Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Xana Bibele Yi Dyondzisa Yini Hakunene?

 NDZIMA YA VUKHUME-MBIRHI

Ku Hanya Hi Ndlela Leyi Tsakisaka Xikwembu

Ku Hanya Hi Ndlela Leyi Tsakisaka Xikwembu
  • U fanele u endla yini leswaku u va munghana wa Xikwembu?

  • Ntlhontlho wa Sathana wu ku khumba njhani?

  • Hi wahi mahanyelo lawa Yehovha a nga ma rhandziki?

  • U fanele u endla yini leswaku u hanya hi ndlela leyi tsakisaka Xikwembu?

1, 2. Boxa swikombiso swa vanhu lava Yehovha a va tekeke va ri vanghana va yena lavakulu.

I MUNHU wa njhani loyi u nga lavaka leswaku a va munghana wa wena? A swi kanakanisi leswaku u lava munhu la nga ni vonelo leri fanaka ni ra wena, la rhandzaka leswi u swi rhandzaka ni loyi mahanyelo ya yena ma fanaka ni ya wena. Naswona u ta rhandza munhu loyi a nga ni timfanelo letinene to fana ni ku tshembeka ni musa.

2 Ku sukela khale ka khaleni, ku ni vanhu lava Xikwembu xi va hlawuleke leswaku va va vanghana va xona lavakulu. Hi xikombiso, Yehovha u vitane Abrahama nakulobye wa yena. (Esaya 41:8; Yakobo 2:23) Xikwembu xi vule leswaku Davhida i “wanuna la amukelekaka embilwini ya mina,” hikuva a a ri munhu la rhandzekaka eka Yehovha. (Mintirho 13:22) Nakambe, Yehovha u teke muprofeta Daniyele tanihi “munhu loyi a navelekaka swinene.”—Daniyele 9:23.

3. Ha yini Yehovha a hlawula vanhu vo karhi leswaku va va vanghana va yena?

3 Ha yini Yehovha a teke Abrahama, Davhida na Daniyele va ri vanghana va yena? U byele Abrahama a ku: ‘U yingise rito ra mina.’ (Genesa 22:18) Kutani Yehovha u aka vuxaka ni vanhu lava titsongahataka, lava endlaka leswi a va byelaka swona. U byele Vaisrayele a ku: “Yingisani rito ra mina kutani ndzi ta va Xikwembu  xa n’wina, n’wina mi ta va vanhu va mina.” (Yeremiya 7:23) Na wena u nga va munghana wa Yehovha loko u n’wi yingisa!

YEHOVHA U TIYISA VANGHANA VA YENA

4, 5. Yehovha u wu kombisa njhani ntamu wa yena eka vanhu va yena?

4 Ku va munghana wa Xikwembu swi vuyerisa ngopfu. Bibele yi vula leswaku Yehovha u lava tindlela to “kombisa ntamu wakwe eka lava mbilu ya vona yi hetisekeke eka yena.” (2 Tikronika 16:9) Xana Yehovha a nga wu kombisa njhani ntamu wa yena eka wena? Ndlela yin’wana hi leyi boxiweke eka Pisalema 32:8, laha hi hlayaka marito lama nge: “[Mina Yehovha] ndzi ta endla leswaku u va ni ku twisisa naswona ndzi ku letela hi ndlela leyi u faneleke u famba ha yona. Ndzi ta ku tsundzuxa ndzi veke tihlo ra mina ri ri ehenhla ka wena.”

5 Yoleyo i ndlela leyi tsakisaka leyi kombisaka nkhathalelo wa Yehovha! U ta ku kongomisa a tlhela a ku sirhelela loko u ri karhi u pfumela ku kongomisiwa hi yena. Xikwembu xi lava leswaku u hlula miringo leyi u langutaneke na yona. (Pisalema 55:22) Kutani loko u tirhela Yehovha hi mbilu hinkwayo, u nga tiyiseka ku fana ni mupisalema loyi a nga te: “Ndzi veke Yehovha emahlweni ka mina nkarhi hinkwawo. Hikuva u le vokweni ra mina ra xinene, a ndzi nge tsekatsekisiwi.” (Pisalema 16:8; 63:8) Ina, Yehovha a nga ku pfuna u hanya hi ndlela leyi n’wi tsakisaka. Kambe, hilaha na wena u swi tivaka hakona, ku ni nala wa Xikwembu la nga swi laviki leswaku u endla tano.

