Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

“Tihlayiseni eRirhandzwini Ra Xikwembu”

 NDZIMA 15

Tsakela Ntirho Wa Wena

Tsakela Ntirho Wa Wena

‘Munhu un’wana ni un’wana u fanele a tsakela ntirho wa yena.’—EKLESIASTA 3:13.

1-3. (a) Xana vanhu vo tala va titwa njhani hi mintirho leyi va yi endlaka? (b) Xana Bibele yi ri yini hi ntirho naswona hi swihi swivutiso leswi nga ta kambisisiwa eka ndzima leyi?

VANHU vo tala namuntlha a va swi tsakeli ku tirha. Siku rin’wana ni rin’wana va tikoka va ya entirhweni kutani va fika va tirha tiawara to tala entirhweni lowu va nga wu tsakeriki. Xana vanhu vo tano va nga endla yini leswaku va tsakela ntirho wa vona va tlhela va eneriseka?

2 Bibele yi khutaza leswaku vanhu va tsakela ntirho wa vona. Yi vula leswaku ntirho ni leswi munhu a swi endleke i nyiko. Solomoni u te: ‘Munhu un’wana ni un’wana u fanele a dya, kunene a nwa, a tsakela ntirho wa yena hinkwawo wa matimba. I nyiko leyi humaka eka Xikwembu.’ (Eklesiasta 3:13) Yehovha, loyi a hi rhandzaka naswona minkarhi hinkwayo a tiyimiseleke ku hi endlela leswinene, u lava leswaku hi eneriseka entirhweni wa hina kutani hi tiphina hi swa nyuku wa hina. Leswaku hi tshama hi ri karhi hi rhandzeka eka yena, hi fanele ku va ni vonelo ra yena hi tlhela hi kongomisiwa hi milawu ya yena loko swi ta eka ntirho.—Hlaya Eklesiasta 2:24; 5:18.

3 Eka ndzima leyi hi ta kambisisa swivutiso swa mune, xo sungula hi lexi nge: Xana hi nga wu tsakela njhani ntirho wa hina? Hi yihi mintirho leyi Vakreste va ntiyiso va nga fanelangiki va yi endla? Xana hi nga swi kotisa ku yini ku papalata ku endla ntirho wa ku tihanyisa hi nkarhi lowu a hi fanele hi endla mintirho ya vandlha? Naswona hi wihi ntirho wa nkoka lowu hi nga wu endlaka? Kambe, a hi rhangeni hi kambisisa  xikombiso xa vatirhi vambirhi lavakulu ngopfu—ku nga Yehovha Xikwembu na Yesu Kreste.

MUTIRHI LONKULU NI MUTIRHI LA NGA NI VUSWIKOTI

4, 5. Bibele yi kombisa hi ndlela yihi leswaku Yehovha i mutirhi la gingiritekaka?

4 Yehovha i Mutirhi Lonkulu. Genesa 1:1 yi ri: “Eku sunguleni Xikwembu xi tumbuluxe matilo ni misava.” Loko Xikwembu xi heta ku vumba swilo swa laha misaveni xi vule leswaku i “swinene ngopfu.” (Genesa 1:31) Leswi swi vula leswaku a a eneriseke hilaha ku heleleke hi swilo hinkwaswo leswi a swi endleke laha misaveni. Tanihi leswi Yehovha a nga “Xikwembu lexi tsakeke,” swi le rivaleni leswaku u tsaka ngopfu hi swilo leswi a swi endleke.—1 Timotiya 1:11.

5 Xikwembu xa hina lexi gingiritekaka xi tshama xi ri eku tirheni. Endzhaku ka loko ku hundze nkarhi wo leha xi hete ku vumba misava, Yesu u te: “Tata wa mina u ya emahlweni a tirha ku fikela sweswi.” (Yohane 5:17) Xana a a ri karhi a endla yini? A swi kanakanisi leswaku a a ri karhi a kongomisa ni ku khathalela vanhu a ri kwale tilweni. U vumbe ‘swivumbiwa leswintshwa,’ ku nga Vakreste lava totiweke hi moya, lava nga ta fuma na Yesu etilweni. (2 Vakorinto 5:17) U karhi u hetisisa xikongomelo xa yena hi vanhu leswaku lava va n’wi rhandzaka va kuma vutomi lebyi nga heriki emisaveni leyintshwa. (Varhoma 6:23) Yehovha u tsaka ngopfu loko a vona leswi a swi endleke. Vanhu va timiliyoni va amukela rungula ra Mfumo va ri karhi va kokiwa hi Xikwembu leswaku va cinca mahanyelo ya vona, va va lava rhandzeka eka xona.—Yohane 6:44.

