Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Mahungu Lamanene Lama Humaka Eka Xikwembu!

 Dyondzo 2

Xikwembu I Mani?

Xikwembu I Mani?

1. Ha yini hi fanele hi gandzela Xikwembu?

Xikwembu xa ntiyiso i Muvumbi wa swilo hinkwaswo. A xi na masungulo naswona a xi nge vi na makumu. (Pisalema 90:2) Hi xona Xihlovo xa mahungu lamanene lama kumekaka eBibeleni. (1 Timotiya 1:11) Leswi Xikwembu xi hi nyikeke vutomi, hi fanele hi gandzela xona ntsena.—Hlaya Nhlavutelo 4:11.

2. Xikwembu xi njhani?

A ku na munhu la tshameke a vona Xikwembu hikuva i Moya, leswi vulaka leswaku xi tlakukile ku tlula swivumbiwa swa nyama leswi hanyaka emisaveni. (Yohane 1:18; 4:24) Nilokoswiritano, hi nga vona vumunhu bya Xikwembu eka swilo leswi xi swi endleke. Hi xikombiso, mihandzu ni swiluva swo hambana-hambana swi hi byela hi rirhandzu ni vutlhari bya xona. Vukulu bya vuako byi hi byela hi matimba ya xona.—Hlaya Varhoma 1:20.

Hi nga dyondza leswi engetelekeke hi vumunhu bya Xikwembu loko hi hlaya Bibele. Hi xikombiso, yi hi byela leswi Xikwembu xi swi tsakelaka ni leswi xi nga swi tsakeliki, ndlela leyi xi va khomaka ha yona vanhu ni ndlela leyi xi angulaka ha yona eka swiyimo swo hambana-hambana.—Hlaya Pisalema 103:7-10.

3. Xana Xikwembu xi ni vito?

Yesu u te: “Tata wa hina la nge matilweni, vito ra wena a ri kwetsimisiwe.” (Matewu 6:9) Hambileswi Xikwembu xi nga ni swithopo swo tala, xi ni vito rin’we ntsena. Eka ririmi rin’wana ni rin’wana, vito leri ri vitaniwa hi ndlela leyi hambaneke. Hi Xitsonga i “Yehovha.”—Hlaya Pisalema 83:18.

Vito ra Xikwembu ri susiwile eTibibeleni to tala ivi ri siviwa hi swithopo leswi nge Hosi kumbe Xikwembu. Kambe loko Bibele yi tsariwa, vito ra Xikwembu a ri humelela minkarhi ya kwalomu ka 7 000. Yesu u twarise vito ra Xikwembu loko a dyondzisa vanhu hi xona.—Hlaya Yohane 17:26.

Ku fana ni tatana loyi la nga ni rirhandzu, Xikwembu xi teka goza leswaku hi ta vuyeriwa hilaha ku nga heriki

 4. Xana Yehovha u na mhaka na hina?

Xana leswi vanhu vo tala va xanisekaka swi vula leswaku Yehovha i Xikwembu lexi nga riki na mhaka na hina? Vanhu van’wana va vula leswaku u pfumelela leswaku hi xaniseka leswaku a hi ringa, kambe sweswo a hi ntiyiso.—Hlaya Yakobo 1:13.

Xikwembu xi nyike vanhu ntshunxeko wo tihlawulela. Xana a hi wu tlangeli ntshunxeko wa hina wa ku hlawula ku tirhela Xikwembu? (Yoxuwa 24:15) Kambe vanhu vo tala va hlawula ku endla van’wana swilo swo biha, hi yona mhaka vanhu vo tala va xanisekaka. Yehovha u twa ku vava loko a vona vuhomboloki byebyo.—Hlaya Genesa 6:5, 6.

Yehovha i Xikwembu lexi nga ni mhaka na hina. U lava leswaku hi tiphina hi vutomi. Ku nga ri khale u ta herisa ku xaniseka ni lava va ku vangaka. Sweswi, u ni xivangelo lexi twalaka xo pfumelela ku xaniseka ku ringana nkarhi wo karhi. Xivangelo xa kona hi ta dyondza hi xona eka Dyondzo 8.—Hlaya 2 Petro 2:9; 3:7, 13.

5. Hi nga tshinela njhani eka Xikwembu?

Yehovha u hi rhamba leswaku hi tshinela eka yena hi ku vulavula na yena hi xikhongelo. Wa khathala hi un’wana ni un’wana wa hina. (Pisalema 65:2; 145:18) U tiyimiserile ku hi rivalela. Wa swi vona loko hi endla matshalatshala yo n’wi tsakisa, hambiloko minkarhi yin’wana hi tsandzeka. Hikwalaho, hambileswi hi nga hetisekangiki, hi nga swi kota ku va ni vuxaka lebyikulu na Xikwembu.—Hlaya Pisalema 103:12-14; Yakobo 4:8.

Leswi Yehovha a hi nyikeke vutomi, hi fanele hi n’wi rhandza ku tlula ndlela leyi hi rhandzaka munhu wihi na wihi. (Marka 12:30) Loko u ri karhi u kombisa ndlela leyi u rhandzaka Xikwembu ha yona hi ku dyondza leswi engetelekeke ha xona ni ku endla ku rhandza ka xona, u ta tshinela swinene eka xona.—Hlaya 1 Timotiya 2:4; 1 Yohane 5:3.

DYONDZA SWO TALA

Xana Xikwembu Xi Ni Vito?

Xikwembu xi ni swithopo swo tala, swo tanihi lexi nge Lowa Matimba Hinkwawo, Muvumbi ni lexi nge Hosi. Kambe vito ra xona ri tirhisiwa minkarhi ya kwalomu ka 7 000 eBibeleni.