Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Mfumo Wa Xikwembu Wa Fuma!

 NDZIMA 16

Ku Hlengeletana Swin’we Leswaku Hi Gandzela

Ku Hlengeletana Swin’we Leswaku Hi Gandzela

LESWI NGA TA TLHUVUTSIWA EKA NDZIMA LEYI

Kambisisa ndlela leyi minhlangano ya hina yi sunguleke ha yona ni leswaku ha yini yi ri ya nkoka

1. Loko vadyondzisiwa va hlengeletane swin’we, hi wihi mpfuno lowu va wu kumeke naswona ha yini a va wu lava?

ENDZHAKUNYANA ka ku pfuxiwa ka Yesu, vadyondzisiwa va hlengeletanile leswaku va ta khutazana. Hambiswiritano, va lotlele minyangwa hikwalaho ko chava valala va vona. Kambe ku chava loku a va ri na kona ku herile loko Yesu a humelela exikarhi ka vona kutani a ku: “Amukelani moya lowo kwetsima”! (Hlaya Yohane 20:19-22.) Endzhakunyana, vadyondzisiwa va tlhele va hlengeletana swin’we naswona Yehovha u va chululele moya lowo kwetsima. Mawaku matimba lawa va ma kumeke yo endla ntirho wo chumayela lowu a va fanele va wu endla!Mint. 2:1-7.

2. (a) Xana Yehovha u hi nyika njhani matimba naswona ha yini hi ma lava? (b) Ha yini lunghiselelo ra Vugandzeri bya Ndyangu ri ri ra nkoka swinene? (Vona nhlamuselo ya le hansi ni bokisi leri nge “ Vugandzeri Bya Ndyangu.”)

2 Hi langutana ni swiphiqo swo fana ni swa vamakwerhu volavo va lembe-xidzana ro sungula. (1 Pet. 5:9) Minkarhi yin’wana, van’wana va hina hi nga ha xaniseka hikwalaho ko chava vanhu. Kutani hi lava matimba lawa Yehovha a ma nyikaka loko hi lava ku tiyisela entirhweni wo chumayela. (Efe. 6:10) Yehovha u hi nyika matimba wolawo hi ku tirhisa minhlangano ya hina. Sweswi hi ni lunghelo ro va kona eka minhlangano yimbirhi ya vhiki ni vhiki leyi vuyerisaka, ku nga Nkulumo ya le Rivaleni ni Dyondzo ya Xihondzo xo Rindza swin’we ni nhlangano wa le xikarhi ka vhiki lowu vitaniwaka Mahanyelo Ni Ntirho Wa Hina Wo Chumayela. * Nakambe hi tiphina hi swiendlakalo swa mune swa lembe ni lembe—ntsombano wa xifundzha, tinhlengeletano timbirhi ta miganga ni Xitsundzuxo xa rifu ra Kreste. Ha yini swi ri swa nkoka ku va kona eka minhlangano yoleyo hinkwayo? Xana minhlangano ya hina ya manguva lawa yi sunguriwe njhani? Xana langutelo leri hi nga na rona hi minhlangano ri kombisa yini hi hina?

Ha Yini Hi Hlengeletana Swin’we?

3, 4. I yini leswi Yehovha a swi languteleke eka vanhu vakwe? Nyika swikombiso.

3 I khale Yehovha a lava leswaku vanhu vakwe va hlengeletana swin’we leswaku va n’wi gandzela. Hi xikombiso, hi 1513 B.C.E., Yehovha u nyike tiko ra Israyele Nawu wakwe naswona Nawu wolowo a wu katsa Savata ya vhiki ni vhiki ku endlela leswaku ndyangu wun’wana ni wun’wana wu n’wi gandzela ni ku leteriwa hi Nawu wolowo. (Det. 5:12; 6:4-9) Loko Vaisrayele va landzela xileriso xexo, mindyangu a yi ta tiyisiwa naswona tiko hinkwaro a ri ta tshama ri basile ni ku tiya hi tlhelo ra moya. Loko tiko ri tsandzeke ku tirhisa Nawu, ri honisa swilaveko swo tano swo tanihi ku hlengeletana swin’we nkarhi na nkarhi leswaku ri gandzela Yehovha,  Xikwembu xi ri fularherile.Lev. 10:11; 26:31-35; 2 Tikr. 36:20, 21.

