Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Mfumo Wa Xikwembu Wa Fuma!

 NDZIMA 17

Ku Letela Vatirheli Va Mfumo

Ku Letela Vatirheli Va Mfumo

LESWI NGA TA TLHUVUTSIWA EKA NDZIMA LEYI

Ndlela leyi ha yona swikolo leswi kongomisiwaka hi Xikwembu swi lunghiselelaka vatirheli va Mfumo leswaku va hetisisa swiavelo swa vona

1-3. Yesu u wu ndlandlamuxe njhani ntirho wo chumayela naswona ku tlakuka swivutiso swihi?

YESU u chumayele etikweni hinkwaro ra Galeliya ku ringana malembe mambirhi. (Hlaya Matewu 9:35-38.) U endzele madoroba ni swimitana swo tala, a ri karhi a dyondzisa emasinagogeni ni ku chumayela mahungu lamanene ya Mfumo. Kun’wana ni kun’wana laha a chumayela kona, mintshungu a yi khitikanela eka yena. Yesu u swi xiyile leswaku “ntshovelo i wukulu” naswona a ku laveka vatirhi lava engetelekeke.

2 Yesu u hlele ku ndlandlamuxa ntirho wo chumayela. Njhani? Hi ku rhumela vaapostola vakwe va 12 “ku ya chumayela hi Mfumo wa Xikwembu.” (Luke 9:1, 2) Swi nga ha endleka leswaku vaapostola a va tivutisa leswaku va ta wu endla njhani ntirho lowu. Emahlweni ko va a va rhuma, hi rirhandzu Yesu u va nyike nchumu lowu Tata wakwe wa le tilweni a n’wi nyikeke wona, ku nga ndzetelo.

3 U nga tivutisa swivutiso swo hlayanyana swo tanihi leswi nge: Hi wihi ndzetelo lowu Yesu a wu kumeke eka Tata wakwe? Hi wihi ndzetelo lowu Yesu a wu nyikeke vaapostola vakwe? Nakambe ku vuriwa yini hi namuntlha—xana Hosi leyi nga Mesiya yi letele valandzeri va yona leswaku va hetisisa vutirheli bya vona? Loko swi ri tano, njhani?

“Ndzi Vulavula Swilo Leswi Hilaha Tatana A Ndzi Dyondziseke Hakona”

4. Xana Yesu u dyondzisiwe hi Tata wakwe rini naswona kwihi?

4 Yesu u pfumerile leswaku leswi a swi dyondzisa a a dyondzisiwe hi Tata wakwe. Hi nkarhi wa vutirheli byakwe, Yesu u te: “Ndzi vulavula swilo leswi hilaha Tatana a ndzi dyondziseke hakona.” (Yoh. 8:28) Xana Yesu u dyondzisiwe rini naswona kwihi? Entiyisweni ndzetelo wakwe wu sungule hi ku hatlisa endzhaku ka loko a vumbiwile tanihi leswi a nga Mativula ya Xikwembu. (Kol. 1:15) Leswi a ri etlhelo ka Tata wakwe wa le tilweni, N’wana u hete malembe ya ntsandza-vahlayi a ri karhi a yingisa ni ku xiyisisa “Muleteri Lonkulu.” (Esa. 30:20) Hikwalaho ka sweswo, N’wana u kume dyondzo leyi nga pimanisiwiki na nchumu eka timfanelo, mintirho ni swikongomelo swa Tata wakwe.

5. Hi wihi ndzetelo lowu Tatana a wu nyikeke N’wana hi vutirheli lebyi a ta byi hetisisa emisaveni?

5 Hi nkarhi lowu faneleke, Yehovha u dyondzise N’wana wakwe hi vutirheli lebyi a ta byi endla emisaveni. Kambisisa vuprofeta lebyi hlamuselaka vuxaka lebyi nga kona exikarhi ka Muleteri Lonkulu ni N’wana wakwe wa mativula. (Hlaya Esaya 50:4, 5.) Vuprofeta byi vula leswaku Yehovha a a pfuxa N’wana wakwe “mixo wun’wana ni wun’wana.” Xifaniso xexo xi kombisa ndlela leyi ha  yona mudyondzisi a pfuxaka vana vakwe va xikolo nimixo leswaku a ta va dyondzisa. Buku yin’wana ya tinhlamuselo ta Bibele yi ri: “Yehovha . . . a a n’wi teka tanihi n’wana loyi a nga exikolweni kutani a n’wi dyondzisa leswi a fanele a swi chumayela ni ndlela leyi a faneleke a chumayela ha yona.” Eka “xikolo,” xexo xa le tilweni, Yehovha u dyondzise N’wana wakwe ‘leswi a nga ta swi hlamusela ni ku swi vulavula.’ (Yoh. 12:49) Nakambe Tatana u nyike N’wana wakwe swiletelo swa ndlela leyi a nga ta dyondzisa ha yona. * Loko a ri laha misaveni, Yesu u tirhise ndzetelo wakwe hi ndlela leyinene ku nga ri hi ku hetisisa vutirheli byakwe ntsena kambe ni ku tlhela a letela valandzeri vakwe leswaku va hetisisa vutirheli bya vona.

