Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

I Yini Leswi Hi Nga Swi Dyondzaka eBibeleni?

 NDZIMA 8

I Yini Mfumo Wa Xikwembu?

I Yini Mfumo Wa Xikwembu?

1. Hi xihi xikhongelo lexi dumeke lexi hi nga ta bula ha xona sweswi?

VANHU va timiliyoni va xi tiva xikhongelo lexi dumeke lexi vitaniwaka Xikhongelo xa Hosi. Yesu u tirhise xikhongelo lexi ku dyondzisa vadyondzisiwa vakwe ndlela yo khongela. Xana u khongelele yini? Kutani ha yini xikhongelo lexi xi ri xa nkoka eka hina namuntlha?

2. Hi swihi swilo swinharhu swa nkoka leswi Yesu a hi dyondziseke leswaku hi swi khongelela?

2 Yesu u te: “Mi fanele mi khongela hi ndlela leyi: ‘Tata wa hina la nge matilweni, vito ra wena a ri kwetsimisiwe [kumbe ri endliwa ri va leri kwetsimaka]. Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.’” (Hlaya Matewu 6:9-13.) Ha yini Yesu a hi dyondzise leswaku hi khongelela swilo leswinharhu?—Vona Nhlamuselo ya le hansi 20.

3. I yini leswi hi faneleke hi swi tiva hi Mfumo wa Xikwembu?

3 Se hi dyondzile leswaku vito ra Xikwembu i Yehovha. Hi tlhele hi bula hi xikongomelo xa Xikwembu hi vanhu ni hi misava. Kambe Yesu a a vula yini loko a ku: “Mfumo wa wena a wu te”? Hi ta dyondza leswaku Mfumo wa Xikwembu i yini, leswi wu nga ta swi endla ni ndlela leyi wu nga ta ri kwetsimisa ha yona vito ra Xikwembu.

I YINI MFUMO WA XIKWEMBU?

4. I yini Mfumo wa Xikwembu naswona i mani Hosi ya wona?

4 Yehovha u veke mfumo etilweni naswona u hlawule Yesu leswaku a va Hosi ya wona. Bibele yi vitana mfumo lowu leswaku i Mfumo wa Xikwembu. Yesu i “Hosi ya lava  nga tihosi ni Mufumi wa lava nga vafumi.” (1 Timotiya 6:15) Yesu u kota ku endla swilo leswinene ngopfu ku tlula munhu wihi ni wihi loyi a nga tshama a fuma naswona u ni matimba ku tlula vafumi hinkwavo.

5. Mfumo wa Xikwembu wu fuma wu ri kwihi? Wu ta fuma yini?

5 Endzhaku ka masiku ya 40 a pfuxiwile, Yesu u tlhelele etilweni. Eku heteleleni, Yehovha u n’wi veke leswaku a va Hosi ya Mfumo wolowo. (Mintirho 2:33) Mfumo wa Xikwembu wu ta fuma misava wu ri etilweni. (Nhlavutelo 11:15) Hi yona mhaka Bibele yi vitana Mfumo wa Xikwembu ‘Mfumo wa le tilweni.’—2 Timotiya 4:18.

6, 7. Ha yini Yesu a ri Hosi leyinene ku tlula hosi leyi nga munhu wa nyama?

6 Bibele yi vula leswaku Yesu u tlakuke ku tlula hosi yihi ni yihi hikuva hi yena “ntsena la nga fiki.” (1 Timotiya 6:16) Vafumi hinkwavo lava nga vanhu va nyama va hetelela va file kambe Yesu a nge pfuki a file. Swilo hinkwaswo leswinene leswi Yesu a nga ta hi endlela swona swi ta tshama hilaha ku nga heriki.

7 Vuprofeta bya Bibele byi vula leswaku Yesu u ta va Hosi leyi nga ni musa ni ntwelavusiwana: “Moya wa Yehovha wu ta tshama ehenhla ka yena, moya wa vutlhari ni wa ku twisisa, moya wa xitsundzuxo ni wa matimba, moya wa vutivi ni wa ku chava Yehovha; naswona yena u ta tiphina hi ku chava Yehovha. A nge avanyisi hi ku ya hi leswi a swi vonaka ematihlweni ya yena, kumbe a tshinya hi ku ya hi leswi twiwaka hi tindleve takwe ntsena. Kutani u ta avanyisa swisiwana hi ku tshembeka.” (Esaya 11:2-4) Xana a wu nga ta swi tsakela ku fumiwa hi hosi yo tano?

