Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Tinhlamulo Ta Swivutiso Swa Khume Leswi Vantshwa Va Swi Vutisaka

 XIVTISO 7

Ndzi Nga Endla Yini Loko Ndzi Tshikileleka Ku Endla Timhaka Ta Masangu?

Ndzi Nga Endla Yini Loko Ndzi Tshikileleka Ku Endla Timhaka Ta Masangu?

LEXI ENDLAKA SWI VA SWA NKOKA

Swiboho leswi u swi endlaka malunghana ni timhaka ta masangu swi ta byi khumba swinene vumundzuku bya wena.

A WU TA ENDLA YINI?

Ehleketa hi xiyimo lexi: Heather u ni tin’hweti timbirhi ntsena a rhandzana na Mike, kambe u titwa onge i khale a n’wi tiva. Va tshamela ku rhumelana marungula, loko va belana riqingho va vulavula nkarhi wo leha naswona va hetiselana ni swivulwa. Kambe Mike a nga ha lavi va bula ntsena.

Eka tin’hweti timbirhi leti hundzeke, Mike na Heather a vo khomana hi mavoko va tlhela va ntswontswana katsongo ntsena. Heather a nga ha lavi ku endla swin’wana swo tlula sweswo. Kambe hi hala tlhelo a nga swi lavi ku tshikiwa hi Mike. A ku na munhu un’wana la n’wi endlaka a titwa a sasekile swinene naswona a hlawulekile ngopfu. U tibyela a ku: ‘Phela mina na Mike ha rhandzana . . . ’

Xana a wu ta endla yini loko ku ri leswaku se u kurile ku ringanela leswaku u nga sungula ku rhandzana naswona u ri exiyin’weni xo fana ni xa Heather?

EHLEKETISISA HI MHAKA LEYI!

Loko wo ringeta ku tlula ehenhla ka nsinya u haha ku fana ni xinyenyana u ta vaviseka. Swi tano ni loko u tlula nawu wo tanihi lowu nge: “Mi papalata vumbhisa.”—1 Vatesalonika 4:3.

Ku endla timhaka ta masangu i nyiko leyi humaka eka Xikwembu ya lava tekaneke ntsena. Loko vanhu va endla timhaka ta masangu va nga tekananga va tirhisa nyiko yoleyo hi ndlela yo biha. Swi fana ni ku teka nguvu yo saseka leyi u nyikiweke yona ivi u yi tirhisela ku basisa ha yona

Hi byihi vuyelo bya ku nga yingisi nawu lowu? Bibele yi ri: “Loyi a hanyaka hi vumbhisa u dyohela miri wa yena n’wini.” (1 Vakorinto 6:18) Marito lawa i ntiyiso ku fikela kwihi?

Vaendli va ndzavisiso va kume leswaku hakanyingi vantshwa vo tala lava endleke timhaka ta masangu va nga si nghenela vukati va kuma byi n’wana bya vuyelo lebyi landzelaka lebyi nga tsakisiki.

  • MBITSI. Vantshwa vo tala lava endleke timhaka ta masangu va nga si nghenela vukati va vula leswaku va tisola.

  • KU NGA TSHEMBANI. Endzhaku ka loko vanhu vambirhi va endle timhaka ta masangu, ha un’we wa vona u sungula ku tivutisa a ku, ‘I mani un’wana loyi a etleleke na yena?’

  • KU PFILUNGANYEKA. Vanhwanyana vo tala va tsakela ku rhandzana ni munhu la nga ta va sirhelela, ku nga ri la nga ta tlanga hi vona. Kasi majaha yo tala a ma ha n’wi tsakeli nhwanyana loyi ma tshameke ma etlela na yena.

  • Mhaka ya nkoka: Loko u pfumela ku endla timhaka ta masangu ni munhu loyi u nga tekanangiki na yena, u sala u nga ha ri na xindzhuti. (Varhoma 1:24) Miri wa wena i wa nkoka swinene kutani a wu fanelanga u tlanga ha wona!

Kombisa leswaku u ni xivindzi hi ku “papalata vumbhisa.” (1 Vatesalonika 4:3) Kutani loko siku rin’wana u nghenela vukati, u ta endla timhaka ta masangu. U ta tiphina swinene handle ko vilela, ku tisola ni ku chava loku vanhu lava endlaka timhaka ta masangu va nga si nghenela vukati va vaka na kona.—Swivuriso 7:22, 23; 1 Vakorinto 7:3.

 U SWI VONISA KU YINI?

  • Xana munhu loyi a ku rhandzaka hakunene a nga hoxa vutomi bya wena ekhombyeni ni ku ku twisa ku vava?

  • Xana munhu loyi a hakunene a khathalaka hi wena a nga ku ringa leswaku u veka vuxaka bya wena ni Xikwembu ekhombyeni?—Vaheveru 13:4.