Xana u n’wi tekisa ku yini Yesu—u n’wi teka a ri hosi leyi nga ni matimba kumbe a ri n’wana la nga kotiki ku tisirhelela?

LOKO Yesu a kurile kutani a twa ndlela leyi a sirheleriweke ha yona loko a ha ri ntsongo, xana u anakanya leswaku u khongerile eka Yehovha, a n’wi nkhensa?— Xana u ehleketa leswaku i yini leswi Yesu a swi byeleke Mariya na Yosefa loko a twa leswaku va ponise vutomi byakwe hi ku baleka na yena va ya aEgipta?—

Ina, Yesu a nga ha ri n’wana. Naswona a nga ha tshami emisaveni. Kambe, xana u swi xiyile leswaku namuntlha vanhu van’wana va ha teka Yesu a ri n’wana la nga exidyelweni?— Leswi swi vonaka kahle hi Khisimusi, hikuva etindhawini to tala ku vekiwa swifaniso leswi kombisaka Yesu a ha ri n’wana.

Hambileswi Yesu a nga ha tshamiki kona emisaveni, xana wa tshemba leswaku wa hanya?— Ina, u pfuxiwile eku feni naswona sweswi i Hosi leyi nga ni matimba etilweni. Xana u ehleketa leswaku i yini lexi a nga endlaka leswaku a sirhelela lava n’wi tirhelaka?— Loko Yesu a ha ri emisaveni, u swi kombisile leswaku a nga va sirhelela njhani lava n’wi rhandzaka. A hi vone ndlela leyi a swi endleke ha yona loko siku rin’wana a ri karhi a famba hi byatso ni vadyondzisiwa va yena.

Dyambu se a ri rhengile. Yesu a a ri karhi a dyondzisa siku hinkwaro eLwandle ra Galeliya,  lwandle leri i tiva lerikulu ra kwalomu ka tikhilomitara ta 20 hi ku leha ni tikhilomitara ta kwalomu ka 12 hi ku anama. Hiloko a byela vadyondzisiwa vakwe a ku: “A hi peleleni etlhelweni lerin’wana ra tiva.” Hiloko va nghena ebyatsweni kutani va sungula ku tluta va tsemakanya tiva. Yesu a a karhele swinene kutani u ye endzhaku ka byatso a ya etlela exikhegelweni. Vurhongo a byi hlwelanga ku n’wi khoma.

Yesu u ri yini eka moya ni magandlati lawa?

Vadyondzisiwa va tshame va xalamukile leswaku va hambeta va lawula byatso. Swilo hinkwaswo a swi famba kahle ku ringana nkarhi wo karhi, kambe ku nga ri khale, ku sungule xidzedze xa matimba. Xi ye xi hunga hi matimba swinene naswona magandlati ma ye ma ri karhi ma kula. Magandlati ma sungule ku ba ma nghena ebyatsweni kutani byatso byi sungula ku tala hi mati.

Vadyondzisiwa va khomiwe hi ku chava hikuva a va vona onge va ta mbombomela. Kambe Yesu a a nga chuhanga. A a ha etlele le ndzhaku ka byatso. Eku heteleleni vadyondzisiwa va n’wi pfuxile kutani va ku: ‘Mudyondzisi, Mudyondzisi, hi ponise; xidzedze lexi xi lava ku hi dlaya.’ Hiloko Yesu a pfuka kutani a vulavula ni xidzedze ni magandlati. U te: “Miyela! U ku whii!”

 Hiloko xidzedze xi miyela kutani tiva ri va ni ku rhula. Vadyondzisiwa va hlamarile. A va nga si tshama va vona nchumu wa muxaka lowu. Va sungule ku byelana va ku: “Kahle-kahle loyi i mani, hikuva u lerisa hambi timheho ni mati, swi vuya swi n’wi yingisa?”—Luka 8:22-25; Marka 4:35-41.

Xana wa swi tiva leswaku Yesu i mani?— Xana wa swi tiva leswaku u ma kuma kwihi matimba yakwe lamakulu?— Vadyondzisiwa a va nga fanelanga va chava loko Yesu a ri na vona hikuva Yesu a a nga ri munhu la tolovelekeke. A a kota ku endla swilo swo hlamarisa leswi ku nga riki na munhu la nga tshama a swi endla. I nge ndzi ku byela nchumu wun’wana lowu a nga tshama a wu endla loko lwandle ri karihile.