6, 7. (a) Hi wihi ndzetelo lowu Yesu a wu nyikeke vaapostola vakwe naswona wu va hlomisele leswaku va endla yini? (b) Yesu u tiyisekise leswaku valandzeri vakwe va le nkarhini wa hina va kuma ndzetelo wa njhani?

6 Hi wihi ndzetelo lowu Yesu a wu nyikeke vaapostola vakwe, hilaha swi hlamuseriweke hakona eku sunguleni ka xihloko lexi? Hi ku ya hi Matewu ndzima 10, u va nyike swiletelo leswi kongomeke swa ntirho wa nsimu, ku katsa ni leswi landzelaka: laha va faneleke va chumayela kona (tindzimana 5, 6), rungula leri va faneleke va ri chumayela (ndzimana 7), xilaveko xo va va tshemba Yehovha (tindzimana 9, 10), ndlela yo sungula mabulo ni vini va miti (tindzimana 11-13), ndlela yo langutana ni ku landzuriwa (tindzimana 14, 15) ni ndlela leyi va nga angulaka ha yona loko va xanisiwa (tindzimana 16-23). * Ndzetelo lowu nga erivaleni lowu Yesu a wu nyikeke vaapostola vakwe wu va hlomisele leswaku va rhangela eka ntirho wo chumayela mahungu lamanene hi lembe-xidzana ro sungula C.E.

7 Ku vuriwa yini enkarhini wa hina? Yesu, Hosi ya Mfumo wa Xikwembu u nyike valandzeri vakwe swiavelo swa nkoka swinene, ku nga ku chumayela “mahungu lamanene lawa ya Mfumo . . . emisaveni hinkwayo leyi akiweke leswaku byi va vumbhoni ematikweni hinkwawo.” (Mat. 24:14) Xana Hosi yi hi leterile leswaku hi hetisisa ntirho lowu hinkwawo wa nkoka? Ina, yi hi leterile! Ku suka etilweni, Hosi yi tiyisekise leswaku valandzeri va yona va kuma ndzetelo wa ndlela leyi va nga ta chumayela ha yona ehandle ka vandlha ni ndlela leyi va nga hetisisaka vutihlamuleri bya vona byo hlawuleka evandlheni.

Ku Letela Vatirheli Leswaku Va Va Vachumayeri Va Evhangeli

8, 9. (a) Hi xihi xikongomelo lexikulu xa Xikolo xa Vutirheli bya le Tilweni? (b) Xana Xikolo xa Vutirheli bya le Tilweni xi ku pfune njhani leswaku u chumayela hi ndlela leyi humelelaka?

8 I khale nhlengeletano ya Yehovha yi ri karhi yi tirhisa tinhlengeletano ni minhlangano ya vandlha—yo tanihi Nhlangano wa Ntirho—leswaku yi letela vanhu va Xikwembu ku hetisisa vutirheli bya vona. Hambiswiritano, ku sukela hi va-1940, vamakwerhu lava rhangelaka entsindza wa Timbhoni ta Yehovha va sungule ku hlela leswaku ku va ni ndzetelo hi ku tirhisa swikolo swo hambana-hambana.

9 Xikolo xa Vutirheli bya le Tilweni. Hilaha hi swi voneke hakona eka ndzima leyi hundzeke, xikolo lexi xi sungule ku fambisiwa hi 1943. Xana xikongomelo xa xikolo lexi i ku letela swichudeni ntsena leswaku swi nyikela tinkulumo leti akaka  eminhlanganweni ya vandlha? Doo! Xikongomelo lexikulu xa xikolo lexi minkarhi hinkwayo xa fana, ku nga ku letela vanhu va Xikwembu leswaku va tirhisa nyiko ya vona yo vulavula leswaku va dzunisa Yehovha evutirhelini. (Ps. 150:6) Xikolo lexi xi hlomisela vamakwerhu hinkwavo lava tsariseke leswaku va va vatirheli va Mfumo lava humelelaka.