6, 7. Hi byihi vumbhoni bya leswaku Yesu a a nga tshami hi mavoko?

6 I khale Yesu a ri karhi a tirha hi matimba. Loko a nga si ta emisaveni u tirhe ni Xikwembu eku vumbeni ka swilo hinkwaswo “ematilweni ni le henhla ka misava,” a ri “mutirhi la nga ni vuswikoti.” (Swivuriso 8:22-31; Vakolosa 1:15-17) Loko a ri laha misaveni, u ye emahlweni a tirha hi matimba. Evuntshweni bya yena u dyondze ntirho wo aka hiloko a tiveka tanihi  “muvatli.” * (Marka 6:3) Ntirho lowu a ku nga ri matlangwana naswona a wu lava leswaku munhu a va ni vutivi bya swilo swin’wana—ngopfu-ngopfu leswi hi nkarhi wolowo a ku nga ri na michini yo tsema timhandzi ni ya gezi swin’we ni switolo swo xavisa nhundzu yo aka. Anakanya Yesu a nghena enhoveni a ya tsema timhandzi kutani a ti koka a vuya na tona laha a nga ta vatlela kona! Anakanya a ri karhi a aka tindlu, a belela timhandzi ta lwangu, a endla minyangwa a tlhela a vatla fanichara ya yindlu yoleyo! A swi kanakanisi leswaku u wu tsakerile ntirho lowu a wu endleke hi vutshila.

7 Yesu a a ri mutirhi la gingiritekaka ngopfu loko a endla ntirho wo chumayela. U hete malembe manharhu ni hafu a khomekile entirhweni lowu wa nkoka swinene. Tanihi leswi a a tiyimisele ku chumayela vanhu vo tala hilaha a nga kotaka hakona, a ri xa ri kala ri pela a ri karhi a chumayela. (Luka 21:37, 38; Yohane 3:2) A a “famba hi muti ni muti ni hi ximutana ni ximutana, a chumayela ni ku vula mahungu lamanene ya mfumo wa Xikwembu.” (Luka 8:1) Yesu u fambe mimpfhuka yo leha hi milenge leswaku a yisa mahungu lamanene eka vanhu.

8, 9. I yini lexi kombisaka leswaku Yesu a a wu tsakela ntirho wa yena?

8 Xana Yesu u wu tsakerile ntirho wa yena wa ku chumayela? Ina, u wu tsakerile! U haxe mbewu ya Mfumo kutani a siya masimu lama lunghekeleke ku tshoveriwa. Ku endla ntirho wa Xikwembu ku nyike Yesu matimba lamakulu lerova minkarhi yin’wana a a tshika ni ku dya leswaku a ta wu endla. (Yohane 4:31-38) Anakanya ndlela leyi a a tsake ha yona loko a heta ntirho wa yena laha misaveni kutani a byela Tata wakwe a ku: “Ndzi ku vangamisile emisaveni, leswi ndzi heteke ntirho lowu u ndzi nyikeke leswaku ndzi wu endla.”—Yohane 17:4.

9 Swi le rivaleni leswaku Yehovha na Yesu i swikombiso  leswinene ngopfu swa vanhu lava tsakelaka ntirho wa vona. Rirhandzu leri hi rhandzaka Yehovha ha rona ri hi khutaza leswaku hi ‘n’wi tekelela.’ (Vaefesa 5:1) Kasi rirhandzu leri hi rhandzaka Yesu ha rona ri hi khutaza leswaku hi “landzelerisisa mikondzo yakwe.” (1 Petro 2:21) Kutani a hi kambisiseni ndlela leyi na hina hi nga wu tsakelaka ha yona ntirho wa hina.

NDLELA LEYI HI NGA WU TSAKELAKA HA YONA NTIRHO WA HINA

Ku tirhisa milawu leyi kongomisaka ya Bibele swi nga hi pfuna leswaku hi tsakela mintirho ya hina

10, 11. I yini lexi nga hi pfunaka leswaku hi pfumelelana ni swiyimo swa lomu hi tirhaka kona?

10 Tanihi Vakreste va ntiyiso hi fanele hi tirha leswaku hi kota ku tihanyisa. Ha swi lava ku tsakela ntirho wa hina kambe a swi olovi loko hi endla ntirho lowu hi nga wu rhandziki. Xana hi nga tsaka njhani hambiloko hi endla ntirho lowu hi nga wu rhandziki?

