Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Mfumo Wa Xikwembu Wa Fuma!

 NDZIMA 19

Ntirho Wo Aka Lowu Yisaka Ku Dzuneka Eka Yehovha

Ntirho Wo Aka Lowu Yisaka Ku Dzuneka Eka Yehovha

LESWI NGA TA TLHUVUTSIWA EKA NDZIMA LEYI

Ntirho wo aka wa misava hinkwayo wu yisa ntirho wa Mfumo emahlweni

1, 2. (a) I yini leswi malandza yo tshembeka ya Yehovha ku nga khale ma ri karhi ma tiphina hi ku swi endla? (b) I yini leswi Yehovha a swi tekaka swi ri swa risima?

I KHALE malandza yo tshembeka ya Yehovha ma ri karhi ma tiphina hi ku aka miako leyi yisaka ku dzuneka evitweni rakwe. Hi xikombiso, Vaisrayele va hlanganyele hi ku hiseka eku akeni ka tabernakela ni ku nyikela hi swo aka.Eks. 35:30-35; 36:1, 4-7.

2 Yehovha a nga languti ntsena swilo swo aka tanihi leswi tisaka ku dzuneka eka yena kumbe swi ri leswi nga swa nkoka swinene eka yena. (Mat. 23:16, 17) Leswi Yehovha a swi tekaka swi ri swa risima, nyiko leyi yisaka ku dzuneka eka yena ku tlula hinkwaswo, i vugandzeri lebyi a endleriwaka byona hi malandza yakwe, ku katsa ni moya wa wona wa ku tinyiketela ni ku tirha hi ku hiseka. (Eks. 35:21; Mar. 12:41-44; 1 Tim. 6:17-19) Yoleyo i mhaka ya nkoka. Ha yini? Hikuva miako i nchumu wa xinkarhana. Hi xikombiso, a ya ha ri kona tabernakela na tempele. Miako yoleyo yi nga ha va yi herisiwile, kambe Yehovha a nga ma rivalanga malwandla ni ntirho wa malandza yakwe yo tshembeka lama seketeleke loko swi akiwa.Hlaya 1 Vakorinto 15:58; Vaheveru 6:10.

3. I yini leswi hi nga ta swi kambisisa eka ndzima leyi?

3 Malandza ya Yehovha ya manguva lawa na wona ma tirhe hi matimba leswaku ma aka tindhawu to gandzela eka tona. Kutani leswi hi swi hetisiseke hi ku kongomisiwa hi Hosi ya hina Yesu Kreste swa hlamarisa hakunene! Swi le rivaleni leswaku Yehovha u katekise matshalatshala ya hina. (Ps. 127:1) Eka ndzima leyi, hi ta kambisisa yin’wana ya mintirho leyi endliweke ni ndlela leyi yi yiseke ku dzuneka ha yona eka Yehovha. Hi ta tlhela hi twa mintokoto ya van’wana lava katsekeke eku hetisiseni ka ntirho lowu.

Ku Aka Tiholo Ta Mfumo

4. (a) Ha yini hi lava tindhawu leti engetelekeke to gandzela eka tona? (b) Ha yini miako yo hambana-hambana ya rhavi yi hlanganisiwile? (Vona bokisi leri nge “ Ku Akiwa Ka Rhavi—Ku Cinca Loku Fambisanaka Ni Swiyimo.”)

4 Hilaha swi hlamuseriweke hakona eka Ndzima 16, Yehovha u lava hi hlengeletana swin’we leswaku hi n’wi gandzela. (Hev. 10:25) Minhlangano ya hina a yi tiyisi ripfumelo ra hina ntsena kambe yi tlhela yi hi pfuna ku hisekela ntirho wo chumayela. Loko masiku yo hetelela ma ri karhi ma chaputa, Yehovha u hambeta a hatlisisa ntirho wolowo. Hikwalaho ka sweswo, vanhu va madzana ya magidi va khitikanela enhlengeletanweni yakwe lembe ni lembe. (Esa. 60:22) Leswi vanhu vo tala lava fumiwaka  hi Mfumo va nghenaka enhlengeletanweni, ku ni xilaveko lexikulu xa tindhawu to gandlisela eka tona leswaku ku humesiwa minkandziyiso leyi sekeriweke eBibeleni. Nakambe hi lava tindhawu leti engetelekeke to gandzela eka tona.

