Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Dyondzisa Vana Va Wena

 DYONDZO 1

Xihundla Lexi Hi Tsakelaka Ku Xi Tiva

Xihundla Lexi Hi Tsakelaka Ku Xi Tiva

Xana u tshame u byeriwa xihundla?— * Bibele yi vulavula hi xihundla xo hlawuleka lexi vuriwaka “xihundla xo kwetsima.” Xa kwetsima hikuva xi huma eka Xikwembu. Nakambe xi vitaniwa xihundla hikuva vanhu a va nga xi tivi. Hambi ku ri tintsumi a ti lava ku tiva swo tala ha xona. Xana u nga tsakela ku tiva leswaku xihundla i yini?—

U ehleketa leswaku i yini leswi tintsumi a ti lava ku swi tiva?

Khale ka khaleni, Xikwembu xi vumbe wanuna ni wansati wo sungula. Mavito ya vona a ku ri Adamu na Evha. Xikwembu xi va nyike kaya ro saseka leri vitaniwaka ntanga wa Edeni. Loko Adamu na Evha a va lo yingisa Xikwembu, vona swin’we ni vana va vona a va ta va va endle misava hinkwayo yi va paradeyisi ku fana ni ntanga wolowo. Nakambe a va ta hanya eParadeyisini hilaha ku nga heriki. Kambe, xana wa swi tsundzuka leswi Adamu na Evha va swi endleke?—

Adamu na Evha a va xi yingisanga Xikwembu kutani hi yona mhaka hi nga hanyiki eparadeyisini namuntlha. Kambe Xikwembu xi vule leswaku a xi ta endla leswaku misava hinkwayo yi va leyi sasekeke naswona un’wana ni un’wana a ta va ni ntsako ni ku hanya hilaha ku nga heriki. Xana a xi ta swi endla njhani leswi? Ku hundze nkarhi wo leha vanhu va nga si swi tiva. A ku ri xihundla.

Loko Yesu a ta emisaveni, u dyondzise vanhu swo tala hi xihundla lexi. U vule leswaku a xi vulavula hi Mfumo wa Xikwembu. Yesu u dyondzise vanhu ku khongela leswaku Mfumo lowu wu ta. Wu ta endla misava yi va paradeyisi yo saseka.

Xana swi ku tsakisile ku tiva xihundla lexi?— Tsundzuka leswaku hi lava yingisaka Yehovha ntsena lava nga ta hanya eParadeyisini. Bibele yi hi byela hi timhaka to tala ta vavanuna ni vavasati lava yingiseke Yehovha. Xana u nga lava ku dyondza ha vona?— A hi voneni leswaku van’wana va vona a ku ri vamani nileswaku hi nga fana njhani na vona.

^ ndzim. 3 Eka swihloko leswi hinkwaswo, u ta vona mfungho wo fana ni lowu (—) endzhaku ka swivutiso swin’wana. Lowu i nkarhi lowunene wa ku yima kutani u endla leswaku n’wana wa wena a hlamula.