10, 11. I vamani lava sweswi va nga yaka eXikolweni xa Giliyadi naswona hi xihi xikongomelo xa xona?

10 Xikolo xa Bibele xa Giliyadi xa Watchtower. Xikolo lexi sweswi xi vitaniwaka Xikolo xa Bibele xa Giliyadi xa Watchtower xi sungule hi Musumbhunuku, February 1, 1943. Eku sunguleni xikolo lexi a xi endleriwe ku letela maphayona ni malandza man’wana ya nkarhi hinkwawo leswaku ma ya endla ntirho wa vurhumiwa ematikweni man’wana. Kambe ku sukela hi October 2011, lunghelo leri ri pfulekele ni vamakwerhu van’wana lava se va nga eka mintirho yin’wana yo hlawuleka ya nkarhi hinkwawo—maphayona yo hlawuleka, valanguteri va miganga ni va swifundzha swin’we ni vasati va vona, vatirhi va le Bethele ni varhumiwa lava nga si tshamaka va ya exikolweni lexi.

11 Xana hi xihi xikongomelo xa Xikolo xa Giliyadi? Muleteri un’wana loyi a nga ni nkarhi wo leha u hlamula a ku: “I ku tiyisa ripfumelo ra swichudeni hi ku dyondza Rito ra Xikwembu hi vukheta ni ku swi pfuna leswaku swi kurisa timfanelo ta moya leti lavekaka leswaku swi lwisana ni mintlhontlho hi ndlela leyi humelelaka eswiavelweni swa swona. Nakambe xikongomelo lexikulu xa xikolo lexi i ku dyondzisa swichudeni leswaku swi swi navela swinene ku endla ntirho wo chumayela.”—Efe. 4:11.

12, 13. Hi byihi vuyelo lebyi Xikolo xa Giliyadi xi veke na byona entirhweni wo chumayela emisaveni hinkwayo? Nyika xikombiso.

12 Hi byihi vuyelo lebyi Xikolo xa Giliyadi xi veke na byona entirhweni wo chumayela emisaveni hinkwayo? Ku sukela hi 1943, ku leteriwe vanhu vo tlula 8 500 exikolweni lexi * naswona varhumiwa lava leteriweke exikolweni xa Giliyadi va tirhe ematikweni yo tlula 170 emisaveni hinkwayo. Varhumiwa va tirhise ndzetelo wa vona hi ndlela leyinene, va veka xikombiso lexinene hi ku hiseka evutirhelini ni ku letela van’wana leswaku va endla hilaha ku fanaka. Minkarhi yo tala, varhumiwa a va rhangela entirhweni wo chumayela etindhawini leti ku nga ni vahuweleri vatsongo va Mfumo kumbe leti nga riki na vona hi ku helela.

13 Xiya leswi endlekeke eJapani, laha ntirho wo chumayela etindhawini ta mani na mani wu yimisiweke hi nkarhi wa Nyimpi ya Vumbirhi ya Misava. Hi August 1949, a ku ri ni vahuweleri lava nga ehansi ka khume eJapani. Hambiswiritano, eku heleni ka lembe rero varhumiwa lava leteriweke exikolweni xa Giliyadi va 13 a va khomekile hi ntirho wo chumayela eJapani. Ku landzele varhumiwa vo tala. Eku sunguleni, varhumiwa a va chumayela emadorobeni lamakulu; kambe hi ku famba ka nkarhi, va ye ni le madorobeni man’wana. Varhumiwa va khutaze swichudeni swa vona ni van’wana leswaku va va joyina entirhweni wa vuphayona. Ku hiseka ka varhumiwa swi tswale mihandzu. Sweswi, ku ni vachumayeri va Mfumo vo tlula 216 000 eJapani naswona ku ni maphayona lama endlaka tiphesente ta kwalomu ka 40! *

14. Swikolo leswi kongomisiwaka hi Xikwembu swi nyikela vumbhoni byihi lebyi tiyeke? (Nakambe vona bokisi leri nge “ Swikolo Leswi Letelaka Vatirheli Va Mfumo,” tluka 188.)

14 Swikolo swin’wana leswi kongomisiwaka hi Xikwembu.  Xikolo xa Ntirho wa Vuphayona, Xikolo Xa Bibele Xa Mimpatswa Leyi Nga Vakreste ni Xikolo xa Bibele xa Vamakwerhu lava nga Tekangiki swi pfune lava yeke eka swona leswaku va kula hi tlhelo ra moya ni leswaku va rhangela hi ku hiseka entirhweni wo chumayela. *swi nyikela vumbhoni lebyi tiyeke bya leswaku Hosi ya hina yi hlomise valandzeri va yona hi ku helela leswaku va hetisisa vutirheli bya vona.—2 Tim. 4:5.