Leswi swi endleke hi siku rin’wana. Loko ri pela, Yesu u byele vadyondzisiwa va yena leswaku va nghena ebyatsweni, va rhanga emahlweni, va ya eka tlhelo lerin’wana ra lwandle. Hiloko Yesu a famba a ri yexe a ya entshaveni. Leyi i ndhawu leyi rhuleke leyi a nga khongelaka eka Tata wakwe, Yehovha Xikwembu eka yona.

 Vadyondzisiwa va nghene ebyatsweni kutani va sungula ku tsemakanya lwandle. Hiloko moya wu sungula ku hunga. Kutani wu ya wu hunga hi matimba swinene. Se a ku ri vusiku. Vavanuna lava va suse maseyile kutani va sungula ku tluta. Kambe va fambe hi ku nonoka hikuva moya wa matimba a wu hunga wu va sivela ndlela. Byatso a byi ya hala ni hala emagandlatini lamakulu naswona mati a ma pfa ma nghena. Vavanuna lava va tirhe hi matimba leswaku va ta fika eribuweni, kambe va tsandzekile.

Yesu a a ha ri yexe entshaveni. Se a ku hundze nkarhi wo leha a ri kwalaho. Kambe se a a swi vona leswaku vadyondzisiwa va yena va le khombyeni emagandlatini lamakulu. Hiloko a rhelela a huma entshaveni a ta eribuweni ra lwandle. Yesu a a lava ku pfuna vadyondzisiwa vakwe, kutani u fambe ehenhla ka lwandle leri, leri kariheke, a ya eka vona!

Xana ku nga humelela yini loko wo ringeta ku famba ehenhla ka mati?— U ta mbombomela naswona u nga ha nwela. Kambe Yesu a nga tano. U ni matimba lama hlawulekeke. Yesu u fambe mpfhuka wo leha leswaku a ya fika ebyatsweni. Se a ku ri vurhonga loko vadyondzisiwa va vona Yesu a ta eka vona, a ri karhi a famba ehenhla ka mati. Kambe va hlamarile loko va vona leswi humelelaka. Va khomiwe hi ku chava naswona va be pongo hikwalaho ko chava. Hiloko Yesu a vulavula na vona a ku: “Tiyani mbilu, hi mina; mi nga chavi.”

Ha yini Yesu a endle masingita?

Loko Yesu a nghena ebyatsweni, xidzedze xi miyerile hi ku hatlisa. Vadyondzisiwa va hlamala nakambe loko va vona leswi. Va nkhinsame emahlweni ka Yesu kutani va ku: “Kunene u N’wana wa Xikwembu.”—Matewu 14:22-33; Yohane 6:16-21.

Xana a swi nga ta tsakisa loko a wu ri kona hi nkarhi wolowo ni ku vona Yesu a endla swilo swo fana ni leswi?— Xana wa swi tiva leswaku ha yini Yesu a endle masingita lawa?— U ma endle hileswi a a rhandza vadyondzisiwa vakwe naswona a a lava ku va pfuna. Nakambe u ma endlele ku kombisa matimba lamakulu lawa a a ri na wona, lawa a a ta ma tirhisa enkarhini lowu taka loko a ri Mufumi wa Mfumo wa Xikwembu.

Xana Yesu u va sirhelela njhani valandzeri va yena namuntlha?

 Ninamuntlha, Yesu wa ma tirhisa matimba yakwe ku sirhelela valandzeri vakwe eka matshalatshala ya Sathana yo va sivela ku byela van’wana hi Mfumo wa Xikwembu. Kambe Yesu a a nga ma tirhisi matimba yakwe ku sirhelela vadyondzisiwa vakwe eka mavabyi kumbe ku va hanyisa loko va vabya. Vaapostola va Yesu hinkwavo va hetelele va file na vona. Yakobo makwavo wa Yohane u dlayiwile naswona Yohane hi byakwe u pfaleriwe ekhotsweni.—Mintirho 12:2; Nhlavutelo 1:9.

Swi tano ninamuntlha. Hambiloko vanhu va tirhela Yehovha kumbe va nga n’wi tirheli, hinkwavo va vabya ni ku fa. Kambe ku nga ri khale swilo swi ta hundzuka eka mfumo wa Yesu loko a ri Hosi ya hulumendhe ya Xikwembu. Hi nkarhi wolowo, a nga kona la nga ta khomiwa hi ku chava hikuva Yesu u ta tirhisa matimba yakwe leswaku a katekisa hinkwavo lava va n’wi yingisaka.—Esaya 9:6, 7.

Tindzima tin’wana leti kombisaka matimba lamakulu lawa Yesu a nga na wona, loyi Xikwembu xi n’wi endleke a va Mufumi eMfun’weni wa Xikwembu, i Daniyele 7:13, 14; Matewu 28:18 na Vaefesa 1:20-22.