8. Hi swi tiva njhani leswaku Yesu a nge fumi a ri yexe?

8 Xikwembu xi hlawule vanhu vo karhi leswaku va fuma na Yesu emfun’weni wa le tilweni. Hi xikombiso, muapostola Pawulo u byele Timotiya a ku: “Loko hi ya emahlweni  hi tiyisela, hi ta tlhela hi va tihosi swin’we.” (2 Timotiya 2:12) I vanhu vangani lava nga ta fuma na Yesu tanihi tihosi?

9. I vanhu vangani lava nga ta fuma na Yesu? Xikwembu xi sungule rini ku va hlawula?

9 Hilaha hi dyondzeke hakona eka Ndzima 7, muapostola Yohane u kombiwe xivono lexi eka xona a voneke Yesu a ri Hosi etilweni ni tihosi tin’wana ta 144 000. I vamani lava 144 000? Yohane u hlamusela leswaku va ‘tsariwe vito ra Yesu ni vito ra Tata wakwe emimombyeni ya vona.’ U ya emahlweni a ku: “Lava hi vona lava hambetaka va landzela Xinyimpfana [ku nga Yesu] ku nga khathariseki leswaku xi ya kwihi. Lava va xaviwe evanhwini.” (Hlaya Nhlavutelo 14:1, 4.) Lava 144 000 i Vakreste vo tshembeka lava hlawuriweke hi Xikwembu leswaku “va ta va tihosi emisaveni” na Yesu. Loko va fa, va pfuxeriwa ku ya hanya etilweni. (Nhlavutelo 5:10) Ku sukela enkarhini wa vaapostola, Yehovha a a ri karhi a hlawula Vakreste vo tshembeka leswaku va ta va xiphemu xa ntlawa wa tihosi ta 144 000.

10. Ha yini ku hlawuriwa ka Yesu ni lava 144 000 leswaku va fuma vanhu swi kombisa leswaku Yehovha wa hi rhandza?

10 Yehovha u khathala swinene hi hina lerova a hlela leswaku ku va ni vanhu lava nga ta fuma na Yesu. Yesu u ta va mufumi lonene hikuva wa hi twisisa. Wa swi tiva leswaku swi njhani ku va munhu wa nyama ni ku xaniseka. Pawulo u vule leswaku Yesu u hi twela vusiwana, a nga “hi tshandzisa eku tsaneni ka hina,” naswona u ‘ringiwe hi tindlela hinkwato ku fana na hina.’ (Vaheveru 4:15; 5:8) Lava 144 000 na vona va swi tiva leswaku swi njhani ku va munhu wa nyama. Nakambe a va nga hetisekanga naswona a va vabya. Kutani hi nga tiyiseka leswaku Yesu ni lava 144 000 a va twisisi ntsena ndlela leyi hi titwaka ha yona kambe ni swiphiqo leswi hi nga na swona.

 I YINI LESWI MFUMO WA XIKWEMBU WU NGA TA SWI ENDLA?

11. Ha yini Yesu a dyondzise vadyondzisiwa vakwe ku khongelela leswaku ku rhandza ka Xikwembu ku endleka etilweni?

11 Yesu u dyondzise vadyondzisiwa vakwe ku khongelela leswaku ku rhandza ka Xikwembu ku endleka etilweni. Ha yini? Eka Ndzima 3 hi dyondze leswaku Sathana Diyavulosi a nga n’wi yingisanga Yehovha. Endzhaku ka sweswo, Yehovha u tshike Sathana ni tintsumi leti nga tshembekangiki, kumbe madimona leswaku va tshama etilweni swa xinkarhana. Kutani a ku nga ri swivumbiwa hinkwaswo etilweni leswi a swi endla ku rhandza ka Xikwembu. Eka Ndzima 10 hi ta dyondza swo tala hi Sathana ni madimona.

12. Hi swihi swiendlakalo swimbirhi swa nkoka leswi hlamuseriweke eka Nhlavutelo 12:10?

12 Bibele yi hlamusela leswaku endzhakunyana ka loko Yesu a endliwe Hosi ya Mfumo wa Xikwembu, a ta lwa na Sathana. (Hlaya Nhlavutelo 12:7-10.) Ndzimana ya vukhume yi hlamusela swiendlakalo swimbirhi swa nkoka swinene. Mfumo wa Xikwembu wu sungule ku fuma loko Yesu Kreste a vekiwa ku va Hosi ya wona, kutani Sathana a lahleriwa emisaveni ku suka etilweni. Hilaha hi nga ta dyondza hakona, swiendlakalo leswimbirhi se swi endlekile.

