Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Tinhlamulo Ta Swivutiso Swa Khume Leswi Vantshwa Va Swi Vutisaka

 XIVUTISO 3

Ndzi Nga Vulavula Njhani Ni Vatswari Va Mina?

Ndzi Nga Vulavula Njhani Ni Vatswari Va Mina?

LEXI ENDLAKA SWI VA SWA NKOKA

Loko u hanyisana ni vatswari va wena, swilo swi ta ku fambela kahle evuton’wini.

A WU TA ENDLA YINI?

Ehleketa hi xiyimo lexi: I Ravunharhu nimadyambu. Geoff wa malembe ya 17, u hetile ku endla mintirho yakwe ya le kaya naswona u lunghekele ku wisa! U layita TV kutani a tshama exitulwini xakwe lexi a xi rhandzaka.

Hi nkarhi wolowo, tata wakwe u nghena hi le nyangweni naswona u tikomba a nga tsakanga.

“Geoffrey! Ha yini u tidyela nkarhi hi ku hlalela TV kasi a wu fanele u pfuna makwenu hi ntirho wakwe wa xikolo? A wu si tshama u endla leswi u byeriwaka swona!”

Geoff u n’unun’uta swi twala, a ku: “Se u sungurile.”

Tata wakwe a ku: “U ri yini n’wana ndziwena?”

Geoff u hefemulela ehenhla a languta tata wakwe hi ndlela yo delela a ku: “A ndzi vulanga nchumu.”

Tata wakwe se u hlundzukile. U ri: “U nga vulavuli na mina hi ndlela yoleyo.”

Loko a wu ri Geoff, a wu ta va u yi sivele njhani mholovo leyi?

EHLEKETISISA HI MHAKA LEYI!

Ku vulavurisana ni vatswari va wena swi fana ni ku chayela movha. Loko u kuma ndlela yi pfariwile, u lava yin’wana u ya famba hi yona.

 XIKOMBISO:

Nhwanyana la vuriwaka Leah u ri: “Swa ndzi tikela ku vulavula na tatana. Minkarhi yin’wana ndzi vulavula na yena ivi a ku, ‘A wu ku yini?’”

LEAH A NGA HLAWULA EKA MAGOZA LAMANHARHU.

  1. A nga huwelela tata wakwe.

    Leah a nga huwelela a ku: “Tatana, mhaka leyi i ya nkoka! Yingisela!”

  2. A nga tshika ku vulavula ni tata wakwe.

    Leah a nga namba a tshika ku byela tata wakwe xiphiqo xakwe.

  3. A nga ha tlhela a vulavula hi mhaka leyi hi nkarhi wun’wana.

    Leah a nga ha vulavula ni tata wakwe hi ku kongoma endzhaku ka nkarhi kumbe a n’wi tsalela papila a n’wi byela xiphiqo xakwe.

A wu ta khutaza Leah ku hlawula ku endla yini?

XIYA: Tata wa Leah u ehleketa hi mhaka yo karhi naswona a nga swi xiyi leswaku Leah u karhatekile. Loko Leah o hlawula Goza A, swi nga ha endleka tata wakwe a nga swi twisisi leswaku ha yini a n’wi huwelela. Goza leri ri nga ha endla leswaku tata wakwe a nga n’wi yingiseli, naswona sweswo swi ta kombisa leswaku a nga n’wi xiximi tata wakwe. (Vaefesa 6:2) Kutani a swi kanakanisi leswaku goza leri a ri nge pfuni nchumu.

Tanihi leswi u nga lan’wiki loko u kuma ndlela yi pfariwile, u nga yi kuma ndlela yo vulavurisana ni vatswari va wena

Hambileswi Goza B ri nga ha vonakaka onge ra olova, kambe a hi vutlhari ku ri teka. Ha yini? Leswaku Leah a kota ku langutana ni swiphiqo leswi a nga na swona, u fanele a vulavula ni tata wakwe naswona tata wakwe u fanele a tiva leswaku ku humelela yini evuton’wini bya Leah leswaku a ta kota ku n’wi pfuna. Loko a nga vulavuli a nge wu kumi mpfuno nikatsongo.

Hambiswiritano, eka Goza C, Leah a nga pfumeleli xihinga lexi xi n’wi sivela ku vulavurisana ni tata wakwe. Ku ri na sweswo, u ringeta ku vulavula na yena hi mhaka yoleyo hi nkarhi wun’wana. Loko Leah a hlawula ku tsalela tata wakwe papila, a nga ha titwa a antswa endzhaku ka sweswo.

Ku tsala papila swi nga ha tlhela swi n’wi pfuna leswaku a swi hlamusela kahle leswi a lavaka ku swi byela tata wakwe. Loko tata wakwe a hlaya papila rero, u ta twa leswi Leah a a ringeta ku n’wi byela swona naswona sweswo swi nga ha n’wi pfuna leswaku a swi twisisa kahle swiphiqo swa n’wana wakwe. Hikwalaho, Goza C ri pfuna Leah na tata wakwe. Ku nga khathariseki leswaku u vulavula ni tata wakwe hi ku kongoma kumbe hi papila, goza leri ri fambisana ni xitsundzuxo xa le Bibeleni xo “[lavisisa] swilo leswi endlaka ku rhula.”—Varhoma 14:19.

Hi wahi magoza man’wana lawa Leah a nga ha ma tekaka?

Ringeta ku ehleketa hi goza rin’we kutani u ri tsala laha hansi. Kutani tsala vuyelo lebyi goza rero ri nga ha vaka na byona.

Goza:

Vuyelo:

 PAPALATA KU VULAVULA HI NDLELA LEYI NGA TA ENDLA VATSWARI VA WENA VA NGA SWI TWISISI LESWI U SWI VULAKA

Tsundzuka leswaku leswi u swi vuleke ni leswi vatswari va wena va anakanyaka leswaku u vula swona, a hi minkarhi hinkwayo swi fanaka.

HI XIKOMBISO:

Vatswari va wena va ku vutisa leswaku ha yini u tikomba u nga tsakanga. Wena u ri, “A ndzi swi lavi ku vulavula hi mhaka ya kona.”

Kambe vatswari va wena va twa onge u ri: “A ndzi nge mi phofuleli ta le mbilwini ya mina hikuva a ndzi mi tshembi. Ndzi ta byela vanghana va mina xiphiqo lexi ku nga ri n’wina.”

Tianakanye u langutane ni xiphiqo lexikulu kutani mutswari wa wena a vula leswaku u ta ku pfuna. Kambe wena u ri: “U nga karhateki. Ndzi ta swi kota ku tilulamisela xiphiqo lexi.”

  • Vatswari va wena va nga ha twa onge u ri:

  • Nhlamulo yo antswa yi nga ha ku: