Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Dyondza Eka Mudyondzisi Lonkulu

 NDZIMA 40

Ndlela Leyi U Nga Tsakisaka Xikwembu Ha Yona

Ndlela Leyi U Nga Tsakisaka Xikwembu Ha Yona

HI NGA endla yini leswaku hi tsakisa Xikwembu? Xana hi nga xi nyika swo karhi?— Yehovha u ri: “Xiharhi xin’wana ni xin’wana xa le khwatini i xa mina.” U tlhela a ku: “Silivhere i ya mina, ni nsuku i wa mina.” (Pisalema 24:1; 50:10; Hagayi 2:8) Kambe ku ni nchumu wun’wana lowu hi nga wu nyikaka Xikwembu. I yini nchumu wa kona?—

Yehovha u swi tshikele eka hina leswaku hi tihlawulela loko hi lava ku n’wi tirhela kumbe hi nga swi lavi. A nga hi sindzisi ku endla swilo leswi hi nga swi laviki ku swi endla. A hi ringete ku kuma xivangelo xa leswaku ha yini Xikwembu xi swi tshikele eka hina ku tihlawulela loko hi lava ku xi tirhela kumbe hi nga swi lavi.

Swi nga ha endleka wa yi tiva rhoboto. I muchini lowu endleriweke ku endla xin’wana ni xin’wana lexi muendli wa wona a lavaka leswaku wu swi endla. Kutani rhoboto a yi tihlawuleli. Loko Yehovha a a swi rhandzile, a a ta va a endle leswaku hinkwerhu hi fana ni tirhoboto. A a ta va a endle leswaku hinkwerhu hi endla ntsena leswi yena a lavaka leswaku hi swi endla. Kambe Xikwembu a xi endlanga tano. Xana wa swi tiva leswaku hikwalaho ka yini?— Phela tithoyi tin’wana ti fana ni tirhoboto. Loko ti pfuleriwa leswaku ti tlanga, ti endla leswi muendli wa tona a ti endleleke swona. Xana u  tshama u yi vona thoyi yo tano?— Hakanyingi vanhu va karhala ku tlangisa thoyi leyi endlaka ntsena leswi yi endleriweke swona. Xikwembu a xi swi lavi leswaku hi xi yingisa onge hi tirhoboto leti endleriweke ku xi tirhela. Yehovha u lava leswaku hi n’wi tirhela hileswi hi n’wi rhandzaka ni hileswi hi lavaka ku n’wi yingisa.

Hikwalaho ka yini Xikwembu xi nga hi endlanga hi fana ni rhoboto leyi?

Xana u ehleketa leswaku Tata wa hina wa le matilweni u titwisa ku yini loko hi n’wi yingisa hi ku swi rhandza?— Ndzi byele, xana vatswari va wena va titwa njhani hi ndlela leyi u tikhomaka ha yona?— Bibele yi vula leswaku n’wana wo tlhariha hi “loyi a tsakisaka tata wakwe,” kambe n’wana wo hunguka “i gome eka mana wakwe.” (Swivuriso 10:1) Xana u swi xiyile leswaku tatana ni mana wa wena va tsaka loko u endla leswi va ku byelaka swona?— Kambe, va titwisa ku yini loko u nga va yingisi?—

I yini lexi u nga xi endlaka leswaku Yehovha ni vatswari va wena va tsaka?

Kutani a hi anakanye hi Yehovha, Tata wa hina wa le matilweni. U hi byela leswi hi nga swi endlaka leswaku hi n’wi tsakisa. Ndzi kombela u teka Bibele ya wena kutani u pfula eka Swivuriso 27:11. Eka ndzimana leyi, Xikwembu xi vulavula na hina, xi ku: “N’wananga, tlhariha u tsakisa mbilu yanga, leswaku ndzi ta angula loyi a ndzi tlhontlhaka.” Xana wa swi tiva leswaku swi vula yini ku tlhontlha munhu?— Phela munhu a nga ha ku tlhontlha hi ku ku hleka a vula leswaku u tsandzeka ku endla leswi u vuleke leswaku u kota ku swi endla. Hi yihi ndlela leyi Sathana a tlhontlhaka Yehovha ha yona?— A hi vone.