13. Ku endleke yini etilweni loko Sathana a hlongoriwile?

13 Bibele yi hlamusela ndlela leyi tintsumi to tshembeka a ti tsake ha yona loko Sathana ni madimona yakwe va hlongoriwile etilweni. Ha hlaya: ‘Tsakani, n’wina matilo na n’wina lava tshamaka eka wona!’ (Nhlavutelo 12:12) Sweswi ku ni ku rhula ni vun’we etilweni hikuva swivumbiwa hinkwaswo swi endla ku rhandza ka Xikwembu.

Ku sukela loko Sathana ni madimona yakwe va hlongoriwile etilweni, ku ve ni ku xaniseka emisaveni. Ku xaniseka loku ku ta hela ku nga ri khale

14. Ku endleka yini emisaveni hileswi Sathana a hlongoriweke etilweni?

14 Kambe emisaveni a ku na ku rhula nikatsongo. Vanhu va humeleriwa hi swilo swo biha ‘hikuva Diyavulosi u xikile’  naswona u “hlundzukile swinene, hi ku tiva leswaku u ni nkarhi wo koma.” (Nhlavutelo 12:12) Sathana u hlundzukile. U hlongoriwe etilweni naswona wa swi tiva leswaku u ta lovisiwa ku nga ri khale. U endla hinkwaswo leswi a nga swi kotaka leswaku a vanga swiphiqo, a twisa vanhu ku vava ni ku vanga maxangu emisaveni hinkwayo.

15. Hi xihi xikongomelo xa Xikwembu hi misava?

15 Kambe xikongomelo xa Xikwembu hi misava a xi si cinca. Xa ha lava leswaku vanhu lava hetisekeke va hanya hilaha ku nga heriki emisaveni leyi nga paradeyisi. (Pisalema 37:29) Kutani Mfumo wa Xikwembu wu ta swi endlisa ku yini leswaku leswi swi koteka?

16, 17. Daniyele 2:44 yi hi dyondzisa yini hi Mfumo wa Xikwembu?

16 Vuprofeta lebyi nga eka Daniyele 2:44 byi ri: “Emasikwini ya tihosi teto Xikwembu xa le tilweni xi ta veka mfumo lowu wu nga ta ka wu nga lovisiwi. Mfumo lowu wu nga ka wu nga hundziseriwi eka vanhu van’wana. Wu ta pfotlosa kutani wu herisa mimfumo leyi hinkwayo, kambe wona wu ta tshama hilaha ku nga riki na makumu.” Xana vuprofeta lebyi byi hi dyondzisa yini hi Mfumo wa Xikwembu?

17 Xo sungula, byi hi dyondzisa leswaku Mfumo wa Xikwembu a wu ta sungula ku fuma “emasikwini ya tihosi teto.” Leswi vulaka leswaku a ku ta va ku ri ni mimfumo yin’wana emisaveni loko Mfumo wu sungula ku fuma. Xa vumbirhi, byi hi dyondzisa leswaku Mfumo wa Xikwembu wu ta va kona hilaha ku nga heriki naswona a wu nge pfuki wu siviwe hi mfumo wun’wana. Xa vunharhu, byi hi dyondzisa leswaku Mfumo wa Xikwembu wu ta lwa ni mimfumo leyin’wana ya laha misaveni. Mfumo wa Xikwembu wu ta hlula kutani ku va wona ntsena lowu nga ta fuma misava hinkwayo. Xisweswo, vanhu va ta fumiwa hi mfumo lowunene ngopfu ku tlula leyi nga tshama yi va kona.

18. Xana nyimpi yo hetelela leyi nga ta va kona exikarhi ka Mfumo wa Xikwembu ni mimfumo ya misava leyi yi vuriwa yini?

 18 Xana Mfumo wa Xikwembu wu ta swi endlisa ku yini leswaku ku va wona lowu fumaka misava? Ku nga si fika nyimpi yo hetelela, leyi vuriwaka Armagedoni, madimona ma ta hambukisa ‘tihosi ta misava hinkwayo leyi akiweke, ku ti hlengeletela nyimpi ya siku lerikulu ra Xikwembu xa Matimba Hinkwawo.’ Mimfumo ya vanhu yi ta lwa ni Mfumo wa Xikwembu.—Nhlavutelo 16:14, 16; vona Nhlamuselo ya le hansi 10.

19, 20. Ha yini hi lava leswaku Mfumo wa Xikwembu wu fuma misava hinkwayo?

19 Ha yini hi lava Mfumo wa Xikwembu? Ku ni swivangelo swinharhu. Xo sungula, hi vadyohi kutani ha vabya ni ku tlhela hi fa. Kambe Bibele yi vula leswaku ehansi ka Mfumo wa Xikwembu hi ta hanya hilaha ku nga heriki. Entiyisweni, Yohane 3:16 yi vula leswi: “Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.”

