Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Mfumo Wa Xikwembu Wa Fuma!

 NDZIMA 7

Tindlela To Chumayela Leti Va Ti Tirhiseke—Va Tirhisa Tindlela Hinkwato Leswaku Va Fikelela Vanhu

Tindlela To Chumayela Leti Va Ti Tirhiseke—Va Tirhisa Tindlela Hinkwato Leswaku Va Fikelela Vanhu

LESWI NGA TA TLHUVUTSIWA EKA NDZIMA LEYI

Vanhu va Xikwembu va tirhisa tindlela to hambana-hambana to chumayela leswaku va fikelela vanhu vo tala hilaha va nga kotaka hakona

1, 2. (a) Hi yihi ndlela leyi Yesu a yi tirhiseke leswaku a vulavula ni ntshungu lowukulu? (b) Xana vadyondzisiwa vo tshembeka va Kreste va xi tekelele njhani xikombiso xakwe naswona ha yini?

MINTSHUNGU yi hlengeletane etlhelo ka Yesu eribuweni ra lwandle, kambe u khandziye byatso kutani a tluta a ya ekulenyana. Ha yini? A a swi tiva leswaku mati a ma ta tlakusa mpfumawulo wa rito rakwe kutani sweswo a swi ta endla leswaku ntshungu lowukulu wu ri twa kahle rungula rakwe.Hlaya Marka 4:1, 2.

2 Eka makume ya malembe ya le kusuhi ni ku velekiwa ka Mfumo, vadyondzisiwa vo tshembeka va Kreste va landzele xikombiso xakwe, hi ku tirhisa tindlela to hambana-hambana leswaku va chumayela mahungu lamanene ya Mfumo eka vanhu vo tala. Ehansi ka nkongomiso wa Hosi, vanhu va Xikwembu va hambeta va fambisana ni ku cinca ka swiyimo ni thekinoloji leyintshwa leyi vaka kona. Hi lava ku chumayela vanhu vo tala hilaha hi nga kotaka hakona makumu ma nga si fika. (Mat. 24:14) Xiya tindlela tin’wana leti hi ti tirhiseke leswaku hi chumayela vanhu, ku nga khathariseki laha va tshamaka kona. Nakambe anakanya hi tindlela leti u nga tekelelaka ripfumelo ra lava chumayeleke mahungu lamanene eminkarhini leyi hundzeke.

Va Fikelela Vanhu Vo Tala

3. Xana valala va ntiyiso va hlundzukisiwe njhani hi ku va hi tirhisa maphepha-hungu?

3 Maphepha-hungu. Makwerhu Russell ni vatirhi-kulobye a va kandziyisa Xihondzo xo Rindza ku sukela hi 1879, va yisela vanhu rungula ra Mfumo. Hambiswiritano, eka makume ya malembe emahlweni ka 1914, a swi vonaka onge Kreste a a hlele leswaku mahungu lamanene a ma ta fikelela hambi ku ri vanhu lava tshamaka ekule. Swiendlakalo leswi tlhandlamanaka swi sungule hi 1903. Hi lembe rero, Dokodela E. L. Eaton, ku nga muvulavuleri wa ntlawa wa vafundhisi va kereke ya Protestente ePenn­sylvania, u ve ni njhekanjhekisano na Charles Taze Russell malunghana ni tidyondzo ta Bibele. Eka papila leri a ri tsaleleke Russell, Eaton u tsale a ku: “Ndzi anakanya leswaku njhekanjhekisano wa le rivaleni wa swin’wana swa swivutiso leswi mina na wena hi nga swi voniki hi tihlo rin’we . . . swi ta va tsakisa swinene vanhu.” Nakambe leswi Russell ni vatirhi-kulobye a va ehleketa leswaku vanhu va ta swi tsakela, kutani va hlele leswaku minjhekanjhekisano yoleyo  yi kandziyisiwa eka phepha-hungu, leri vuriwaka The Pitts­burgh Gazette. Swihloko swa le ka phepha-hungu a swi tiveka swinene naswona nhlamuselo ya Russell leyi nga erivaleni ya ntiyiso wa Bibele yi endle leswaku vakandziyisi va phepha-hungu va lava ku kandziyisa tinkulumo ta Russell vhiki rin’wana ni rin’wana. Hakunene nhluvuko wolowo wu nga ha va wu hlundzukise valala va ntiyiso!

