Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Mahungu Lamanene Lama Humaka Eka Xikwembu!

 Dyondzo 4

Yesu Kreste I Mani?

Yesu Kreste I Mani?

Hi tihi timfanelo leti endleke leswaku Yesu a tshineleleka?MATEWU 11:29; MARKA 10:13-16.

1. Vutomi bya Yesu byi sungule njhani?

Ku hambana ni munhu wihi na wihi wa nyama, Yesu u hanye etilweni a ri munhu wa moya loko a nga si velekiwa emisaveni. (Yohane 8:23) A a ri xivumbiwa xo sungula xa Xikwembu naswona u pfunetile eku tumbuluxiweni ka swilo leswin’wana hinkwaswo. Hi yena ntsena la vumbiweke hi Yehovha hi yexe, hikwalaho swi fanerile leswi a vitaniwaka N’wana wa Xikwembu “la tswariweke a ri swakwe.” (Yohane 1:14) Yesu a a ri Muvulavuleri wa Xikwembu, hikwalaho u vitaniwa “Rito.”—Hlaya Swivuriso 8:22, 23, 30; Vakolosa 1:15, 16.

2. Ha yini Yesu a te emisaveni?

Xikwembu xi rhumele N’wana wa xona emisaveni hi ku hundzisela vutomi bya yena ku suka etilweni xi byi yisa embelekweni wa wanhwana wa Muyuda la vuriwaka Mariya. Hikwalaho Yesu a a nga ri na tatana la nga munhu wa nyama. (Luka 1:30-35) Yesu u te emisaveni (1) leswaku a ta dyondzisa ntiyiso malunghana ni Xikwembu, (2) leswaku a ta hi vekela xikombiso xa ndlela leyi hi nga endlaka ku rhandza ka Xikwembu ha yona hambiloko hi ri ni swiphiqo ni (3) leswaku a ta nyikela hi vutomi bya yena lebyi hetisekeke tanihi “nkutsulo.”—Hlaya Matewu 20:28.

3. Ha yini hi lava nkutsulo?

Nkutsulo i mali leyi hakeriwaka leswaku ku ntshunxiwa munhu leswaku a nga dlayiwi. (Eksoda 21:29, 30) Rifu ni ku dyuhala a swi nga ri xiphemu xa xikongomelo xa Xikwembu hi vanhu. Hi swi tivisa ku yini sweswo? Xikwembu xi byele wanuna wo sungula Adamu leswaku loko o endla leswi Bibele yi swi vitanaka “xidyoho,” a a ta fa. Hikwalaho loko Adamu a a nga dyohanga, a a ta va a nga fanga. (Genesa 2:16,  17; 5:5) Hi ku ya hi Bibele, rifu ri ‘nghene’ emisaveni hi Adamu. Hikwalaho, Adamu u hundzisele xidyoho ni vuyelo bya xona ku nga rifu eka vatukulu va yena hinkwavo. Hi lava nkutsulo leswaku wu hi ntshunxa eka xigwevo xa rifu lexi hi xi kumeke eka Adamu.—Hlaya Varhoma 5:12; 6:23.

I mani loyi a a ta hakela nkutsulo wolowo leswaku a hi ntshunxa eka rifu? Loko hi fa, hi hakela xigwevo xa swidyoho swa hina ntsena. A nga kona munhu la nga hetisekangiki la nga hakelaka swidyoho swa vanhu van’wana.—Hlaya Pisalema 49:7-9.

4. Ha yini Yesu a file?

Yesu a a nga fani na hina, a a hetisekile. Hikwalaho a a nga boheki ku fa hikwalaho ka swidyoho swa yena—a nga xi endlanga xidyoho. Ku ri na sweswo, Yesu u file hikwalaho ka swidyoho swa van’wana. Xikwembu xi kombise ndlela leyikulu leyi xi rhandzaka vanhu ha yona hi ku rhumela N’wana wa xona leswaku a ta hi fela. Yesu na yena u kombise leswaku wa hi rhandza hi ku yingisa Tata wa yena ni hi ku nyikela hi vutomi bya yena hikwalaho ka swidyoho swa hina.—Hlaya Yohane 3:16; Varhoma 5:18, 19.

5. Yesu u endla yini sweswi?

Loko Yesu a ri laha misaveni u tshungule vavabyi, a pfuxa vafi a tlhela a ponisa vanhu lava a va ri ekhombyeni. Xisweswo u kombise leswi a nga ta swi endlela vanhu hinkwavo lava yingisaka enkarhini lowu taka. (Matewu 15:30, 31; Yohane 5:28) Endzhaku ka loko Yesu a file, Xikwembu xi n’wi pfuxile a ri munhu wa moya. (1 Petro 3:18) Endzhaku ka sweswo, Yesu u rindze evokweni ra xinene ra Yehovha kukondza A n’wi nyika matimba ya ku fuma tanihi Hosi emisaveni hinkwayo. (Vaheveru 10:12, 13) Sweswi Yesu wa fuma tanihi Hosi etilweni naswona valandzeri va yena va twarisa mahungu wolawo lamanene emisaveni hinkwayo.—Hlaya Daniyele 7:13, 14; Matewu 24:14.

Ku nga ri khale, Yesu u ta tirhisa matimba ya yena tanihi Hosi leswaku a herisa ku xaniseka hinkwako ni vanhu lava ku vangaka. Hinkwavo lava kombisaka ripfumelo eka Yesu hi ku n’wi yingisa va ta tiphina hi vutomi emisaveni leyi nga paradeyisi.—Hlaya Pisalema 37:9-11.

 

DYONDZA SWO TALA

Nkutsulo I Nyiko Ya Nkoka Leyi Humaka Eka Xikwembu

I yini nkutsulo? Xana wu nga ku vuyerisa hi ndlela yihi?