Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Mahungu Lamanene Lama Humaka Eka Xikwembu!

 Dyondzo 15

Ha Yini U Fanele U Ya eMahlweni U Dyondza Swo Tala Hi Yehovha?

Ha Yini U Fanele U Ya eMahlweni U Dyondza Swo Tala Hi Yehovha?

1. U ta vuyeriwa njhani loko u ya emahlweni u dyondza Bibele?

A swi kanakanisi leswaku nkatsakanyo lowu wa tidyondzo ta xisekelo ta Bibele wu tiyise ndlela leyi u rhandzaka Yehovha ha yona. Rirhandzu leri ri lava ku tshama ri hlakuleriwa. (1 Petro 2:2) Ntshembo wa wena wa vutomi lebyi nga heriki wu titshege hi ku va u ya emahlweni u tshinela eka Xikwembu hi ku dyondza Rito ra xona.—Hlaya Yohane 17:3; Yudha 21.

Loko vutivi bya wena bya Xikwembu byi kula, ripfumelo ra wena ri ta tiya. Ripfumelo ri ta ku pfuna leswaku u tsakisa Xikwembu. (Vaheveru 11:1, 6) Ri ta ku susumetela ku hundzuka ni ku endla ku cinca loku faneleke evuton’wini bya wena.—Hlaya Mintirho 3:19.

U nga va ni vuxaka byo hlawuleka na Yehovha

2. Ku tiva ka wena Xikwembu ku ta va vuyerisa njhani van’wana?

Hi ntolovelo, u ta lava ku byela van’wana leswi u swi dyondzeke—hinkwerhu ha swi tsakela ku byela van’wana mahungu lamanene. Loko u ya emahlweni u dyondza Bibele, u ta dyondza ndlela yo tirhisa Bibele leswaku u hlamusela ripfumelo leri u nga na rona eka Yehovha ni le ka mahungu lamanene.—Hlaya Varhoma 10:13-15.

Vanhu vo tala va sungula hi ku byela vanghana ni maxaka ya vona mahungu lamanene. Vana ni vuxiya-xiya. Ematshan’weni yo va byela leswaku vukhongeri bya vona a hi bya ntiyiso, va byele leswi Xikwembu xi swi tshembisaka. Nakambe, tsundzuka leswaku hakanyingi vanhu va tsakisiwa hi mahanyelo ya wena lamanene ku ri na leswi u swi vulaka.—Hlaya 2 Timotiya 2:24, 25.

3. U nga tiphina hi vuxaka bya njhani ni Xikwembu?

Ku dyondza Rito ra Xikwembu swi ta ku pfuna leswaku u kula hi tlhelo ra moya. Eku heteleleni, u nga va ni vuxaka byo hlawuleka swinene na Yehovha. Entiyisweni u nga va xirho xa ndyangu wa yena.—Hlaya 2 Vakorinto 6:18.

 4. U nga ya njhani emahlweni u endla nhluvuko?

U nga endla nhluvuko hi tlhelo ra moya hi ku ya emahlweni u dyondza Rito ra Xikwembu. (Vaheveru 5:13, 14) Kombela un’wana wa Timbhoni ta Yehovha leswaku a dyondza na wena Bibele mi tirhisa buku leyi nge, Xana Bibele Yi Dyondzisa Yini Hakunene? Loko u ya u dyondza leswi engetelekeke eRitweni ra Xikwembu, swi ta ku fambela kahle evuton’wini.—Hlaya Pisalema 1:1-3; 73:27, 28.

Mahungu lamanene ma huma eka Yehovha, Xikwembu lexi tsakeke. U nga tshinela eka yena hi ku tihlanganisa ni vanhu va yena. (Vaheveru 10:24, 25) Loko u ya emahlweni u endla matshalatshala yo tsakisa Yehovha, u tikarhatela ku kuma vutomi bya xiviri ku nga vutomi lebyi nga heriki. Hakunene ku tshinela eka Xikwembu i nchumu lowunene lowu u nga wu endlaka.—Hlaya 1 Timotiya 1:11; 6:19.

 

DYONDZA SWO TALA

MINHLANGANO

Ku Endliwa Yini eHolweni Ya Mfumo?

Nghena endzeni u vona leswi endliwaka.

DYONDZO YA BIBELE

Ha Yini U Fanele U Dyondza Bibele?

Bibele yi le ku pfuneni ka vanhu va timiliyoni emisaveni hinkwayo leswaku va kuma tinhlamulo ta swivutiso swa nkoka evuton’wini. Xana na wena u nge tsakeli leswaku yi ku pfuna?

Xana Bibele Yi Dyondzisa Yini Hakunene?

Tshinela Eka Xikwembu Hi Xikhongelo

Xana Xikwembu xa yingisa loko u khongela? Leswaku u hlamula xivutiso xexo, u fanele u twisisa leswi Bibele yi swi dyondzisaka hi xikhongelo.