NTLHONTLHO WA SATHANA

6. I yini leswi Sathana a swi vuleke hi vanhu?

6 Ndzima 11 ya buku leyi yi hlamusele ndlela leyi Sathana Diyavulosi a tlhontlheke vulawuri bya Xikwembu ha yona. Sathana u hehle Xikwembu hi mavunwa, a vula leswaku Yehovha u hombolokile hileswi a nga tshikangiki Adamu na Evha va tihlawulela leswinene ni swo biha. Endzhaku ka loko Adamu na Evha va dyohile naswona misava yi ri karhi yi tala hi vana va vona, Sathana u sole xikongomelo xa vanhu xo tirhela Xikwembu. U te: “Wena Xikwembu, vanhu a va ku tirheli hileswi va ku rhandzaka. Loko wo ndzi pfumelela, ndzi nga va hambukisa hinkwavo.” Mhaka leyi khumbaka wanuna la vuriwaka Yobo, yi kombisa leswaku  hi swona leswi a swi ri emianakanyweni ya Sathana. I mani Yobo naswona swi tise ku yini leswaku ntlhontlho wa Sathana wu n’wi khumba?

7, 8. (a) I yini lexi endleke leswaku Yobo a va munhu wo hlawuleka eka vanhu va nkarhi lowu a a hanya eka wona? (b) Sathana u xi sole hi ndlela yihi xikongomelo xa Yobo xo tirhela Xikwembu?

7 Yobo u hanye kwalomu ka malembe ya 3 600 lama hundzeke. A a ri munhu lonene hikuva Yehovha u te: “A ku na munhu la fanaka na yena emisaveni, munhu la pfumalaka xisandzu, wo lulama, la chavaka Xikwembu naswona a kendlukaka eka leswo biha.” (Yobo 1:8) Yobo a a tsakisa Xikwembu.

8 Sathana u sole xikongomelo xa Yobo xo tirhela Xikwembu. Diyavulosi u byele Yehovha a ku: “Xana wena a wu vekanga rihlampfu ku n’wi sirhelela [Yobo] ni ku sirhelela yindlu yakwe ni hinkwaswo leswi a nga na swona matlhelo hinkwawo? U katekise ntirho wa mavoko yakwe, naswona swifuwo swakwe swi tele hinkwako-nkwako emisaveni. Kambe, ndzi kombela leswaku u cinca u tshambuluta voko ra wena, u khumba hinkwaswo leswi a nga na swona kutani u vona loko a nga ta ka a nga ku rhukani exikandzeni.”—Yobo 1:10, 11.

9. Hi yihi ndlela leyi Yehovha a anguleke ha yona eka ntlhontlho wa Sathana naswona ha yini?

9 Hi ndlela yoleyo, Sathana u vule leswaku Yobo u tirhela Xikwembu hileswi xi nga ta n’wi nyika swo karhi. Diyavulosi u tlhele a vula leswaku loko Yobo o ringiwa, u ta fularhela Xikwembu. Xana Yehovha u angurise ku yini eka ntlhontlho lowu wa Sathana? Leswi mhaka leyi a yi khumba xikongomelo xa Yobo xo tirhela Yehovha, u pfumelele Sathana leswaku a ringa Yobo. Sweswo a swi ta yi kombisa kahle mhaka ya leswaku Yobo u rhandza Xikwembu hakunene kumbe a nga xi rhandzi.

MIRINGO YA YOBO

10. Hi yihi miringo leyi Yobo a langutaneke na yona naswona u angurise ku yini?

10 Sathana a nga ha yimayimanga, u lo namba a tisela Yobo miringo yo hambana-hambana. Swifuwo swin’wana swa Yobo swi yiviwile ivi swin’wana swi dlayiwa. Naswona malandza ya yena yo tala ma dlayiwile. Sweswo swi siye Yobo a ri xisiwana. Khombo rin’wana a ku ri ku dlayiwa ka vana va Yobo va khume hi xidzedze.  Hambileswi a weriweke hi makhombo lawa yo chavisa, “Yobo a nga dyohanga kumbe ku vula leswi nga fanelangiki eka Xikwembu.”—Yobo 1:22.

11. (a) Hi xihi xihehlo xa vumbirhi lexi Sathana a hehleke Yobo ha xona naswona Yehovha u angurise ku yini? (b) Xana Yobo u angurise ku yini eka vuvabyi bya yena lebyi vavaka?