4 Nakambe, xiya xikombiso lexi Yesu a xi vekeke. A a tolovele ku ya esinagogeni vhiki rin’wana ni rin’wana hi Savata. (Luka 4:16) Endzhaku ka rifu ra Yesu ni ku pfuxiwa kakwe, vadyondzisiwa vakwe va ye emahlweni va hlengeletana nkarhi na nkarhi hambileswi a va nga ha ri ehansi ka nawu wa Savata. (Mint. 1:6, 12-14; 2:1-4; Rhom. 14:5; Kol. 2:13, 14) Eka minhlangano yoleyo, Vakreste va lembe-xidzana ro sungula a va nga kumi ndzetelo ni xikhutazo ntsena kambe a va tlhela va endla switlhavelo swo dzunisa Xikwembu hi ku va va khongela, va nyikela tinhlamulo ni ku yimbelela.Kol. 3:16; Hev. 13:15.

Vadyondzisiwa va Yesu a va hlengeletana swin’we leswaku va tiyisana ni ku khutazana

5. Ha yini hi va kona eka minhlangano ya vhiki ni vhiki ni le tinhlengeletanweni lembe ni lembe? (Nakambe vona bokisi leri nge “ Ku Hlengeletana Loku Vaka Kona Lembe Ni Lembe Loku Hlanganisaka Vanhu Va Xikwembu.”)

5 Hilaha ku fanaka, loko hi va kona eka minhlangano ya hina ya vhiki ni vhiki ni le tinhlengeletanweni lembe ni lembe, hi kombisa leswaku hi seketela Mfumo wa Xikwembu, moya lowo kwetsima wu hi nyika matimba naswona hi khutaza van’wana hi swiendlo swa hina leswi kombisaka ripfumelo. Xa nkoka swinene, hi ni lunghelo ro gandzela Yehovha hi ku va hi khongela, hi nyikela tinhlamulo ni ku yimbelela. Minhlangano ya hina yi nga ha va yi hleriwe hi ndlela leyi hambaneke ni ya Vaisrayele ni Vakreste va lembe-xidzana ro sungula, kambe ku hlengeletana ka hina i ka nkoka ku fana ni le ku sunguleni. Xana minhlangano ya hina ya manguva lawa yi sunguriwe njhani?

Minhlangano Ya Vhiki Ni Vhiki Leyi Khutazaka ‘Rirhandzu Ni Mintirho Leyinene’

6, 7. (a) Hi xihi xikongomelo xa minhlangano ya hina? (b) Xana minhlangano a yi hambana njhani?

6 Loko Makwerhu Charles Taze Russell a sungula ku lavisisa ntiyiso eRitweni ra Xikwembu, u vone xilaveko xo hlengeletana ni van’wana lava nga ni xikongomelo lexi fanaka. Hi 1879, Russell u tsale leswi: “Mina swin’we ni van’wana ePittsburgh, hi hlele tlilasi  ya bibele yo lavisisa Matsalwa naswona hi hlengeletana Sonto yin’wana ni yin’wana.” Vahlayi va Zion’s Watch Tower va khutaziwe ku hlengeletana swin’we naswona hi 1881, a ku khomiwa minhlangano ePittsburgh, le Pennsylvania, hi Sonto ni hi Ravunharhu wun’wana ni wun’wana. Nkandziyiso wa Xihondzo xo Rindza wa November 1895 wu vule leswaku xikongomelo xa minhlangano yoleyo i ku hlakulela “vunakulobye bya Vukreste, rirhandzu ni ntwanano” ni ku nyika lava vaka kona lunghelo ra ku khutazana.Hlaya Vaheveru 10:24, 25.

