Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Mahungu Lamanene Lama Humaka Eka Xikwembu!

 Dyondzo 7

Mfumo Wa Xikwembu I Yini?

Mfumo Wa Xikwembu I Yini?

Ha yini Yesu a ri Hosi leyi fanelekaka?MARKA 1:40-42.

1. Mfumo wa Xikwembu i yini?

Mfumo wa Xikwembu i hulumendhe ya le tilweni. Wu ta siva tihulumendhe letin’wana hinkwato naswona wu ta endla leswaku ku rhandza ka Xikwembu ku endleka etilweni ni laha misaveni. Mahungu lama vulavulaka hi Mfumo wa Xikwembu i manene. Ku nga ri khale Mfumo wa Xikwembu wu ta enerisa xilaveko xa vanhu xo lava hulumendhe leyinene. Wu ta endla leswaku hinkwavo lava tshamaka emisaveni va va ni vun’we.—Hlaya Daniyele 2:44; Matewu 6:9, 10; 24:14.

Mfumo wu fanele wu va ni hosi. Yehovha u hlawule N’wana wa yena, Yesu Kreste, leswaku a va Hosi ya Mfumo wa Yena.—Hlaya Nhlavutelo 11:15.

2. Ha yini Yesu a ri Hosi leyi fanelekaka?

N’wana wa Xikwembu i Hosi leyi fanelekaka hikuva u ni musa naswona u tiyimisele ku endla leswinene. (Yohane 1:14) Nakambe u ni matimba yo pfuna vanhu hikuva u ta fuma misava a ri etilweni. Endzhaku ka loko a pfuxiwile eku feni, u tlhandlukele etilweni kutani a fika a tshama evokweni ra xinene ra Yehovha a rindza. (Vaheveru 10:12, 13) Eku heteleleni, Xikwembu xi n’wi nyike matimba leswaku a sungula ku fuma.—Hlaya Daniyele 7:13, 14.

3. I vamani lava nga ta fuma na Yesu?

Ntlawa lowu vitaniwaka “vakwetsimi” wu ta fuma na Yesu etilweni. (Daniyele 7:27) Vanhu vo sungula lava hlawuriweke ku va vakwetsimi a ku ri vaapostola vo tshembeka va Yesu. Yehovha u ye emahlweni a hlawula vavanuna ni vavasati vo tshembeka leswaku va va vakwetsimi ku fikela sweswi. Ku fana na Yesu, va pfuxiwa eku feni va ri ni mimiri ya moya.—Hlaya Yohane 14:1-3; 1 Vakorinto 15:42-44.

 I vanhu vangani lava yaka etilweni? Yesu u va vitane “ntlhambinyana.” (Luka 12:32) Eku heteleleni, nhlayo ya vona yi ta va 144 000 naswona va ta fuma misava swin’we na Yesu.—Hlaya Nhlavutelo 14:1.

4. Ku humelele yini loko Yesu a sungula ku fuma?

Mfumo wa Xikwembu wu sungule ku fuma hi 1914. * Goza ro sungula leri Yesu a ri tekeke loko a va Hosi a ku ri ku lahlela Sathana ni madimona ya yena emisaveni. Sathana u hlundzukile kutani a sungula ku vanga swiphiqo emisaveni hinkwayo. (Nhlavutelo 12:7-10, 12) Ku sukela hi nkarhi wolowo, makhombo lama welaka vanhu ma nyanyile. Tinyimpi, tindlala, mintungu ni ku tsekatseka ka misava i xiphemu xa “xikombiso” xa leswaku ku nga ri khale Mfumo wa Xikwembu wu ta lawula misava hinkwayo.—Hlaya Luka 21:7, 10, 11, 31.

5. Mfumo wa Xikwembu wu hetisisa yini?

Hi ku tirhisa ntirho wo chumayela emisaveni hinkwayo, Mfumo wa Xikwembu wu hlengeleta ntshungu lowukulu wa vanhu lava humaka ematikweni hinkwawo lava nga ni vun’we. Vanhu va timiliyoni lava titsongahataka se va fumiwa hi Yesu. Mfumo wa Xikwembu wu ta va sirhelela loko wu lovisa mafambiselo lawa yo homboloka ya swilo emisaveni. Kutani hinkwavo lava lavaka ku vuyeriwa eka Mfumo wa Xikwembu va fanele va dyondza ku va vanhu lava nga ta fumiwa hi Yesu lava yingisaka.—Hlaya Nhlavutelo 7:9, 14, 16, 17.

Mfumo wolowo wu ta hetisisa xikongomelo xo sungula xa Xikwembu malunghana ni vanhu hi nkarhi lowu endlaka malembe ya 1 000. Misava hinkwayo yi ta va paradeyisi. Eku heteleleni, Yesu u ta tlherisela Mfumo eka Tata wa yena. (1 Vakorinto 15:24-26) Xana u tiva munhu wo karhi loyi u nga tsakelaka ku n’wi byela hi Mfumo wa Xikwembu?—Hlaya Pisalema 37:10, 11, 29.

 

^ ndzim. 12 Leswaku u kuma vuxokoxoko bya ndlela leyi vuprofeta bya le Bibeleni byi profeteke lembe ra 1914 ha yona, hlaya eka matluka 215-218 ya buku leyi nge, Xana Bibele Yi Dyondzisa Yini Hakunene?

DYONDZA SWO TALA

Xana Bibele Yi Dyondzisa Yini Hakunene?

Xana Hi Hanya “eMasikwini Yo Hetelela”?

Anakanyisisa hi ndlela leyi swiendlo ni malangutelo ya vanhu lava hi rhendzeleke swi kombisaka ha yona leswaku sweswi hi hanya “emasikwini yo hetelela” lawa Bibele yi profeteke ha wona.

I VAMANI LAVA ENDLAKA KU RHANDZA KA YEHOVHA NAMUNTLHA?

Ntirho Wa Timbhoni Ta Yehovha Wo Chumayela Hi Mfumo Wu Hleriwe Njhani?

Hi landzela ntila lowu vekiweke hi Yesu loko a ri laha misaveni. Hi tihi tin’wana ta tindlela to chumayela?