Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Dyondza Eka Mudyondzisi Lonkulu

 NDZIMA 32

Ndlela Leyi Yesu A Sirheleriweke Ha Yona

Ndlela Leyi Yesu A Sirheleriweke Ha Yona

MINKARHI yin’wana Yehovha u endla swilo hi ndlela yo hlamarisa leswaku a sirhelela vana lavatsongo ni lava va tsandzekaka ku tisirhelela. Loko wo famba enhoveni, u nga ha vona ndlela yin’wana leyi Yehovha a endlaka leswi ha yona. Kambe swi nga ha endleka eku sunguleni u nga swi twisisi leswaku ku humelela yini.

U nga ha vona xinyenyana xi fika xi phatsama ehansi ekusuhi na wena. Xi vonaka onge xi vavisekile. Xi koka rin’wana ra timpapa ta xona kutani xi tsutsuma loko u ringeta ku tshinela eka xona. Loko u ri karhi u xi landzelela, xi ya emahlweni xi tsutsuma. Kutani xi hetelela xi hahile. Ripapa ra xona a ri nga vavisekanga nikatsongo! Xana wa swi tiva leswaku xinyenyana lexi a xi endla yini?—

Phela, ekusuhi ni laha xinyanyana lexi xi fikeke xi phatsama kona ekusuhi na wena, hilaha a xi tumbete swivondlwana swa xona kona. Mana wa swona a a anakanya leswaku u nga ha swi vona kutani u swi vavisa. Hiloko a tiendla onge u vavisekile kutani a ku hambukisa endleleni ya wena. Xana wa swi tiva leswaku i mani la nga hi sirhelelaka ku fana ni xinyenyana lexi sirhelelaka mavondlo ya xona?— EBibeleni, Yehovha u fanisiwa ni xinyenyana lexi vitaniwaka gama, lexi xi pfunaka mavondlo ya xona.—Deteronoma 32:11, 12.

Xana xinyenyana lexi xi ma sirhelela njhani mavondlo ya xona?

 N’wana wa Yehovha wa risima, i N’wana wa yena la rhandzekaka, Yesu. Loko Yesu a ri etilweni, a a ri munhu wa moya la nga ni matimba, ku fana ni Tata wakwe. A a swi kota ku tisirhelela. Kambe loko Yesu a velekiwa tanihi n’wana emisaveni, a a nga ri na wona matimba yo tisirhelela. A a lava ku sirheleriwa.

Leswaku a kota ku hetisisa leswi Xikwembu a xi lava leswaku a swi endla emisaveni, Yesu a a fanele a rhanga a kula, a va munhu lonkulu, la hetisekeke. Loko Yesu a nga si va munhu lonkulu, la hetisekeke, Sathana u ringete ku n’wi dlaya. Matshalatshala yo dlaya Yesu loko a ha ri ntsongo ni tindlela leti Yehovha a n’wi sirheleleke ha tona, i mhaka leyi tsakisaka swinene. Xana wa swi tsakela ku yi twa?—

Loko Yesu a ha ku tswariwa, Sathana u endle leswaku ku humelela nchumu lowu fanaka ni nyeleti, wu hatima exibakabakeni le Vuxeni. Vanhu lava vuriwaka vangoma va swilo swa le mpfhukeni, lava kambisisaka tinyeleti, va landzelele nyeleti yoleyo mpfhuka lowu ringanaka tikhilomitara ta madzana-dzana ku ya eYerusalema. Kwalaho va fike va vutisa laha loyi a nga ta va hosi ya Vayuda a nga ta tswaleriwa kona. Loko ku vutisiwa vanhu lava tivaka leswi Bibele yi swi vulaka malunghana ni mhaka leyi, va hlamurile va ku: “EBetlehema.”—Matewu 2:1-6.

Endzhaku ka loko vangoma va swilo swa le mpfhukeni va endzele Yesu, hi xihi xitsundzuxo lexi Xikwembu xi va nyikeke xona leswaku xi ponisa Yesu?

