Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Mahungu Lamanene Lama Humaka Eka Xikwembu!

 Dyondzo 8

Ha Yini Xikwembu Xi Pfumelela Vubihi Ni Ku Xaniseka?

Ha Yini Xikwembu Xi Pfumelela Vubihi Ni Ku Xaniseka?

Xikwembu xi pfumelele vanhu ku fuma nkarhi wo leha ku kombisa leswaku a va nge swi koti ku tlhantlha swiphiqo swa vanhu

1. Vubihi byi sungule njhani?

Vubihi byi sungule emisaveni loko Sathana a vule mavunwa yo sungula. Eku sunguleni Sathana a a ri ntsumi leyi hetisekeke, kambe “a nga yimanga a tiyile entiyisweni.” (Yohane 8:44) U navele vugandzeri lebyi fanelaka Xikwembu ntsena. U hembele Evha wansati wo sungula, kutani a n’wi kucetela ku yingisa yena ematshan’weni ya Xikwembu. Adamu u joyine Evha a nga yingisi Xikwembu. Xiboho xa Adamu xi vange ku xaniseka ni rifu.—Hlaya Genesa 3:1-6, 19.

Loko Sathana a khutaza Evha leswaku a nga yingisi Xikwembu, a a sungula ku xandzukela vuhosi bya Xikwembu kumbe xikhundlha xa xona tanihi Lexi nge Henhla-henhla. Vunyingi bya vanhu va joyine Sathana va fularhela Xikwembu tanihi Mufumi wa vona. Hikwalaho, u ve “mufumi wa misava.”—Hlaya Yohane 14:30; 1 Yohane 5:19.

2. Xana a ku ri ni leswi a swi soleka eka leswi Xikwembu xi swi vumbeke?

Mintirho hinkwayo ya Xikwembu yi hetisekile. Vanhu ni tintsumi leti Xikwembu xi ti vumbeke a va ta swi kota ku xi yingisa hi ku hetiseka. (Deteronoma 32:4, 5) Xikwembu xi hi vumbe hi ri ni ntshunxeko wo tihlawulela ku endla leswinene kumbe leswo biha. Ntshunxeko wolowo wu hi nyika nkarhi wo kombisa ndlela leyi hi rhandzaka Xikwembu ha yona.—Hlaya Yakobo 1:13-15; 1 Yohane 5:3.

3. Ha yini Xikwembu xi pfumelele ku xaniseka ku fikela sweswi?

Yehovha u pfumelele vanhu leswaku va xandzukela vuhosi bya yena ku ringana nkarhi wo karhi. Ha yini? Leswaku a ta kombisa leswaku loko vanhu va ringeta ku tifuma handle ka yena a swi nge va vuyerisi. (Eklesiasta 7:29; 8:9) Endzhaku ka malembe ya 6 000 ya matimu  ya vanhu, vumbhoni bya kona byi le rivaleni. Vafumi lava nga vanhu va tsandzekile ku herisa nyimpi, vugevenga, vuhomboloki kumbe mavabyi. —Hlaya Yeremiya 10:23; Varhoma 9:17.

Ku hambana ni vulawuri bya vanhu, vulawuri bya Xikwembu byi vuyerisa lava byi amukelaka. (Esaya 48:17, 18) Ku nga ri khale, Yehovha u ta herisa tihulumendhe hinkwato ta vanhu. Emisaveni ku ta tshama ntsena vanhu lava hlawulaka ku fumiwa hi Xikwembu.—Esaya 11:9.—Hlaya Daniyele 2:44.

Swiboho swa hina swi kombisa loko hi hlawula Xikwembu tanihi Mufumi wa hina

4. Ku lehisa mbilu ka Xikwembu ku hi nyika nkarhi wo endla yini?

Sathana u vule leswaku vanhu va tirhela Yehovha hikwalaho ka swivangelo swa vutianakanyi. Xana u nga swi tsakela ku kombisa leswaku sweswo i mavunwa? U nga swi kota! Ku lehisa mbilu ka Xikwembu ku hi nyika nkarhi wo kombisa leswaku hi tsakela ku fumiwa hi xona kumbe hi vanhu. Ndlela leyi hi hanyaka ha yona yi kombisa loyi hi hlawulaka ku fumiwa hi yena.—Hlaya Yobo 1:8-12; Swivuriso 27:11.

5. Hi nga swi kombisa njhani leswaku hi hlawula Xikwembu tanihi Mufumi wa hina?

Hi nga kombisa leswaku hi hlawula Xikwembu tanihi Mufumi wa hina hi ku dyondza hi vugandzeri bya ntiyiso ni hi ku hanya hi ku pfumelelana na byona hilaha byi hlamuseriweke hakona eRitweni ra Xikwembu ku nga Bibele. (Yohane 4:23) Hi nga ala ku fumiwa hi Sathana hi ku ka hi nga hlanganyeli eka tipolitiki ni tinyimpi hilaha Yesu a endleke hakona.—Hlaya Yohane 17:14.

Sathana u tirhisa matimba ya yena leswaku a endla mikhuva leyi thyakeke ni leyi nga ni khombo yi vonaka yi ri yinene. Loko hi ala ku endla mikhuva yoleyo, vanghana ni maxaka ya hina man’wana va nga ha hi hlekula kumbe va hi kaneta. (1 Petro 4:3, 4) Hikwalaho hi fanele hi hlawula. Xana hi ta tihlanganisa ni vanhu lava rhandzaka Xikwembu? Xana hi ta yingisa milawu ya xona ya vutlhari ni ya rirhandzu? Loko hi endla tano, hi ta va hi kombisa leswaku Sathana a a hemba loko a vula leswaku a va kona vanhu lava nga yingisaka Xikwembu loko swi tika ku endla tano.—Hlaya 1 Vakorinto 6:9, 10; 15:33.

Ndlela leyi Xikwembu xi rhandzaka vanhu ha yona yi tiyisekisa leswaku vuhomboloki ni ku xaniseka swi ta hela. Lava kombisaka leswaku va swi tshemba leswi, va ta tiphina hi vutomi emisaveni hilaha ku nga heriki.—Hlaya Yohane 3:16.

 

DYONDZA SWO TALA

Xana Bibele Yi Dyondzisa Yini Hakunene?

Ha Yini Xikwembu Xi Pfumelela Leswaku Ku Va Ni Ku Xaniseka?

Vanhu vo tala va anakanya leswaku Xikwembu xi fanele xi soriwa hikwalaho ka leswi misava hinkwayo yi xanisekaka. Wena u ri yini? Dyondza hi swivangelo leswi Xikwembu xi swi vulaka malunghana ni ku xaniseka.