11 Sathana a nga lan’wanga. U fanele a anakanye leswaku hambileswi Yobo a koteke ku tiyiselela ku lahlekeriwa hi rifuwo ra yena, malandza ya yena ni vana va yena, kambe loko o vabya u ta fularhela Xikwembu. Yehovha u pfumelele Sathana leswaku a hlasela Yobo hi vuvabyi lebyi nyenyetsaka, byo vava. Kambe, hambi ku ri byona byi tsandzekile ku dlaya ripfumelo ra Yobo eka Xikwembu. Ematshan’weni ya sweswo, u vule hi xivindzi a ku: “Ndzi nga ka ndzi nga tshiki vutshembeki bya mina kukondza ndzi timeka!”—Yobo 27:5.

Yobo u kume hakelo hikwalaho ka leswi a tshameke a tshembikile

12. Yobo u angurise ku yini eka ntlhontlho wa Diyavulosi?

12 Yobo a a nga swi tivi leswaku maxangu ya yena ma vangiwa hi Sathana. Leswi Yobo a a nga tivi nchumu leswaku Diyavulosi u tlhontlhe vulawuri bya Yehovha, u anakanye leswaku Yehovha hi yena la n’wi vangelaka maxangu lawa a langutaneke na wona. (Yobo 6:4; 16:11-14) Hambiswiritano, u tshame a tshembekile eka Yehovha. Leswi Sathana a swi vuleke leswaku Yobo u tirhela Xikwembu hileswi xi nga ta n’wi nyika swo karhi, swi hundzuke mavunwa ya rihlaza hikuva Yobo u tshame a tshembekile!

13. Ku tshembeka ka Yobo eka Yehovha ku n’wi vuyerise ha yini?

13 Ku tshembeka ka Yobo ku endle leswaku Yehovha a kota ku hlamula ntlhontlho wa Sathana lowu sandzaka. Hakunene Yobo a a ri munghana wa Yehovha naswona Xikwembu xi n’wi rihile hikwalaho ko hanya hi ku tshembeka.—Yobo 42:12-17.

NDLELA LEYI WENA U KHUMBEKAKA HA YONA

14, 15. Hi swi tivisa ku yini leswaku ntlhontlho wa Sathana a wu nga khumbi Yobo ntsena kambe a wu ta khumba vanhu hinkwavo?

14 Mhaka leyi pfuxiweke hi Sathana ya ku tshembeka ka vanhu eka Xikwembu, a yi nga khumbi Yobo ntsena. Na wena ya ku khumba. Sweswo swi vonaka kahle eka leswi vuriwaka eka Swivuriso 27:11, laha Rito ra Yehovha ri nge: “N’wananga, tlhariha u tsakisa mbilu yanga, leswaku ndzi ta angula loyi a ndzi tlhontlhaka.” Marito wolawo lama tsariweke endzhaku ka madzana ya malembe  Yobo se a file, ma kombisa leswaku Sathana u ye emahlweni a tlhontlha Xikwembu ni ku hehla malandza ya xona. Loko hi hanya hi ndlela leyi tsakisaka Yehovha, entiyisweni hi hoxa xandla leswaku xihehlo xa Sathana xi hundzuka vunwa kutani sweswo swi tsakisa mbilu ya Xikwembu. Xana u titwa njhani hi sweswo? Xana a swi nge ku tsakisi ku hoxa xandla leswaku swihehlo swa Diyavulosi swi hundzuka vunwa hambiloko sweswo swi ta vula leswaku u hundzula mahanyelo ya wena?

15 Xiya leswaku Sathana u te: “Hinkwaswo leswi munhu a nga na swona u ta swi humesa leswaku a ponisa moya-xiviri wakwe.” (Yobo 2:4) Loko Sathana a vula a ku “munhu,” u swi veke erivaleni leswaku xihehlo xa yena xi katsa vanhu hinkwavo, ku nga ri Yobo ntsena. Leyi i yinhla ya nkoka. Sathana u tlhontlha ku tshembeka ka wena eka Xikwembu. Diyavulosi u lava ku ku vona u nga xi yingisi Xikwembu kutani u fularhela ndlela leyinene loko u langutane ni swiyimo swo tika. Xana Sathana a nga swi endlisa ku yini sweswo?