 Endzhaku ka loko Heroda, hosi yo homboloka ya le Yerusalema, a twe hi ta hosi leyi leyintshwa leyi ya ha ku velekiwaka emutini lowu nga ekusuhi wa Betlehema, u byele vangoma va swilo swa le mpfhukeni a ku: ‘Lavani n’wana loyi mi kala mi n’wi kuma kutani mi vuya mi ta ndzi tivisa.’ Xana wa swi tiva leswaku ha yini Heroda a lava ku tiva lomu Yesu a nga kona?— Heroda a a ri ni mavondzo naswona a a lava ku n’wi dlaya!

Xana Xikwembu xi n’wi sirhelele njhani N’wana wa xona?— Loko vangoma va swa le mpfhukeni va kuma Yesu, va n’wi nyike tinyiko. Endzhakunyana Xikwembu xi tsundzuxe vangoma lava va swa le mpfhukeni hi norho leswaku va nga ha tlheleli eka Heroda. Hiloko va tirhisa ndlela yin’wana loko va ya ekaya va nga ha tlheleli eYerusalema. Loko Heroda a twa leswaku vangoma va swa le mpfhukeni va fambile, u karihe ngopfu. Leswaku a ringeta ku dlaya Yesu, Heroda u lerise leswaku vana hinkwavo va vafana va le Betlehema lava nga ehansi ka malembe mambirhi va dlayiwa! Kambe hi nkarhi wolowo, Yesu a a nga ha ri kona kwalaho.

Xana wa swi tiva leswaku Yesu u ponise ku yini?— Endzhaku ka loko vangoma va swa le mpfhukeni va sukile va tlhelela ekaya, Yehovha u lemukise Yosefa, nuna wa Mariya, leswaku a pfuka a balekela aEgipta. Kwalaho Yesu a a sirhelelekile eka Heroda lowo biha. Endzhaku ka malembe yo hlayanyana, loko Mariya na Yosefa va vuya na Yesu hi le Egipta, Xikwembu xi lemukise Yosefa nakambe. Xi n’wi byele enorhweni leswaku a rhurhela eNazareta, laha Yesu a nga ta va a sirhelelekile.—Matewu 2:7-23.

Hi yihi ndlela yin’wana leyi Yesu a ponisiweke ha yona?

Xana wa yi vona ndlela leyi Yehovha a n’wi poniseke ha yona N’wana wa yena?— I mani loyi u nga n’wi fanisaka ni swivondlwana leswi tumbetiweke hi mana wa swona ekhwatini kumbe loyi a fanaka na Yesu loko a  ha ri n’wana lontsongo? Xana a wu fani na swona?— Na wena ku ni vanhu lava lavaka ku ku vavisa. Xana wa va tiva vanhu va kona?—

Bibele yi vula leswaku Sathana u fana ni nghala leyi bongaka leyi lavaka ku hi dya. Tanihi leswi nghala hakanyingi yi hlaselaka swiharhi leswitsongo, Sathana ni madimona yakwe va tala ku hlasela vana. (1 Petro 5:8) Kambe Yehovha u ni matimba ku tlula Sathana. Yehovha a nga va sirhelela vana vakwe kumbe a herisa timbanga leti Sathana a va humesaka tona.

Xana wa ha tsundzuka leswaku i yini leswi Diyavulosi ni madimona yakwe va ringetaka ku hi kanganyisa ha swona, hi ku ya hi Ndzima 10 ya buku leyi?— Ina, va ringeta ku hi endlisa vuxaka bya rimbewu hi tindlela leti Xikwembu xi nga ti amukeliki. Kambe i vamani lava ku nga vona ntsena va nga vaka ni vuxaka bya rimbewu?— Ina, i vanhu vambirhi lavakulu, wa xinuna ni wa xisati, lava tekaneke.

