Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

U Nga Va Ni Ndyangu Lowu Tsakeke

 XIYENGE 1

Titshege Hi Xikwembu Leswaku U Va Ni Vukati Lebyi Tsakisaka

Titshege Hi Xikwembu Leswaku U Va Ni Vukati Lebyi Tsakisaka

“Loyi a va tumbuluxeke eku sunguleni u va endle va va waxinuna ni waxisati.”—Matewu 19:4

Yehovha * Xikwembu hi yena musunguri wa vukati. Bibele yi hi byela leswaku u vumbe wansati wo sungula kutani “a n’wi tisa eka wanuna.” Adamu a a tsake swinene lerova a ku: “Eku heteleleni leri i rhambu ra marhambu ya mina ni nyama ya nyama ya mina.” (Genesa 2:22, 23) Yehovha wa ha lava leswaku vanhu lava tekaneke va tsaka.

Loko u nghenela vukati, u nga ha anakanya leswaku swilo hinkwaswo swi ta famba kahle. Kambe ku vula ntiyiso, hambi ku ri vatekani lava rhandzanaka swinene va ta pfa va va ni swiphiqo. (1 Vakorinto 7:28) Eka broxara leyi, u ta kuma milawu leyi kongomisaka ya le Bibeleni leyi loko u yi tirhisa yi nga endlaka leswaku vukati bya wena byi tsakisa ni ndyangu wa wena wu tsaka.—Pisalema 19:8-11.

 1 AMUKELA VUTIHLAMULERI LEBYI YEHOVHA A KU NYIKEKE BYONA

LESWI BIBELE YI SWI VULAKA: Wanuna i nhloko ya ndyangu.—Vaefesa 5:23.

Loko u ri wanuna, Yehovha u langutele leswaku u khathalela nsati wa wena hi rirhandzu. (1 Petro 3:7) U n’wi endle leswaku a va muhetisisi wa wena naswona u lava leswaku u n’wi xixima u tlhela u n’wi rhandza. (Genesa 2:18) U fanele u rhandza nsati wa wena swinene lerova u tiyimisela ku rhangisa swilaveko swa yena eka swa wena.—Vaefesa 5:25-29.

Loko u ri wansati, Yehovha u langutele leswaku u xixima nuna wa wena swinene u tlhela u n’wi pfuna ku hetisisa vutihlamuleri bya yena. (1 Vakorinto 11:3; Vaefesa 5:33) Seketela swiboho swa yena naswona u tirhisana na yena hi mbilu ya wena hinkwayo. (Vakolosa 3:18) Loko u endla tano, u ta va u sasekile ematihlweni ya nuna wa wena ni le ka Yehovha.—1 Petro 3:1-6.

LESWI U NGA SWI ENDLAKA:

  • Vutisa nkataku leswaku u nga endla yini leswaku u va wanuna kumbe wansati lonene. N’wi yingisele hi vukheta kutani u endla leswi u nga swi kotaka leswaku u antswisa

  • Lehisa mbilu. Swi ta mi tekela nkarhi leswaku havambirhi ka n’wina mi dyondza leswi mi nga swi endlaka leswaku mi tsakisana

2 KHATHALA SWINENE HI NDLELA LEYI NKATAKU A TITWAKA HA YONA

LESWI BIBELE YI SWI VULAKA: U fanele u rhangisa swilaveko swa nkataku. (Vafilipiya 2:3, 4) Teka nkataku a ri wa nkoka, u ri karhi u tsundzuka leswaku Yehovha u lava leswaku malandza ya yena ma “olova eka hinkwavo.” (2 Timotiya 2:24) “U kona la vulavulaka handle ko anakanya ku fana ni ku tlhava ka banga, kambe ririmi ra lavo tlhariha ra horisa.” Hikwalaho hlawula marito ya wena hi vukheta. (Swivuriso 12:18) Moya wa Yehovha wu ta ku pfuna leswaku u vulavula hi musa ni hi rirhandzu.—Vagalatiya 5:22, 23; Vakolosa 4:6.

LESWI U NGA SWI ENDLAKA:

  • Khongelela mpfuno leswaku u tshama u rhurile ni ku nga endli swiboho u nga si burisana ni nkataku hi timhaka ta nkoka

  • Anakanyisisa hi leswi u nga ta swi vula ni ndlela leyi u nga ta swi vula ha yona

 3 TIRHISANANI

LESWI BIBELE YI SWI VULAKA: Loko u nghenela vukati, mi va “nyama yin’we” ni nkataku. (Matewu 19:5) Kambe ma ha ri vanhu vambirhi naswona mi nga ha va ni mavonelo lama nga faniki. Hikokwalaho mi fanele mi dyondza ku tirhisana ni ku twelana. (Vafilipiya 2:2) Vun’we i bya nkoka loko mi endla swiboho. Bibele yi ri: “Makungu ma simekiwa ma tiya hi xitsundzuxo.” (Swivuriso 20:18) Pfumelelani milawu ya Bibele yi mi kongomisa loko mi endla swiboho swa nkoka swin’we.—Swivuriso 8:32, 33.

LESWI U NGA SWI ENDLAKA:

  • Byela nkataku ndlela leyi u titwaka ha yona ku nga ri mavonelo ya wena ntsena

  • Rhanga u vulavula ni nkataku loko u nga si endla swiboho

^ ndzim. 4 Yehovha i vito ra Xikwembu hi laha Bibele yi vulaka hakona.

DYONDZA SWO TALA

Ndlela Yo Hlula Swihinga Leswi Mimpatswa Leya Ha Ku Cataka Yi Langutanaka Na Swona

Xana ma ha ku cata? Bibele yi nga mi pfuna leswaku mi tiyisa vukati bya n’wina.

Vavanuna—Endlani Makaya Ya N’wina Ma Va Ndhawu Leyi Phyuphyisaka

Ndyangu wu nga ha va wu yime kahle hi tlhelo ra timali kambe wu nga ri na ntsako.

Xana Bibele Yi Nga Ndzi Pfuna Ku Va Ni Ndyangu Lowu Tsakeke?

Xitsundzuxo xa vutlhari lexi kumekaka eBibeleni xi pfune timiliyoni ta vavanuna ni vavasati leswaku va va ni kaya leri tsakeke.