Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

U Nga Va Ni Ndyangu Lowu Tsakeke

 XIYENGE 7

Ndlela Yo Dyondzisa N’wana Wa Wena

Ndlela Yo Dyondzisa N’wana Wa Wena

“Marito lawa ndzi ku lerisaka wona namuntlha ma fanele ma va embilwini ya wena; u fanele u ma dyondzisa n’wana wa wena hi ku phindha-phindha.”—Deteronoma 6:6, 7

Loko Yehovha a endla lunghiselelo ra ndyangu, u nyike vatswari vutihlamuleri byo dyondzisa vana va vona. (Vakolosa 3:20) I vutihlamuleri bya wena mutswari ku dyondzisa n’wana wa wena ku rhandza Yehovha ni leswaku a kula a ri ni vutihlamuleri. (2 Timotiya 1:5; 3:15) Nakambe u fanele u tiva leswi nga embilwini ya n’wana wa wena wa jaha kumbe wa nhwana. Kambe, xikombiso xa wena i xa nkoka swinene. U nga swi kota ku dyondzisa n’wana wa wena Rito ra Yehovha loko wena u rhanga u ri nghenisa embilwini ya wena.—Pisalema 40:8.

 1 ENDLA LESWAKU VANA VA WENA VA TITWA VA NTSHUNXEKILE KU VULAVULA NA WENA

LESWI BIBELE YI SWI VULAKA: “Hatlisa emhakeni yo twa, [u] nonoka emhakeni yo vulavula.” (Yakobo 1:19) Loko u lava leswaku vana va wena va titwa va ntshunxekile ku vulavula na wena, va fanele va swi tiva leswaku u lunghekele ku va yingisela nkarhi wihi ni wihi loko va lava ku vulavula. Endla leswaku vana va wena va ntshunxeka leswaku swi ta va olovela ku tiphofula. (Yakobo 3:18) Loko va ehleketa leswaku u ta va holovela kumbe u va sola-sola, swi nga endleka va chava ku tiphofula. Va lehisele mbilu naswona nkarhi na nkarhi u va tiyisekisa leswaku wa va rhandza.—Matewu 3:17; 1 Vakorinto 8:1.

LESWI U NGA SWI ENDLAKA:

  • Nyika vana va wena nkarhi loko va lava ku vulavula na wena

  • Bula ni vana va wena nkarhi na nkarhi, ku nga ri ntsena loko ku ri ni swiphiqo

2 RINGETA KU TWISISA LESWI VA SWI VULAKA

LESWI BIBELE YI SWI VULAKA: “Loyi a nga ni ku twisisa emhakeni u ta kuma leswinene.” (Swivuriso 16:20) Minkarhi yin’wana, u fanele u tiva ndlela leyi vana va wena va titwaka ha yona hambiloko va nga vulanga nchumu. Swi tolovelekile eka vantshwa leswaku va vula swilo leswi entiyisweni va nga vuliki swona. “Loko munhu a angula malunghana ni mhaka yo karhi kambe a nga si yi twa, sweswo i vuphukuphuku eka yena.” (Swivuriso 18:13) U nga hatliseli ku hlundzuka.—Swivuriso 19:11.

LESWI U NGA SWI ENDLAKA:

  • U nga va ngheni enon’wini kumbe u va karihela loko vana va wena va vula leswi u nga swi rhandziki

  • Ringeta ku tsundzuka ndlela leyi a wu titwa ha yona loko wa ha ringana na vona ni leswaku i yini leswi a wu swi teka swi ri swa nkoka

 3 VANA VA NGA MI HOLOVISI

LESWI BIBELE YI SWI VULAKA: “N’wananga, yingisa ndzayo ya tata wa wena, naswona u nga wu fularheli nawu wa mana wa wena.” (Swivuriso 1:8) Yehovha u nyike vatswari mfanelo yo vekela vana va vona milawu. Mi fanele mi dyondzisa vana va n’wina ku mi xixima ni ku mi yingisa. (Vaefesa 6:1-3) Vana va swi xiya loko vatswari va vona va nga ‘twanani eka leswi va swi ehleketaka.’ (1 Vakorinto 1:10) Loko mi nga pfumelelani, mi nga swi kombisi emahlweni ka vana va n’wina hikuva swi nga endla leswaku va nga ha mi xiximi.

LESWI MI NGA SWI ENDLAKA:

  • Bulani hi ndlela leyi mi nga ta va tshinya ha yona vana va n’wina

  • Loko mi ri ni mavonelo lama hambaneke malunghana ni ndlela leyi mi faneleke mi dyondzisa vana va n’wina ha yona, ringetani ku twisisana

 4 VANA NI XIKONGOMELO

LESWI BIBELE YI SWI VULAKA: “Letela mufana hi ndlela leyi nga yakwe.” (Swivuriso 22:6) A swi nge tiendlekeli leswaku vana va wena va kuma dyondzo leyinene kambe u fanele u va dyondzisa ni ku va tshinya. (Pisalema 127:4; Swivuriso 29:17) Ku tshinya a swi vuli ku va xupula ntsena, kambe swi katsa ku va pfuna leswaku va twisisa xivangelo xo va va vekeriwe milawu. (Swivuriso 28:7) Nakambe, va dyondzise ku rhandza Rito ra Yehovha ni ku twisisa milawu leyi kongomisaka ya rona. (Pisalema 1:2) Leswi swi ta endla leswaku va va ni ripfalo lerinene.—Vaheveru 5:14.

LESWI U NGA SWI ENDLAKA:

  • Tiyiseka leswaku vana va wena va teka Xikwembu tanihi Munhu wa xiviri loyi va nga n’wi tshembaka

  • Va pfune va tiva ni ku papalata mahanyelo yo biha, yo fana ni lama kumekaka eka Internet. Va dyondzise ndlela yo papalata lava yengaka vanhu leswaku va endla timhaka ta masangu na vona

“Letela mufana hi ndlela leyi nga yakwe”

DYONDZA SWO TALA

Switoloveto Swa Vana

Kuma switoloveto leswi tsakisaka leswi nga ku pfunaka ku dyondzisa vana va wena timfanelo leti sekeriweke eBibeleni.

U Fanele U Va Tshinya Njhani Vana Va Wena?

Bibele yi vulavula hi tindlela tinharhu leti pfunaka loko swi ta emhakeni yo tshinya.

Vatswari Va Nga Va Dyondzisa Njhani Vana Va Vona Hi Timhaka Ta Masangu?

Bibele yi ni milawu yo tala leyi nga ta ku pfuna ku vulavula ni vana va wena hi timhaka ta masangu ni ku va sirhelela eka vanhu lava lavaka ku va xanisa.

Mutswari: Va Dyondzise Mahanyelo Lamanene

Milawu ya Bibele yi nga ku pfuna njhani leswaku u dyondzisa vana va wena mahanyelo lamanene?