7 Ku ringana malembe yo tala, ndlela leyi Swichudeni swa Bibele a swi yi khoma ha yona minhlangano a yi nga fani. Hi xikombiso, papila leri humaka eka ntlawa wa le United States leri kandziyisiweke hi 1911 ri te: “Hi khoma minhlangano ya ntlhanu vhiki ni vhiki.” A wu khoma minhlangano yoleyo hi Musumbhunuku, Ravunharhu, Ravuntlhanu kasi hi Sonto a wu khoma yimbirhi. Papila rin’wana leri humaka eka ntlawa wa le Afrika, leri kandziyisiweke hi 1914 ri te: “Hi khoma minhlangano kambirhi hi n’hweti, ku sukela hi Ravuntlhanu ku ya fikela hi Sonto.” Hambiswiritano, hi ku famba ka nkarhi minhlangano ya hina yi sungule ku fambisiwa hi ndlela leyi yi fambisiwaka ha yona namuntlha. Kambisisa matimu ya nhlangano ha wun’we.

8. Hi tihi tin’wana ta tinhloko-mhaka ta tinkulumo ta le rivaleni to sungula?

8 Nkulumo Ya Le Rivaleni. Hi 1880, endzhaku ka lembe Makwerhu Russell a sungule ku kandziyisa Zion’s Watch Tower, u sungule ku landzela xikombiso lexi vekiweke hi Yesu kutani a sungula riendzo ro chumayela. (Luka 4:43) Loko nkarhi wu ri karhi wu famba, Makwerhu Russell u veke xikombiso eka leswi namuntlha swi vitaniwaka Nkulumo ya le Rivaleni. Loko xi tivisa riendzo leri a ta ri teka, Xihondzo xo Rindza xi vule leswaku Russell “a a ta tsakela ku nyikela tinkulumo ta le rivaleni leti nge ‘Swilo leswi fambisanaka ni mfumo wa Xikwembu.’” Hi 1911, endzhaku ka loko titlilasi kumbe mavandlha, ma simekiwile ematikweni yo hlayanyana, tlilasi ha yin’we yi khutaziwe ku rhumela swivulavuri leswi fanelekaka etindhawini ta kwalaho leswaku swi ya nyikela tinkulumo ta tsevu ta ntlhandlamano leti vulavulaka hi vuavanyisi ni nkutsulo. Loko nkulumo ha yin’we yi gimeta, a ku tivisiwa vito ra xivulavuri ni nhloko-mhaka ya nkulumo ya vhiki leri landzelaka.

9. Xana Nkulumo ya le Rivaleni yi cince njhani loko malembe ma ri karhi ma famba naswona xana u nga wu seketela njhani nhlangano lowu?

9 Hi 1945, Xihondzo xo Rindza xi tivise ku sungula ka tsima leri a ri ta endliwa emisaveni hinkwayo ra Nkulumo ya le Rivaleni leri katsaka tinkulumo ta nhungu leti sekeriweke eBibeleni leti vulavulaka hi “swiphiqo swa xihatla swa le nkarhini wolowo.” Ku ringana makume ya malembe yo tala, swivulavuri leswi hlawuriweke a swi nga tirhisi tinhloko-mhaka leti swi nyikiweke hi hlonga ro tshembeka ntsena kambe a swi tlhela swi nyikela tinkulumo leti swi tiendleleke tona. Hambiswiritano, hi 1981, swivulavuri hinkwaswo swi lerisiwe ku tirhisa tinkulumo leti rhumeriweke mavandlha. * Ku kondza ku fika 1990, tinkulumo tin’wana ta le rivaleni a ti lava leswaku vayingiseri va katseka kumbe ku endla minkombiso; kambe hi lembe rero swiletelo swi cinciwile naswona tinkulumo ta le rivaleni a ti nyikeriwa tanihi mimbulavulo ntsena.  Ku ve ni ku antswisiwa loku engetelekeke hi January 2008 laha tinkulumo ta le rivaleni ti hungutiweke ku suka eka 45 wa timinete ku ya eka 30 wa timinete. Hambiloko ku endliwe ku cinca ko tano, tinkulumo ta le rivaleni leti lunghiseleriweke kahle ti ya emahlweni ti endla leswaku hi va ni ripfumelo eRitweni ra Xikwembu ni ku hi dyondzisa hi swilo swo hambana-hambana swa Mfumo wa Xikwembu. (1 Tim. 4:13, 16) Xana u hisekela ku rhamba van’wana lava u tlhelelaka eka vona loko u endla maendzo yo vuyela ni lava nga riki Timbhoni leswaku va twa tinkulumo teto ta nkoka leti sekeriweke eBibeleni?

