Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele—Yi Tamele Rungula Rihi?

 XIYENGE 23

Mahungu Lamanene Ma Hangalakile

Mahungu Lamanene Ma Hangalakile

Pawulo u chumayele loko a famba etikweni ni loko a tluta elwandle

ENDZHAKU ka ku hundzuka ka yena, Pawulo u chumayele mahungu lamanene malunghana ni Mfumo wa Xikwembu hi ku hiseka—naswona tanihi leswi a a ri mukaneti, na yena se a a kanetiwa hi tihanyi. Muapostola loyi la hisekaka u endle maendzo yo hlayanyana yo chumayela, a famba mimpfhuka a ri karhi a chumayela mahungu lamanene hi Mfumo lowu a wu ta hetisisa xikongomelo lexi Xikwembu a xi ri na xona hi vanhu.

Eka riendzo ra Pawulo ro sungula ro chumayela loko a ri eListra, u hanyise wanuna la velekiweke a lamarile. Vanhu va sungule ku vula leswaku Pawulo na Barnaba i swikwembu. Vavanuna lavambirhi va tsandzekile ku sivela vanhu volavo leswaku va va endlela switlhavelo. Hambiswiritano, endzhaku ka loko ntshungu wolowo wu kuceteriwe hi valala va Pawulo, wu n’wi khandle hi maribye ivi wu n’wi siya wu anakanya leswaku u file. Pawulo u ponile hiloko hi ku famba ka nkarhi a tlhelela emutini wolowo leswaku a ya khutaza vadyondzisiwa volavo.

Vakreste van’wana lava nga Vayuda va vule leswaku vapfumeri lava nga riki Vayuda a va fanele va hlayisa milawu yo karhi ya Nawu wa Muxe. Pawulo u ye eYerusalema a ya tivisa vaapostola ni vakulukumba hi xiphiqo xexo. Endzhaku ka loko vavanuna volavo va kambisise Matsalwa hi vukheta naswona va kongomisiwe hi moya lowo kwetsima wa Xikwembu, va tsalele vamakwerhu emavandlheni va va khutaza leswaku va papalata ku gandzela swifaniso swa hava, ku dya ngati ni nyama leyi dlayiweke hi ku tlimbiwa nkolo ni vumbhisa. Swileriso sweswo a swi ri ‘swilo leswi fanelaka,’ kambe ku yingisa swilo leswi a swi nga lavi leswaku munhu a landzela Nawu wa Muxe.—Mintirho 15:28, 29.

Eka riendzo ra yena ra vumbirhi ro chumayela, Pawulo u endzele eBeriya, ku nga muti lowu sweswi wu nga laha ku nga tiko ra Greece ra manguva lawa. Vayuda lava tshamaka kwalaho va amukele rito hi mapfundza, va kambisisa Matsalwa siku ni siku leswaku va ta tiyiseka hi leswi a a swi dyondzisa. Nakambe, loko a ri kwalaho u xanisiwile lerova a boheka ku balekela emutini wa Atena. Pawulo u nyikele nkulumo ya matimba emahlweni ka ntlawa lowu dyondzekeke wa vanhu va le Atena naswona u hi vekele xikombiso lexinene xo tirhisa vuxiyaxiya, ku twisisa ni ku khorwisa.

Endzhaku ka riendzo ra vunharhu ro chumayela, Pawulo u ye eYerusalema. Loko a ri kwalaho etempeleni, Vayuda van’wana va vange hasahasa naswona a va lava ku n’wi dlaya. Masocha ya Varhoma ma nghenelerile kutani ma konanisa Pawulo. Tanihi leswi a a ri muaka-tiko wa le Rhoma, hi ku famba ka nkarhi u tihlamulele eka Ndhuna-nkulu ya Murhoma ku nga Felikisi. Vayuda a va swi kotanga ku humesa vumbhoni bya leswi a va hehla Pawulo ha swona. Leswaku Pawulo a sivela Festo, ndhuna-nkulu yin’wana ya Murhoma leswaku yi nga n’wi yisi eka Vayuda, u te: “Ndzi endla xikombelo eka Khezari!” Hiloko Festo a ku: “U ta ya eka Khezari.”—Mintirho 25:11, 12.

Endzhaku ka sweswo Pawulo u yisiwe hi xikepe eItaliya leswaku a ya tengisiwa. Xikepe lexi a va famba ha xona xi tshovekile hiloko a boheka ku tshama exihlaleni xa Melita kukondza xixika xi hela. Loko a hetelele a fikile eRhoma, u tshame malembe mambirhi endlwini leyi hirhiweke. Hambileswi muapostola loyi la hisekaka a a rindziwa hi socha, u ye emahlweni a chumayela hi Mfumo wa Xikwembu eka vanhu hinkwavo lava a va n’wi endzela.

—Xi sekeriwe eka Mintirho 11:22–28:31.