Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele—Yi Tamele Rungula Rihi?

 XIYENGE 16

Ku Ta Ka Mesiya

Ku Ta Ka Mesiya

Yehovha u vule leswaku Yesu wa le Nazareta hi yena Mesiya loyi se a ku hundze malembe a tshembisiwile

XANA Yehovha a a ta va pfuna vanhu va kota ku tiva Mesiya la tshembisiweke? Ina. Xiya leswi Xikwembu xi swi endleke. Leswi swi endleke endzhaku ka malembe-xidzana ya mune Matsalwa ya Xiheveru ma tsariwile. Emutini wa Nazareta lowu nga le n’walungwini wa Galeliya, wanhwana la vuriwaka Mariya u humeleriwe hi nchumu lowu hlamarisaka. Ntsumi leyi vuriwaka Gabriyele, yi humelele eka yena kutani yi n’wi byela leswaku Xikwembu a xi ta tirhisa matimba ya xona lama tirhaka, ku nga moya wa xona lowo kwetsima, leswaku a tika kutani a veleka n’wana hambileswi a a nga si tshama a etlela ni wanuna. N’wana yoloye wa jaha a a ta va Hosi leyi se a ku hundze malembe yi tshembisiwile, leyi a yi ta fuma hilaha ku nga heriki! N’wana yoloye a a ta va N’wana wa Xikwembu, loyi xi hundziseleke vutomi bya yena embelekweni ya Mariya.

Hi ku titsongahata Mariya u ri amukerile lunghelo leri. Yosefa wanuna loyi a a ri muvatli naswona a tshembisane na Mariya, u tekane na yena endzhaku ka loko Xikwembu xi rhumele ntsumi ya xona yi ya n’wi byela leswaku Mariya u tike hikwalaho ka leswi Xikwembu xi nga nghenisa vutomi bya N’wana wa xona embelekweni wakwe. Kambe ku vuriwa yini hi vuprofeta lebyi nga vula leswaku Mesiya a a ta velekeriwa eBetlehema? (Mikiya 5:2) Ku suka eNazareta ku ya eBetlehema a ku ri tikhilomitara ta kwalomu ka 140!

Mufumi wa le Rhoma u lerise leswaku ku hlayiwa vanhu. Vanhu a va fanele va ya tsarisa emitini leyi va velekeriweke eka yona. Swi tikomba onge Yosefa na Mariya a va velekeriwe eBetlehema, hikwalaho Yosefa u fambe ni nsati wa yena la tikeke va ya kwalaho. (Luka 2:3) Mariya u fike a veleka n’wana exivaleni xa tihanci xa xiyimo xa le hansi kutani a n’wi lata exidyelweni. Endzhaku ka sweswo, Xikwembu xi rhumele tintsumi leswaku ti ya byela ntlawa wa varisi lava a va ri entshaveni leswaku n’wana loyi a ha ku velekiwaka a ku ri Mesiya kumbe Kreste la tshembisiweke.

Kambe a ku ri ni vanhu van’wana lava na vona a va ta tiyisekisa leswaku Yesu a ku ri Mesiya la tshembisiweke. Muprofeta Esaya u vule ka ha ri emahlweni leswaku a ku ta humelela wanuna loyi a a ta basisela Mesiya ndlela entirhweni wakwe wa nkoka. (Esaya 40:3) Wanuna yoloye a ku ri Yohane Mukhuvuri. Loko Yohane a vona Yesu, u huwelerile a ku: “Vonani, Xinyimpfana xa Xikwembu lexi susaka xidyoho xa misava!” Hi nkarhi wolowo vadyondzisiwa van’wana va Yohane va sungule ku landzela Yesu. Un’wana wa vona u te: “Hi kume Mesiya.”—Yohane 1:29, 36, 41.

A ku ri ni vumbhoni byin’wana. Loko Yohane a khuvula Yesu, Yehovha u vulavule a ri etilweni. Hi ku tirhisa moya lowo kwetsima, u tote Yesu leswaku a va Mesiya, ivi a ku: “Loyi i N’wananga, la rhandzekaka, loyi ndzi n’wi amukeleke.” (Matewu 3:16, 17) Mesiya loyi se a ku ri malembe a tshembisiwile, a a fikile!

Xana leswi swi endleke rini? Swi endleke hi lembe ra 29 C.E., loko ku hela malembe ya 483 lawa Daniyele a profeteke ha wona. Lebyi i byin’wana bya vumbhoni lebyikulu bya leswaku Yesu i Mesiya kumbe Kreste. Kutani hi rihi rungula leri a a ta ri chumayela loko a fika emisaveni?

—Xi sekeriwe eka Matewu ndzima 1 ku ya eka ndzima 3; Marka ndzima 1; Luka ndzima 2; Yohane ndzima 1.

DYONDZA SWO TALA

Yesu Kreste I Mani?

Kuma leswaku ha yini Yesu a file. Leswi nkutsulo wu nga swona ni leswi Yesu a swi endlaka sweswi.

Mariya U ‘Anakanyisisile eMbilwini Yakwe’

Leswi Mariya a langutaneke na swona eBetlehema swi tiyise ripfumelo rakwe eka switshembiso swa Yehovha.

Yosefa U Wu sirhelerile, A Wu Wundla Ni Ku Tiyisela

Yosefa u sirhelele ndyangu wakwe hi tindlela tihi? Ha yini a teke Mariya na Yesu a va yisa a Egipta?

Xikwembu Xi Tiyimisele Ku Kutsula Vanhu

Xana Mesiya u katseka njhani eka xitshembiso lexi Xikwembu xi xi endleke eka Abrahama? Hlaya ndlela leyi ha yona Xikwembu xi nga ta ponisa vanhu eka vuvabyi, ku xaniseka ni rifu.