11 Hi ku tidyondzisa ku pfumelelana ni swiyimo. Minkarhi yin’wana a hi nge swi koti ku cinca xiyimo lexi hi nga eka xona kambe hi nga swi kota ku cinca langutelo ra hina. Ku anakanyisisa hi langutelo ra Xikwembu swi nga hi pfuna leswaku hi tidyondzisa ku pfumelelana ni swiyimo swa ntirho wa hina. Hi xikombiso, loko u ri nhloko ya ndyangu, anakanyisisa hi ndlela leyi ntirho wolowo wu ku pfunaka ha yona leswaku u wundla ndyangu wa wena, ku nga khathariseki leswaku i wa xiyimo xa le hansi. Phela, ku wundla ndyangu wa wena i swa nkoka swinene emahlweni ka Xikwembu. Rito ra xona ri vula leswaku loyi a nga wu wundliki ndyangu wa yena “u bihe ngopfu ku tlula munhu la landzuleke Yehovha.” (1 Timotiya 5:8, nhlamuselo ya le hansi ya NW) Ku xiya leswaku ntirho wa wena wu ku pfuna ku wundla ndyangu wa wena, leswaku u ta kota ku endla ntirho lowu Xikwembu xi ku nyikeke wona, swi ta ku pfuna leswaku u wu tsakela ku tlula vatirhi-kuloni.

12. Xana swi vuyerisa ha yini ku va la hisekaka ni la tshembekaka entirhweni?

12 Hi ku va la hisekaka ni la tshembekaka. Ku hiseka ni ku  dyondza ndlela leyi hi nga antswisaka matirhelo ya hina swi nga hi tisela mikateko. Hakanyingi vathori va va rhandza ngopfu vanhu lava hisekaka ni lava nga ni vutshila. (Swivuriso 12:24; 22:29) Tanihi Vakreste va ntiyiso, hi fanele hi tshembeka entirhweni wa hina—hi nga yivi mali, nhundzu kumbe nkarhi wa muthori wa hina. (Vaefesa 4:28) Hilaha hi swi voneke hakona eka ndzima leyi hundzeke, ku tshembeka swa vuyerisa. Mutirhi la tivekaka hi ku tshembeka wa tshembiwa. Ku nga khathariseki leswaku muthori wa ku xiya ku tshembeka ka hina kumbe a nga ku xiyi, swi ta hi tsakisa ku tiva leswaku hi ni “ripfalo ro tshembeka” ni ku tiva leswaku hi tsakisa Xikwembu lexi hi xi rhandzaka.—Vaheveru 13:18; Vakolosa 3:22-24.

13. Xana xikombiso xa hina lexinene entirhweni xi nga va ni vuyelo byihi lebyinene?

 13 Hi ku xiya leswaku ku tikhoma ka hina lokunene ku ta dzunisa Xikwembu. Vanhu va ta swi xiya loko hi tikhoma hi ndlela leyi Vakreste va faneleke va hanya ha yona lomu hi tirhaka kona. Sweswo swi ta va ni vuyelo byihi? Hi ta “sasekisa dyondzo ya Muponisi wa hina, Xikwembu.” (Tito 2:9, 10) Ina, ku tikhoma ka hina lokunene ku ta endla leswaku van’wana va rhandza vugandzeri bya hina. Anakanya ndlela leyi u nga ta titwa ha yona loko mutirhi-kuloni a amukela ntiyiso hikwalaho ka xikombiso xa wena lexinene entirhweni! Kambe, xa nkoka swinene hileswaku ku tikhoma ka wena lokunene ku dzunisa Yehovha naswona ku tsakisa mbilu ya yena!—Hlaya Swivuriso 27:11; 1 Petro 2:12.

KU HLAWULA NTIRHO HI VUTLHARI

14-16. Loko swi ta emhakeni yo hlawula ntirho wa ku tihanyisa, hi swihi swivutiso swimbirhi swa nkoka leswi hi faneleke hi tivutisa swona?