Hi 1914, maphepha-hungu yo tlula 2 000 a ma kandziyisa tinkulumo ta Russell

4, 5. Hi yihi mfanelo leyi Russell a yi kombiseke naswona lava nga ni vu­tihlamuleri va nga xi tekelela njhani xikombiso xakwe?

4 Hi ku hatlisa maphepha-hungu yo tala a ma lava ku kandziyisa tinkulumo ta Russell. Hi 1908, Xihondzo xo Rindza xi vike leswaku tinkulumo a ti kandziyisiwa eka “maphepha-hungu ya 11 nkarhi na nkarhi.” Hambiswiritano, vamakwerhu lava a va tolovelane ni ntirho wa maphepha-hungu va khutaze Russell leswaku loko o rhurhisa tihofisi ta Sosayiti ePittsburgh ti ya edorobeni leri dumeke swinene, maphepha-hungu yo tala a ma ta kandziyisa swihloko leswi sekeriweke eBibeleni. Endzhaku ko anakanyisisa hi xikhutazo xexo ni swivangelo swin’wana, Russell u rhurhisele tihofisi eBrooklyn, le New York, hi 1909. Vuyelo byi ve byihi? Endzhaku ka tin’hweti ti nga ri tingani loko ta ha ku rhurhiseriwa kwalaho, maphepha-hungu ya kwalomu ka 400 a ma kandziyisa tinkulumo swin’we ni swin’wana leswi a swi hoxiwa eka nxaxamelo. Hi nkarhi lowu Mfumo wu simekiweke ha wona hi 1914, maphepha-hungu yo tlula 2 000 a ma kandziyisa tinkulumo ta Russell ni swihloko hi tindzimi ta mune!

5 Hi yihi dyondzo ya nkoka leyi hi yi kumaka eka nhluvuko wolowo? Namuntlha lava nga ni vutihlamuleri lebyikulu enhlengeletanweni ya Xikwembu va endla kahle loko va tekelela ku titsongahata ka Russell. Hi ndlela yihi? Loko va endla swiboho swa nkoka, va fanele va swi tekela enhlokweni swikhutazo swa van’wana.Hlaya Swivuriso 15:22.

6. Xana ntiyiso lowu kandziyisiweke eka swihloko swa phepha-hungu wu n’wi khumbe njhani munhu un’wana?

6 Ntiyiso wa Mfumo lowu kandziyisiweke eka swihloko sweswo swa maphepha-hungu wu cince vutomi bya vanhu. (Hev. 4:12) Hi xikombiso, Ora Hetzel, loyi a khuvuriweke hi 1917, hi un’wana wa vanhu vo tala lava rhangeke va dyondza ntiyiso eka swihloko swo tano. Ora u ri: “Endzhaku ka loko ndzi nghenele vukati, ndzi endzele mana wa mina eRochester, le Minnesota. Loko ndzi fika, ndzi n’wi kume a ri karhi a tsema swihloko eka phepha-hungu. A ku ri tinkulumo ta Russell. Manana u hlamusele leswi a swi dyondzeke eka tona.” Ora u amukele ntiyiso lowu a wu dyondzeke naswona u hete kwalomu ka makume ya malembe ya tsevu a ri muchumayeri loyi a tshembekeke wa Mfumo wa Xikwembu.