16. (a) Hi tihi tindlela leti Sathana a ti tirhisaka ku hambukisa vanhu eka Xikwembu? (b) Xana Diyavulosi a nga ti tirhisa njhani tindlela leti eka wena?

16 Hilaha swi hlamuseriweke hakona eka Ndzima 10 ebukwini leyi, Sathana u tirhisa tindlela to hambana-hambana leswaku vanhu va fularhela Xikwembu. U hlasela ‘ku fana ni nghala leyi vombaka, leyi lavaka loyi yi nga n’wi dyaka.’ (1 Petro 5:8) Hi ndlela yoleyo, nkucetelo wa Sathana wu nga vonaka loko vanghana, maxaka kumbe vanhu van’wana, va ku kaneta loko u ringeta ku dyondza Bibele ni ku tirhisa leswi u swi dyondzaka. * (Yohane 15:19, 20) Kasi Sathana wa swi kota nakambe ku “tihundzula ntsumi ya ku vonakala.” (2 Vakorinto 11:14) Diyavulosi a nga tirhisa tindlela ta vuxisi leswaku a ku yenga u tshika ku hanya hi ndlela leyi tsakisaka Xikwembu. A nga ha ku heta matimba, kumbexana a ku endla u tivona u nga ta swi kota ku hanya hi ndlela leyi tsakisaka Xikwembu. (Swivuriso 24:10) Ku nga khathariseki leswaku  Sathana u tiendla “nghala leyi vombaka,” kumbe “ntsumi ya ku vonakala,” ntlhontlho wa yena wa fana: Leswi a swi vulaka hi leswaku loko u langutane ni miringo, u ta tshika ku tirhela Xikwembu. U nga angurisa ku yini eka ntlhontlho wa yena, u kombisa leswaku u tshembekile eka Xikwembu hilaha Yobo a endleke hakona?

KU YINGISA SWILERISO SWA YEHOVHA

17. Hi xihi xivangelo lexikulu xa leswaku hi yingisa swileriso swa Yehovha?

17 U nga angula ntlhontlho wa Sathana hi ku hanya hi ndlela leyi tsakisaka Xikwembu. Sweswo swi katsa yini? Bibele yi ri: “U fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi matimba ya wena lamakulu hinkwawo.” (Deteronoma 6:5) Loko u ya emahlweni u rhandza Xikwembu, u ta ya u navela ku endla leswi xi swi languteleke eka wena. Muapostola Yohane u tsale a ku: “Ku rhandza Xikwembu, hi kona ku hlayisa swileriso swa xona.” Loko u rhandza Yehovha hi mbilu ya wena hinkwayo u ta kuma leswaku “swileriso swa xona a swi tiki.”—1 Yohane 5:3.

18, 19. (a) Hi swihi swileriso swin’wana swa Yehovha? (Vona bokisi leri nga eka tluka 122.) (b) Hi swi tivisa ku yini leswaku Xikwembu a xi langutelanga leswaku hi endla leswi hi nga taka hi nga swi koti ku swi endla?

18 Hi swihi swileriso swa Yehovha? Swin’wana swa swona swi katsa mahanyelo lawa hi faneleke hi ma papalata. Hi xikombiso, vona  bokisi leri nga eka tluka 122, leri nge “Papalata Leswi Yehovha A Swi Vengaka.” Eka rona u ta kuma ku xaxametiwe mahanyelo lawa Bibele yi ma solaka hi ku kongoma. Man’wana ya wona ma nga ha vonaka ma nga bihanga loko u ma twa ro sungula. Kambe, endzhaku ka loko u anakanyisise hi matsalwa lama kombisiweke, swi nga endleka u swi xiya leswaku i vutlhari ku tirhisa milawu ya Yehovha. Swi nga ha endleka leswaku swi ku tikela ngopfu ku cinca mahanyelo ya wena. Hambiswiritano, u ta eneriseka naswona u va ni ntsako swinene loko u hanya hi ndlela leyi tsakisaka Xikwembu. (Esaya 48:17, 18) Naswona u nga swi kota. Hi swi tivisa ku yini?