10-12. (a) Xana ndlela leyi Dyondzo ya Xihondzo xo Rindza yi fambisiwaka ha yona yi cince njhani? (b) Hi swihi swivutiso leswi u nga ta va u endla kahle ku tivutisa swona?

10 Dyondzo ya Xihondzo xo Rindza. Hi 1922, vamakwerhu lava tivekaka tanihi vafamberi—vatirheli lava rhumiweke hi Sosayiti ya Watch Tower leswaku va ya nyikela tinkulumo emavandlheni ni ku rhangela entirhweni wo chumayela—va khutaze leswaku eka nhlangano lowu a wu va kona nkarhi na nkarhi ku va ni dyondzo ya Xihondzo xo Rindza. Xiringanyeto xexo xi amukeriwile, naswona eku sunguleni, tidyondzo ta Xihondzo xo Rindza a ti khomiwa exikarhi ka vhiki kumbe hi Sonto.

Dyondzo ya Xihondzo xo Rindza eGhana, hi 1931

11 Hi June 15, 1932, Xihondzo xo Rindza xi nyikele nkongomiso lowu engetelekeke malunghana ni ndlela leyi nhlangano lowu a wu fanele wu fambisiwa ha yona. Hi ku tirhisa endlelo leri Kaya ra Bethele a ri fambisa dyondzo yoleyo ha yona, xihloko xi vule leswaku makwerhu u fanele a rhangela eka nhlangano wolowo. Vamakwerhu vanharhu a va tshama emahlweni kutani va cincana ku hlaya tindzimana. Hi nkarhi wolowo swihloko a swi ri hava swivutiso, kutani mufambisi a a byeriwe ku kombela vayingiseri ku vutisa swivutiso eka rungula leri a ri tlhuvutsiwa. Endzhaku ka sweswo, a a ta kombela vayingiseri va nyikela tinhlamulo ta swivutiso sweswo. Loko ka ha laveka nhlamulo leyi engetelekeke, mufambisi a a lerisiwe ku nyikela nhlamuselo “yo koma ni leyi kongomeke.”

12 Eku sunguleni, vandlha rin’wana ni rin’wana a ri nyikiwe  mpfumelelo wo hlawula nkandziyiso wa magazini lowu vo tala a va lava ku dyondza ha wona. Hambiswiritano, Xihondzo xo Rindza xa April 15, 1933, xi ringanyete leswaku mavandlha hinkwawo ma tirhisa nkandziyiso wa nkarhi wolowo. Hi 1937, ku nyikeriwe nkongomiso wa leswaku dyondzo yi fanele yi fambisiwa hi Sonto. Ku tengisiwa loku engetelekeke loku cinceke nhlangano wu va xileswi hi wu tivisaka xiswona namuntlha ku kandziyisiwe eka Xihondzo xo Rindza xa October 1, 1942. Xo sungula, magazini wu tivise leswaku a ku ta va ni swivutiso ehansi ka tluka ha rin’we ra swihloko leswi dyondziwaka nileswaku swivutiso sweswo a swi fanele swi tirhisiwa. Kutani wu vule leswaku nhlangano wu fanele wu heta awara. Wu tlhele wu khutaza lava hlamulaka leswaku va hlamula “hi marito ya vona” ematshan’weni yo hlaya marito lama nga eka ndzimana. Dyondzo ya Xihondzo xo Rindza yi ya emahlweni yi va nhlangano wa nkoka lowu eka wona hlonga ro tshembeka ri hi nyikaka swakudya swa moya hi nkarhi lowu faneleke. (Mat. 24:45) Un’wana ni un’wana wa hina u endla kahle ku tivutisa leswi: ‘Xana ndza yi lunghiselela dyondzo ya Xihondzo xo Rindza ya vhiki ni vhiki? Nakambe xana ndzi tikarhatela ku hlamula loko ndzi swi kota?’