7. Ha yini lava rhangelaka va tlhele va ­kambisisa ku tirhisiwa ka maphepha-hungu?

7 Hi 1916, swiendlakalo swimbirhi swa nkoka swi endle leswaku lava a va rhangela va tlhela va kambisisa ku tirhisiwa ka maphepha-hungu eku chumayeleni ka mahungu lamanene. Xo sungula, Nyimpi Leyikulu leyi a yi ri kona hi nkarhi wolowo yi endle leswaku swi tika ku kuma swilo swo kandziyisa ha swona. Hi 1916, xiviko lexi humaka eka ndzawulo ya hina ya maphepha-hungu ya le Britain xi vulavule hi xiphiqo xa kona, hi ku vula leswi: “Sweswi ku ni maphepha-hungu yo tlula 30 ntsena lama  kandziyisaka Tinkulumo. Swi nga ha endleka nhlayo leyi yi hungutiwa swinene tanihi leswi nxavo wa phepha wu tlakukeke swinene.” Xiendlakalo xa vumbirhi i xa ku fa ka Makwerhu Russell hi October 31, 1916. Xisweswo, Xihondzo xo Rindza xa December 15, 1916, xi te: “Leswi se Makwerhu Russell a feke tinkulumo a ti nge he kandziyisiwi [eka maphepha-hungu.]” Hambileswi ndlela leyi yo chumayela yi heleke, ndlela yin’wana yo chumayela hi ku tirhisa “Photo-Drama of Creation,” yi hambete yi va ni vuyelo lebyinene.

8. I yini leswi a swi katseka loko ku endliwa “Photo-Drama of Creation”?

8 Ku tirhisa swifaniso. Russell ni vatirhi-kulobye va tirhe malembe ya kwalomu ka manharhu leswaku va endla “Photo-Drama of Creation,” leyi humesiweke hi 1914. (Swiv. 21:5) Drama leyi hilaha a yi vitaniwa hakona, a yi katsa swifaniso leswi tshukatshukaka, mpfumawulo lowu rhekhodiweke ni tislaydi ta mivalavala. Vanhu va madzana va hoxe xandla eku encenyeteni ka swivono swa le Bibeleni leswi a swi kombisiwa eka filimi yoleyo leyi katsaka  ni swiharhi. Xiviko lexi tsariweke hi 1913 xi ri: “Ku tirhisiwe swiharhi swin’wana swo tala swa le ntangeni lowukulu wa swiharhi leswaku ku endliwa vhidiyo ya swifaniso leswi Tshukatshukaka leswi kombisaka mhaka ya le nkarhini wa Nowa eka nkombiso wolowo lowukulu.” Tanihi leswi ku tirhisiweke tislaydi ta madzana to hambana-hambana eka drama leyi, vampfampfarhuti va le London, New York, Paris na le Philadelphia a va penda slaydi yin’wana ni yin’wana hi voko.

9. Ha yini ku tirhisiwe nkarhi ni mali yo tala leswaku ku endliwa “Photo-Drama”?

9 Ha yini ku tirhisiwe nkarhi ni mali yo tala leswaku ku endliwa “Photo-Drama”? Xihlambanyo lexi endliweke emintsombanweni ya 1913 xa hlamusela: “Ndlela leyi maphepha-hungu ya le Amerika ma swi koteke ha yona ku kucetela mavonelo ya vanhu hi ku tirhisa tiphophayi ni swifaniso eka swiyenge swa wona swa mahungu ya wona ni timagazini swin’we ni ndlela leyi tifilimi ti rhandziwaka ha yona, yi swi kombisa hi ku helela leswaku swa pfuna swinene naswona ha pfumela hi ku helela leswaku swa fanela ku va hina vachumayeri va manguva lawa ni vadyondzisi va titlilasi ta Bibele hi seketela ku tirhisiwa ka tivhidiyo ni tislaydi tanihi ndlela leyi tsakisaka ni leyi vuyerisaka leyi vavuri va evhangeli ni vadyondzisi va nga yi tirhisaka.”

Ehenhla: Nchumu lowu a wu tirhisiwa ku tlanga “Photo-Drama”; Ehansi: Tislaydi ta “Photo-Drama”

10. Xana “Photo-Drama” yi tlangiwe ku fikela kwihi?

10 Hi 1914, “Photo-Drama” yi tlangiwe emadorobeni ya 80 hi siku rin’we. Vanhu va kwalomu ka timiliyoni ta nhungu eUnited States ni le Canada va hlalele drama leyi. Hi lembe rero, “Photo-Drama” yi tlangiwe eAustralia, Britain, Denmark, Finland, Jarimani, New Zealand, Norway, Sweden ni le Switzerland. Ku endliwe drama yin’wana leyi olovisiweke leyi nga riki na swifaniso leswi tshukatshukaka, leyi tlangiweke emadorobeni lamatsongo. Drama yoleyo—“Eureka Drama”—a swi nga durhi ku yi endla naswona a swi olova ku famba na yona. Hi 1916, “Photo-Drama” kumbe “Eureka Drama” yi hundzuluxeriwe hi Xiarmenia, Xidenixi lexi pfanganeke ni Xinorway, Xifurwa, Xijarimani, Xigriki, Xiitaliya, Xipolish, Xipaniya ni Xisweden.

