Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Mahungu Lamanene Lama Humaka Eka Xikwembu!

 Dyondzo 10

U Nga Byi Vona Njhani Vugandzeri Bya Ntiyiso?

U Nga Byi Vona Njhani Vugandzeri Bya Ntiyiso?

“Tivoneleni vaprofeta va mavunwa.”MATEWU 7:15.

“Va vula erivaleni leswaku va tiva Xikwembu, kambe va xi landzula hi mintirho ya vona.”TITO 1:16.

1. Xana ku ni vukhongeri byin’we ntsena bya ntiyiso?

Yesu u dyondzise valandzeri va yena vukhongeri byin’we ntsena, ku nga vukhongeri bya ntiyiso. Byi fana ni gondzo leri yisaka evuton’wini lebyi nga heriki. Yesu u te: “A hi vangani lava ri kumaka” gondzo rolero. (Matewu 7:14) Xikwembu xi amukela ntsena vugandzeri lebyi sekeriweke eRitweni ra xona ra ntiyiso. Vagandzeri hinkwavo va ntiyiso va pfumela swilo leswi fanaka.—Hlaya Yohane 4:23, 24; 14:6; Vaefesa 4:4, 5.

2. Yesu u vule yini hi Vakreste va mavunwa?

Yesu u lemukise leswaku vaprofeta va mavunwa a va ta thyakisa Vukreste. Ehandle va vonaka va fana ni vagandzeri va ntiyiso. Etikerekeni ta vona va vula leswaku vona i Vakreste. Kambe vanhu vo tano u nga va vona hi mihandzu ya vona. Njhani? I vugandzeri bya ntiyiso ntsena lebyi nga ni Vakreste va xiviri lava nga ni timfanelo letinene ni swiendlo leswi vanhu va swi xiyaka.—Hlaya Matewu 7:13-23.

3. U nga va vona njhani vagandzeri va ntiyiso?

Xiya mimfungho leyi ya ntlhanu:

  • Vagandzeri va ntiyiso va xixima Bibele tanihi Rito ra Xikwembu. Va tikarhatela ku hanya hi milawu ya yona. Hikwalaho vukhongeri bya ntiyiso bya hambana ni vukhongeri lebyi sekeriweke eka mianakanyo ya vanhu. (Matewu 15:7-9) Vagandzeri va ntiyiso va hanya hi ku pfumelelana ni leswi va swi dyondzisaka.—Hlaya Yohane 17:17; 2 Timotiya 3:16, 17.

  • Valandzeri va ntiyiso va Yesu va xixima vito ra Xikwembu ku nga Yehovha. Yesu u xixime vito ra Xikwembu  hi ku ri twarisa. U pfune vanhu leswaku va tiva Xikwembu a tlhela a va dyondzisa ku khongelela leswaku vito ra Xikwembu ri kwetsimisiwa. (Matewu 6:9) Laha u tshamaka kona, hi byihi vukhongeri lebyi twarisaka vito ra Xikwembu?—Hlaya Yohane 17:26; Varhoma 10:13, 14.

  • Vakreste va ntiyiso va chumayela hi Mfumo wa Xikwembu. Xikwembu xi rhume Yesu leswaku a ya chumayela mahungu lamanene ya Mfumo. Mfumo wa Xikwembu hi wona ntsena ntshembo wa vanhu. Yesu u ye emahlweni a vulavula hi wona ku fikela loko a fa. (Luka 4:43; 8:1; 23:42, 43) U vule leswaku valandzeri va yena a va ta chumayela ha wona. Loko munhu a vulavurisana na wena hi Mfumo wa Xikwembu, u va a ri wa vukhongeri byihi?—Hlaya Matewu 24:14.

  • Valandzeri va Yesu a hi xiphemu xa misava leyi yo homboloka. U nga va vona hikuva a va hlanganyeli eka swa tipolitiki kumbe eka tinyimpi ta tinxaka. (Yohane 17:16; 18:36) Nakambe, a va ma tekeleli mahanyelo ya misava lama nga ni khombo ni malangutelo ya kona.—Hlaya Yakobo 4:4.

  • Vakreste va ntiyiso va rhandzana hi ndlela leyikulu. Rito ra Xikwembu ri va dyondzise ku xixima vanhu va tinxaka hinkwato. Hambileswi minkarhi yo tala vukhongeri bya mavunwa byi seketelaka tinyimpi ta rixaka, vagandzeri va ntiyiso a va pfumeli ku endla sweswo. (Mikiya 4:1-3) Ku ri na sweswo, Vakreste va ntiyiso handle ka vutianakanyi va tirhisa nkarhi ni swilo swa vona leswaku va pfuna ni ku khutaza van’wana.—Hlaya Yohane 13:34, 35; 1 Yohane 4:20.

4. U nga byi vona njhani vukhongeri bya ntiyiso?

I vukhongeri byihi lebyi tidyondzo ta byona ti sekeriweke eRitweni ra Xikwembu, lebyi xiximaka vito ra Xikwembu, naswona byi twarisaka Mfumo wa Xikwembu tanihi wona ntsena ntshembo wa vanhu? Hi wihi ntlawa lowu kombisanaka rirhandzu naswona wu nga hlanganyeliki etinyimpini? U swi vonisa ku yini?—Hlaya 1 Yohane 3:10-12.

 

DYONDZA SWO TALA

Vugandzeri Lebyi Amukelekaka Eka Xikwembu

Kambisisa timfanelo ta tsevu leti lava nga evukhongerini bya ntiyiso va vonakaka ha tona.