13, 14. Hi wahi matimu ya Dyondzo ya Bibele ya Vandlha naswona i yini leswi u tiphinaka ha swona eka nhlangano lowu?

13 Dyondzo ya Bibele ya Vandlha. Exikarhi ka va-1890, endzhaku ka loko ku humesiwe tivholumo to hlayanyana ta Millennial Dawn, Makwerhu H. N. Rahn, loyi a a ri Xichudeni xa Bibele lexi tshamaka edorobeni ra Baltimore, eMaryland, le U.S.A., u ringanyete leswaku ku khomiwa “Minhlangano yo Sungula” ya dyondzo ya Bibele. Eku sunguleni, minhlangano leyi, hakanyingi a yi khomeriwa emakaya ya vamakwerhu. Hambiswiritano, hi September 1895, Minhlangano yo Sungula yi fambisiwe hi ndlela leyi humelelaka ematikweni yo hlaya ya le United States. Hikokwalaho Xihondzo xo Rindza xa n’hweti yoleyo xi ringanyete leswaku swichudeni hinkwaswo swa ntiyiso swi khoma minhlangano yoleyo. Xi lerise leswaku loyi a fambisaka u fanele a kota ku hlaya kahle. A a ta hlaya xivulwa kutani a yimela lava nga kona leswaku va hlamula. Endzhaku ko hlaya xivulwa ha xin’we eka ndzimana ni ku bula ha swona, a a fanele a pfula matsalwa lama tshahiweke kutani a ma hlaya. Loko ku gimetiwa ndzima, un’wana ni un’wana wa lava veke kona a a nyikela mpfuxeto wo koma wa rungula rero.

14 Vito ra nhlangano lowu ri cinciwe minkarhi yo hlayanyana. Wu sungule ku tiviwa tanihi Minhlangano ya Vaberiya ya Dyondzo ya Bibele, va kombetela eka Vaberiya va lembe-xidzana ro sungula lava a va kambisisa Matsalwa hi vukheta. (Mint. 17:11) Hi ku famba ka nkarhi, vito rero ri cinciwe ri va Dyondzo ya Buku ya Vandlha. Sweswi yi vitaniwa Dyondzo ya Bibele ya Vandlha naswona vandlha hinkwaro ri hlengeletana swin’we eHolweni ya Mfumo ematshan’weni yo hlengeletana hi mintlawa emakaya ya vamakwerhu. Eka makume ya malembe lama hundzeke, ku tirhisiwe tibuku to hambana-hambana, tibroxara hambi ku ri swihloko swa Xihondzo xo Rindza tanihi xisekelo xa dyondzo. Ku sukela khale, hinkwavo lava a va va kona a va khutaziwa ku hoxa xandla  enhlanganweni. Nhlangano lowu wu endle swo tala ku engetela vutivi lebyi hi nga na byona hi Bibele. Xana nkarhi na nkarhi u lunghiselela nhlangano lowu ni ku hlamula eka wona hilaha u nga kotaka hakona?