Hi 1914, “Photo-Drama” yi tlangiwe etiholweni leti a ti lo hontlo, hi vanhu

11, 12. “Photo-Drama” yi ve ni vuyelo byihi eka muntshwa un’wana naswona hi xihi xikombiso lexi a xi ­vekeke?

11 Vuhundzuluxeri bya Xifurwa bya “Photo-Drama” byi ve ni vuyelo lebyikulu eka Charles Rohner loyi a nga ni malembe ya 18. Charles u ri: “Yi tlangiwe edorobeni leri ndzi tshamaka eka rona—eColmar, Alsace, le Furwa. To ho suka, ndzi tsakisiwe hi ntiyiso lowu nga erivaleni wa Bibele.”

12 Sweswo swi endle leswaku Charles a khuvuriwa naswona hi 1922 u nghenele ntirho wa nkarhi hinkwawo. Xin’wana xa swiavelo swakwe swo sungula a ku ri ku pfuneta ku tlanga “Photo-Drama” eka vanhu va le Furwa. Loko Charles a hlamusela ntirho lowu u ri: “A ndzi averiwe mintirho yo hlayanyana—ku tlanga vhayolini, ku va nandza wa timali tlhelo nandza wa tibuku. Nakambe ndzi komberiwe ku miyeta vanhu emahlweni ko va nongonoko wu sungula. Hi nkarhi wo wisa a hi phakela minkandziyiso. A hi avela makwerhu ha un’we wa xinuna kumbe wa xisati leswaku a phakela eka xiphemu xo karhi xa holo. Ha un’we a a teka minkandziyiso kutani a ya nyika munhu un’wana ni un’wana loyi a nga eka xiphemu lexi a averiweke xona. Ku engetela kwalaho,  enyangweni wa holo, a hi veka matafula lama nga ni minkandziyiso yo tala.” Hi 1925, Charles u rhambiwe ku ya tirha eBethele ya le Brooklyn, eNew York. Loko a fika kwalaho u averiwe ku rhangela eka okhestra ya le ka xitichi xa xiya-ni-moya lexi a xa ha ku sunguriwa xa WBBR. Endzhaku ka loko hi xiye xikombiso xa Makwerhu Rohner, hi nga ha tivutisa, ‘Xana ndzi tiyimisele ku amukela swiavelo swin’wana ni swin’wana leswi ndzi averiwaka swona leswaku ndzi pfuneta ku chumayela rungula ra Mfumo?’Hlaya Esaya 6:8.

13, 14. Xana xiya-ni-moya xi tirhisiwe njhani eku chumayeleni ka mahungu lamanene? (Nakambe vona bokisi leri nge “ Minongonoko Ya WBBR” ni leri nge “ Ntsombano Lowu Nga Rivalekiki.”)

13 Xiya-ni-moya. Hi va-1920, ntirho wa “Photo-Drama” wu sungule ku hunguteka, kutani xiya-ni-moya hi xona a xi tekiwa tanihi ndlela leyi xiyekaka yo chumayela mahungu lamanene ya Mfumo. Hi April 16, 1922, Makwerhu Rutherford u vulavule ro sungula eka xiya-ni-moya xa le ka Metropolitan Opera House ePhiladelphia, le Pennsylvania. Vanhu va kwalomu ka 50 000 va yingisele nkulumo leyi nge “Timiliyoni Leti Hanyaka Sweswi Ti Nga Ka Ti Nga Fi.” Kutani, hi 1923, nongonoko wa ntsombano wu sungule ku haxiwa eka xiya-ni-moya. Ku engetela eka switichi swa le handle swa xiya-ni-moya, lava rhangelaka va endle xiboho xa leswaku a ku ta va vutlhari loko hi tiakela xitichi xa hina xa xiya-ni-moya, lexi akiweke eXihlahleni xa Staten, le New York naswona xi tsarisiweke tanihi WBBR. Xi sungule ku haxa emoyeni hi February 24, 1924.