Ku Letela Vamakwerhu Leswaku Va Hetisisa Vutihlamuleri Byo Hlawuleka

15. Vamakwerhu lava nga ni vutihlamuleri va lava ku tekelela Yesu hi ndlela yihi?

15 Tsundzuka vuprofeta bya Esaya lebyi vulavulaka hi Yesu loko a ri karhi a leteriwa hi Xikwembu. Eka “xikolo” xexo xa le tilweni, N’wana u dyondze ku ‘tiva ndlela leyinene yo angula loyi a karhaleke.’ (Esa. 50:4) Yesu u tirhise ndzetelo wolowo; loko a ri laha misaveni u phyuphyise lava “tirhaka hi matimba ni lava tikeriwaka.” (Mat. 11:28-30) Hi ku tekelela Yesu, vavanuna lava nga ni vutihlamuleri evandlheni va lava ku va lava phyuphyisaka eka vamakwerhu va vona. Kutani, swikolo swo hambana-hambana swi  endleriwe ku pfuna vamakwerhu lava fanelekaka leswaku va va mpfuno lowukulu loko va ri karhi va tirhela vapfumeri-kulobye.

16, 17. Hi xihi xikongomelo xa Xikolo xa Vutirheli bya Mfumo? (Nakambe vona nhlamuselo ya le hansi.)

16 Xikolo xa Vutirheli bya Mfumo. Tlilasi yo sungula ya xikolo lexi yi sungule hi March 9, 1959, eSouth Lansing, le New York. Valanguteri va miganga ni va swifundzha swin’we vakulu va vandlha va rhambiwe leswaku va ya eka khoso leyi tekaka n’hweti. Endzhakunyana, khoso leyi yi hundzuluxeriwe yi suka eka Xinghezi yi ya eka tindzimi tin’wana naswona hakatsongo-tsongo xikolo xi sungule ku letela vamakwerhu emisaveni hinkwayo. *

Makwerhu Lloyd Barry a ri karhi a dyondzisa eka Xikolo xa Vutirheli bya Mfumo eJapani, hi 1970

17 Malunghana ni xikongomelo xa Xikolo xa Vutirheli bya Mfumo, Buku Ya Lembe Ya Timbhoni Ta Yehovha Ya 1962 yi te: “Emisaveni leyi, leyi tshamaka yi khomekile mulanguteri wa vandlha ra timbhoni ta Yehovha u fanele a va wanuna loyi a kotaka ku hlela vutomi byakwe leswaku a ta khathala swinene hi vanhu hinkwavo evandlheni ni ku va nkateko eka vona. Hi hala tlhelo a nga fanelanga a va wanuna loyi a honisaka ndyangu wakwe hikwalaho ka vandlha, kambe u fanele a va a hlutekile emianakanyweni. Mawaku lunghelo leri vakulu va vandlha emisaveni hinkwayo va nga na rona ra ku hlangana swin’we eka Xikolo xa Vutirheli bya Mfumo  leswaku va ta kuma ndzetelo lowu nga ta va pfuna ku endla leswi Bibele yi vulaka leswaku mulanguteri u fanele a swi hetisisa!”—1 Tim. 3:1-7; Tito 1:5-9.

18. Xana vanhu hinkwavo va Xikwembu va vuyeriwa njhani eka Xikolo xa Vutirheli bya Mfumo?

18 Vanhu hinkwavo va Xikwembu va vuyeriwile eka Xikolo xa Vutirheli bya Mfumo. Njhani? Loko vakulu ni malandza ya vutirheli va tirhisa leswi va swi dyondzeke exikolweni, va ta va lava phyuphyisaka eka vapfumeri-kulobye ku fana na Yesu. Xana a wu ma tlangeli marito ya musa, ku yingiseriwa kumbe riendzo leri khutazaka ra nkulu kumbe nandza wa vutirheli? (1 Tes. 5:11) Hakunene vavanuna vo tano lava fanelekaka i nkateko emavandlheni ya vona!