19 Yehovha a nga langutelanga leswaku hi endla swilo leswi hi nga taka hi nga swi koti ku swi endla. (Deteronoma 30:11-14) U  tiva vuswikoti bya hina ni swipimelo swa hina ku tlula ndlela leyi hina hi titivaka ha yona. (Pisalema 103:14) Tlhandlakambirhi, Yehovha a nga hi nyika matimba leswaku hi kota ku n’wi yingisa. Muapostola Pawulo u tsale a ku: “Xikwembu xa tshembeka, a xi nge mi tshiki mi ringiwa hi ndlela leyi tlulaka leswi mi nga swi tiyiselaka, kambe loko mi ringiwa xi ta mi nyika ndlela yo huma, leswaku mi kota ku swi tiyisela.” (1 Vakorinto 10:13) Yehovha a nga ku pfuna leswaku u kota ku tiyisela, hi ku ku nyika “matimba lama tlulaka lama tolovelekeke.” (2 Vakorinto 4:7) Endzhaku ka loko Pawulo a tiyiselele miringo yo tala, u te: “Eka swilo hinkwaswo ndzi ni ntamu hikwalaho ka loyi a ndzi nyikaka matimba.”—Vafilipiya 4:13.

 KU HLAKULELA TIMFANELO TA XIKWEMBU

20. Hi tihi timfanelo leti rhandzekaka eka Xikwembu, leti u faneleke u ti hlakulela naswona ha yini swi ri swa nkoka?

20 I ntiyiso leswaku ku tsakisa Yehovha a swi vuli ntsena ku papalata swilo leswi a swi vengaka. U fanele u rhandza ni leswi a swi rhandzaka. (Varhoma 12:9) Xana a wu va rhandzi vanhu lava nga ni vonelo leri fanaka ni ra wena, lava rhandzaka leswi u swi rhandzaka ni lava mahanyelo ya vona ma fanaka ni ya wena? Yehovha na yena u rhandza vanhu vo tano. Hikwalaho, dyondza ku rhandza swilo leswi Yehovha a swi rhandzaka. Swin’wana swa swona swi hlamuseriwe eka Pisalema 15:1-5, laha hi  hlayaka hi ta vanhu lava Xikwembu xi va tekaka va ri vanghana va xona. Vanghana va Yehovha va kombisa leswi Bibele yi swi vulaka “mihandzu ya moya.” Yona yi katsa timfanelo to fana ni “rirhandzu, ntsako, ku rhula, ku va ni mbilu yo leha, musa, vunene, ripfumelo, ku olova [ni] ku tikhoma.”—Vagalatiya 5:22, 23.

21. I yini lexi nga ta ku pfuna leswaku u hlakulela timfanelo leti rhandzekaka eka Xikwembu?

21 Ku hlaya ni ku dyondza Bibele minkarhi hinkwayo swi ta ku pfuna leswaku u hlakulela timfanelo leti rhandzekaka eka Xikwembu. Naswona ku dyondza leswi Xikwembu xi swi languteleke eka wena swi ta ku pfuna leswaku u hanya hi ku pfumelelana ni ku rhandza ka xona. (Esaya 30:20, 21) Loko u ya u rhandza Yehovha, u ta ya u navela ku hanya hi ndlela leyi tsakisaka Xikwembu.

22. U ta vuyeriwa hi yini loko u hanya hi ndlela leyi tsakisaka Xikwembu?

22 Ku hanya hi ndlela leyi tsakisaka Yehovha swi lava matshalatshala yo karhi. Bibele yi fanisa ku cinca mahanyelo ya wena ni ku hluvula vumunhu bya khale ivi u ambala lebyintshwa. (Vakolosa 3:9, 10) Kambe, loko mupisalema a vulavula hi swileriso swa Yehovha, u tsale a ku: “Ku swi hlayisa swi ni hakelo leyikulu.” (Pisalema 19:11) Na wena u ta kuma leswaku swa vuyerisa swinene ku hanya hi ndlela leyi tsakisaka Xikwembu. Hi ku endla tano, u ta angula ntlhontlho wa Sathana ivi u tsakisa mbilu ya Yehovha!

^ ndzim. 16 Leswi a swi vuli swona leswaku lava va ku kanetaka va lawuriwa hi Sathana hi ku kongoma. Kambe Sathana i xikwembu xa mafambiselo lawa ya swilo naswona misava hinkwayo yi lawuriwa hi yena. (2 Vakorinto 4:4; 1 Yohane 5:19) Xisweswo, hi nga langutela ku vengiwa loko hi hanya hi ndlela leyi tsakisaka Xikwembu naswona van’wana va ta hi kaneta.