Hi 1922, vanhu va kwalomu ka 50 000 va yingisele nkulumo leyi nge “Timiliyoni Leti Hanyaka Sweswi Ti Nga Ka Ti Nga Fi”

14 Loko xi hlamusela xikongomelo xa WBBR, Xihondzo xo Rindza xa December 1, 1924, xi te: “Hi tshemba leswaku xiya-ni-moya i xitirhisiwa lexi nga durhiki ni lexi pfunaka ku chumayela rungula ra ntiyiso lexi nga si tshamaka xi tirhisiwa.” Kutani xi engetele xi ku: “Loko Hosi yi vona swi fanerile leswaku hi aka switichi swin’wana swa xiya-ni-moya leswaku hi chumayela rungula ra ntiyiso, yi ta hi nyika mali hi ndlela ya yona leyinene.” (Ps. 127:1) Hi 1926, vanhu va Yehovha a va ri ni switichi swa xiya-ni-moya swa tsevu. Swimbirhi a swi ri eUnited States—xa WBBR a xi ri eNew York naswona xa WORD a xi ri ekusuhi ni le Chicago. Swin’wana swa mune a swi ri eCanada, ekusuhi ni le Alberta, British Columbia, Ontario na Saskatchewan.

15, 16. (a) Xana vafundhisi va le Canada va endle yini hi switichi swa hina? (b) Xana tinkulumo ta le ka xiya-ni-moya ni ntirho wo chumayela hi yindlu ni yindlu swi fambisana njhani?

15 Nongonoko lowu wo chumayela ntiyiso wa Bibele wu xiyiwe ni hi vafundhisi va Vujagana. Albert Hoffman, loyi a tolovelane ni ntirho lowu a wu endliwa exitichini xa xiya-ni-moya xa le Sas­katchewan, eCanada, u te: “Vanhu vo tala va sungule ku tiva Swichudeni swa Bibele [hilaha Timbhoni ta Yehovha a ti vitaniwa hakona]. Ku chumayeriwe hi ndlela yoleyo leyinene kukondza ku fika lembe ra 1928, loko vafundhisi va kucetela vatirhela-mfumo leswi endleke leswaku switichi hinkwaswo swa le Canada swa Swichudeni swa Bibele swi tekeriwa maphepha lama swi pfumelelaka ku haxa.”

16 Ku nga khathariseki ku pfariwa ka switichi swa hina swa xiya-ni-moya swa le Canada, tinkulumo ta Bibele ti hambete ti haxiwa eka switichi swa le handle swa xiya-ni-moya. (Mat. 10:23) Leswaku minongonoko yoleyo yi va leyi vuyerisaka, Xihondzo xo  Rindza na The Golden Age (leyi sweswi yi vitaniwaka Xalamuka!) a swi ri ni nxaxamelo wa mavito ya switichi swa xiya-ni-moya leswi haxaka ntiyiso wa Bibele leswaku vahuweleri lava chumayelaka hi yindlu ni yindlu va ta khutaza vanhu ku yingisela tinkulumo eka switichi swa laha va tshamaka kona. Vuyelo byi ve byihi? Bulletin ya January 1931 yi ri: “Ntirho wa xiya-ni-moya wu va khutaze swinene vamakwerhu leswaku va chumayela hi yindlu ni yindlu. Ku te swiviko swo tala erhavini leswi hi byelaka leswaku vanhu va rhiye ndleve naswona hikwalaho ko yingisela tinkulumo ta Makwerhu Rutherford a va tiyimisele ku teka tibuku leti a va nyikiwa tona.” Kutani Bulletin yi hlamusele lunghiselelo ro haxa hi xiya-ni-moya ni ntirho wo chumayela hi yindlu ni yindlu tanihi “tindlela timbirhi letikulu to chumayela ta nhlengeletano ya Hosi.”

