Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Tekelela Ripfumelo Ra Vona

Xingheniso

Xingheniso

“Mi tekelela lava dyaka ndzhaka ya switshembiso hikwalaho ka ripfumelo ni ku lehisa mbilu.”—VAHEVERU 6:12.

1, 2. Xana mulanguteri un’wana wa xifundzha a va teka njhani vanhu vo tshembeka va le Bibeleni, naswona ha yini vanhu vo tano a va ta va vanghana lavanene?

“U VULAVULA hi vanhu va le Bibeleni onge ko va khale ka vanghana vakwe.” Marito lawa ya vuriwe hi wansati loyi a nga Mukreste endzhaku ka loko a yingisele nkulumo ya mulanguteri wa xifundzha loyi a dyuhaleke. A ku ri ntiyiso hikuva makwerhu loyi a a hete malembe yo tala a ri karhi a dyondza Rito ra Xikwembu a tlhela a ri tirhisa leswaku a dyondzisa—lerova loko a vulavula hi vavanuna ni vavasati va le Bibeleni lava kombiseke ripfumelo a swi twala onge u vulavula hi vanghana va yena.

2 A swi ta tsakisa ku va ni vanhu va le Bibeleni tanihi vanghana va hina. Xana i va xiviri eka wena? Anakanya ndlela leyi swi nga ha vaka ha yona ku famba ni ku vulavula na vona, ku heta nkarhi u ri karhi u tivana ni vavanuna ni vavasati vo tanihi Nowa, Abrahama, Rhuti, Eliya na Estere. Anakanya hi ndlela leyi va nga cincaka vutomi bya wena—ndzayo leyi u nga yi kumaka ni xikhutazo xa vona!—Hlaya Swivuriso 13:20.

3. (a) Xana hi nga vuyeriwa njhani hi ku dyondza hi vavanuna ni vavasati va ripfumelo eBibeleni? (b) Hi swihi swivutiso leswi hi nga ta swi kambisisa?

3 I ntiyiso leswaku loko ku “pfuxiwa . . . lava lulameke,” vuxaka byebyo lebyi vuyerisaka byi ta koteka. (Mint. 24:15) Hambiswiritano, sweswi hi nga vuyeriwa hi ku dyondza hi ripfumelo ra vavanuna ni vavasati va le Bibeleni. Njhani? Muapostola Pawulo u hi nyika nhlamulo leyi: “Mi tekelela lava dyaka ndzhaka ya switshembiso hikwalaho ka ripfumelo ni ku lehisa mbilu.” (Hev. 6:12) Loko hi sungula ku hlaya hi vavanuna ni vavasati va ripfumelo, a hi kambisiseni swivutiso swi nga ri swingani leswi Pawulo a hi nyikaka swona: I yini ripfumelo naswona ha yini hi ri lava? Xana hi nga va tekelela njhani vanhu vo tshembeka va le Bibeleni?

I Yini Ripfumelo Naswona Ha Yini Hi Ri Lava?

4. Xana vanhu va anakanya yini hi ripfumelo naswona ha yini va hoxisile?

4 Ripfumelo i mfanelo leyinene leyi vavanuna ni vavasati lava hi nga ta dyondza hi vona ebukwini leyi a va yi teka yi ri ya nkoka. Vanhu vo tala namuntlha a va swi tivi leswaku ripfumelo i yini, va vula leswaku i ku pfumela eka swo karhi u nga ri na vumbhoni bya swona. Hambiswiritano, va hoxisile. Ripfumelo a hi ku titwa u pfumela eka swo karhi u nga ri na vumbhoni bya swona ntsena. Ku pfumela eka leswi u nga riki na vumbhoni bya swona swi nga va ni khombo. Ku titwa hi ndlela yoleyo a swi endleki minkarhi hinkwayo, naswona ku pfumela ntsena a swi enelanga eka Xikwembu hikuva “madimona ma kholwa ma tlhela ma rhurhumela.”—Yak. 2:19.

5, 6. (a) Xana ripfumelo ra hina ri dzika eka swilo swihi swimbirhi leswi nga voniwiki? (b) Xana ripfumelo ra hina ri fanele ri tiya ku fika kwihi? Kombisa.