5. Ha yini vito leri nge Holo ya Mfumo ri faneleka? (Nakambe vona bokisi leri nge “ Kereke Ya New Light.”)

5 Eka matimu ya manguva lawa ya vanhu va Yehovha, Swichudeni swa Bibele swi sungule ku vona xilaveko xo va ni tindhawu ta swona to gandzela eka tona. Swi vonaka onge yin’wana ya tindhawu to sungula to gandzela eka tona a yi akiwe eWest Vir­ginia, le U.S.A., hi 1890. Hi va-1930, vanhu va Yehovha va ake kumbe ku pfuxeta tiholo to hlayanyana, kambe tindhawu teto to gandzela eka tona a ti nga si nyikiwa vito ro hlawuleka. Kambe hi 1935, Makwerhu Rutherford u endzele eHawaii, laha a ku akiwa holo swin’we ni rhavi lerintshwa. Loko Makwerhu Rutherford a vutisiwa leswaku xana muako lowu wu fanele wu vitaniwa yini, u hlamule a ku: “Xana a mi voni swi antswa ku wu vitana ‘Holo ya Mfumo,’ tanihi leswi ku nga swona leswi hi swi endlaka, ku nga ku chumayela mahungu lamanene ya Mfumo?” (Mat. 24:14) Vito rero leri faneleke a ri nga ta nyikiwa holo yoleyo ntsena  kambe ni tindhawu tin’wana to hlayanyana to hlanganyela eka tona leti tirhisiwaka hi mavandlha ya vanhu va Yehovha emisaveni hinkwayo.

6, 7. Xana Tiholo ta Mfumo leti akiwaka hi ku hatlisa ti nyikele vumbhoni byihi?

6 Hi va-1970, a ku laveka Tiholo ta Mfumo leti engeteleke. Hikwalaho ka sweswo, vamakwerhu va le United States va sungule endlelo leri fambaka kahle ro aka tiholo to saseka hi masiku ma nga ri mangani ntsena. Hi 1983, ku akiwe Tiholo ta Mfumo hi ndlela yoleyo ta kwalomu ka 200 eUnited States ni le Canada. Leswaku va endla ntirho wolowo, va sungule ku simeka tikomiti to aka ta xifundzha. Endlelo leri ri fambe kahle swinene lerova hi 1986, Huvo leyi Fumaka yi tsarise lunghiselelo rero enawini, naswona hi 1987 a ku ri ni Tikomiti to Aka ta Xifundzha eUnited States. * Hi 1992, ku tlhele ku hlawuriwa Tikomiti to Aka ta Xifundzha eArgentina, Australia, Furwa, Jarimani, Japani, Mexico, Afrika Dzonga ni le Spain. Entiyisweni, vamakwerhu volavo lava tirhaka hi matimba eku akeni Tiholo ta Mfumo ni Tiholo ta Tinhlengeletano va lava nseketelo wa hina, hikuva ntirho lowu va wu endlaka i xiphemu xa ntirho wo kwetsima.

7 Tiholo leti ta Mfumo leti akiwaka hi ku hatlisa ti nyikela vumbhoni byo tsakisa etindhawini leti ti akiweke eka tona. Hi xikombiso, phepha-hungu ra le Spain, a ri ri ni nhloko-mhaka leyi nge “Ripfumelo Ri Susumeta Tintshava.” Loko ri vulavula hi ku akiwa ka Holo ya Mfumo yo tano edorobeni ra Martos, phepha-hungu ri vutise ri ku: “Xana swi kotekisa ku yini leswaku emisaveni ya sweswi leyi nga ni vutianakanyi, vatirhi va ku tirhandzela lava humaka etindhawini to hambana-hambana [ta le Spain] hi ku tirhandzela va ta eMartos leswaku va ta aka muako  lowu tshoveke rhekhodo hi ku hatla wu hela, wu sasekile naswona wu hlelekile?” Xihloko xi hlamule xivutiso hi ku tshaha marito ya un’wana wa vatirhi va ku tirhandzela la nga Mbhoni xi ku: “Xivangelo hileswi hi nga vanhu lava dyondzisiwaka hi Yehovha.”