20 Xivangelo xa vumbirhi lexi endlaka hi lava Mfumo wa Xikwembu hi leswaku hi hanya exikarhi ka vanhu vo biha. Vo tala va hemba, va kanganyisa ni ku tikhoma hi ndlela yo biha. A ku na lexi hi nga xi endlaka leswaku hi va lovisa, kambe Xikwembu hi xona xi nga ta va lovisa. Vanhu lava yaka emahlweni va endla swilo swo biha va ta lovisiwa hi nkarhi wa Armagedoni. (Hlaya Pisalema 37:10.) Xivangelo xa vunharhu lexi endlaka hi lava Mfumo wa Xikwembu hileswaku mimfumo ya vanhu a yi na matimba, yi endla swilo swo biha ni ku va ni vukanganyisi. A yi swi lavi ku pfuna vanhu leswaku va yingisa Xikwembu. Bibele yi vula leswaku ‘munhu u fuma munhu ku n’wi endla swo biha.’—Eklesiasta 8:9.

21. Mfumo wa Xikwembu wu ta swi endla njhani leswaku ku rhandza ka xona ku endleka emisaveni?

 21 Endzhaku ka Armagedoni, Mfumo wa Xikwembu wu ta endla leswaku ku rhandza ka xona ku endliwa emisaveni. Hi xikombiso, wu ta lovisa Sathana ni madimona yakwe. (Nhlavutelo 20:1-3) Eku heteleleni, vanhu a va nge he vabyi kumbe ku fa. Hikwalaho ka nkutsulo, vanhu hinkwavo lava tshembekaka va ta hanya hilaha ku nga heriki eParadeyisini. (Nhlavutelo 22:1-3) Mfumo wu ta kwetsimisa vito ra Xikwembu. Xana leswi swi vula yini? Swi vula leswaku loko mfumo wa Xikwembu wu fuma misava, vanhu hinkwavo va ta kwetsimisa vito ra Yehovha.—Vona Nhlamuselo ya le hansi 21.

YESU U SUNGULE RINI KU VA HOSI?

22. Hi swi tivisa ku yini leswaku Yesu a nga vanga Hosi loko a ha ri emisaveni kumbe hi ku hatlisa loko a ta va a pfuxiwile?

22 Yesu u dyondzise vadyondzisiwa vakwe ku khongela va ku: “Mfumo wa wena a wu te.” Kutani a swi ri erivaleni leswaku mfumo wa Xikwembu a wu ta ta enkarhini lowu taka. Yehovha a ta sungula hi ku veka mfumo wakwe ni ku endla leswaku Yesu a va Hosi ya wona. Xana Yesu u nambe a vekiwa ku va Hosi loko a tlhelela etilweni? Doo, a fanele a rindza. Endzhaku ka loko Yesu a pfuxiwile, Petro na Pawulo  va swi veke erivaleni leswaku vuprofeta lebyi nga eka Pisalema 110:1 byi kombetela eka Yesu. Yehovha u vula leswi eka vuprofeta byebyo: “Tshama evokweni ra mina ra xinene, ku fikela loko ndzi veka valala va wena va va vunavelo bya milenge ya wena.” (Mintirho 2:32-35; Vaheveru 10:12, 13) Xana Yesu a ta rindza nkarhi wo tanihi kwihi emahlweni ko va Yehovha a n’wi endla Hosi?

Mfumo wa Xikwembu wu ta endla leswaku ku rhandza ka xona ku endleka emisaveni

23. (a) Yesu u sungule rini ku fuma tanihi Hosi ya Mfumo wa Xikwembu? (b) Hi ta dyondza yini eka ndzima leyi landzelaka??

23 Loko ka ha sale malembe yo tala leswaku ku fika lembe ra 1914, ntlawa wa Vakreste lava titsongahataka wu twisise leswaku lembe rero a ri ta va ra nkoka eka vuprofeta bya Bibele. Leswi humeleleke emisaveni kusukela hi 1914, swi kombise leswaku ntlawa wolowo a wu tiyisile. Yesu u sungule ku fuma tanihi Hosi hi lembe rero. (Pisalema 110:2) Endzhakunyana ka sweswo, Sathana u lahleriwe emisaveni naswona sweswi u saleriwe hi “nkarhi wo koma.” (Nhlavutelo 12:12) Eka ndzima leyi landzelaka, hi ta vona vumbhoni byo tala bya leswaku hi hanya enkarhini wolowo. Hi ta tlhela hi dyondza leswaku ku nga ri khale Mfumo wa Xikwembu wu ta endla leswaku ku rhandza ka xona ku endliwa emisaveni.—Vona Nhlamuselo ya le hansi 22.