Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Tinhlamulo Ta Swivutiso Swa Khume Leswi Vantshwa Va Swi Vutisaka

 XIVUTISO 4

Ndzi Nga Swi Lulamisa Njhani Swihoxo Swa Mina?

Ndzi Nga Swi Lulamisa Njhani Swihoxo Swa Mina?

LEXI ENDLAKA SWI VA SWA NKOKA

Ku pfumela swihoxo swa wena swi ta endla u va munhu la tshembekaka naswona a tshembiwaka.

A WU TA ENDLA YINI?

Ehleketa hi xiyimo lexi: Loko Tim a ri karhi a tlanga ni vanghana vakwe u hoxe bolo ivi yi faya fasitere ra movha ya muakelani.

Loko a wu ri Tim a wu ta endla yini?

EHLEKETISISA HI MHAKA LEYI!

U NGA HLAWULA EKA MAGOZA LAMANHARHU:

  1. U nga baleka.

  2. U nga vona un’wana nandzu.

  3. U nga byela muakelani leswi humeleleke, kutani u vula leswaku u ta ri lunghisa fasitere leri u ri fayeke.

U nga ha titwa u lava ku hlawula Goza A. Kambe minkarhi hinkwayo ku ni swivangelo leswi twalaka swa leswaku u pfumela swihoxo swa wena—ku nga khathariseki leswaku swi katsa ku faya fasitere kumbe swilo swin’wana.

 Ku tshamela ku anakanya hi swihoxo swa wena swa khale swi fana ni ku chayela u langute xivoni lexi ku kombaka swilo swa le ndzhaku

SWIVANGELO SWINHARHU SWO PFUMELA SWIHOXO SWA WENA

  1. I nchumu lowu u faneleke u wu endla.

    Bibele yi ri: “Hi [navela] ku tikhoma hi ku tshembeka eka swilo hinkwaswo.”—Vaheveru 13:18.

  2. Vanhu va tala ku rivalela lava pfumelaka leswaku va endle swihoxo.

    Bibele yi ri: “Loyi a fihlaka ku tlula nawu kakwe a nge humeleli, kambe loyi a tiphofulaka kutani a tshika, u ta kombiwa tintswalo.”—Swivuriso 28:13.

  3. Xa nkoka swinene, swi tsakisa Xikwembu.

    Bibele yi ri: “Munhu la kanganyisaka i nchumu lowu nyenyetsaka eka Yehovha, kambe Yena u rhandza lavo lulama.”—Swivuriso 3:32.

Karina loyi a nga ni malembe ya 20 u ringete ku fihlela papa wa yena thikithi leri a ri kumeke hikwalaho ko chayela hi rivilo ra le henhla. Kambe a a nga ta ri fihla hilaha ku nga heriki. Karina u ri: “Endzhakunyana ka lembe, papa u vone thikithi rero ra ku chayela hi rivilo ra le henhla. A ndzi ri ekhombyeni!”

Xana u dyondze yini? Karina u ri: “Ku fihla swihoxo swi nyanyisa swilo. Hi ku famba ka nkarhi swi ta humelela.”

LESWI U NGA SWI DYONDZAKA EKA SWIHOXO SWA WENA

Bibele yi ri: “Hinkwerhu ha khunguvanyeka minkarhi yo tala.” (Yakobo 3:2) Hilaha se hi swi voneke hakona, ku pfumela swihoxo swa wena hi ndlela leyi faneleke swi kombisa ku titsongahata ni ku va la wupfeke.

Goza leri landzelaka i ku dyondza eka swihoxo swa wena. Nhwanyana la vuriwaka Vera u te: “Eka xihoxo xin’wana ni xin’wana lexi ndzi xi endleke, ndzi ringeta ku dyondza swo karhi leswi nga ta endla leswaku ndzi antswisa vumunhu bya mina ni ku endla swilo hi ndlela leyi hambaneke enkarhini lowu taka.” A hi vone leswaku u nga swi endlisa ku yini sweswo.

U lomba bayisikiri ya papa wa wena kutani u tshova swo karhi eka yona. Xana u ta endla yini?

  • U to miyela u ri ni ntshembo wa leswaku papa wa wena a nge swi voni.

  • U byela papa wa wena leswi humeleleke.

  • U byela papa wa wena leswi humeleleke kambe u vona munhu un’wana nandzu.

U feyila xikambelo hileswi u nga hlayangiki. Xana u ta endla yini?

  • U ta vula leswaku xikambelo a xi tika.

  • U ta vula leswaku a wu hlayanga.

  • U ta vula leswaku thicara wa wena a nga ku rhandzi.

Ku tshamela ku anakanya hi swihoxo swa wena swa khale swi fana ni ku chayela u langute xivoni lexi ku kombaka swilo swa le ndzhaku

 Sweswi anakanya hi swiendlakalo leswi se hi vulavuleke ha swona ivi u tianakanya u ri (1) papa wa wena ni (2) thicara wa wena. Papa wa wena na thicara wa wena a va ta ku teka njhani loko u hatla u amukela swihoxo swa wena? Xana a va ta ku teka njhani loko a wu tumbeta swihoxo swa wena?

Anakanya hi xihoxo lexi u xi endleke lembe leri nga hela kutani u hlamula swivutiso leswi landzelaka.

A ku ri yini xihoxo xa kona? U endle yini ha xona?

  • Ndzi xi fihlile.

  • Ndzi vone un’wana nandzu hikwalaho ka xona.

  • Ndzi hatle ndzi xi pfumela.

Loko u nga xi pfumelanga xihoxo xa wena, u titwe njhani endzhaku ka sweswo?

• Ndzi tsakile hikuva a ndzi kumekanga!

• Ndzi kingindziwe hi ripfalo, a ndzi fanele ndzi vule ntiyiso.

Hi yihi ndlela leyinene leyi a wu fanele u langutane ni xiyimo xolexo ha yona?

U dyondze yini eka xihoxo xa wena?

U SWI VONISA KU YINI?

Ha yini vanhu van’wana va nga swi lavi ku amukela swihoxo swa vona?

Vanhu va ta ku teka njhani loko u tshamela ku fihla swihoxo swa wena kambe vanhu va ta ku teka njhani loko u pfumela swihoxo swa wena?—Luka 16:10.