Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Mfumo Wa Xikwembu Wa Fuma!

Papila Leri Humaka Eka Huvo Leyi Fumaka

Papila Leri Humaka Eka Huvo Leyi Fumaka

Eka Vahuweleri-kulorhi Va Mfumo:

TIVONE hi tihlo ra mianakanyo u ri xirho xa ndyangu wa Bethele ya le Brooklyn nimixo hi Ravuntlhanu October 2, 1914. U tshame exitulwini lexi u tshamaka eka xona hi nkarhi wa swakudya swo fihlula u rindzele leswaku Makwerhu C. T. Russell a fika ekamareni leri ku dyeriwaka eka rona. Hiloko u vona nyangwa wu pfuleka kutani ku nghena Makwerhu Russell. A fika a miyelanyana, tanihi ntolovelo wakwe kutani a xeweta ndyangu wa Bethele hi ntsako a ku: “Rixile.” Ematshan’weni yo fika a tshama exitulwini xakwe tanihi nhloko ya tafula, u ba mavoko kutani a vula xitiviso lexi tsakisaka lexi nge: “Minkarhi ya Vamatiko yi herile; nkarhi wa ku fuma ka tihosi ta misava se wu fike emakumu!” A wa ha tikoti hi ntsako hikuva nkarhi wolowo a ku ri khale u wu langutele hi mahlo-ngati! Wena swin’we ni swirho swa ndyangu wa Bethele, mahungu lawa ya mi tsakisa ngopfu lerova mi ba mavoko.

 Se ku hundze makume ya malembe ku sukela loko Makwerhu Russell a vule marito wolawo yo tsakisa. I yini leswi Mfumo wu swi endleke ku sukela enkarhini wolowo? Wu endle swo tala. Hikwalaho ka lunghiselelo ra Mfumo, Yehovha hakatsongo-tsongo a ri karhi a antswisa mahanyelo ya vanhu vakwe ni ku va letela, ku sukela loko va ha ri magidi ma nga ri mangani hi 1914 ku ta fika sweswi va nga nhlayo leyi tlulaka timiliyoni ta nkombo ni hafu. Xana wena u vuyeriwe njhani eka ndzetelo wolowo?

Namuntlha hi tala ku twa vamakwerhu va ku, “Kalichi ya Yehovha ya le tilweni yi le ku tsutsumeni!” wolowo i ntiyiso. Hambiswiritano, ntiyiso wa mhaka hileswaku ku sukela hi 1914, kalichi ya le tilweni yi fanekisela xiphemu lexi nga vonakiki xa nhlengeletano ya Yehovha, leyi ku nga khale yi ri karhi yi tsutsuma hi rivilo lerikulu, hilaha u nga ta swi vona hakona loko u ri karhi u hlaya buku leyi hi vukheta. Leswi vahuweleri va Mfumo va tiyimiseleke ku chumayela mahungu lamanene emisaveni hinkwayo, va tirhise tindlela to hambana-hambana leti katsaka ku chumayela hi maphepha-hungu, ku macha va khome maphepha lama nga ni rungula ra le Bibeleni, nkombiso wa swifaniso, makhadi yo nyikela vumbhoni, tigramafoni, xiya-ni-moya hambi ku ri Internet.

Hikwalaho ka leswi Yehovha a katekisaka ntirho lowu, sweswi hi kota ku kandziyisa minkandziyiso leyi sekeriweke eBibeleni leyi nga ni rungula leri tsakisa hi tindzimi to tlula 670, naswona hi yi nyika vanhu mahala. Vatirhi va ku tirhandzela lava titsonaka swo karhi va pfuneta entirhweni wo aka Tiholo ta Mfumo, Tiholo ta Tinhlengeletano ni miako ya rhavi, ematikweni lama fuweke ni lama nga evuswetini. Loko ku va ni timhangu, leswi vamakwerhu va nga ni rirhandzu va ya va ya phalala etindhawini teto, va tiyisekisa leswaku hakunene i vamakwavo lava “velekiweke loko ku ri ni maxangu.”Swiv. 17:17.

Minkarhi yin’wana vafundhisi ni vakaneti van’wana va endla xikungu xo hi hlasela leswaku va vanga “khombo hi xileriso xa nawu,” kambe minkarhi hinkwayo swi hi tiyisa ripfumelo ku vona ndlela leyi matshalatshala ya vona yo ringeta ku sivela ntirho wa hina ma endleke leswaku “mahungu lamanene ma ya emahlweni.”Ps. 94:20; Filp. 1:12.

I lunghelo ku va hi tirha swin’we na n’wina, ‘malandza-kulorhi.’ Tshamani mi ri karhi mi swi tiva leswaku hinkwenu ka n’wina hi mi rhandza swinene. Hi khongelela leswaku rungula leri nga ebukwini leyi ri mi pfuna swinene leswaku mi yi tlangela swinene ndzhaka ya n’wina ya moya ku tlula rini na rini.Mat. 24:45.

Hi mi navelela leswinene,

Vamakwenu,

Huvo leyi Fumaka ya Timbhoni ta Yehovha