Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Xana Bibele Yi Dyondzisa Yini Hakunene?

 XIENGETELO

Ku Hlamuseriwa Ka “Babilona Lonkulu”

Ku Hlamuseriwa Ka “Babilona Lonkulu”

BUKU ya Nhlavutelo yi tamele marito man’wana lama fanekiselaka swo karhi. (Nhlavutelo 1:1) Hi xikombiso, yi vulavula hi wansati loyi a tsariweke vito leri nge “Babilona Lonkulu” emombyeni wakwe. Wansati loyi ku vuriwa leswaku u tshame ehenhla ka “mintshungu ni matiko.” (Nhlavutelo 17:1, 5, 15) Leswi a nga riki kona wansati wa xiviri la nga swi endlaka sweswo, swi vula leswaku Babilona Lonkulu ku fanele ku ri wo fanekisela. Kutani, xana nghwavava leyi yo fanekisela yi yimela yini?

Eka Nhlavutelo 17:18, wansati loyi wo fanekisela u hlamuseriwa a ri “muti lowukulu lowu nga ni mfumo ehenhla ka tihosi ta  misava.” Rito leri nge “muti” ri komba nhlengeletano ya vanhu. Leswi ‘muti lowu lowukulu’ wu lawulaka “tihosi ta misava,” wansati la vuriwaka Babilona Lonkulu u fanele a ri nhlangano lowu nga ni nkucetelo ematikweni hinkwawo. Wu nga vuriwa mfumo wa misava. Xana i mfumo wa muxaka muni? I wa vukhongeri. Xiya ndlela leyi tindzimana tin’wana ta buku ya Nhlavutelo ti yi hlamuselaka ha yona mhaka leyi.

Mfumo wu nga ha va wa tipolitiki, wa mabindzu kumbe wa vukhongeri. Wansati la vuriwaka Babilona Lonkulu a hi mfumo wa tipolitiki hikuva Rito ra Xikwembu ri ri “tihosi ta misava” kumbe swirho swa politiki swa misava leyi, swi ‘endle vumbhisa’ na yena. Vumbhisa byakwe byi vula vuxaka lebyi a byi endleke ni vafumi va misava leyi, nakambe byi tlhela byi swi veka erivaleni leswaku ha yini a vuriwa “nghwavava leyikulu.”—Nhlavutelo 17:1, 2; Yakobo 4:4.

Babilona Lonkulu a ku nge vi mfumo wa mabindzu hikuva ‘vaxavisi va misava’ lava yimelaka van’wamabindzu, va ta n’wi rila enkarhini wa ku lovisiwa ka yena. Entiyisweni, tihosi ni vaxavisi va hlamuseriwa va ri lava languteke Babilona Lonkulu va ri “ekule.” (Nhlavutelo 18:3, 9, 10, 15-17) Hikwalaho, swa twala ku gimeta hileswaku Babilona Lonkulu a hi mfumo wa politiki kumbe wa mabindzu, kambe i mfumo wa vukhongeri.

Leswaku Babilona Lonkulu i vukhongeri swi tiyisekisiwe hi marito lama nge u xisa matiko hinkwawo hi “vungoma” byakwe. (Nhlavutelo 18:23) Leswi mixaka hinkwayo ya vungoma yi humaka eka madimona, a swi hlamarisi leswi Bibele yi vulaka leswaku Babilona Lonkulu i “vutshamo bya madimona.” (Nhlavutelo 18:2; Deteronoma 18:10-12) Nakambe mfumo lowu wu hlamuseriwa wu ri lowu vengaka vukhongeri bya ntiyiso, wu xanisa “vaprofeta” ni “vakwetsimi.” (Nhlavutelo 18:24) Kahle-kahle, Babilona Lonkulu u venga vukhongeri bya ntiyiso hi mbilu ya yena hinkwayo lerova u xanisa “timbhoni ta Yesu” hi ndlela ya tihanyi hambi ku ri ku ti dlaya. (Nhlavutelo 17:6) Hikwalaho, swi le rivaleni leswaku wansati loyi a vitaniwaka Babilona Lonkulu u yimela mfumo wa misava wa vukhongeri bya mavunwa, lebyi katsaka vukhongeri hinkwabyo lebyi lwaka na Yehovha Xikwembu.