14 Bibele a yi hlamuseli hi vuxokoxoko leswaku hi wihi ntirho wa ku tihanyisa lowu faneleke ni lowu nga fanelangiki. Kambe, leswi a swi vuli leswaku hi ta amukela ntirho wun’wana ni wun’wana lowu hi wu kumaka. Matsalwa ma nga hi pfuna leswaku hi hlawula ntirho lowunene ni lowu xiximekaka, lowu tsakisaka Xikwembu nileswaku hi papalata lowu nga xi tsakisiki. (Swivuriso 2:6) Loko swi ta emhakeni yo hlawula ntirho wa ku tihanyisa, ku ni swivutiso swimbirhi swa nkoka leswi hi faneleke hi tivutisa swona.

15 Xana ntirho lowu wu ta endla leswaku ndzi endla leswi nga pfumeleriwiki hi Bibele? Rito ra Xikwembu ri ku sola hi ku kongoma ku yiva, ku hemba ni ku endla swifaniso swa vugandzeri bya hava. (Eksoda 20:4; Mintirho 15:29; Vaefesa 4:28; Nhlavutelo 21:8) A hi nge pfumeli ku thoriwa eka ntirho wun’wana ni wun’wana lowu endlaka swilo swo tano. Leswi hi rhandzaka Yehovha, a hi nge pfuki hi amukele ntirho lowu katsaka ku endla swilo leswi Xikwembu xi swi vengaka.—Hlaya 1 Yohane 5:3.

 16 Xana ku endla ntirho wolowo ku swi veka erivaleni leswaku hi hlanganyela eka mikhuva yo biha kumbe hi pfuna leswaku yi ya emahlweni? A hi endle xikombiso. A swi hoxanga ku thoriwa leswaku u hlamula tinqingho ni ku amukela vaendzi. Kambe, a hi nge Mukreste u thoriwe ku endla tano laha ku humesiwaka kona makhwiri! I ntiyiso leswaku ntirho wa yena a wu lavi leswaku a hlanganyela hi ku kongoma eku humeseni ka makhwiri. Kambe, leswi a tirhaka endhawini yoleyo, u seketela mukhuva lowu Rito ra Xikwembu ri nga pfumelelaniki  na wona. (Eksoda 21:22-24) Tanihi leswi hi rhandzaka Yehovha, a hi swi lavi ku endla swilo leswi nga pfumelelaniki ni Matsalwa.

17. (a) Hi tihi tinhla tin’wana leti hi faneleke hi anakanyisisa ha tona hi nga si endla xiboho emhakeni ya ntirho wa ku tihanyisa? (Vona bokisi leri nge “ Xana Ndzi Fanele Ndzi Wu Amukela Ntirho Lowu?”) (b) Xana mapfalo ya hina ma nga hi pfuna njhani leswaku hi endla swiboho leswi tsakisaka Xikwembu?

17 Loko hi swi kambisisa hi vukheta swivutiso swimbirhi leswi nga eka ndzimana 15 na 16, hi ta kota ku hlamula swivutiso swo tala leswi tlakukaka loko hi fanele hi endla xiboho emhakeni ya ntirho wa ku tihanyisa. Nakambe ku ni tinhla tin’wana leti hi faneleke hi anakanyisisa ha tona hi nga si endla xiboho emhakeni ya ntirho wa ku tihanyisa. * A hi nge rindzeli  leswaku hlonga ro tshembeka ri hi tsalela milawu leyi nga ta hlamula swivutiso hinkwaswo leswi nga tlakukaka. Hi fanele hi tirhisa ku twisisa. Hilaha hi dyondzeke hakona eka Ndzima 2, hi fanele hi letela mapfalo ya hina, hi ku swi tirhisa siku ni siku leswi hi swi dyondzaka eRitweni ra Xikwembu. Loko hi “tirhisa” ‘matimba ya hina ya ku twisisa,’ mapfalo ya hina ma ta hi pfuna leswaku hi endla swiboho leswi tsakisaka Xikwembu nileswi nga ta hi pfuna leswaku hi tshama hi ri lava rhandzekaka eka xona.—Vaheveru 5:14.

KU RINGANISELA EMHAKENI YA NTIRHO WA KU TIHANYISA

18. Ha yini swi nga olovi ku endla swiboho leswi nga ta endla leswaku hi tshama hi ri lava rhandzekaka eka Yehovha?

18 A swi olovi ku endla swiboho leswi nga ta endla leswaku hi tshama hi ri lava rhandzekaka eka Yehovha ‘emasikwini lawa yo hetelela,’ lawa ma ‘nonon’hwaka ku langutana na wona.’ (2 Timotiya 3:1) Swa tika ku kuma ntirho lowu u nga khomelelaka eka wona nkarhi wo leha. Tanihi Vakreste va ntiyiso ha swi tiva leswaku hi fanele hi kulula hi n’watseka leswaku hi kota ku wundla mindyangu ya hina. Kambe loko hi nga swi xiyi, hi nga tikuma hi ngheniwe hi moya wo biha wa ku rhandza rifuwo kutani ntirho wa hina wu kavanyeta vugandzeri bya hina eka Xikwembu. (1 Timotiya 6:9, 10) A hi voneni ndlela leyi hi nga ringaniselaka ha yona leswaku hi ta “tiyiseka hi swilo swa nkoka swinene.”—Vafilipiya 1:10.