 5 Ripfumelo a ko va ku pfumela eka nchumu lowu u nga riki ni vumbhoni na wona. Xiya ndlela leyi Bibele yi ri hlamuselaka ha yona. (Hlaya Vaheveru 11:1.) Pawulo u vule leswaku ripfumelo ri dzike eka swilo swimbirhi leswi hi nga kotiki ku swi vona. Xo sungula, ri dzika eka swilo leswi nga kona kambe swi ‘nga voniwiki.’ Mahlo ya hina ya nge swi koti ku vona swilo leswi nga kona ematilweni—tanihi Yehovha Xikwembu, N’wana wakwe kumbe Mfumo lowu fumaka etilweni sweswi. Xa vumbirhi, ripfumelo ri dzika eka swilo “leswi tshembiwaka”—swiendlakalo leswi nga si humelelaka. Sweswi hi nge swi koti ku vona misava leyintshwa leyi nga ta tisiwa hi Mfumo wa Xikwembu ku nga ri khale. Xana sweswo swi vula leswaku a ku na vumbhoni bya swilo ni swiendlakalo leswi hi nga ni ripfumelo eka swona?

6 A swi tano nikatsongo! Pawulo u hlamusele leswaku ripfumelo ra ntiyiso ri ni masungulo lama tiyeke. Loko a vula leswaku ripfumelo i “ku langutela loku tiyisekisiweke,” u tirhise xiga lexi nga ha tlhelaka xi hundzuluxeriwa xi vula “xitiyisekiso.” A hi nge munhu un’wana u ku nyika yindlu. A nga ha ku nyika xitiyisekiso lexi tsariweke xa leswaku hakunene yindlu yoleyo i ya wena kutani a ku, “Hi leyi yindlu ya wena.” I ntiyiso leswaku a nga vuli swona leswaku u ta tshama ephepheni rolero, u vula leswaku papila rolero i vumbhoni lebyi tiyeke bya leswaku yindlu yoleyo i ya wena kutani ku va na rona swi fana niloko u ri ni yindlu. Hilaha ku fanaka, vumbhoni bya ripfumelo ra hina bya khorwisa naswona byi tiyile lerova byi nga ringanisiwa ni ripfumelo.

7. Xana ripfumelo ra xiviri ri katsa yini?

7 Xisweswo, ripfumelo ra xiviri ri katsa ku pfumela ni ku tiyiseka hi ndlela leyi dzikeke eka Yehovha Xikwembu. Ripfumelo ri hi endla hi vona leswaku hi n’wi vona tanihi Tatana wa rirhandzu ni ku tshemba leswaku switshembiso swakwe hinkwaswo swi ta hetiseka. Ripfumelo ra xiviri ri katsa ni swin’wana swo tala. Ku fana na xilo lexi hanyaka, ri fanele ri wundliwa leswaku ri ta kota ku hanya. Ri fanele ri kombisiwa hi mintirho handle ka swona ri ta fa.—Yak. 2:26.

8. Ha yini ripfumelo ri ri ra nkoka?

8 Ha yini ripfumelo ri ri ra nkoka? Pawulo u nyikele nhlamulo leyi nga erivaleni. (Hlaya Vaheveru 11:6.) Hi nge swi koti ku tshinela eka Yehovha kumbe ku n’wi tsakisa loko hi nga ri na ripfumelo. Kutani ripfumelo i ra nkoka loko hi lava ku hetisisa xikongomelo lexikulu xa swivumbiwa leswi twisisaka: ku tshinela ekusuhi na Yehovha Tata wa hina wa le tilweni ni ku n’wi kwetsimisa.

