Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Xana Bibele Yi Dyondzisa Yini Hakunene?

 XIENGETELO

Ndlela Leyi Vito Ra Xikwembu Ri Tirhisiwaka Ha Yona Ni Nhlamuselo Ya Rona

Ndlela Leyi Vito Ra Xikwembu Ri Tirhisiwaka Ha Yona Ni Nhlamuselo Ya Rona

XANA Pisalema 83:18 yi hundzuluxeriwe njhani eBibeleni ya wena? EBibeleni leyi vuriwaka Vuhundzuluxeri Bya Misava Leyintshwa Bya Matsalwa Yo Kwetsima yi hundzuluxeriwe hi ndlela leyi: “Leswaku vanhu va ta swi tiva leswaku wena loyi vito ra wena u nga Yehovha, wena u ri wexe u La nge Henhla-henhla emisaveni hinkwayo.” Tibibele to talanyana ti hundzuluxele ndzimana leyi hi ndlela leyi fanaka ni leyi. Hambiswiritano, vahundzuluxeri vo tala va susa vito leri nge Yehovha va ri siva hi swithopo swo fana na “Hosi” kumbe “La Nga Riki Na Makumu.” I yini lexi faneleke xi tsariwa eka ndzimana leyi? Xana i xithopo kumbe i vito leri nge Yehovha?

Vito ra Xikwembu hi tinhlanga ta Xiheveru

Ndzimana leyi yi vulavula hi vito. Eka ririmi ro sungula ra Xiheveru, leri Bibele yi hundzuluxeriweke yi suka eka rona, ku tsariwe vito ro hlawuleka endzimaneni leyi. Ri peletiwe hi tinhlanga ta Xiheveru ku nga יהוה (YHWH). Hi Xitsonga, vito leri ri vitaniwa “Yehovha.” Xana vito leri ri humelela ntsena eka ndzimana yin’we ya Bibele? Doo! Eka Matsalwa yo sungula ya Xiheveru, ri humelela kwalomu ka 7 000!

Xana vito ra Xikwembu i ra nkoka ku fikela kwihi? Anakanya hi xikhongelo lexi nga xikombiso, lexi vuriweke hi Yesu Kreste. Marito ya xona yo sungula ma ri: “Tata wa hina la nge matilweni, vito ra wena a ri kwetsimisiwe.” (Matewu 6:9) Endzhakunyana Yesu u khongele Xikwembu a ku: “Tatana, vangamisa vito ra wena.” Xikwembu xi hlamule xi ri tilweni xi ku: “Ndzi ri vangamisile naswona ndzi ta tlhela ndzi ri vangamisa.” (Yohane 12:28) Swi le rivaleni leswaku vito ra Xikwembu i ra nkoka swinene. Kutani, ha yini vahundzuluxeri van’wana va suse vito leri loko va hundzuluxela Bibele kutani va ri siva hi swithopo?

Ku vonaka ku ri ni swivangelo swimbirhi leswi va vhikaka ha swona. Xo sungula, vo tala va vula leswaku vito rero a ri fanelanga ri tirhisiwa hikuva namuntlha a yi tiviwi ndlela leyi a ri vitaniwa ha yona eku sunguleni. Xiheveru xa khale a xi tsariwa xi nga ri na switwari. Hikwalaho, a nga kona loyi a nga vulaka hi ku kongoma leswaku vanhu va khale va le Bibeleni a va ti vitanisa ku yini tinhlanga leti nge YHWH. Kambe, xana sweswo swi vula leswaku a hi fanelanga  hi tirhisa vito ra Xikwembu? Swi nga ha endleka leswaku enkarhini wa Bibele, vito ra Yesu a ri vitaniwa Yeshua kumbexana Yehoshua—a nga kona la swi tivaka. Hambiswiritano, vanhu vo hambana-hambana emisaveni namuntlha va vitana vito ra Yesu hi tindlela leti nga faniki, va ri vita hi ndlela leyi tolovelekeke hi ririmi ra rikwavo. A va tshiki ku ri tirhisa hikwalaho ka leswi va nga swi tiviki leswaku a ri vitanisiwa ku yini eka lembe-xidzana ro sungula. Hilaha ku fanaka, loko wo endzela etikweni rimbe, u ta kuma leswaku vito ra wena ri vitaniwa hi ndlela leyi u nga yi tolovelangiki hi ririmi ra kona. Hikwalaho, mhaka ya ku ala ku tirhisa vito ra Xikwembu hileswi hi nga tiyisekiki hi mavitanelo ya rona ya khale, a yi twali.

Xivangelo xa vumbirhi lexi vahundzuluxeri va vhikaka hi xona loko va susa vito ra Xikwembu eTibibeleni xi fambisana ni ndhavuko wa khale wa Vayuda. Vo tala va pfumela leswaku vito ra Xikwembu a ri fanelanga ri vuriwa. Swi le rivaleni leswaku xivangelo xexo i ku tirhisiwa ka nawu wa Bibele hi ndlela leyi hoxeke, ku nga nawu lowu nge: “U nga tshuki u khoma vito ra Yehovha Xikwembu xa wena hi ndlela leyi nga pfuniki nchumu, hikuva Yehovha a nge tshiki ku xupula la khomaka vito rakwe hi ndlela leyi nga pfuniki nchumu.”—Eksoda 20:7.

