Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Dyondzisa Vana Va Wena

 DYONDZO 6

Davhida A A Nga Chavi

Davhida A A Nga Chavi

Xana u endla yini loko u chava?— Kumbexana u ya eka mana wa wena kumbe tata wa wena leswaku u ya lava mpfuno. Kambe ku ni un’wana loyi na yena a nga ku pfunaka. U ni matimba swinene ku tlula vanhu hinkwavo. Xana wa swi tiva leswaku i mani munhu wa kona?— Ina, i Yehovha Xikwembu. A hi bule hi jaha rin’wana leri eBibeleni ri vuriwaka Davhida. A a swi tiva leswaku Yehovha minkarhi hinkwayo a a ta n’wi pfuna, kutani a a nga chavi.

Ku sukela loko Davhida a ha ri n’wana, vatswari vakwe va n’wi dyondzise ku rhandza Yehovha. Leswi swi pfune Davhida leswaku a nga chavi hambiloko a humeleriwa hi swilo swo chavisa. A a swi tiva leswaku Yehovha a a ri Munghana wakwe nileswaku a a ta n’wi pfuna. Siku rin’wana, loko Davhida a ri karhi a khathalela tinyimpfu, ku humelele nghala leyikulu kutani yi hlasela nyimpfu! Xana wa swi tiva leswaku Davhida u endle yini? U hlongorise nghala kutani a yi dlaya hi mavoko yakwe! Kutani loko bere yi lava ku dlaya nyimpfu, na yona u yi dlayile! Xana u ehleketa leswaku i mani loyi a pfuneke Davhida?— Ina, i Yehovha.

Ku ni nkarhi wun’wana lowu Davhida a kombiseke leswaku a a nga chavi. Vaisrayele a va lwa ni Vafilista. Rin’wana ra masocha ya Vafilisita a ri lehile swinene ri tlhela ri va ni tinyama to tiyela! Vito ra rona a ku ri Goliyadi. Goliyadi a hleka masocha ya Vaisrayele na Yehovha. Goliyadi u byele masocha ya Vaisrayele leswaku ma ta ma ta lwa na yena. Kambe Vaisrayele hinkwavo a va chava ku lwa na yena. Loko Davhida a twa mhaka leyi, u byele Goliyadi a ku: ‘Ndzi ta lwa na wena! Yehovha u ta ndzi pfuna kutani ndzi ta ku hlula!’ Xana u ehleketa leswaku Davhida a a nga chavi?— Ina, a a nga chavi. Xana wa swi lava ku tiva leswi endlekeke endzhaku ka sweswo?

Davhida u teke xipelupelu xakwe ni maribye ya ntlhanu yo rhetela kutani a huma leswaku a ya lwa na Goliyadi. Loko Goliyadi a vona Davhida loyi a ha ri jaha, u n’wi hlekile. Kambe Davhida u n’wi byele leswi: ‘U ta eka mina hi banga, kambe mina ndzi ta eka wena hi vito ra Yehovha!’ Hiloko Davhida a hoxa ribye eka xipelupelu xakwe, a tsutsumela eka Goliyadi ivi a xi hoxa  eka yena. Ribye ri be Goliyadi emombyeni wakwe! Goliyadi u wele ehansi kutani a fa! Vafilista va chave ngopfu kutani hinkwavo va baleka. Xana jaha ro fana na Davhida ri swi kotise ku yini ku hlula Goliyadi?— Yehovha u ri pfunile naswona ri ve ni matimba yo tlula ya Goliyadi!

Davhida a a nga chavi hikuva a a swi tiva leswaku Yehovha u ta n’wi pfuna

Xana u nga dyondza yini eka rungula ra Davhida?— Yehovha u ni matimba swinene ku tlula vanhu hinkwavo. Nakambe i Munghana wa wena. Kutani enkarhini lowu taka loko u twa u chava, tsundzuka, Yehovha a nga ku pfuna leswaku u nga chavi!

HLAYA EBIBELENI YA WENA