Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Dyondza Eka Mudyondzisi Lonkulu

 NDZIMA 19

Xana Swi Lulamile Ku Lwa?

Xana Swi Lulamile Ku Lwa?

XANA u tiva vafana van’wana kumbe vanhwanyana van’wana lava ringetaka ku tiendla vamakhonya?— Xana wa swi tsakela ku va vanghana va vona? Kumbe, xana u nga tsakela ku tshama ni munhu loyi a nga ni musa ni loyi a rhandzaka ku rhula?— Mudyondzisi Lonkulu u te: “Va tsaka lava kondletelaka ku rhula, hikuva va ta vuriwa ‘vana va Xikwembu.’”—Matewu 5:9.

Kambe minkarhi yin’wana vanhu van’wana va endla swilo leswi swi hi khunguvanyisaka. Xana a swi tano?— Kutani hi nga ha titwa hi lava ku rihisela. Leswi swi humelerile eka vadyondzisiwa va Yesu loko va ri karhi va famba na Yesu va ya eYerusalema. I nge ndzi ku hlamusela mhaka ya kona.

Loko se va fambe mpfhukanyana, Yesu u rhume vadyondzisiwa va yena va nga ri vangani eximutanini xa Vasamariya leswaku va ya lava ndhawu yo wisa. Kambe vanhu va kwalaho a va nga swi lavi ku va rhurhela hikwalaho ka leswi Vasamariya va nga ni vukhongeri lebyi hambeneke ni bya vona. Naswona  a va venga munhu wihi ni wihi loyi a yaka emutini wa Yerusalema, a ya gandzela kona.

Xana Yakobo na Yohane a va lava ku endla yini leswaku va tirihisela eka Vasamariya?

Loko sweswo a swi lo endlekela wena, xana a wu ta va u endle yini? Xana a wu ta hlundzuka? Xana a wu ta lava ku rihisela?— Sweswo hileswi mudyondzisiwa Yakobo na Yohane a va lava ku swi endla. Va vulavule na Yesu va ku: ‘Xana u lava hi byela ndzilo wu xika hi le tilweni kutani wu va lovisa?’ A swi hlamarisi leswi Yesu a va vitaneke Vana va Dzindza-tilo! Kambe Yesu u va byele leswaku a hi swinene ku khoma vanhu van’wana hi ndlela yoleyo.—Luka 9:51-56; Marka 3:17.

I ntiyiso leswaku vanhu van’wana va nga hi khunguvanyisa minkarhi yin’wana. Vana van’wana va nga ha hi alela ku tlanga emintlangwini ya vona. Va nga ha vula va ku: “A hi ku lavi laha.” Loko swilo leswi fanaka ni leswi swi humelela, swi nga hi hlundzukisa, a swi tano ke? Hi nga ha titwa hi lava ku rihisela. Kambe, xana swi fanerile ku endla sweswo?—

Xana u nga ta ni Bibele ya wena? A hi pfule Swivuriso ndzima 24, ndzimana 29. Yona yi ri: “U nga vuli u ku: ‘Hilaha a endleke hakona eka mina, na mina ndzi ta endla hilaha ku fanaka eka yena. Ndzi ta tlherisela un’wana ni un’wana hi ku ya hi ndlela leyi a endlaka ha yona.’”

U yi twa njhani ndzimana leyi?— Yi vula leswaku a hi fanelanga hi rihisela. A hi fanelanga hi khoma munhu hi tihanyi ntsena hileswi yena a hi khomeke hi tihanyi. Kambe u ta endla yini loko munhu un’wana a ringeta ku ku pfuka? A nga ha ringeta ku ku hlundzukisa hi ku ku hlekula. A nga ha ku hleka, a vula leswaku u toya. A hi nge u ku vitana toya. Xana u ta endla yini? Xana u ta lwa na yena?—

A hi tlhele hi twa leswaku Bibele yi ri yini. Pfula eka Matewu ndzima 5, ndzimana 39. Eka yona Yesu u ri: “Mi nga n’wi kaneti la hombolokeke; kambe hambi ku ri mani la mi makalaka erhameni ra xinene, hundzuluxelani ni lerin’wana eka yena.” Xana u ehleketa leswaku Yesu a a vula yini eka ndzimana leyi? Xana a a vula leswaku loko munhu a ku ba hi xibakele erhameni, u fanele u tlhela u n’wi nyika ni lerin’wana a ku ba eka rona?—

 Doo, Yesu a a nga vuli swona nikatsongo. Ku makala munhu a swi fani ni ku n’wi ba hi xibakela. Ku makala ku nga ha fanisiwa ni ku susumeta munhu. Munhu a nga hi makala leswaku a pfuxa nyimpi. U lava leswaku hi hlundzuka. Loko ho hlundzuka naswona hi tlherisela hi ku n’wi susumeta, xana ku ta humelela yini?— Ku nga ha pfuka nyimpi.