15. Xana Xikolo xa Vutirheli bya le Tilweni a xi endleriwe yini?

15 Xikolo Xa Vutirheli Bya Le Tilweni. Carey Barber, loyi hi nkarhi wolowo a a tirha entsindza wa misava hinkwayo wa Timbhoni ta Yehovha eBrooklyn, le New York, u ri: “Hi Musumbhunuku nimadyambu, wa February 16, 1942, vamakwerhu hinkwavo va xinuna lava nga swirho swa ndyangu wa Bethele ya le Brooklyn va rhambiwe ku tsarisa eka xikolo lexi hi ku famba ka nkarhi a xi ta tiviwa tanihi Xikolo xa Vutirheli bya le Tilweni.” Makwerhu Bar­ber, loyi hi ku famba ka nkarhi a veke xirho xa Huvo leyi Fumaka u hlamusele xikolo lexi tanihi “xin’wana xa swiendlakalo leswi xiyekaka swinene swa ndlela leyi Yehovha a tirhisanaka ha yona ni vanhu vakwe manguva lawa.” Khoso yoleyo yi humelerile eku pfuneni ka vamakwerhu ku antswisa vutshila bya vona byo dyondzisa ni ku chumayela laha eku sunguleni ka 1943 ku endliweke xibukwana lexi nge Course in Theocratic Ministry lexi xi yeke xi kumeka  hatsongo-tsongo emavandlheni hinkwawo. Xihondzo xo Rindza xa June 1, 1943, xi vule leswaku Xikolo xa Vutirheli bya le Tilweni a xi endleriwe ku pfuna vanhu va Xikwembu ‘ku va letela leswaku va va vachumayeri lavanene eku twariseni ka Mfumo.’2 Tim. 2:15.

16, 17. Xana Xikolo xa ­Vutirheli bya le Tilweni a xi dyondzisa ntsena ku va ni vutshila? Hlamusela.

16 Eku sunguleni, vo tala a swi va tikela ku vulavula emahlweni ka vayingiseri vo tala. Clayton Woodworth, Lontsongo, loyi tata wakwe a a pfaleriwe ekhotsweni a nga ri na nandzu swin’we na Makwerhu Rutherford ni van’wana hi 1918, u tsundzuka ndlela leyi a titweke ha yona loko a joyina xikolo ro sungula hi 1943. Makwerhu Woodworth u te: “A swi ndzi tikela swinene ku nyikela tinkulumo. Ririmi ra mina a ri twala ri lehile, nomu wa mina wu oma hi ku helela naswona rito ra mina ri sungula ku rhurhumela ni ku ka ri nga ha twali.” Hambiswiritano, loko Clayton a ya a va ni vuswikoti, u kume malunghelo yo tala yo nyikela tinkulumo. Xikolo xi n’wi dyondzise swo tala ku tlula ku va ni vutshila. Xi n’wi dyondzise mfanelo ya ku titsongahata ni nkoka wo tshembela eka Yehovha. U te: “Ndzi sungule ku xiya leswaku xivulavuri hi xoxe a hi  xa nkoka. Kambe loko xi lunghiselela kahle kutani leswin’wana hinkwaswo xi swi siyela Yehovha, xi ta va lexi yingiseriwaka hi ntsako naswona vayingiseri va ta dyondza swo karhi.”

17 Hi 1959, vamakwerhu va xisati va rhambiwe ku tsarisa eka xikolo. Makwerhu wa xisati Edna Bauer u tsundzuka loko a twa xitiviso enhlengeletanweni leyi a ye eka yona. U te: “Ndzi tsundzuka ntsako lowu vamakwerhu va xisati va veke na wona. Se a va ri ni malunghelo lama engetelekeke.” Eka malembe lama hundzeke, vamakwerhu vo tala va tirhise lunghelo ro tsarisa eka Xikolo xa Vutirheli bya le Tilweni ni ku dyondzisiwa hi Yehovha. Namuntlha hi ya emahlweni hi kuma ndzetelo wo tano eminhlanganweni ya hina ya le xikarhi ka vhiki.Hlaya Esaya 54:13.

18, 19. (a) Sweswi hi wu kuma njhani nkongomiso lowu pfunaka leswaku hi kota ku endla ntirho wo chumayela? (b) Ha yini hi yimbelela eminhlanganweni ya hina? (Vona bokisi leri nge “ Ku Yimbelela Ntiyiso.”)