19. Hi swihi swikolo swin’wana leswi Komiti yo Dyondzisa yi swi langutelaka naswona swikolo sweswo swi endleriwe yini?

19 Swikolo swin’wana leswi kongomisiwaka hi Xikwembu. Komiti yo Dyondzisa ya Huvo leyi Fumaka yi langutela swikolo swin’wana leswi nyikelaka ndzetelo eka vamakwerhu va xinuna lava nga ni vutihlamuleri enhlengeletanweni. Swikolo sweswo swi endleriwe ku pfuna vamakwerhu lava nga ni vutihlamuleri—vakulu va vandlha, valanguteri va miganga ni va swifundzha ni swirho swa Komiti ya Rhavi—leswaku va hetisisa vutihlamuleri bya vona byo tala hi ndlela leyi humelelaka. Khoso leyi sekeriweke eBibeleni yi khutaza vamakwerhu leswaku va hlayisa vuxaka bya vona na Yehovha ni ku tirhisa milawu ya Matsalwa loko va tirhisana ni tinyimpfu ta risima leti Yehovha a va nyikeke vutihlamuleri byo ti khathalela.—1 Pet. 5:1-3.

Tlilasi yo sungula ya Xikolo xa Ndzetelo wa Vutirheli lexi khomeriweke eMalawi, hi 2007

20. Ha yini Yesu a vule leswaku hinkwerhu hi ‘dyondzisiwa hi Yehovha’ naswona u tiyimisele ku endla yini?

20 Swi le rivaleni leswaku Hosi leyi nga Mesiya yi tiyisekise leswaku valandzeri va yona va leteriwa kahle. Ndzetelo hinkwawo wu huma etilweni: Yehovha u letele N’wana wakwe kutani N’wana a letela valandzeri vakwe. Xisweswo, Yesu a nga vula leswaku hinkwerhu hi ‘dyondzisiwa hi Yehovha.’ (Yoh. 6:45; Esa. 54:13) A hi tiyimiseleni ku wu tirhisa hi ku helela ndzetelo lowu Hosi ya hina yi hi nyikaka wona—ku nga khathariseki leswaku hi le ka Xikolo xa Vutirheli bya le Tilweni, minhlangano yin’wana ya vandlha kumbe eka swikolo swin’wana leswi ku buriweke ha swona eka ndzima leyi. Nakambe a hi tsundzukeni leswaku xikongomelo lexikulu xa ndzetelo lowu hinkwawo i ku hi pfuna leswaku hi tshama hi tiyile emoyeni leswaku hi ta byi hetisisa hi xitalo vutirheli bya hina.

^ ndzim. 5 Xana hi swi tiva njhani leswaku Tatana u dyondzise N’wana ndlela yo chumayela? Xiya leswi: Yesu u tirhise swifaniso swo tala eka tidyondzo takwe leswaku a hetisisa vuprofeta lebyi tsariweke eka malembe-xidzana emahlweni ko va a velekiwa. (Ps. 78:2; Mat. 13:34, 35) Swi le rivaleni leswaku Mutsari wa vuprofeta byebyo, ku nga Yehovha a vule ka ha ri emahlweni leswaku N’wana wakwe a ta dyondzisa hi ku tirhisa swifaniso.—2 Tim. 3:16, 17.

^ ndzim. 6 Endzhakunyana ka tin’hweti, Yesu ‘u hlawule van’wana va 70 kutani a va rhuma hi vambirhi-mbirhi’ leswaku va ya chumayela. U tlhele a va letela.—Luka 10:1-16.

^ ndzim. 12 Lava tsariseke va ye eXikolweni xa Giliyadi ku tlula kan’we.

^ ndzim. 13 Leswaku u kuma rungula leri engetelekeke malunghana ni vuyelo lebyi veke kona ensin’wini bya varhumiwa lava leteriweke exikolweni xa Giliyadi, vona ndzima 23 ya buku leyi nge Timbhoni Ta Yehovha I Vahuweleri Va Mfumo Wa Xikwembu.

^ ndzim. 14 Swikolo sweswo swimbirhi swi siviwe hi Xikolo Xa Vachumayeri Va Mfumo.

^ ndzim. 16 Sweswi vakulu hinkwavo va vuyeriwa eka minongonoko ya Xikolo xa Vutirheli bya Mfumo lexi nga heriki hi minkarhi leyi fanaka naswona xi khomiwaka endzhaku ka malembe yo hlayanyana. Ku sukela hi 1984, malandza ya vutirheli na wona ma kume ndzetelo exikolweni lexi.

DYONDZA SWO TALA

“Khulela Nenge Wa Wena Ndlela” Leswaku U Endla Nhluvuko

U nga swi susa njhani swihinga ivi u fikelela tipakani ta wena ta moya?

Pfuna Van’wana Leswaku Va Wupfa Hi Tlhelo Ra Moya

Hi nga va pfuna njhani vamakwerhu va xinuna lava ha riki vantshwa kumbe lava ha ku khuvuriwaka leswaku va endla nhluvuko?