Ku Aka eMatikweni Lama Nga eVuswetini

8. Hi 1999, hi wihi nongonoko lowuntshwa lowu Huvo leyi Fumaka yi pfumeleke leswaku wu va kona naswona ha yini?

8 Loko lembe-xidzana ra vu-20 ri ya eku heleni, vanhu va khitikanele enhlengeletanweni ya Yehovha ematikweni lawa eka wona vamakwerhu va nga evuswetini. Mavandlha ya kwalaho ma endle leswi ma nga swi kotaka leswaku ma aka tindhawu to hlanganyela eka tona. Kambe ematikweni man’wana, a va fanele va tiyisela ku hlekuriwa ni xihlawuhlawu hikuva Tiholo ta Mfumo ta kwalaho a ti akiwe hi ndlela yo olova loko ti ringanisiwa ni tindhawu tin’wana to gandzela eka tona. Hambiswiritano, ku sukela hi 1999, Huvo leyi Fumaka yi pfumele leswaku ku va ni nongonoko wo hatlisisa ntirho wo aka Tiholo ta Mfumo ematikweni lama nga evuswetini. Ma nyikiwe mali leyi humaka ematikweni lama fuweke swinene ku endlela leswaku ku va ni “ku ringana-ringana.” (Hlaya 2 Vakorinto 8:13-15.) Kutani vamakwerhu vo huma ematikweni man’wana va tinyiketele ku pfuna entirhweni.

9. Hi wihi ntirho lowu a wu vonaka wu tika, kambe i yini leswi hetisisiweke?

9 Eku sunguleni, ntirho a wu vonaka wu tika. Xiviko xa 2001 xi kombise leswaku a ku laveka Tiholo ta Mfumo ta 18 300 ematikweni ya 88 lama nga evuswetini. Kambe hi ku pfuniwa hi moya wa Xikwembu ni Hosi ya hina Yesu Kreste, ku hava ntirho lowu nga kotekiki. (Mat. 19:26) Ku nga si hela malembe ya kwalomu  ka 15, ku sukela hi 1999 ku ya eka 2013, vanhu va Xikwembu va ake Tiholo ta Mfumo ta 26 849 tanihi xiphemu xa nongonoko lowu. * Yehovha u hambeta a katekisa ntirho wo chumayela kutani ku sukela hi 2013, a ka ha laveka Tiholo ta Mfumo ta kwalomu ka 6 500 ematikweni wolawo naswona sweswi ku laveka to tlula madzana lembe ni lembe.

Ntirho wo aka Tiholo ta Mfumo ematikweni lama sweleke wu ni swiphiqo leswi nga tolovelekangiki

10-12. Xana ku akiwa ka Tiholo ta Mfumo swi yise ku dzuneka evitweni ra Yehovha hi ndlela yihi?

10 Xana ku akiwa ka Tiholo toleto ta Mfumo letintshwa swi yise ku dzuneka evitweni ra Yehovha hi ndlela yihi? Xiviko lexi humaka erhavini ra le Zimbabwe xi te: “Ku nga si hela n’hweti ku ri karhi ku akiwa Holo ya Mfumo, nhlayo ya lava a va va kona yi andze kambirhi.” Ematikweni yo tala, swi vonaka onge vanhu va kanakana ku tihlanganisa na hina kukondza ku va ni ndhawu leyi faneleke yo gandzela eka yona. Kambe loko Holo ya Mfumo yi akiwile yi hatla yi tala hi vanhu ivi ku laveka yin’wana. Hambiswiritano, a hi ku languteka ka miako ntsena loku tshinetaka vanhu eka Yehovha. Rirhandzu ra xiviri ra Vukreste leri kombisiweke hi lava akaka tiholo na rona ri khumbe ndlela leyi vanhu va yi tekaka ha yona nhlengeletano yakwe. Xiya swikombiso swi nga ri swingani.

11 Indonesia. Loko wanuna loyi a a hlalerile loko ku ri karhi ku akiwa Holo ya Mfumo a kuma leswaku vatirhi hinkwavo a ku ri vatirhi va ku tirhandzela, u te: “Mi vanhu vo hlamarisa hakunene! Ndzi vone ndlela leyi un’wana ni un’wana wa n’wina a tirhaka ha yona hi mbilu hinkwayo ni hi ntsako, hambileswi mi nga holiki. Ndzi ehleketa leswaku ku hava nhlengeletano yin’wana ya vukhongeri leyi fanaka ni ya n’wina!”

12 Ukraine. Wansati un’wana loyi siku ni siku a a hundza laha a ku akiwa kona Holo ya Mfumo u gimete hileswaku vatirhi volavo a ku ri Timbhoni ta Yehovha nileswaku muako wolowo a ku ta va Holo ya Mfumo. U te: “Ndzisana ya mina ya xisati leyi na yona yi veke Mbhoni ya Yehovha hi yona leyi ndzi hlamuseleke hi tona. Hi ku va ndzi xiyisise ntirho lowu wo aka, ndzi endle xiboho xa leswaku na mina a ndzi lava ku va endyangwini lowu wa moya. Laha hi kona ndzi voneke rirhandzu.” Wansati loyi u amukele dyondzo ya Bibele naswona u khuvuriwe hi 2010.

