1, 2. Hi nga wu kuma kwihi nsirhelelo namuntlha?

A HI nge u le ku fambeni epatwini hi siku leri ku nga ni xidzedze lexikulu. Xibakabaka xi ya xi dzwihala, ri sungula ku hatima kutani ri dzindza. Kutani mpfula yi sungula ku na. U lava ndhawu yo tumbela eka yona. A swi kanakanisi leswaku u ta tsaka hileswi u heteleleke u kume ndhawu yo tumbela eka yona!

2 Namuntlha hi le ka xiyimo lexi fanaka. Swiyimo swa misava leyi swi ya swi nyanya. U nga ha tivutisa, ‘Xana ndzi nga wu kuma kwihi nsirhelelo?’ Mupisalema u tsale a ku: “Ndzi ta vula eka Yehovha ndzi ku: ‘U vutumbelo bya mina ni khokholo ra mina, Xikwembu xanga, lexi ndzi nga ta tshembela eka xona.’” (Pisalema 91:2) Hakunene, Yehovha a nga hi phyuphyisa eka swiphiqo swa hina sweswi naswona u hi nyika ntshembo wo tsakisa hi vumundzuku.

3. Yehovha a nga va vutumbelo bya hina hi ndlela yihi?

3 Yehovha a nga hi sirhelela njhani? A nga hi pfuna leswaku hi langutana ni swiphiqo leswi hi nga na swona naswona u ni matimba ku tlula munhu un’wana ni un’wana loyi a lavaka ku hi vavisa. Hambiloko ho humeleriwa hi swilo swo biha sweswi, ha tiyiseka leswaku Yehovha u ta swi lunghisa enkarhini lowu taka. Bibele yi hi khutaza yi ku: “Tihlayiseni erirhandzwini ra Xikwembu.” (Yudha 21) Hi fanele hi tiyisa vuxaka bya hina na Yehovha leswaku a ta hi pfuna hi minkarhi yo tika. Hi nga byi tiyisa njhani?

 TLANGELA RIRHANDZU RA XIKWEMBU

4, 5. Yehovha u hi kombise njhani leswaku wa hi rhandza?

4 Loko hi xiya ndlela leyi Yehovha a hi rhandzaka ha yona swi ta hi pfuna leswaku hi tiyisa vuxaka bya hina na Yena. Ehleketa hi swilo hinkwaswo leswi Yehovha a hi endleleke swona. U hi nyike misava yo saseka leyi taleke hi swimilana swo saseka ni swiharhi. U tlhele a hi nyika swakudya swo nandziha swin’we ni mati yo tenga. EBibeleni, Yehovha u hi byele vito rakwe ni timfanelo takwe letinene. Ku tlula hinkwaswo, u hi kombe rirhandzu rakwe hi ku rhumela N’wana wakwe Yesu emisaveni leswaku a ta nyikela vutomi byakwe. (Yohane 3:16) Hikwalaho ka gandzelo rero ra nkutsulo, hi ni ntshembo wo tsakisa hi vumundzuku.

5 Yehovha u simeke Mfumo wa Mesiya, ku nga mfumo wa le tilweni lowu nga ta herisa ku xaniseka hinkwako. Mfumo lowu wu ta hundzula misava yi va paradeyisi, laha vanhu va nga ta hanya hi ku rhula ni ntsako hilaha ku nga heriki. (Pisalema 37:29) Ndlela yin’wana leyi Yehovha a hi kombiseke rirhandzu rakwe ha yona i ku hi dyondzisa ndlela leyinene leyi hi faneleke hi hanya ha yona. Yehovha u hi rhamba leswaku hi khongela eka yena naswona minkarhi hinkwayo u lunghekele ku yingisa swikhongelo swa hina. Yehovha u kombise un’wana ni un’wana wa hina rirhandzu rakwe.

6. U nga swi kombisa njhani leswaku wa ri tlangela rirhandzu ra Yehovha?

6 U nga swi kombisa njhani leswaku wa ri tlangela rirhandzu ra Yehovha? N’wi kombe leswaku wa swi tlangela hinkwaswo leswi a ku endleleke swona. Lexi twisaka ku vava, vo tala namuntlha a va tlangeli. A swi ri tano hi nkarhi lowu Yesu a a ha ri laha misaveni. Siku rin’wana, Yesu u tshungule vavanuna va khume lava a va ri ni nhlokonho, kambe i un’we ntsena loyi a vuyeke a ta n’wi nkhensa. (Luka 17:12-17) Hina hi lava ku fana ni wanuna loyi a nkhenseke Yesu. Minkarhi hinkwayo hi fanele hi nkhensa Yehovha.

