Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Dyondzisa Vana Va Wena

 DYONDZO 2

Raveka A A Lava Ku Tsakisa Yehovha

Raveka A A Lava Ku Tsakisa Yehovha

Raveka a a ri wansati loyi a a rhandza Yehovha. Nuna wakwe a ku ri Isaka. Na yena a a rhandza Yehovha. Xana Raveka u hlangane njhani na Isaka? Xana u swi kombise njhani leswaku a a lava ku tsakisa Yehovha? A hi dyondzi swo tala ha yena.

Vatswari va Isaka a ku ri Abrahama na Sara. A va tshama etikweni ra Kanana, laha vanhu va kona a va nga n’wi gandzeli Yehovha. Kambe Abrahama a a lava leswaku n’wana wakwe a teka nsati loyi a gandzelaka Yehovha. Kutani u rhume nandza wakwe Eliyezere, leswaku a ya lavela Isaka nsati endhawini leyi vuriwaka Harani, laha man’wana ya maxaka ya Abrahama a ma tshama kona.

Raveka a a tiyimisele ku tirha hi matimba leswaku a kela tikamela mati

Eliyezere u fambe ni malandza man’wana ya Abrahama. A va ta famba nkarhi wo leha swinene. Va fambe ni khume ra tikamela leti a ti rhwale swakudya ni tinyiko. Xana Eliyezere a a ta n’wi tiva njhani wansati loyi a a ta n’wi hlawulela Isaka? Loko Eliyezere ni malandza yakwe va fika eHarani, va yime exihlobyeni hikuva a a swi tiva leswaku a swi nga ta teka nkarhi ku va vanhu va ta va ta ka mati. U khongele eka Yehovha kutani a ku: ‘Loko ndzi kombela nhwanyana leswaku a ndzi nyika mati kutani a ndzi nyika wona a tlhela a nyika ni tikamela ta mina, ndzi ta swi tiva leswaku hi yena loyi u n’wi hlawuleke.’

Raveka loyi a ha ri nhwanyana u te exihlobyeni.  Bibele yi vula leswaku a a saseke swinene. Eliyezere u n’wi kombele mati yo nwa hiloko Raveka a ku: ‘Hi lawa. Ndzi ta tlhela ndzi kela ni tikamela ta wena mati.’ Anakanya hi malwandla yo tano! Tikamela leti nga ni torha ti nwa mati yo tala, kutani Raveka a a fanele a vuyela exihlobyeni hi ku phindha-phindha. Xana wa yi vona ndlela leyi a tirhaka ha yona laha xifanisweni?— Eliyezere yi n’wi hlamarisile ndlela leyi Yehovha a hlamuleke xikhongelo xakwe ha yona.

Eliyezere u nyike Raveka tinyiko to tala to saseka. Raveka u rhambe Eliyezere ni malandza man’wana endyangwini wa ka vona. Eliyezere u hlamusele leswaku ha yini Abrahama a n’wi rhume kwalaho ni ndlela leyi Yehovha a hlamuleke xikhongelo xakwe ha yona. Ndyangu wa ka va Raveka a wu tsakile ku n’wi pfumelela leswaku a tekana na Isaka.

Raveka u fambe na Eliyezere eKanana leswaku a ya tekana na Isaka

Kambe xana u ehleketa leswaku Raveka a swi lava ku tekana na Isaka?— Raveka a a swi tiva leswaku Yehovha u rhumele Eliyezere kwale. Kutani loko ndyangu wa ka va Raveka wu n’wi vutise loko a lava ku ya eKanana a ya tekana na Isaka, u te: ‘Ina, ndzi lava ku famba.’ Xikan’we-kan’we u fambe na Eliyezere. Loko va fika eKanana u tekane na Isaka.

Hikwalaho ka leswi Raveka a endleke leswi Yehovha a a lava leswaku a swi endla, Yehovha u n’wi katekisile. Endzhaku ka malembe yo tala, Yesu u velekiwe endyangwini wakwe! Loko u fana na Raveka kutani u tsakisa Yehovha, u ta ku katekisa na wena.

HLAYA EBIBELENI YA WENA