18 Nhlangano wa Ntirho. Eku sunguleni ka 1919, a ku khomiwa minhlangano leswaku ku hleriwa ntirho wa nsimu. Hi nkarhi wolowo, a hi vanhu hinkwavo evandlheni lava a va va kona eka minhlangano yoleyo—a ku va ni lava ntsena a va katseka hi ku kongoma eka ntirho wo fambisa minkandziyiso. Ku hele nkarhi wo leha hi 1923, Nhlangano wa Ntirho wu ri karhi wu khomiwa kan’we hi n’hweti naswona hinkwavo etlilasini kumbe evandlheni a va fanele va va kona. Hi 1928, mavandlha ma khutaziwe ku khoma Nhlangano wa Ntirho vhiki rin’wana ni rin’wana, naswona hi 1935, Xihondzo xo Rindza xi khutaze mavandlha hinkwawo ku sekela Nhlangano wa Ntirho eka rungula leri kandziyisiweke eka Director (leyi endzhakunyana yi vitaniweke Informant naswona endzhakunyana yi vitaniweke Vutirheli Bya Hina Bya Mfumo). Hi ku hatlisa nhlangano lowu wu ve eka xiyimiso xin’wana ni xin’wana xa vandlha.

19 Namuntlha, eka nhlangano wa hina wa le xikarhi ka vhiki hi kuma nkongomiso lowu twisisekaka wo endla ntirho wo chumayela. (Mat. 10:5-13) Loko u fanelekela ku kuma xiyimiso xa minhlangano, xana wa xi hlaya ni ku tirhisa swiringanyeto leswi xi swi tameleke loko u ri karhi u endla ntirho wo chumayela?

Nhlangano Wa Nkoka Swinene eLembeni

Ku sukela hi lembe-xidzana ro sungula C.E., Vakreste a va hlengeletana swin’we lembe ni lembe leswaku va tsundzuka Xitsundzuxo xa rifu ra Kreste (Vona ndzimana 20)

20-22. (a) Ha yini hi tsundzuka rifu ra Yesu? (b) Hi byihi vuyelo lebyi u byi kumaka loko u va kona eka Xitsundzuxo xa lembe ni ­lembe?

20 Yesu u byele valandzeri vakwe ku tsundzuka rifu rakwe kukondza a fika. Ku fana ni ku tlangeriwa ka Paseka, Xitsundzuxo xa rifu ra Kreste i xiendlakalo xa lembe ni lembe. (1 Kor. 11:23-26) Nhlangano lowu wu koka vanhu va timiliyoni lembe ni lembe. Wu tsundzuxa vatotiwa hi lunghelo leri va nga na rona ro va vadyandzhaka va Mfumo. (Rhom. 8:17) Kasi eka lava tinyimpfu tin’wana, swi endla leswaku va va ni xichavo lexi enteke ni ku tshembeka eka Hosi ya Mfumo wa Xikwembu.Yoh. 10:16.

21 Makwerhu Russell ni vatirhi-kulobye va xiye nkoka wo tsundzuka Xilalelo xa Hosi naswona a va swi tiva leswaku xi fanele xi endliwa kan’we hi lembe. Nkandziyiso wa Xihondzo xo Rindza wa April 1880 wu te: “Ku ringana malembe yo hlayanyana ku ri mukhuva eka vanhu vo tala laha Pittsburgh ku . . . tsundzuka Paseka [Xitsundzuxo] ni ku dya swifanekiselo swa miri ni ngati ya Hosi ya hina.” Hi ku hatlisa mintsombano a yi khomiwa xikan’we ni  Xitsundzuxo. Sweswo swi ve hi 1889, laha ku veke ni vanhu va 225 naswona ku khuvuriweke va 22.