7. Hi fanele hi n’wi rhandza hi ndlela yihi Yehovha?

 7 Nakambe hi fanele hi kombisa leswaku ha n’wi rhandza Yehovha. Yesu u byele vadyondzisiwa vakwe leswaku va fanele va rhandza Yehovha hi timbilu ta vona hinkwato, hi mimoyaxiviri ya vona hinkwayo ni hi mianakanyo ya vona hinkwayo. (Hlaya Matewu 22:37.) Sweswo swi vula yini?

8, 9. Hi nga swi kombisa njhani leswaku ha n’wi rhandza Yehovha?

8 Xana swi enerile ku vula leswaku ha n’wi rhandza Yehovha? Doo! Loko hi rhandza Yehovha hi mbilu, hi moyaxiviri ni hi mianakanyo ya hina hinkwayo, hi ta swi kombisa hi swiendlo swa hina leswaku ha n’wi rhandza. (Matewu 7:16-20) Bibele yi dyondzisa leswaku loko hi rhandza Xikwembu, hi ta yingisa swileriso swa xona. Xana swa tika ku endla tano? E-e, hikuva ‘swileriso swa Yehovha a swi tiki.’—Hlaya 1 Yohane 5:3.

9 Loko hi yingisa Yehovha, hi ta hanya vutomi lebyi tsakisaka ni lebyi enerisaka. (Esaya 48:17, 18) I yini lexi nga ta hi pfuna leswaku hi tiyisa vuxaka bya hina na Yehovha? A hi voneni.

YANA EMAHLWENI U TIYISA VUXAKA BYA WENA NA YEHOVHA

10. Ha yini u fanele u ya emahlweni u dyondza hi Yehovha?

10 Swi tise ku yini leswaku u va munghana wa Yehovha? Hi ku hlaya ka wena Bibele, u tive Yehovha ku antswa naswona u hlakulele ku va munghana wa yena. Vuxaka lebyi byi fana ni ndzilo lowu u lavaka leswaku wu tshama wu ri karhi wu pfurha. Tanihi leswi ndzilo wu lavaka tihunyi leswaku wu pfurha, u fanele u ya emahlweni u dyondza hi Yehovha leswaku vuxaka bya n’wina byi ta tshama byi ri lebyi tiyeke.—Swivuriso 2:1-5.

Ndlela leyi u rhandzaka Yehovha ha yona yi fanele yi fana ni ndzilo lowu lavaka tihunyi leswaku wu ya emahlweni wu pfurha

11. Xana u titwisa ku yini hi tidyondzo ta Bibele?

11 Loko u ya emahlweni u dyondza Bibele, u ta dyondza swilo leswi nga ta ku tsakisa swinene. Xiya ndlela leyi vadyondzisiwa vambirhi va Yesu va titweke ha yona loko a va  hlamusela vuprofeta bya Bibele. Va te: “Xana timbilu ta hina a ti nga pfurhi loko a ri karhi a vulavula na hina egondzweni, loko a hi pfulela Matsalwa hi ku helela?”—Luka 24:32.

12, 13. (a) Ku nga humelela yini hi ndlela leyi hi rhandzaka Xikwembu ha yona? (b) Hi nga endla yini leswaku ndlela leyi hi rhandzaka Yehovha ha yona yi tshama yi tiyile?

12 Ku fana ni vadyondzisiwa lava tsakeke loko va twisise Matsalwa, u nga va u titwe hi ndlela leyi fanaka loko u sungule ku twisisa Bibele. Leswi swi endle leswaku u tiva Yehovha ni ku tlhela u n’wi rhandza. A wu nge swi tsakeli leswaku ndlela leyi u n’wi rhandzaka ha yona yi tsana.—Matewu 24:12.