19. Ha yini swi fanerile leswaku hi tshemba Yehovha hi mbilu hinkwayo naswona sweswo swi ta hi pfuna leswaku hi papalata yini?

19 Tshemba Yehovha hi mbilu ya wena hinkwayo. (Hlaya Swivuriso 3:5, 6.) Hakunene hi fanele hi n’wi tshemba hikuva hi yena la hi khathalelaka. (1 Petro 5:7) U tiva leswi hi swi pfumalaka naswona u tshama a ri karhi a hi nyika swona. (Pisalema 37:25) Hikwalaho hi fanele hi yingisa leswi Rito ra yena ri swi vulaka loko ri ku: “Mukhuva wa n’wina wa vutomi a wu pfumale rirhandzu ra mali, mi ri karhi mi eneriseka hi swilo leswi nga kona. Hikuva [Yehovha] u te: ‘Ndzi nga ka ndzi nga ku tshiki  naswona ndzi nga ka ndzi nga ku fularheli.’” (Vaheveru 13:5) Malandza yo tala ya Yehovha lama nga le ntirhweni wa nkarhi hinkwawo, ma nga vula leswaku wa ma khathalela. Loko hi tshemba hi mbilu hinkwayo leswaku Yehovha u ta hi khathalela, a hi nge karhateki ku tlula mpimo hileswaku hi ta yi wundla njhani mindyangu ya hina. (Matewu 6:25-32) A hi nge pfumeleli ntirho wa ku tihanyisa leswaku wu hi endla hi honisa  mintirho ya vandlha, yo kota ku chumayela mahungu lamanene ni ku ya eminhlanganweni.—Matewu 24:14; Vaheveru 10:24, 25.

20. Xana swi vula yini ku hanya vutomi lebyi olovaka naswona hi nga swi endlisa ku yini sweswo?

20 Hanya vutomi byo olova. (Hlaya Matewu 6:22, 23.) Loko Mukreste a rhangisa ku endla ku rhandza ka Xikwembu, u hanya vutomi byo olova. Loko hi rhangisa ku endla ku rhandza ka Xikwembu, a hi nge lavi ku kuma ntirho lowu holelaka mali yo tala ni ku hanya vutomi bya vulovolovo. Nakambe, a hi nge tikumi hi hlongorisana ni swilo leswi nga efexenini, leswi vaxavisi va vulaka leswaku hi ta tsaka loko hi ri na swona. U nga ku rhangisa njhani ku endla ku rhandza ka Xikwembu? Hi ku papalata ku tihoxa eswikweletini. U nga pfilunganyi vutomi bya wena hi swilo leswi ku dyelaka nkarhi wa wena wo tala. Yingisa ndzayo ya Bibele ya leswaku u eneriseka hi “swakudya ni swifunengeto.” (1 Timotiya 6:8) Ringeta ku olovisa vutomi bya wena hilaha u nga kotaka hakona.

21. Ha yini hi fanele hi va ni swilo leswi hi swi rhangisaka, naswona hi swihi leswi faneleke swi rhangisiwa evuton’wini bya hina?

21 Rhangisa timhaka leti tiyisaka vuxaka bya wena na Yehovha. Tanihi leswi hi nge swi kotiki ku endla xin’wana ni xin’wana evuton’wini, hi fanele hi va ni swilo leswi hi swi rhangisaka. Loko hi nga endli tano, swilo leswi nga riki swa nkoka swi ta hi dyela nkarhi wa swilo swa nkoka. Hi swihi leswi hi faneleke hi swi rhangisa? Vanhu vo tala emisaveni va rhangisa dyondzo leswaku va ta hanya bya le ka byandlana emafambiselweni lawa ya swilo. Hambiswiritano, Yesu u khutaze valandzeri va yena leswaku va ‘hambeta va lava mfumo ku sungula.’ (Matewu 6:33) Ina, tanihi Vakreste va ntiyiso hi rhangisa Mfumo wa Xikwembu evuton’wini bya hina. Ndlela leyi hi hanyaka ha yona—ku nga swilo leswi hi swi hlawulaka, tipakani leti hi tivekelaka tona ni mintirho leyi hi yi endlaka—yi fanele yi kombisa leswaku ntirho wa Mfumo ni ku rhandza ka Xikwembu i swa nkoka swinene eka hina ku tlula rifuwo ni ntirho wa ku tihanyisa.