22 Sweswi a ha ha vi ni Xitsundzuxo tanihi xiphemu xa nongonoko wa ntsombano, kambe hi rhamba vaaki hinkwavo etindhawini hinkwato leti hi tshamaka eka tona leswaku va hi joyina eHolweni ya hina ya Mfumo kumbe emuakweni lowu hirhiweke. Hi 2013, vanhu vo tlula 19 wa timiliyoni va ve kona loko ku tsundzukiwa rifu ra Yesu. A hi lunghelo ntsena ku va kona eXitsundzuxweni kambe hi tlhela hi khutaza van’wana leswaku va hi joyina eka madyambu lawa yo kwetsima swonghasi! Xana u hisekela ku rhamba vanhu vo tala hilaha u nga kotaka hakona eXitsundzuxweni lembe ni lembe?

Leswi Langutelo Ra Hina Ri Kombisaka Swona

23. Xana u ku languta njhani ku hlengeletana ka hina swin’we?

23 Malandza yo tshembeka ya Yehovha a ma teki xiletelo xo hlengeletana swin’we tanihi ndzhwalo. (Hev. 10:24, 25; 1 Yoh. 5:3) Hi xikombiso, Hosi Davhida a a rhandza ku ya endlwini ya Yehovha leswaku a ya gandzela. (Ps. 27:4) A a tsakela ku endla tano ngopfu-ngopfu loko a ri ni van’wana lava rhandzaka Xikwembu. (Ps. 35:18) Kutani anakanya hi xikombiso xa Yesu. Hambileswi a ha ri ntsongo, a a swi tsakela swinene ku va endlwini ya Tata wakwe yo gandzela eka yona.Luka 2:41-49.

Ku navela ka hina ku hlengeletana swin’we ku kombisa ndlela leyi Mfumo wa Xikwembu wu nga wa xiviri ha yona eka hina

24. Loko hi va kona eminhlanganweni, hi wahi malunghelo lawa hi vaka na wona?

24 Loko hi va kona eminhlanganweni, hi kombisa rirhandzu leri hi nga na rona eka Yehovha ni leswaku hi tsakela ku aka vapfumeri-kulorhi. Nakambe hi kombisa leswaku hi navela ku dyondza ndlela yo hanya tanihi lava fumiwaka hi Mfumo wa Xikwembu, hikuva eminhlanganweni ya hina, etinhlengeletanweni ni le mintsombanweni hi kona laha hi kumaka ndzetelo wo tano. Ku engetela kwalaho, minhlangano ya hina yi endla leswaku hi va ni vutshila ni matimba lawa hi ma lavaka leswaku hi tiyisela eka wun’wana wa mintirho ya nkoka swinene leyi endliwaka hi Mfumo wa Xikwembu namuntlha—ku endla vadyondzisiwa va Hosi Yesu Kreste ni ku va letela. (Hlaya Matewu 28:19, 20.) Handle ko kanakana, ku navela ka hina ku hlengeletana swin’we ku kombisa ndlela leyi Mfumo wa Xikwembu wu nga wa xiviri ha yona eka un’wana ni un’wana wa hina. Onge minkarhi hinkwayo hi nga yi teka yi ri ya nkoka minhlangano ya hina!

^ ndzim. 2 Ku engetela eka minhlangano ya hina ya vandlha, ndyangu ha wun’we kumbe munhu ha un’we u khutaziwa ku endla xiyimiso xa dyondzo ya munhu hi yexe kumbe vugandzeri bya ndyangu kan’we hi vhiki.

^ ndzim. 9 Hi 2013, a ku ri ni tinkulumo ta le rivaleni to tlula 180.

DYONDZA SWO TALA

Yehovha U Hlengeleta Vanhu Va Yena Lava Tsakeke

Minkuvo ya le Bibeleni yi fana njhani ni mintsombano ya Timbhoni ta Yehovha? Ha yini swi fanerile leswaku hi va kona?

Vugandzeri Bya Ndyangu—Xana U Nga Byi Endla Byi Tsakisa Swinene?

Twana leswi vanhu van’wana va swi endlaka ematikweni man’wana leswi u nga swi ringetaka leswi nga ta ku pfuna.