17, 18. Hambileswi swiyimo swi cinceke, xana xiya-ni-moya xi hambete xi va xa nkoka hi ndlela yihi?

17 Hi va-1930, nkaneto wu ye wu tinyika matimba hileswi a hi tirhisa switichi swa xiya-ni-moya swa le handle. Kutani eku heleni ka 1937, vanhu va Yehovha va fambisane ni ku cinca ka swiyimo. Va tshike ku haxa eka switichi swa xiya-ni-moya swa le handle kutani va dzika swinene eka ntirho wo chumayela hi yindlu ni yindlu. * Nilokoswiritano, xiya-ni-moya xi hambete xi va xitirhisiwa xa nkoka eku chumayeleni ka rungula ra Mfumo etindhawini tin’wana ta le kule ta misava. Hi xikombiso, ku sukela hi 1951 ku ya fika hi 1991, xitichi xa xiya-ni-moya xa le Vupela-dyambu bya Berlin, eJarimani, nkarhi na nkarhi a xi haxa tinkulumo ta Bibele leswaku lava tshamaka etindhawini leti hi nkarhi wolowo a ti ri eVuxeni bya Jarimani va ta kota ku twa rungula ra Mfumo. Ku sukela hi 1961 naswona ku ringana makume ya malembe yo tlula manharhu endzhaku ka kwalaho, xitichi xa xiya-ni-moya xa le matikweni yo hambana-hambana le Suriname, eAmerika Dzonga, a xi haxa nongonoko wa timinete ta 15 vhiki ni vhiki lowu a wu endla leswaku rungula ra Bibele ri hangalaka. Ku sukela hi 1969 ku ya fika hi 1977, nhlengeletano yi humese minongonoko ya xiya-ni-moya yo tlula 350 leyi rhekhodiweke ya ntlhandlamano lowu nge “Matsalwa Hinkwawo Ma Pfuna.” Le United States, switichi swa xiya-ni-moya swa 291 eswifundzheni swa 48 a swi haxa minongonoko leyi. Hi 1996, xitichi xa xiya-ni-moya xa le Apia, ku nga ntsindza wa doroba ra Pacific Dzonga etikweni ra Samoa, xi haxe nongonoko vhiki ni vhiki lowu nga ni nhloko-mhaka leyi nge “Tinhlamulo Ta Swivutiso Swa Bibele.”

18 Loko lembe-xidzana ra vu-20 ri ya eku heleni, xiya-ni-moya a xi nga ha ri xa nkoka eku chumayeleni ka mahungu lamanene. Hambiswiritano, ku ve ni thekinoloji yin’wana leyi endleke leswaku swi koteka ku chumayela vanhu vo tala.

19, 20. Ha yini vanhu va ­Yehovha va endle jw.org ­naswona ku ve ni vuyelo byihi? (Nakambe vona ­bokisi leri nge “ JW.ORG.”)

19 Internet. Hi 2013, vanhu vo tlula 2,7 wa tibiliyoni, ku nga vaaki lava tlulaka tiphesente ta 40 emisaveni, se a va tirhisa Internet. Hi ku ya hi swiringanyeto swo karhi, vanhu va kwalomu ka tibiliyoni timbirhi va nghena eka Internet hi ku tirhisa switirhisiwa swo tanihi ti-smartphone na ti-tablet. Nhlayo yoleyo yi hambete yi engeteleka emisaveni hinkwayo, Internet yi ya yi tirhisiwa  swinene eAfrika, laha ku nga ni switirhisiwa leswi tirhisaka Inter­net swo tlula 90 wa timiliyoni. Kahle-kahle, nhluvuko wolowo wu cince ndlela leyi vanhu vo tala va kumaka rungula ha yona.

20 Ku sukela hi 1997, vanhu va Yehovha va sungule ku tirhisa ndlela leyi yo vulavurisana ha yona. Hi 2013, Web site ya jw.org yi sungule ku kumeka hi tindzimi ta kwalomu ka 300 naswona ku endliwe leswaku vanhu va kota ku kopa rungula leri sekeriweke eBibeleni hi tindzimi to tlula 520. Siku ni siku, vanhu vo tlula 750 000 va nghena eka Web site yoleyo. Ku engetela eka ku hlalela tivhidiyo, n’hweti yin’wana ni yin’wana, vanhu va kopa tibuku leti heleleke ta timiliyoni tinharhu, timagazini ta mune wa timiliyoni leti heleleke ni ti-CD ta 22 wa timiliyoni.

