Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

U Nga Va Ni Ndyangu Lowu Tsakeke

 XIYENGE 8

Loko Mi Weriwa Hi Khombo

Loko Mi Weriwa Hi Khombo

“Ma tsaka swinene, hambileswi sweswi mi vangeriweke gome hi miringo leyi hambaneke ku ringana nkarhinyana, loko swi fanerile.”—1 Petro 1:6

Hambiloko u ringeta hi matimba leswaku u va ni vukati lebyi tsakisaka ni ndyangu lowu tsakeke, kambe ku nga ha humelela swilo leswi a wu nga swi langutelanga leswi nga endlaka swi ku tikela ku tshama u tsakile. (Eklesiasta 9:11) Hi rirhandzu Xikwembu xi hi nyika mpfuno loko hi langutana ni swiyimo swo tika. Loko u tirhisa milawu leyi landzelaka ya le Matsalweni, wena ni ndyangu wa wena mi ta swi kota ku langutana na swona, hambiloko swiyimo swa kona swi tika swinene.

 1 TITSHEGENI HI YEHOVHA

LESWI BIBELE YI SWI VULAKA: ‘Lahlelani ku vilela hinkwako ka n’wina eka xona, hikuva xa mi khathalela.’ (1 Petro 5:7) Minkarhi hinkwayo tsundzukani leswaku a mi fanelanga mi sola Xikwembu loko mi langutana ni miringo. (Yakobo 1:13) Loko mi tshinela eka xona, xi ta mi pfuna swinene. (Esaya 41:10) “Chululani timbilu ta n’wina emahlweni ka xona.” —Pisalema 62:8.

Nakambe mi ta chaveleleka loko mi hlaya ni ku dyondza Bibele siku ni siku. Loko mi endla tano, mi ta xiya ndlela leyi Yehovha a mi ‘chavelelaka [ha yona] enhlomulweni wa n’wina hinkwawo.’ (2 Vakorinto 1:3, 4; Varhoma 15:4) U tshembisa ku mi nyika “ku rhula ka Xikwembu loku tlulaka miehleketo hinkwayo.”—Vafilipiya 4:6, 7, 13.

LESWI MI NGA SWI ENDLAKA:

  • Khongelelani mpfuno wa Yehovha leswaku mi tshama mi rhurile ni ku ehleketa kahle

  • Kambisisani leswi mi nga swi endlaka ivi mi endla leswi nga ta ku vuyerisa

2 TIKHATHALELE U TLHELA U KHATHALELA NDYANGU WA WENA

LESWI BIBELE YI SWI VULAKA: “Mbilu ya la twisisaka yi kuma vutivi, ni ndleve ya lavo tlhariha yi lava ku kuma vutivi.” (Swivuriso 18:15) Tikarhatele ku kumisisa leswi swirho swa ndyangu wa wena hinkwaswo swi titwisaka xiswona. Vulavula na swona u tlhela u swi yingisela.—Swivuriso 20:5.

Ku vuriwa yini loko loyi u n’wi rhandzaka a fa? U nga chavi ku kombisa ndlela leyi u titwaka ha yona. Tsundzuka leswaku hambi ‘Yesu u ririle.’ (Yohane 11:35; Eklesiasta 3:4) Nakambe i swa nkoka ku wisa hi ndlela leyi faneleke ni ku etlela tiawara leti ringaneke. (Eklesiasta 4:6) Leswi swi ta endla leswaku swi ku olovela ku langutana ni xiyimo lexi tshikilelaka.

LESWI U NGA SWI ENDLAKA:

  • Loko khombo ri nga si hlasela, titoloveteni ku bula tanihi ndyangu. Loko ku va ni swiphiqo, swi ta mi olovela ku bula hi swona

  • Vulavulani ni van’wana lava tshameke va langutana ni xiyimo lexi fanaka

 3 KUMA MPFUNO LOWU U WU LAVAKA

LESWI BIBELE YI SWI VULAKA: ‘Munghana wa ntiyiso u ni rirhandzu nkarhi hinkwawo, naswona i makwerhu la velekiweke loko ku ri ni maxangu.’ (Swivuriso 17:17) Vanghana va wena va swi lava ku ku pfuna, kambe va nga ha va va nga swi tivi leswi va faneleke va swi endla. U nga chavi ku va byela leswi u swi lavaka. (Swivuriso 12:25) Nakambe, lava mpfuno hi tlhelo ra moya eka lava twisisaka Bibele. Nkongomiso lowu va nga ku nyikaka wona lowu humaka eBibeleni wu nga ku pfuna.—Yakobo 5:14.

U ta kuma nseketelo lowu u wu lavaka loko nkarhi na nkarhi u tihlanganisa ni vanhu lava hakunene va nga ni ripfumelo eka Xikwembu ni lava tshembaka switshembiso swa xona. Nakambe u ta kuma nchavelelo lowukulu loko u pfuna van’wana lava lavaka ku khutaziwa. Va byele hi ripfumelo ra wena eka Yehovha ni hi switshembiso swakwe. Tshama u khomekile hi ku pfuna vanhu van’wana naswona u nga tihambanisi ni lava ku rhandzaka ni ku tlhela va khathala ha wena.—Swivuriso 18:1; 1 Vakorinto 15:58.

LESWI U NGA SWI ENDLAKA:

  • Kombela munghana wa wena lonkulu leswaku a ku pfuna

  • Swi veke erivaleni leswi u swi lavaka

DYONDZA SWO TALA

Loko N’wana Wa Wena A Vutisa Hi Rifu

Tindlela ta mune leti nga ku pfunaka leswaku u hlamula swivutiso swa vona swin’we ni ku va pfuna ku langutana ni ku feriwa hi loyi va n’wi rhandzaka.

Ha Yini Xikwembu Xi Pfumelela Vubihi Ni Ku Xaniseka?

Vubihi byi sungule njhani naswona ha yini Xikwembu xi byi pfumelele byi ya emahlweni? Xana ku xaniseka ku ta kala ku hela?

Loko U Weriwa Hi Maxangu—Ku Feriwa Hi Munhu Loyi U N’wi Rhandzaka

Ntlhanu wa swirho swa ndyangu wa ka va Ronaldo swi fe eka mhangu ya movha eka malembe ya 16 lama hundzeke. Hambileswi a ha twaka ku vava kambe u kume ku rhula ka mianakanyo.