Nawu lowu wu yirisa ku tirhisa vito ra Xikwembu hi ndlela leyi hoxeke. Kambe, xana wu yirisa ku tirhisiwa ka vito ra xona hi ndlela leyi xiximekaka? Nikatsongo! Vatsari va Bibele ya Xiheveru (“Testamente Ya Khale”) hinkwavo a va ri vavanuna lava tshembekeke, lava a va hanya hi Nawu lowu Xikwembu xi wu nyikeke Vaisrayele va khale. Kambe, hakanyingi a va tirhisa vito ra Xikwembu. Hi xikombiso, va ri tirhise ko tala eka tipisalema leti a ti yimbeleriwa hi mintshungu ya vagandzeri va Xikwembu. Yehovha Xikwembu u kale a lerisa vagandzeri va yena leswaku va vitana vito ra yena, kutani lava tshembekaka va endle tano. (Yuwele 2:32; Mintirho 2:21) Hikwalaho, Vakreste namuntlha a va kanakani ku tirhisa vito ra Xikwembu hi ndlela ya xichavo, hilaha Yesu a endleke hakona.—Yohane 17:26.

Vahundzuluxeri va Bibele va endla xihoxo lexikulu hi ku susa vito ra Xikwembu va ri siva hi swithopo. Va endla leswaku Xikwembu xi nga tiveki naswona xi vonaka xi nga ri xa xiviri, kasi Bibele yi khutaza vanhu leswaku va va ni “xinakulobye na Yehovha.” (Pisalema 25:14) Anakanya hi munhu la nga munghana wa wena lonkulu. Xana a mi ta va vanghana lavakulu loko a wu nga ri tivi vito ra yena? Swi tano ni hi Xikwembu, loko vanhu va nga tivisiwi vito ra xona, leri nge Yehovha, xana va ta swi kotisa ku yini ku aka vuxaka lebyikulu na xona? Ku tlula kwalaho, loko vanhu va nga ri tirhisi vito ra Xikwembu,  a va swi koti ni ku tiva nhlamuselo ya rona ya nkoka. Xana vito ra Xikwembu ri vula yini?

Xikwembu hi xoxe xi hlamusele leswi vito ra xona ri vulaka swona, eka Muxe, nandza wa xona wo tshembeka. Loko Muxe a vutise Xikwembu vito ra xona, Yehovha u hlamule a ku: “Ndzi ta tikombisa ndzi ri lexi ndzi nga ta tikombisa ndzi ri xona.” (Eksoda 3:14) Vuhundzuluxeri bya Rotherham, byi ri: “Ndzi ta va lexi ndzi rhandzaka ku va xona.” Leswi vulaka leswaku Yehovha a nga va xin’wana ni xin’wana lexi a lavaka ku va xona leswaku a hetisisa swikongomelo swa yena.

A hi nge u kota ku va xin’wana ni xin’wana lexi u lavaka ku va xona! Xana u nga va endlela yini vanghana va wena? Loko un’wana wa vona o vabyela ku fa, u nga va dokodela u n’wi tshungula. Loko un’wana a pfumala mali, u nga n’wi pfuna hi ku n’wi nyika mali. Kambe, ntiyiso hi leswaku a wu na wona matimba yo endla swilo swo tano. Hinkwerhu a hi na wona. Loko u ri karhi u dyondza Bibele, u ta hlamala ndlela leyi Yehovha a kotaka ku va xin’wana ni xin’wana lexi a lavaka ku va xona leswaku a hetisisa switshembiso swa yena. Naswona u tsakela ku tirhisa matimba ya yena leswaku a pfuna lava n’wi rhandzaka. (2 Tikronika 16:9) Vanhu lava nga ri tiviki vito ra Xikwembu a va swi koti ku tiva timfanelo leti letinene ta vumunhu bya Yehovha.

Handle ko tipfinyinga, vito ra Yehovha ri fanele ri tsariwa eBibeleni. Ku tiva leswi ri vulaka swona ni ku ri tirhisa hi ku ntshunxeka loko hi n’wi gandzela swi ta hi pfuna swinene leswaku hi tshinela eka Yehovha, Tata wa hina wa le tilweni. *

^ ndzim. 3 Leswaku u kuma rungula leri engetelekeke hi vito ra Xikwembu, leswi ri vulaka swona ni swivangelo swo ri tirhisa evugandzerini, vona broxara leyi nge Vito Ra Xikwembu Leri Nga Ta Tshama Hi Masiku, leyi kandziyisiweke hi Timbhoni ta Yehovha.

 

DYONDZA SWO TALA

Xana Xikwembu Xi Ni Vito?

Xikwembu xi ni swithopo swo tala, swo tanihi lexi nge Lowa Matimba Hinkwawo, Muvumbi ni lexi nge Hosi. Kambe vito ra xona ri tirhisiwa minkarhi ya kwalomu ka 7 000 eBibeleni.