Kambe Yesu a a nga swi lavi leswaku valandzeri vakwe va lwa. Xisweswo u vule leswaku loko munhu a hi makala, a hi fanelanga hi rihisela. A hi fanelanga hi hlundzuka kutani hi lwa. Loko hi lwa, hi ta va hi kombisa leswaku ha fana ni munhu loyi a sunguleke nyimpi.

Xana u ehleketa leswaku i yini lexinene lexi hi nga xi endlaka loko ku pfuka nyimpi?— I ku famba. Munhu la pfuxaka nyimpi a nga ha ku dlidlimbeta-dlidlimbeta. Kambe a nga ha hetelela hi ku endla sweswo ntsena. Loko u hambana na yena, a swi vuli swona leswaku u toya. Swi vula leswaku u ni xivindzi xo endla nchumu lowu nga wunene.

Xana hi fanele hi endla yini loko munhu un’wana a hi pfuka?

 Kambe ku vuriwa yini loko wo sungula ku lwa kutani u hlula? Xana ku nga humelela yini endzhaku ka sweswo?— Munhu loyi u n’wi hluleke a nga ha ku vuyela a ri ni vanghana va yena. Va nga ha ku hima hi nhonga kumbe va ku tlhava hi mukwana. Se wa swi vona leswaku hikwalaho ka yini Yesu a a nga swi lavi leswaku hi lwa ni vanhu?—

Kambe, xana hi fanele hi endla yini loko hi vona vanhu van’wana va lwa? Xana hi fanele hi seketela un’wana exikarhi ka vona?— Bibele yi hi byela leswi hi faneleke hi swi endla. Pfula Swivuriso ndzima 26, ndzimana 17. Yona yi ri: ‘Munhu la hundzaka hi ndlela kambe a hlundzukisiwa hi mholovo leyi nga riki ya yena u fana ni munhu la khomaka tindleve ta mbyana.’

Ha yini ku nghenelela tinyimpi ta vanhu van’wana swi fana ni ku khoma tindleve ta mbyana? U nga ha vaviseka kutani u nga endli tano!

Xana ku nga humelela yini loko wo khoma tindleve ta mbyana? Mbyana yi ta twa ku vava kutani yi ku luma, a swi tano ke? Loko mbyana yi ri karhi yi lwela ku chupula, u ta ya u ti khoma swinene tindleve ta yona naswona yi ta ya yi kariha ngopfu. Loko wo yi tshika, yi nga ha ku kakatlula. Xana u nga swi kota ku tshama u yi khome hi tindleve u nga yi tshiki?—

Lexi ku nga ha va xiyimo lexi hi nga vaka eka xona loko hi nghenela nyimpi ya vanhu van’wana. Swi nga ha endleka hi nga swi tivi leswaku i mani la sunguleke nyimpi leyi kumbe hi nga swi tivi leswaku va lwela yini. Munhu un’wana a nga ha biwa, kumbexana hikwalaho ka leswi a yiveleke munhu loyi a n’wi baka. Loko hi lamulela munhu yoleyo, hi ta va hi pfuna khamba. Sweswo swi ta va swi nga lulamanga, a hi swona ke?

 Kutani, i yini lexi u faneleke u xi endla loko u vona vanhu va ri eku lweni?— Loko ku ri exikolweni, hatlisa u vitana mudyondzisi. Loko u nga ri exikolweni, u nga ha byela un’wana wa vatswari va wena kumbe phorisa. Ina, hambiloko vanhu van’wana va lava ku lwa, hi fanele hi hlayisa ku rhula.

Xana u fanele u endla yini loko u vona vanhu va ri karhi va lwa?

Vadyondzisiwa va Yesu va xiviri va endla hilaha va nga kotaka hakona leswaku va papalata ku lwa. Hi ndlela yoleyo hi va hi kombisa leswaku hi ni xivindzi xo endla swilo leswinene. Bibele yi vula leswaku mudyondzisiwa wa Yesu a nga ‘fanelanga a lwa, kambe u fanele a olova eka hinkwavo, a fanelekela ku dyondzisa, a tikhoma eka leswo biha.’—2 Timotiya 2:24.

Sweswi a hi kambisise ndzayo yin’wana leyinene leyi nga ta hi pfuna leswaku hi papalata ku lwa: Varhoma 12:17-21 na 1 Petro 3:10, 11.