9. Xana Yehovha u swi kombise njhani leswaku wa swi tiva leswaku hi lava ripfumelo?

9 Yehovha wa swi tiva leswaku hi lava ripfumelo kutani u hi nyika swikombiso leswi hi dyondzisaka ndlela leyi hi nga vaka ni ripfumelo hi tlhela hi ri kombisa ha yona. U katekisa vandlha ra Vukreste hi swikombiso swa vavanuna vo tshembeka lava rhangelaka. Rito rakwe ri ri: ‘Tekelelani ripfumelo ra vona.’ (Hev. 13:7)  U tlhele a hi nyika swin’wana. Pawulo u tsale hi “papa lerikulu swinene ra timbhoni,” ku nga vavanuna ni vavasati va le minkarhini ya khale lava hi siyeleke swikombiso leswinene swa ku va ni ripfumelo. (Hev. 12:1) Ku ni malandza man’wana yo tala yo tshembeka ya Yehovha lawa Pawulo a nga ma boxangiki eka Vaheveru ndzima 11. Bibele yi tele hi marungula lama nga ntiyiso ya vavanuna ni vavasati, lavakulu ni lavatsongo, lava humaka eka swiyimo swo hambana-hambana lava hanyeke hi ripfumelo naswona va nga ni swo tala leswi hi nga swi dyondzaka hina lava hanyaka enkarhini lowu ripfumelo ri kalaka.

Xana Hi Nga Ri Tekelela Njhani Ripfumelo Ra Van’wana?

10. Xana dyondzo ya wena n’wini yi nga ku pfuna njhani leswaku u tekelela vavanuna ni vavasati lava vo tshembeka lava ku tsariweke hi vona eBibeleni?

10 U nge swi koti ku tekelela munhu wo karhi handle ka loko u rhanga hi ku n’wi langutisisa hi vukheta. Loko u ri karhi u hlaya buku leyi, u ta swi xiya leswaku ku endliwe ndzavisiso wo tala leswaku wu ku pfuna leswaku u kambisisa vavanuna ni vavasati lava a va ri ni ripfumelo. Ha yini na wena u nga endli leswi fanaka leswaku u tiendlela ndzavisiso hi wexe? Eka dyondzo ya wena n’wini, kambisisa Bibele hi ku tirhisa switirhisiwa leswi u nga na swona. Loko u ri karhi u anakanyisisa hileswi u swi dyondzaka, ringeta ku vona tindhawu leti marungula lawa ya le Bibeleni a ma humelela eka tona hi mahlo ya mianakanyo. Ringeta ku anakanya u ri karhi u vona tindhawu ta kona, u twa mimpfumawulo ni nun’hwelo onge hiloko u ri kona. Xa nkoka swinene, ringeta ku twisisa ndlela leyi vanhu lava a va ri kona a va titwa ha yona. Loko u ri karhi u twisisa vavanuna ni vavasati volavo vo tshembeka, va ta va va xiviri eka wena naswona u ta va tiva—swi nga ha endleka leswaku u twa onge van’wana i vanghana va wena.

11, 12. (a) Xana u nga titwa u ri ekusuhi swinene na Abrama na Sarayi hi ndlela yihi? (b) Xana u nga vuyeriwa njhani eka xikombiso xa Hana, Eliya kumbe Samuwele?

11 Loko u va tiva hakunene swi le rivaleni leswaku u ta lava ku va tekelela. Hi xikombiso, a hi nge u le ku anakanyisiseni hi xiavelo lexintshwa. Hi ku tirhisa nhlengeletano ya Yehovha, u rhambiwa leswaku u ndlandlamuxa vutirheli bya wena hi ndlela yo karhi. Kumbexana u komberiwa ku rhurhela ensin’wini leyi ku nga ni xilaveko xa xihatla xa vachumayeri kumbe u komberiwa leswaku u tirhisa ndlela yo chumayela leyi u nga yi tolovelangiki. Loko u ri karhi u anakanyisisa hi xiavelo xexo u tlhela u khongela hi xona, xana a swi nge ku pfuni ku anakanyisisa hi xikombiso xa Abrama? Yena na Sarayi a va tiyimisele ku sukela vulovolovo bya le Ura kutani va katekisiwile swinene hikwalaho ka sweswo. Loko u ri karhi u endla hilaha va endleke hakona, a swi kanakanisi leswaku u ta va tiva ku tlula ndlela leyi a wu va tiva ha yona.