13, 14. (a) I yini leswi u swi dyondzeke eka ndlela leyi mpatswa wun’wana wu anguleke ha yona endzhaku ko xiyisisa mintirho leyi a yi endliwa endhawini leyi a ku akiwa eka yona Holo ya Mfumo? (b) I yini leswi u nga swi endlaka ku tiyisekisa leswaku ndhawu leyi u gandzelaka eka yona yi yisa ku dzuneka evitweni ra Yehovha?

13 Argentina. Mpatswa wun’wana wu tshinelele makwerhu loyi a langutelaka laha ku akiwaka Holo ya Mfumo. Nuna wa kona u te, “A hi mi hlalerile loko mi ri karhi mi aka Holo ya Mfumo, kutani . . . hi endle xiboho xa leswaku hi lava ku dyondza hi Xikwembu endhawini leyi.” Kutani u vutise a ku, “Xana hi fanele hi endla yini leswaku hi fanelekela ku ta laha minhlanganweni?” Mpatswa wolowo wu amukele ku fambiseriwa dyondzo ya Bibele, kambe loko ntsena ndyangu hinkwawo wu ta katseka. Vamakwerhu va amukele xikombelo xa vona hi ntsako.

14 Swi nga ha endleka u nga vanga na rona lunghelo ro pfuneta ku aka Holo ya Mfumo leyi u hlanganyelaka eka yona, kambe nilokoswiritano u nga endla leswi engetelekeke ku pfuneta leswaku ndhawu leyi u gandzelaka eka yona yi yisa ku dzuneka evitweni ra Yehovha. Hi xikombiso, u nga hisekela ku rhamba  swichudeni swa wena swa Bibele, lava u endlaka maendzo yo vuyela eka vona ni vanhu lava u hlanganaka na vona leswaku va ta hlanganyela na wena eminhlanganweni eHolweni ya Mfumo. Nakambe u ni lunghelo ro pfuneta ku basisa ni ku hlayisa ndhawu leyi u gandzelaka eka yona. Loko wo veka mali yo karhi, u nga kota ku nyikela mali yo khathalela Holo ya Mfumo leyi u hlanganyelaka eka yona kumbe u nyikela leswaku ku akiwa tindhawu to gandzela eka tona etindhawini tin’wana ta misava. (Hlaya 1 Vakorinto 16:2.) Mintirho leyi hinkwayo yi yisa ku dzuneka evitweni ra Yehovha.

Vatirhi Lava ‘Tinyikelaka Hi Ku Tirhandzela’

15-17. (a) I vamani lava endlaka ntirho wo tala loko ku akiwa?(b) I yini leswi u swi dyondzeke eka leswi vuriweke hi mimpatswa leyi tirheke eka matsima yo aka ematikweni yo hambana-hambana?

15 Mintirho yo tala leyi endliwaka loko ku akiwa Tiholo ta Mfumo, Tiholo ta Tinhlengeletano ni miako ya rhavi yi endliwa hi vamakwerhu va kwalaho. Kambe va tala ku pfuniwa hi vamakwerhu vo huma ematikweni man’wana lava nga ni vuswikoti byo aka. Van’wana va vatirhi volavo va ku tirhandzela va hlele swilo swa vona leswaku va kota ku tirha eka matsima ya le matikweni yo hambana-hambana ku ringana mavhiki yo hlayanyana. Van’wana va tirhe malembe yo tala eka matsima yo hambana-hambana yo aka.

Timo na Lina Lappalainen (Vona ndzimana 16)

16 Ntirho wo aka wa misava hinkwayo wu ni swiphiqo swa wona leswi nga tolovelekangiki kambe wu tisa mikateko. Hi xikombiso, Timo na Lina, va ye va ya tirha laha ku akiwaka Tiholo ta Mfumo, Tiholo ta Tinhlengeletano ni miako ya rhavi ematikweni ya le Asia, Yuropa ni le Amerika Dzonga. Timo u ri, “Hi xiringaniso ndzi cince xiavelo xa mina endzhaku ka malembe man’wana ni man’wana mambirhi eka malembe ya 30 lama hundzeke.” Lina, loyi a nga ni malembe ya 25 a tekane na Timo, u ri: “Ndzi tirhe na Timo ematikweni ya khume yo hambana-hambana. Swi lava matimba ni nkarhi wo tala ku tolovelana ni  swakudya leswintshwa, maxelo lamantshwa, ririmi lerintshwa ni ku chumayela ensin’wini leyintshwa swin’we ni ku endla vanghana lavantshwa.” * Xana va vuyeriwile hikwalaho ka ku tikarhata ka vona? Lina u ri: “Swiphiqo sweswo swi endle leswaku hi kuma mikateko yo tala. Hi vone rirhandzu ra Vukreste ni malwandla naswona Yehovha u hi kombise nkhathalelo wa rirhandzu. Nakambe hi vone ku hetiseka ka xitshembiso lexi Yesu a xi tshembiseke vadyondzisiwa vakwe, lexi nga eka Marka 10:29, 30. Hi kume vamakwerhu vo tala swinene va moya va xinuna ni va xisati swin’we ni vamanana.” Timo u ri, “Swi hi tisela ku eneriseka lokukulu ku tirhisa vutshila bya hina eka swikongomelo hinkwaswo leswinene, hi hoxa xandla eku ndlandlamuxeni ka swilo swa Hosi.”

