Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

U Nga Va Ni Ndyangu Lowu Tsakeke

 XIYENGE 6

Ndlela Leyi Vana Va Nga Byi Cincaka Ha Yona Vukati

Ndlela Leyi Vana Va Nga Byi Cincaka Ha Yona Vukati

“Vana i ndzhaka leyi humaka eka Yehovha.”—Pisalema 127:3

Ku velekiwa ka n’wana ku nga ha tsakisa ku tlhela ku vangela vatekani ku karhateka. Tanihi vatswari lavantshwa, mi ta hlamala ku kuma leswaku nkarhi ni matimba ya n’wina yo tala mi ta swi tirhisela ku khathalela n’wana wa n’wina. Ku nga etleli kahle swin’we ni ku cinca ka mintlhaveko swi nga ha endla leswaku vuxaka bya n’wina byi nga vi byinene. Wena ni nkataku mi fanele mi endla mindzulamiso leswaku mi khathalela n’wana wa n’wina ni ku hlayisa vukati bya n’wina. Ndzayo ya le Bibeleni yi nga mi pfuna njhani leswaku mi langutana ni swiphiqo leswi?

 1 TWISISA NDLELA LEYI N’WANA A CINCAKA VUTOMI BYA N’WINA HA YONA

LESWI BIBELE YI SWI VULAKA: “Rirhandzu ri ni mbilu yo leha ni musa.” Nakambe, rirhandzu “a ri lavi leswi vuyerisaka rona ntsena, a ri hlundzuki.” (1 Vakorinto 13:4, 5) Tanihi manana lontshwa, i swa ntumbuluko leswaku u khathala ngopfu hi n’wana wa wena. Kambe, nuna wa wena a nga ha vona onge wa n’wi honisa, hikwalaho u nga rivali ku tinyika nkarhi wa yena. Hi ku lehisa mbilu ni musa, u nga n’wi pfuna leswaku a titwa a ri wa nkoka ni ku katseka eku kuriseni ka n’wana wa n’wina.

“N’wina vavanuna lava tekeke, hambetani mi tshama na vona hi ku ya hi vutivi.” (1 Petro 3:7) U fanele u swi twisisa leswaku nsati wa wena u ta tirhisa matimba ya yena yo tala a khathalela n’wana wa n’wina. U ni vutihlamuleri lebyintshwa naswona a nga ha tshikileleka, a karhala ni ku karhateka. Minkarhi yin’wana, a nga ha ku hlundzukela, kambe ringeta ku va ni moya wo rhula, hikuva “loyi a hlwelaka ku hlundzuka wa antswa ku ri ni wanuna wa matimba.” (Swivuriso 16:32) Vana ni vuxiyaxiya, naswona u n’wi nyika nseketelo lowu a wu lavaka.—Swivuriso 14:29.

LESWI U NGA SWI ENDLAKA:

  • Vatatana: Pfunani vasati va n’wina ku khathalela n’wana hambi ku ri vusiku. Hungutani nkarhi lowu mi wu hetaka mi endla mintirho yin’wana leswaku mi ta kota ku heta nkarhi wo tala mi ri ni vasati va n’wina ni n’wana wa n’wina

  • Vamanana: Loko vanuna va n’wina va lava ku mi pfuna ku khathalela n’wana wa n’wina, amukelani mpfuno wa vona. Loko va nga wu endli kahle ntirho wa vona, mi nga va soli, kambe hi musa va kombeni ndlela yo wu endla

 2 TIYISANI VUXAKA BYA N’WINA

LESWI BIBELE YI SWI VULAKA: “Va fanele va va nyama yin’we.” (Genesa 2:24) Hambileswi mi nga ni xirho lexintshwa endyangwini wa n’wina, tsundzuka leswaku wena ni nkataku ma ha ri “nyama yin’we.” Tikarhateleni ku hlayisa vuxaka bya n’wina byi tiyile.

Vavasati, tlangelani mpfuno ni nseketelo wa vanuna va n’wina. Marito ya n’wina yo tlangela ma nga “horisa.” (Swivuriso 12:18) Vavanuna, byelani vasati va n’wina ndlela leyi mi va rhandzaka ha yona ni ndlela leyi mi va tekaka va ri va nkoka ha yona. Va bumabumeleni hikwalaho ka ndlela leyi va khathalelaka ndyangu ha yona.—Swivuriso 31:10, 28.

“Un’wana ni un’wana a a hambete a lava leswaku ku pfuneka un’wana, hayi yena n’wini.” (1 Vakorinto 10:24) Minkarhi hinkwayo endlela nkataku swilo leswinene ngopfu. Tinyikeni nkarhi wo vulavurisana, wo bumabumelana ni wo yingiselana. Anakanyelanani loko swi ta eka timhaka ta masangu. Swi tekele enhlokweni swilaveko swa nkataku. Bibele yi ri: “Mi nga tsonani, handle ka loko mi lo pfumelelana hi vumbirhi bya n’wina.” (1 Vakorinto 7:3-5) Hikokwalaho bulani hi mhaka leyi mi ntshunxekile. Ku lehisa mbilu ni ku twisisa ka n’wina swi ta tiyisa vuxaka bya n’wina.

LESWI MI NGA SWI ENDLAKA:

  • Tinyikeni nkarhi wa n’wina mi ri vambirhi ntsena

  • Endla swilo leswitsongo leswi endlaka nkataku a titwa a rhandziwa, swo fana ni ku n’wi rhumelela marungula kumbe ku n’wi nyika nyiko leyitsongo

 3 DYONDZISANI N’WANA WA N’WINA

LESWI BIBELE YI SWI VULAKA: “Ku sukela loko wa ha ri ricece u tive matsalwa yo kwetsima, lawa ma swi kotaka ku ku tlharihisa leswaku u ta pona.” (2 Timotiya 3:15) Hlelani leswi mi nga ta swi endla leswaku mi dyondzisa n’wana wa n’wina. U ni vuswikoti byo dyondza, hambiloko a nga si velekiwa. N’wana wa wena a nga kota ku tiva rito ra wena a ha ri embelekweni a tlhela a angula hi ku ya hi ndlela leyi u titwaka ha yona. N’wi hlayeleni loko a ha ri ricece. Hambiloko a nga swi twisisi leswi mi swi hlayaka, swi nga n’wi pfuna leswaku a tsakela ku hlaya loko se a kurile.

N’wana wa n’wina a nga mi twa loko mi vulavula hi Xikwembu hambiloko a ha ri ntsongo ngopfu. Khongelani eka Yehovha loko mi ri na yena. (Deteronoma 11:19) Hambiloko mi tlanga na yena, vulavulani hi swilo leswi Xikwembu xi nga swi endla. (Pisalema 78:3, 4) Loko n’wana wa n’wina a kula, u ta yi xiya ndlela leyi mi rhandzaka Yehovha ha yona kutani na yena u ta dyondza ku n’wi rhandza.

LESWI MI NGA SWI ENDLAKA:

  • Khongelani mi kombela vutlhari byo dyondzisa n’wana wa n’wina

  • Phindhani tinhla-nkulu ni tidyondzo to karhi eka n’wana wa n’wina leswaku a ta sungula ku dyondza a ha ri ntsongo