembu. Emalembeni lawa Nowa a ma heteke a ri karhi a aka ngalava, a a ri “muchumayeri wa leswo lulama.” (2 Petro 2:5) U tsundzuxe vanhu hi ndhambi leyi a yi ta fika kambe vanhu volavo a va n’wi yingisanga. Nkarhi wa leswaku Nowa ni ndyangu wa yena swin’we ni swiharhi va nghena engalaveni a wu fikile. Xikwembu hi xona xi pfaleke nyangwa ya ngalava. Hiloko mpfula yi sungula ku na.

Mpfula yi ne hi matimba swinene ku ringana masiku ya 40 ni vusiku bya 40 kukondza misava hinkwayo yi tala hi mati. Vanhu vo homboloka a va lovisiwile. Endzhaku ka tin’hweti to hlaya loko mati ma sungula ku vohla, ngalava yi fike yi yima ehenhla ka ntshava. Nowa ni ndyangu wa yena swin’we ni swiharhi va hume engalaveni endzhaku ka loko va tshame lembe hinkwaro. Nowa u nkhense Yehovha hi ku n’wi endlela xitlhavelo. Xikwembu xi amukele xitlhavelo xexo hi ku tiyisekisa Nowa ni ndyangu wa yena leswaku a xi nge he lovisi swivumbiwa hinkwaswo emisaveni hi ku tirhisa ndhambi. Yehovha u endle nkwangulatilo tanihi xitiyisekiso lexi a xi ta va chavelela.

Endzhaku ka ndhambi, Xikwembu xi tlhele xi nyika vanhu swileriso leswintshwa. Xi va pfumelele leswaku va dya nyama ya swiharhi. Hambiswiritano, xi va alele ku dya ngati. Nakambe xi lerisa leswaku vatukulu va Nowa va fanele va hangalaka emisaveni hinkwayo. Kambe van’wana a va xi yingisanga xileriso xexo xa Xikwembu. Vanhu va hlanganile kutani Nimrodo a va murhangeri wa vona hiloko va sungula ku tiakela xihondzo lexikulu emutini wa Babele, lowu hi ku famba ka nkarhi wu vuriweke Babilona. A va lava ku lwisana ni xikongomelo xa Xikwembu xa leswaku va tata misava hinkwayo. Kambe Xikwembu xi xaxise makungu ya vaxandzuki volavo hi ku pfilunganya ririmi ra vona ivi xi endla leswaku va vulavula tindzimi to hambana-hambana. Tanihi leswi a va nga ha twani, va tshike ntirho wa vona wo aka hiloko va hangalaka.

—Xi sekeriwe eka Genesa ndzima 6 ku ya eka ndzima 11; Yudha 14, 15.

DYONDZA SWO TALA

Nowa U ‘Fambe Ni Xikwembu Xa Ntiyiso’

Xana Nowa ni nsati wakwe va langutane ni swiphiqo swihi loko va ri karhi va kurisa vana va vona? Xana va ri kombise njhani ripfumelo loko va ri karhi va aka ngalava?