17 Darren na Sarah, lava pfuneteke eka matsima yo aka ematikweni ya le Afrika, Asia, Amerika Xikarhi, Yuropa, Amerika Dzonga ni le Pacific Dzonga, va vona onge va kume swo tala ku tlula leswi va nyikeleke ha swona. Ku nga khathariseki swiphiqo leswi va langutaneke na swona, Darren u ri: “Ku ve lunghelo ku tirha ni vamakwerhu vo huma ematikweni yo hambana-hambana ya misava. Ndzi swi vonile leswaku rirhandzu leri vanhu va Yehovha va nga na rona eka yena ri endla leswaku hinkwavo va va ni rirhandzu ni vun’we.” Sarah u ri: “Ndzi dyondze swo tala eka vamakwerhu vo huma eka mindhavuko yo hambana-hambana! Ku vona ndlela leyi va titsonaka swo karhi ha yona leswaku va tirhela Yehovha swi ndzi susumetele ku hambeta ndzi nyikela hi leswi ndzi nga na swona.”

18. Xana vuprofeta lebyi nga eka Pisalema 110:1-3 byi hetiseka njhani?

18 Hosi Davhida u profete leswaku hambileswi lava fumiwaka hi Mfumo wa Xikwembu a va ta langutana ni swiphiqo, a va ta “tinyikela hi ku tirhandzela” leswaku va yisa ntirho wa Mfumo emahlweni. (Hlaya Pisalema 110:1-3.) Hinkwavo lava katsekaka entirhweni lowu seketelaka Mfumo va hoxa xandla eku hetisiseni ka marito wolawo ya vuprofeta. (1 Kor. 3:9) Ku akiwa ka miako yo tala ya rhavi, Tiholo ta Tinhlengeletano ta madzana ni Tiholo ta Mfumo ta makume ya magidi emisaveni hinkwayo, ku nyikela vumbhoni lebyi xiyekaka bya leswaku Mfumo wa Xikwembu i wa xiviri naswona sweswi wa fuma. Hakunene i lunghelo ku tirha na Hosi Yesu Kreste entirhweni lowu yisaka ku dzuneka eka Yehovha loku n’wi fanelaka swinene!

^ ndzim. 6 Hi 2013, vatirhi va ku tirhandzela vo tlula 230 000 va nyikiwe mpfumelelo wo tirha ni Tikomiti to Aka ta Xifundzha ta 132 eUnited States. Etikweni rero, lembe ni lembe tikomiti teto ti langutele ku akiwa ka Tiholo ta Mfumo letintshwa ta kwalomu ka 75 naswona ti pfunete ku pfuxeta kumbe ku lunghisa tiholo ta kwalomu ka 900.

^ ndzim. 9 Nhlayo leyi a yi katsi Tiholo ta Mfumo to hlayanyana leti nga akiwangiki hi tikomiti leti.

^ ndzim. 16 Vamakwerhu lava akaka ematikweni yo hambana-hambana ni vatirhi va ku tirhandzela va heta nkarhi wa vona wo tala va ri karhi va tirha laha ku akiwaka kona kambe va tlhela va seketela ntirho wo chumayela lowu endliwaka emavandlheni ya kwalaho hi mahelo-vhiki kumbe nimadyambu.

DYONDZA SWO TALA

Timbhoni Ta Yehovha Ti Ya eMahlweni Ni Ntirho Wo Aka

Vanhu va Yehovha lava nga ni vun’we va aka Tiholo ta Mfumo ni miako yin’wana leswaku ku dzuneka ku yisiwa eka Yehovha ku nga khathariseki matiko lawa va humaka eka wona, mindhavuko ni tindzimi.