21. Xana u dyondze yini eka ntokoto wa Sina?

21 Web site yi ve xitirhisiwa lexinene xa ndlela yo chumayela mahungu lamanene ya Mfumo wa Xikwembu, hambi ku ri ematikweni lawa ntirho wa hina wo chumayela wu yirisiweke. Hi xikombiso, eku sunguleni ka 2013, wanuna loyi a vuriwaka Sina u nghene eka jw.org kutani a fonela ntsindza wa misava hinkwayo wa Timbhoni ta Yehovha, lowu nga eUnited States, a kombela rungula leri engetelekeke malunghana ni Bibele. I yini leswi endleke leswaku ku fona kakwe ku va loku hlamarisaka? Sina i Mumoslem naswona u tshama eximutanini lexi nga ekule etikweni leri ntirho wa Timbhoni ta Yehovha wu yirisiweke. Hikwalaho ka sweswo, ku endliwe malunghiselelo ya leswaku Sina a dyondza Bibele kambirhi hi vhiki ni Mbhoni leyi tshamaka eUnited States. Dyondzo a yi fambisiwa hi ku tirhisa vhidiyo leyi nga eka Internet.

Ku Dyondzisa Vanhu

22, 23. (a) Xana tindlela to chumayela vanhu vo tala ti sive ntirho wo chumayela hi yindlu ni yindlu? (b) Xana Hosi yi ma katekise njhani matshalatshala ya hina?

22 Eka tindlela leti hi ti tirhiseke leswaku ku chumayeriwa vanhu vo tala to tanihi ku tirhisa maphepha-hungu, “Photo-Drama,” minongonoko ya xiya-ni-moya ni Web site ku hava leyi siveke  ntirho wo chumayela hi yindlu ni yindlu. Ha yini? Hikuva vanhu va Yehovha va landzele xikombiso xa Yesu. U endle swo tala ku tlula ku chumayela mintshungu leyikulu; a a dzike eka ku pfuna vanhu. (Luka 19:1-5) Nakambe Yesu u letele vadyondzisiwa vakwe leswaku va endla hilaha ku fanaka naswona u va nyike rungula leri a va fanele va ri chumayela. (Hlaya Luka 10:1, 8-11.) Hilaha swi hlamuseriweke hakona eka Ndzima 6, minkarhi hinkwayo lava rhangelaka va khutaza nandza un’wana ni un’wana wa Yehovha leswaku a vulavula hi ku kongoma ni vanhu.Mint. 5:42; 20:20.

23 Eka malembe ya dzana endzhaku ka loko Mfumo wu velekiwile, vahuweleri va timiliyoni to tlula 7,9 va tirhe hi ku hiseka entirhweni wo dyondzisa van’wana hi swikongomelo swa Xikwembu. Handle ko kanakana, Hosi yi katekise tindlela to chumayela leti hi ti tirhiseke leswaku hi chumayela hi Mfumo. Hilaha ndzima leyi landzelaka yi nga ta kombisa hakona, yi tlhele yi hi nyika switirhisiwa leswi hi swi lavaka leswaku hi ta chumayela mahungu lamanene eka matiko hinkwawo, tinyimba hinkwato ni tindzimi hinkwato.Nhlav. 14:6.

^ ndzim. 17 Hi 1957, lava a va rhangela va endle xiboho xo pfala WBBR eNew York, ku nga xitichi xa hina xo hetelela xa ­xiya-ni-moya.

DYONDZA SWO TALA

Hi Yihi Ndlela Leyi Hi Faneleke Hi “Hlamula Un’wana Ni Un’wana” Ha Yona?

Hi nga kanerisana njhani ni van’wana hi Matsalwa loko va hi vutisa swivutiso swo tika? Xiya tindlela tinharhu leti hi nga ti tirhisaka ku va hlamula hi ndlela leyi khorwisaka.