Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Tinhlamulo Ta Swivutiso Swa Khume Leswi Vantshwa Va Swi Vutisaka

 XIVUTISO 2

Ha Yini Ndzi Karhateka Hi Ndlela Leyi Ndzi Langutekaka Ha Yona?

Ha Yini Ndzi Karhateka Hi Ndlela Leyi Ndzi Langutekaka Ha Yona?

LEXI ENDLAKA SWI VA SWA NKOKA

Ku ni swilo leswi nga swa nkoka swinene ku tlula leswi u tivonaka u ri xiswona exivonini.

A WU TA ENDLA YINI?

Ehleketa hi xiyimo lexi: Loko Julia a tilanguta exivonini, u tivona a nyuherile. U ri, “Ndzi fanele ndzi hunguta miri,” hambileswi vatswari vakwe ni vanghana vakwe va n’wi byeleke leswaku u larile.

Julia u tibyele leswaku u lava ku hunguta miri wakwe hi tikhilogiramu ti nga ri tingani ntsena. Lexi a faneleke a xi endla i ku nga dyi ku ringana masiku ma nga ri mangani . . .

A wu ta endla yini loko a wu titwa hi ndlela leyi Julia a titwaka ha yona?

EHLEKETISISA HI MHAKA LEYI!

Ndlela leyi u tivonaka ha yona yi nga fana ni leswi u tivonisaka xiswona exivonini lexi ku endlaka u languteka hi ndlela leyi nga riki yona

A swi bihanga ku karhateka hi ndlela leyi u langutekaka ha yona. Bibele yi vulavula kahle hi ndlela leyi vavasati ni vavanuna vo hlayanyana a va languteka ha yona, ku katsa na Sara, Rahele, Abigayele, Yosefa na Davhida. Bibele yi vula leswaku wansati la vuriwaka Abixaga a a ri “phyembye.”—1 Tihosi 1:4.

Hambiswiritano, vantshwa vo tala va karhateka swinene hi ndlela leyi va langutekaka ha yona. Sweswo swi nga va vangela swiphiqo leswikulu. Anakanya hi mhaka leyi:

  • Eka nkambisiso wun’we, vanhwanyana lava endlaka 58 wa tiphesente va vule leswaku va nyuhele swinene, kambe a ko va lava endlaka 17 wa tiphesente ntsena lava a va nyuhele swinene.

  • Eka nkambisiso wun’wana, vavasati lava endlaka 45 wa tiphesente lava a va ondzile a va anakanya leswaku va nyuhele ngopfu.

  • Vantshwa van’wana va dya swakudya switsongo ngopfu hileswi va lavaka ku hunguta miri.

 Loko se u sungule ku dya swakudya switsongo ngopfu kumbe u ri ni vuvabyi byo karhi byo titsona swakudya, kombela mpfuno. Rhanga hi ku byela mutswari kumbe munhu un’wana lonkulu loyi u n’wi tshembaka. Bibele yi ri: “Nakulorhi wa ntiyiso u ni rirhandzu nkarhi hinkwawo, naswona i makwerhu la velekiweke loko ku ri ni maxangu.”—Swivuriso 17:17.

KU ANTSWISA LOKUNENE LOKU U NGA KU ENDLAKA!

Leswi endlaka munhu a saseka kumbe a nga saseki hi leswi a nga swona hakunene. Anakanya hi Absalomu n’wana wa Hosi Davhida. Bibele yi ri:

“A ku nga ri na munhu loyi a a saseke ku fana na yena. . . . A a nga ri na xivati.”—2 Samuwele 14:25.

Kambe jaha leri a ri tikurisa, ri navela xikhundlha ni ku va ni vukanganyisi! Hikwalaho, loko Bibele yi vulavula hi Absalomu a yi n’wi hlamuseli tanihi munhu lonene; yi n’wi hlamusela tanihi wanuna loyi a a nga tshembekanga a tlhela a va ni rivengo leri n’wi susumeteleke ku dlaya.

Swi fanerile leswi Bibele yi hi tsundzuxaka yi ku:

“Mi tiambexa vumunhu lebyintshwa.”Vakolosa 3:10.

“Mi nga endli ku tisasekisa ka n’wina ku va ka le handle . . . , kambe a ku ve ka munhu la nge xihundleni wa mbilu.”—1 Petro 3:3, 4.

Hambileswi swi nga bihangiki loko munhu a lava ku languteka, kambe xa nkoka swinene ku tlula ndlela leyi u langutekaka ha yona i vumunhu bya wena. Hi ku famba ka nkarhi, timfanelo letinene hi tona ti nga ta ku endla leswaku van’wana va ku teka u ri la sasekeke ku tlula ku va ni timayisele kumbe miri wo saseka. Nhwanyana la vuriwaka Phylicia u ri: “Vanhu va hatla va byi vona vuxongi, kambe lexi vanhu va nga ta ku tsundzuka swinene ha xona hi leswi u nga swona hakunene ni timfanelo ta wena letinene.”

KAMBISISA NDLELA LEYI U LANGUTEKAKA HA YONA

Xana minkarhi yin’wana a wu yi rhandzi ndlela leyi u langutekaka ha yona?

INA

E-E

Xana u tshame u anakanya ni hi ku endla vuhandzuri bya ku tisasekisa kumbe u titsona swakudya leswaku u ta antswisa ndlela leyi u langutekaka ha yona?

INA

E-E

I yini leswi a wu ta swi cinca eka ndlela leyi u langutekaka ha yona loko a wo kota ku endla tano? (Swi funghe.)

  • KU LEHA

  • NTIKO

  • MISISI

  • XIVUMBEKO XA MIRI

  • XIKANDZA

  • MUVALA WA NHLONGE

Loko swivutiso swimbirhi swo sungula u swi hlamule hi ina naswona u funghe swilo swinharhu kumbe ku tlula eka xivutiso xa vunharhu, anakanya hi mhaka leyi: Swi nga endleka leswaku van’wana a va ku voni hi ndlela leyi wena u tivonaka ha yona. Swa olova ku va munhu a karhateka ngopfu hi ndlela leyi a langutekaka ha yona.—1 Samuwele 16:7.

DYONDZA SWO TALA

Leswi Vantshwa Va Swi Vulaka Hi Ku Khathalela Rihanyo

Xana swa ku tikela ku dya swakudya leswi nga ni rihanyo ni ku endla vutiolori? Eka vhidiyo leyi, vantshwa van’wana va vula leswi va swi endlaka leswaku va va ni rihanyo lerinene.