Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Dyondzisa Vana Va Wena

 DYONDZO 3

Rahava A A Pfumela Eka Yehovha

Rahava A A Pfumela Eka Yehovha

A hi endle onge hi le mutini wa Yeriko. Muti lowu wu le tikweni ra Kanana, laha vanhu va kwalaho a va nga pfumeli eka Yehovha. Wansati loyi a vuriwaka Rahava a a tshama kwalaho.

Loko Rahava a ha ri xinhwanyetana, u twe marungula ya Muxe loko a ava Lwandle ro Tshwuka kutani a rhangela Vaisrayele va huma aEgipta. U tlhele a twa hi ta ndlela leyi Yehovha a va pfuneke ha yona leswaku va hlula tinyimpi ta vona leti va ti lweke ni valala va vona. Kutani sweswi u twe leswaku Vaisrayele va endle matende ya vona ekusuhi ni muti wa Yeriko!

Rahava u sirhelele vakamberi hikuva a a pfumela eka Yehovha

Siku rin’wana nimadyambu, Vaisrayele vambirhi va ye eYeriko leswaku va ya kambela muti wolowo. Va ye endlwini ya Rahava. U va rhambe leswaku va nghena va tshama. Exikarhi ka vusiku, hosi ya le Yeriko yi kume leswaku vakamberi va le mutini naswona va ye emutini wa Rahava. Kutani hosi yi rhumele vavanuna leswaku va va landza. Rahava u tumbete vakamberi vambirhi ehenhla ka yindlu yakwe kutani a byela vavanuna va hosi a ku: ‘Vakamberi a va ri kwala, kambe se va humile emutini. Loko mo famba sweswi, mi nga va kuma!’ Xana wa swi tiva leswaku ha yini Rahava a sirhelele vakamberi volavo?— Hikuva a a pfumela eka Yehovha naswona a a swi tiva leswaku a a ta nyika Vaisrayele tiko ra Kanana.

Loko vakamberi va nga si famba endlwini ya Rahava va n’wi tshembise leswaku yena swin’we ni ndyangu wakwe a va ta pona loko muti wa Yeriko wu lovisiwa. Xana wa swi tiva leswaku va n’wi byele leswaku a endla yini?— Va te: ‘Teka ntambhu leyi yo tshwuka kutani u yi hayeka ehandle ka fasitere ra wena. Loko u endle tano, un’wana ni un’wana loyi a nga endlwini ya wena u ta pona.’ Rahava u endle hilaha vakamberi va n’wi byeleke hakona. Xana wa swi tiva leswaku ku humelele yini endzhaku ka sweswo?—

Yehovha u ponise Rahava ni ndyangu wakwe

Endzhaku ka masiku ma nga ri mangani, Vaisrayele va mache va rhendzela muti va lo whii! Ku ringana masiku ya tsevu va mache va rhendzela muti, kan’we hi siku. Kambe hi siku ra vunkombo, va mache va rhendzela muti ku ringana ka nkombo. Kutani hinkwavo va huwelela. Yehovha u endle leswaku makhumbi lama rhendzeleke  muti ya wa. Kambe yindlu leyi a yi ri ni ntambhu yo tshwuka leyi a yi hayekiwe efasitereni a yi wanga! Xana wa yi vona laha xifanisweni?— Rahava ni ndyangu wakwe va ponisiwile!

Hi nga dyondza yini eka Rahava?— Rahava a a pfumela eka Yehovha hikwalaho ka swilo hinkwaswo swo hlamarisa leswi a swi dyondzeke ha yena. Na wena u le ku dyondzeni ka swilo swo tala swo hlamarisa hi Yehovha. Xana wa pfumela eka yena hilaha Rahava a endleke hakona?— Ha swi tiva leswaku wa pfumela!