13 Loko se u ri munghana wa Xikwembu, u fanele u tikarhatela ku tiyisa vunghana byebyo. U fanele u ya emahlweni u dyondza hi xona na Yesu ni ku anakanyisisa hileswi u swi dyondzaka kutani u vona leswaku u nga swi tirhisa njhani evuton’wini bya wena. (Yohane 17:3) Loko u hlaya kumbe u  dyondza Bibele, tivutise: ‘Leswi swi ndzi dyondzisa yini hi Yehovha? Ha yini ndzi fanele ndzi n’wi rhandza hi mbilu ni moyaxiviri wa mina hinkwawo?’—1 Timotiya 4:15.

14. Xikhongelo xi yi tiyisa njhani ndlela leyi hi rhandzaka Yehovha ha yona?

14 Loko u ri ni munghana, u vulavula na yena nkarhi na nkarhi naswona leswi swi endla leswaku vunghana bya n’wina byi tiya. Hilaha ku fanaka, loko hi tshamela ku vulavula na Yehovha hi xikhongelo, swi ta endla leswaku ndlela leyi hi n’wi rhandzaka ha yona yi tiya. (Hlaya 1 Vatesalonika 5:17.) Xikhongelo i nyiko leyinene leyi humaka eka Tata wa hina wa le tilweni. Hi fanele hi vulavula na yena swi huma embilwini. (Pisalema 62:8) A hi fanelanga hi nhlokohata swikhongelo, kambe hi fanele hi vula ndlela leyi hi titwaka ha yona. Hakunene, loko hi ya emahlweni hi dyondza Bibele ni ku khongela swi huma embilwini, ndlela leyi hi rhandzaka Yehovha ha yona yi ta ya yi tiya.

KU VULAVULA NI VAN’WANA HI YEHOVHA

15, 16. U wu teka njhani ntirho wo chumayela?

15 Loko hi lava ku tiyisa vuxaka bya hina na Yehovha, hi fanele hi vulavula ni van’wana hi ripfumelo ra hina. Ku vulavula ni van’wana hi Yehovha i lunghelo lerikulu. (Luka 1:74) I vutihlamuleri lebyi Yesu a byi nyikeke Vakreste hinkwavo va ntiyiso. Un’wana ni un’wana wa hina u fanele a chumayela mahungu lamanene ya Mfumo wa Xikwembu. Xana se u swi endlile sweswo?—Matewu 24:14; 28:19, 20.

16 Muapostola Pawulo a a teka ntirho wo chumayela wu ri wa risima; u wu vitane “xuma.” (2 Vakorinto 4:7) Ku byela van’wana hi Yehovha ni hi xikongomelo xakwe i ntirho wa nkoka lowu u nga wu endlaka. I ndlela leyi u nga tirhelaka Yehovha ha yona naswona wa swi tlangela leswi u n’wi endlelaka swona. (Vaheveru 6:10) Nakambe ku chumayela ku nga vuyerisa wena ni lava va ku yingiselaka hikuva u pfuna wena ni van’wana leswaku mi va ni vuxaka na Yehovha ni ku kuma  vutomi lebyi nga heriki. (Hlaya 1 Vakorinto 15:58.) Xana ku ni ntirho wun’wana lowu nga ku nyikaka ntsako ku tlula lowu?

17. Ha yini ntirho wo chumayela wu ri wa xihlatla?

17 Ntirho wo chumayela i wa xihlatla. Hi fanele hi “chumayela rito” naswona hi “va eka rona hi xihatla.” (2 Timotiya 4:2) Vanhu va fanele va twa hi Mfumo wa Xikwembu. Bibele yi ri: “Siku lerikulu ra Yehovha ri le kusuhi! Ri le kusuhi, naswona ra hatlisa swinene!” Makumu ‘a ma nge hlweli.’ (Sofaniya 1:14; Habakuku 2:3) Ku nga ri khale, Yehovha u ta lovisa misava yo homboloka ya Sathana. Loko sweswo swi nga si endleka, vanhu va fanele va lemukisiwa leswaku va ta hlawula ku tirhela Yehovha.