Kambe, lexi vavisaka, vanhu van’wana lavakulu va rhandza ku va ni vuxaka bya rimbewu ni vana lavatsongo. Leswi swi endla leswaku vana volavo, vafana ni vanhwanyana, va sungula ku endla swilo swo biha leswi va swi dyondzeke eka vanhu lava lavakulu. Na vona va sungula ku tirhisa swirho swa vona swa rimbewu hi ndlela leyi hoxeke. Leswi swi tshame swi humelela khale swinene, le mutini wa Sodoma. Bibele yi vula leswaku vanhu va ndhawu leyi, “ku sukela eka mufana ku ya eka munhu la kuleke,” va ringete ku va ni vuxaka bya rimbewu ni vavanuna lava va endzeleke Lota.—Genesa 19:4, 5.

Xisweswo, leswi Yesu na yena a a fanele a sirheleriwa, na wena u fanele u sirheleriwa eka vanhu lavakulu—ni le ka vana van’wana—lava va nga ha lavaka ku va ni vuxaka bya rimbewu na wena. Hi ntolovelo, vanhu lava va ta tiendla onge i vanghana va wena. Va nga ha ku tshembisa ku ku nyika swo karhi loko wo va tshembisa leswaku a wu nge byeli munhu malunghana ni leswi va lavaka ku ku endla swona. Kambe vanhu lava a va na rirhandzu, va fana na Sathana ni madimona yakwe, naswona va lava ku titsakisa vona vini, a va na mhaka ni vanhu van’wana. Kutani va ringeta ku kuma ntsako lowu hi ku va ni vuxaka bya rimbewu ni vana lavatsongo. Leswi swi hoxile swinene!

 Xana wa swi tiva leswi va nga swi endlaka leswaku va titsakisa?— Va nga ha ringeta ku tlangisa swirho swa wena swa rimbewu. Kumbe va nga ha endla leswaku swirho swa vona swa rimbewu swi khumbana ni swa wena. Kambe u nga tshuki u pfumelela munhu wo karhi leswaku a tlanga hi xirho xa wena xa rimbewu. Hambi ku ri makwenu wa xinuna kumbe wa xisati kumbe mana wa wena ni tata wa wena, u nga va pfumeleli. Swirho leswi a hi swo tlanga hi swona.

yini leswi u faneleke u swi vula ni ku swi endla loko munhu wo karhi a ringeta ku ku khumba hi ndlela leyi nga fanelangiki?

Xana u nga wu sirhelela njhani miri wa wena eka vanhu lava endlaka swilo swo biha swo fana ni leswi?— Xo sungula, u nga pfumeleli munhu a tlanga hi swirho swa wena swa rimbewu. Loko munhu wo karhi a ringeta ku endla leswi, huwelela, u ku: “U nga ndzi khumbi! Ndzi ta ku pota!” Loko munhu yoloye a vula leswaku leswi swi humeleleke swi vangiwe hi wena, u nga pfumeli. Wa hemba. Famba u ya n’wi pota ku nga khathariseki leswaku i mani! U fanele u n’wi pota hambiloko o vula leswaku leswi mi swi endlaka i xihundla xa n’wina mi ri vambirhi. Hambiloko munhu wa kona a ku tshembisa tinyiko leti tsakisaka kumbe a ku xungeta, suka eka yena u ya n’wi pota.

A wu fanelanga u chava, kambe i swa nkoka leswaku u tivonela. Loko vatswari va wena va ku tsundzuxa malunghana ni vanhu kumbe tindhawu leti nga ha vaka ni khombo eka wena, u fanele u va yingisa. Loko wo va yingisa, u ta endla leswaku munhu wo biha a nga swi koti ku ku vavisa.

Hlaya tindzima leti landzelaka u vona leswaku u nga tisirhelela njhani eka vuxaka bya rimbewu lebyi hoxeke, Genesa 39:7-12; Swivuriso 4:14-16; 14:15, 16; 1 Vakorinto 6:18; na 2 Petro 2:14.