12 Hilaha ku fanaka, ku vuriwa yini loko un’wana loyi mi nga tolovelana a ku khoma hi ndlela yo biha lerova u hela matimba—hambi ku ri ku anakanya ni ku nga yi eminhlanganweni? Loko wo anakanyisisa hi xikombiso xa Hana ni ndlela leyi a nga pfumelelangiki leswaku  ndlela yo biha leyi Penina a a n’wi khoma ha yona yi nga n’wi tshikisi leswaku a tshika ku gandzela Yehovha, swi ta ku pfuna leswaku u endla xiboho lexinene—naswona swi nga ha tlhela swi endla Hana a va munghana wa wena la rhandzekaka. Hilaha ku fanaka, loko u hetiwa matimba hi ku titwa onge a wu pfuni nchumu, u nga titwa u ri ekusuhi swinene na Eliya loko u ri karhi u dyondza hi maxangu yakwe ni ndlela leyi Yehovha a n’wi chaveleleke ha yona. Vantshwa lava va hlangavetanaka ni ntshikilelo ku suka eka vadyondzi-kulorhi lava nga ni mahanyelo yo biha va nga titwa va ri ekusuhi swinene na Samuwele loko va dyondza ndlela leyi a anguleke ha yona eka nkucetelo wo biha wa vana va majaha va Eli etabernakeleni.

13. Xana ku tekelela ripfumelo ra vanhu va le Bibeleni swi nga ku endla u twa onge ripfumelo ra wena a hi ra nkoka eka Xikwembu? Hlamusela.

13 Xana ku tekelela leswi van’wana va swi endleke leswaku va kombisa ripfumelo swi endla leswaku u twa onge ripfumelo ra wena a hi ra nkoka eka Yehovha? A swi tano! Tsundzuka leswaku Rito ra Yehovha ri hi khutaza leswaku hi tekelela vanhu lava nga ni ripfumelo. (1 Kor. 4:16; 11:1; 2 Tes. 3:7, 9) Ku tlula kwalaho, vanhu van’wana lava hi nga ta dyondza hi vona laha na vona a va tekelela van’wana vo tshembeka lava hanyeke emahlweni ka vona. Hi xikombiso, eka Ndzima 17 ya buku leyi, hi xiya leswaku eka marito yakwe, swi tikomba Mariya a a tshaha marito ya Hana, leswi swi vekaka erivaleni leswaku a n’wi teka tanihi xikombiso. Xana sweswo swi endle leswaku ripfumelo ra Mariya ri va ritsongo? Nikatsongo! Ematshan’weni ya sweswo, xikombiso xa Hana xi pfune Mariya leswaku a va ni ripfumelo leswaku a ta tiendlela vito rakwe a ri yexe eka Yehovha Xikwembu.

14, 15. Xana hi swihi swilo swin’wana leswi nkandziyiso lowu wu nga na swona, naswona hi nga swi tirhisa njhani hi ndlela leyinene?

14 Buku leyi yi endleriwe ku ku pfuna leswaku u tiyisa ripfumelo ra wena. Tindzima leti landzelaka ti hlanganisiwe ti huma eka swihloko swa ntlhandlamano leswi nge “Tekelela Ripfumelo Ra Vona” leswi kandziyisiweke eka Xihondzo xo Rindza ku sukela hi 2008 ku fikela hi 2013. Hambiswiritano, ku ni rungula rin’wana lerintshwa leri engeteleriweke. Ndzima yin’wana ni yin’wana yi ni swivutiso leswi nga ta hi pfuna leswaku hi burisana ni ku tirhisa rungula leri. Ku ni swifaniso swo tala leswi nga ni mihlovo-hlovo leswi nga ni rungula ro tala leswi endleriweke buku leyi yi ri yoxe naswona leswi a swi ri kona swi kurisiwile ni ku antswisiwa eka ndlela leyi a swi languteka ha yona. Swilo swin’wana leswi pfunaka, swo tanihi ntlhandlamano wa minkarhi ni mimepe na swona swi kona. Buku leyi, leyi nge Tekelela Ripfumelo Ra Vona yi endleriwe ku hi pfuna eka dyondzo ya hina, ya ndyangu ni ya vandlha. Mindyangu yo tala yi nga tsakela ku hlaya switori leswi swin’we hi rito ra le henhla.

15 Onge buku leyi yi nga ku pfuna leswaku u tekelela ripfumelo ra malandza yo tshembeka ya Yehovha ya le nkarhini lowu hundzeke. Naswona yi ta ku pfuna leswaku ripfumelo ra wena ri tiya loko u ri karhi u tshinela ekusuhi ni Tata wa wena wa le tilweni, ku nga Yehovha!