18. Ha yini hi fanele hi tirhela Yehovha swin’we ni Vakrestekulorhi?

18 Yehovha u lava leswaku hi n’wi tirhela swin’we ni Vakrestekulorhi. Bibele yi ri: “A hi khathalelaneni leswaku hi khutazana erirhandzwini ni le mintirhweni leyinene, hi nga fularheli ku hlengeletana ka hina, hilaha ku nga ntolovelo wa van’wana, kambe hi khutazana, naswona hi endla tano hilaha ku engetelekeke ngopfu tanihi leswi mi vonaka siku ri tshinela.” (Vaheveru 10:24, 25) Hi fanele hi tikarhatela ku va kona eka minhlangano hinkwayo. Minhlangano yi hi nyika lunghelo ro khutazana ni ku tiyisana.

19. I yini lexi nga ta hi pfuna leswaku hi rhandza vamakwerhu lava nga Vakreste?

19 Loko u va kona eminhlanganweni, u ta kuma vanghana lavanene lava nga ta ku pfuna leswaku u tirhela Yehovha. U ta hlangana ni vamakwerhu, lava ku fana na wena, va endlaka leswi nga ematimbeni ya vona leswaku va gandzela yena. Hilaha ku fanaka, a va hetisekanga naswona va endla swihoxo. Loko va swi endla, tiyimisele ku va rivalela. (Hlaya Vakolosa 3:13.) Minkarhi hinkwayo xiya timfanelo letinene leti vamakwerhu va nga na tona, hikuva loko u endla tano swi ta ku pfuna leswaku u va rhandza ni ku tiyisa vuxaka bya wena na Yehovha.

 VUTOMI BYA XIVIRI

20, 21. I yini “vutomi bya xiviri”?

20 Yehovha u lava leswaku vanghana vakwe hinkwavo va tiphina hi vutomi. Bibele yi hi dyondzisa leswaku vutomi bya hina bya le nkarhini lowu taka byi ta hambana swinene ni bya sweswi.

Yehovha u lava leswaku u tsakela “vutomi bya xiviri.” Xana u ta byi tsakela?

21 Enkarhini lowu taka, hi ta hanya hilaha ku nga heriki, ku nga ri malembe ya 70 kumbe 80 ntsena. Hi ta tsakela “vutomi lebyi nga heriki” hi ri ni rihanyo lerinene, ku rhula ni ntsako eparadeyisini yo saseka. Leswi hi swona leswi Bibele yi swi vulaka “vutomi bya xiviri.” Yehovha u tshembisa ku hi nyika vutomi bya xiviri kambe hi fanele hi endla hinkwaswo leswi hi nga swi kotaka sweswi leswaku hi “khomelela swinene” eka byona.—1 Timotiya 6:12, 19.

22. (a) Xana hi nga “khomelela njhani eka vutomi bya xiviri”? (b) Ha yini ku kuma vutomi lebyi nga heriki swi nga titsheganga hi matshalatshala ya hina?

22 Xana hi nga “khomelela njhani eka vutomi bya xiviri”? Hi fanele hi “endla leswinene” ni ku “fuwa hi mintirho leyinene.” (1 Timotiya 6:18) Leswi vulaka leswaku hi fanele hi hanya hi ku pfumelelana ni leswi hi swi dyondzaka eBibeleni. Hambiswiritano, vutomi bya xiviri a byi titsheganga hi matshalatshala lawa hi ma endlaka. I nyiko leyi humaka eka Yehovha leyi a yi nyikaka malandza yakwe, ku nga xikombiso xa “musa lowu nga faneriwiki.” (Varhoma 5:15) Tata wa hina wa le tilweni u lava ku nyika malandza yakwe yo tshembeka nyiko leyi.

23. Ha yini u fanele u endla swiboho leswinene sweswi?

23 Tivutise, ‘Xana ndzi gandzela Xikwembu hi ndlela leyi xi yi amukelaka?’ Loko u vona leswaku u fanele u endla ku cinca ko karhi, ku endle ka ha ri sweswi. Loko hi titshega hi Yehovha naswona hi endla hinkwaswo leswi nga ematimbeni ya hina leswaku hi yingisa ni ku tshembela eka yena, u ta va vutumbelo bya hina. U ta hlayisa vanhu vakwe  lava tshembekaka emasikwini lawa yo hetelela ya misava yo homboloka ya Sathana. Kutani Yehovha u ta tiyisekisa leswaku hi hanya eParadeyisini hilaha ku nga heriki, hilaha a tshembiseke hakona. Hakunene, u nga va ni vutomi bya xiviri loko u endla swiboho leswinene sweswi!