Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

“Tihlayiseni eRirhandzwini Ra Xikwembu”

 XIENGETELO

Xana Bibele Yi Ri Yini Hi Ku Dlaya Vukati Ni Ku Thalana?

Xana Bibele Yi Ri Yini Hi Ku Dlaya Vukati Ni Ku Thalana?

Yehovha u lava leswaku vatekani va xixima swihlambanyo swa vona swa vukati. Loko a catisa wanuna ni wansati wo sungula u te: “Wanuna . . . u fanele ku namarhela nsati wakwe, kutani va fanele va va nyama yin’we.” Hi ku famba ka nkarhi, Yesu Kreste u phindhe marito wolawo kutani a ku: “Hikokwalaho, leswi Xikwembu xi swi paneke swin’we, ku nga tshuki ku va ni munhu la swi hambanisaka.” (Genesa 2:24; Matewu 19:3-6) Hi yona mhaka leyi  Yehovha na Yesu va lavaka leswaku vatekani va hanya swin’we kukondza va hambanisiwa hi rifu. (1 Vakorinto 7:39) Leswi vukati ku nga lunghiselelo leri sunguriweke hi Yehovha, mhaka ya ku byi dlaya a yi fanelanga yi tekeriwa ehansi. Kahle-kahle Yehovha wa ku venga ku dlaya vukati loko swivangelo swa kona swi nga sekeriwanga eBibeleni.—Malakiya 2:15, 16.

Hi swihi swivangelo swa Matsalwa leswi pfumelelaka ku dlaya vukati? Yehovha u venga vuoswi ni vumbhisa. (Genesa 39:9; 2 Samuwele 11:26, 27; Pisalema 51:4) Entiyisweni u nyenya vumbhisa lerova u vula leswaku vatekani va nga ha dlaya vukati loko un’wana a endle vumbhisa. (Leswaku u kuma nhlamuselo ya vumbhisa, hlaya Ndzima 9, ndzimana 7 ebukwini leyi.) Yehovha u vula leswaku munghana wa vukati la nga riki na nandzu, a nga ha hlawula ku rivalela loyi a dyoheke kumbe a dlaya vukati. (Matewu 19:9) Hikwalaho, loko munghana wa vukati la nga riki na nandzu a hlawula ku dlaya vukati, a nga tluli nawu wa Yehovha. Hambiswiritano, vandlha ra Vukreste a ri khutazi munhu leswaku a dlaya vukati. Minkarhi yin’wana munghana wa vukati la nga riki na nandzu a nga ha hlawula ku tshama ni loyi a dyoheke, ngopfu-ngopfu loko a hundzukile. Kambe, hinkwavo lava nga ni swivangelo swa Matsalwa swa ku dlaya vukati va fanele va tiendlela swiboho naswona va fanele va langutana ni vuyelo bya swiboho swa vona.—Vagalatiya 6:5.

Eka swiyimo swin’wana leswi nga tiyiselekiki, Vakreste van’wana va hlawule ku thala vatekani va vona kumbe va dlaya vukati hambiloko va nga endlanga vumbhisa. Eka swiyimo swo tano, loyi a thalaka kumbe a dlaya vukati u fanele a ‘tshama a nga teki kumbe ku tekiwa swi nga ri tano va vuyelana.’ (1 Vakorinto 7:11) Loko Mukreste a ri eka xiyimo xo tano a nga na mfanelo yo lava munghana un’wana wa vukati. (Matewu 5:32) Hi leswi swiyimo leswi nga tiyiselekiki leswi van’wana va swi vonaka swi fanerile ku va munhu a nga thala vukati hikwalaho ka swona.

Ku nga hlayisi ndyangu hi vomu. Ndyangu wu nga ha tikuma wu ri swisiwana, wu pfumala swo tihanyisa ha swona hikwalaho ka leswi wanuna a alaka hi vomu ku wu hlayisa. Bibele yi ri: “Loko munhu a nga pfuni . . . lava va nga va ndyangu wa yena wa xiviri, u landzurile vupfumeri, kutani u tlula ni vamatiko hi ku biha.” (1 Timotiya 5:8) Loko wanuna wo tano a nga lavi ku cinca tindlela  ta yena, wansati a nga ha hlawula ku sirhelela vutomi byakwe ni bya vana va yena hi ku thala. I ntiyiso leswaku, vakulu va vandlha va fanele va kambisisa hi vukheta swihehlo swa leswaku wanuna la nga Mukreste a nga hlayisi ndyangu wakwe. Hikuva loko wanuna a ala ku wundla ndyangu wakwe a nga susiwa evandlheni.

Ku biwa hi ndlela ya tihanyi. Munghana wa vukati loyi a nga ni rigombo a nga bukutela nkatakwe lerova vutomi bya yena byi va ekhombyeni. Loko munghana wa vukati la nga ni rigombo a ri Mukreste, vakulu va fanele va kambisisa mhaka leyi ku vona loko ku ri ntiyiso kumbe mavunwa. Timholovo ni ku kariha i swilo leswi nga endlaka leswaku munhu a susiwa evandlheni.—Vagalatiya 5:19-21.

Ku siveriwa ku gandzela Xikwembu hilaha ku heleleke. Munghana wa vukati a nga tshamela ku sivela nkatakwe leswaku a gandzela Xikwembu kumbe a ringeta ku n’wi sindzisa ku tlula nawu wa Xikwembu hi tindlela to karhi. Loko swi ri tano, loyi a xungetiwaka hi ndlela leyi u fanele a tiendlela xiboho xa leswaku u ta swi kotisa ku yini ‘ku yingisa Xikwembu ku tlula munhu.’—Mintirho 5:29.

Eka swiyimo leswi ku buriweke ha swona laha henhla, munghana wa vukati la nga riki na nandzu a nga fanelanga a sindzisiwa ku thala kumbe ku tshama ni nkatakwe. Hambiloko vanghana lava wupfeke ni vakulu va vandlha va nyikela mpfuno ni ndzayo leyi humaka eMatsalweni, a va nge tivi hinkwaswo leswi endlekaka exikarhi ka nuna na nsati. I Yehovha ntsena loyi a nga kotaka ku vona sweswo. Wansati loyi a hundzeletaka swiphiqo leswi nga kona endyangwini wakwe ntsena leswaku a ta kota ku hambana ni nuna wakwe u ta va a nga xiximi lunghiselelo ra Xikwembu ra vukati, swi tano ni le ka wanuna. Yehovha u kota ku vona loko munghana wa vukati a ringeta ku kuma marhengu yo thala vukati, hambiloko a ringeta ku tumbetela van’wana. I ntiyiso leswaku “swilo hinkwaswo swi lo dla, swi paluxeka erivaleni ematihlweni ya loyi hi nga ta tihlamulela eka yena.” (Vaheveru 4:13) Kambe loko ku ri ni xiyimo lexi nga tiyiselekiki lexi tekaka nkarhi wo leha, a nga kona Mukreste la faneleke a sola loyi a thalaka vukati hikwalaho ko tikeriwa. Eku heteleleni “hinkwerhu hi ta yima emahlweni ka xitshamo xa vuavanyisi xa Xikwembu.”—Varhoma 14:10-12.