 KU GINGIRITEKA ENTIRHWENI WA HINA WO CHUMAYELA

Hi nga kombisa leswaku hi rhandza Yehovha hi ku rhangisa ntirho wo chumayela evuton’wini bya hina

22, 23. (a) Hi wihi ntirho wa nkoka eka Vakreste va ntiyiso naswona hi nga kombisa njhani leswaku i wa nkoka? (Vona bokisi leri nge “ Xiboho Xa Mina Xi Ndzi Tisele Ntsako Ni Ku Eneriseka.”) (b) I yini lexi u tiyimiseleke ku xi endla emhakeni ya ntirho wa ku tihanyisa?

22 Tanihi leswi hi tivaka leswaku hi hanya emasikwini ya makumu, hi tshama hi khomekile entirhweni lowu hi faneleke hi wu endla tanihi Vakreste va ntiyiso, wa ku chumayela ni ku endla vadyondzisiwa. (Matewu 24:14; 28:19, 20) Ku fana na Yesu loyi a nga xikombiso xa hina lexikulu, hi fanele hi tshama hi khomekile entirhweni lowu ponisaka vutomi. Xana hi nga swi kombisa njhani leswaku ntirho lowu i wa nkoka eka hina? Vanhu vo tala va Xikwembu va tinyiketela hi mbilu hinkwayo entirhweni wo chumayela. Van’wana i maphayona kumbe varhumiwa. Hikwalaho ka leswi vatswari vo tala va swi vonaka leswaku i swa nkoka ku tivekela pakani yo tirhela Yehovha, va khutaza vana va vona leswaku va va varhumiwa, va tirha eBethele, va phayona kumbe va pfuneta entirhweni wo aka Tiholo ta Mfumo. Xana vahuweleri lava hisekaka va Mfumo va wu tsakela ntirho wa vona? Ina, va wu tsakela! Ku tirhela Yehovha hi moya-xiviri hinkwawo i ndlela leyinene yo kuma ntsako ni ku eneriseka evuton’wini swin’we ni mikateko ya ntsandza-vahlayi.—Hlaya Swivuriso 10:22.

23 Vunyingi bya hina hi heta nkarhi wo tala hi ri entirhweni wa ku tihanyisa leswaku hi kota ku wundla mindyangu ya hina. Hi nga rivali leswaku Yehovha u lava leswaku hi tsakela ntirho wa hina. Leswaku hi wu tsakela, hi fanele hi endla leswaku langutelo ra hina ni swiendlo swa hina swi pfumelelana ni langutelo ra yena ni milawu ya yena leyi hi kongomisaka. Kutani, a hi tiyimiseleni leswaku hi nge pfuki hi pfumelele ntirho wa hina wa ku tihanyisa wu kavanyeta ntirho wa hina wa nkoka, wa ku chumayela mahungu lamanene ya Mfumo wa Xikwembu. Loko hi rhangisa ntirho lowu evuton’wini bya hina, hi kombisa leswaku hi rhandza Yehovha kutani u ta tshama a ri karhi a hi rhandza.

^ ndzim. 6 Rito ra Xigriki leri hundzuluxeriweke va ku “muvatli,” ku vuriwa leswaku ri vula “munhu la tirhaka hi timhandzi, swi nga khathariseki leswaku u aka tindlu kumbe u vatla fanichara kumbe u endla swilo swin’wana hi mintsandza.”

^ ndzim. 17 Leswaku u kuma rungula leri engetelekeke emhakeni yo hlawula ntirho wa ku tihanyisa, vona Xihondzo xo Rindza xa April 15, 1999, matluka 28-30, ni xa January 1, 1983, tluka 19, [eka Xinghezi i xa July 15, 1982, tluka 26.]

DYONDZA SWO TALA

Ndlela Yo Kuma Ku Humelela Ka Xiviri

Magoza ya ntlhanu ma nga ku pfuna leswaku u kuma ku humelela ka xiviri.