Wa tsundzuka leswaku eka Ndzima 8 ya buku leyi hi dyondze leswaku Sathana u lava ku va Wo Rhandza nileswaku u lava leswaku vanhu  hinkwavo va yingisa yena. Sathana u vula leswaku vanhu va gandzela Yehovha ntsena hileswi Yehovha a nga ta va nyika vutomi lebyi nga heriki loko va endla tano. Endzhaku ka loko Sathana a kote ku xisa Adamu na Evha leswaku va nga n’wi yingisi Yehovha, Sathana u tlhontlhe Xikwembu. U byele Xikwembu a ku: ‘Vanhu va ku tirhela hileswi va kumaka swo karhi eka wena. Loko wo ndzi pfumelela, ndzi ta endla leswaku hinkwavo va tshika ku ku tirhela.’

Endzhaku ka loko Adamu na Evha va dyohile, Sathana u tlhontlhe Yehovha hi ndlela yihi?

I ntiyiso leswaku marito lawa a ma tsariwanga hi ndlela yoleyo eBibeleni. Kambe loko hi hlaya hi wanuna la vuriwaka Yobo, swi va erivaleni leswaku Sathana u byele Xikwembu marito yo fana na wona. Kunene a swi ri swa nkoka eka Sathana ni le ka Yehovha leswaku Yobo u tshembekile eka Xikwembu kumbe a nga tshembekanga. A hi pfule Tibibele ta hina eka Yobo ndzima 1 na 2 hi vona leswi endlekeke.

Xiya leswaku eka Yobo ndzima 1 Sathana a a te hi xiviri etilweni loko tintsumi ti ta vona Yehovha. Hiloko Yehovha a vutisa Sathana a ku: “U huma kwihi?” Sathana u hlamule hi ku vula leswaku a a  ri eku famba-fambeni emisaveni. Yehovha u vutisile a ku: ‘Xana u swi xiyile leswaku Yobo wa ndzi tirhela nileswaku a nga endli nchumu wo biha?’—Yobo 1:6-8.

Ta ha suka, Sathana u sungule ku tiyimelela. U te: ‘Yobo u ku gandzela hileswi swilo swi n’wi fambelaka kahle. Loko wo n’wi tshika u nga n’wi sirheleli naswona u nga n’wi katekisi, u ta ku landzula u n’wi langutile.’ Yehovha u hlamule a ku: ‘Swi lulamile Sathana, endla hinkwaswo leswi u swi rhandzaka kambe Yobo u nga n’wi twisi ku vava.’—Yobo 1:9-12.

Xana Sathana u endle yini?— U rhume vanhu leswaku va ya yiva swifuwo swa Yobo ku katsa ni timbhongolo ta yena ni ku dlaya lava va swi langutelaka. Kutani rihati ri ba, ri dlaya tinyimpfu ni varisi va tona. Endzhaku ka nkarhi, ku te vanhu va ta yiva tikamela va tlhela va dlaya lava va ti langutelaka. Eku heteleleni, Sathana u endle leswaku mheho leyikulu yi wisa yindlu leyi vana va khume va Yobo a va ri eka yona, kutani va fa hinkwavo ka vona. Hambileswi a ku endleke swilo leswi hinkwaswo, Yobo u ye emahlweni a tirhela Yehovha.—Yobo 1:13-22.

Loko Yehovha a tlhela a vona Sathana, Yehovha u n’wi byele leswaku Yobo wa ha tshembekile. Sathana u tiyimelerile, a ku: ‘Loko wo ndzi pfumelela ndzi n’wi twisa ku vava emirini, u ta ku landzula u n’wi langutile.’ Hiloko Yehovha a pfumelela Sathana  leswaku a twisa Yobo ku vava emirini, kambe a n’wi lemukisa leswaku a nga n’wi dlayi Yobo.

Hi wahi maxangu lawa Yobo a ma tiyiseleleke naswona ha yini leswi swi tsakise Xikwembu?

Sathana u hlasele Yobo hi vuvabyi lebyi endleke leswaku miri wa yena hinkwawo wu huma swilondza leswi vavaka. A swi nun’hwa lerova a ku nga ri na munhu loyi a a lava ku tshinela ekusuhi na yena. Hambi ku ri nsati wa Yobo u n’wi byele a ku: “Rhukana Xikwembu u fa!” Lava a va tiendla vanghana va Yobo va n’wi endzerile kutani va n’wi twisa ku vava lokukulu hi ku n’wi byela leswaku u weriwe hi makhombo lawa hinkwawo hileswi a endleke swilo swo biha swinene. Hambileswi Sathana a vangeleke Yobo makhombo lawa hinkwawo ni ku n’wi twisa ku vava, Yobo u hambete a tirhela Yehovha hi ku tshembeka.—Yobo 2:1-13; 7:5; 19:13-20.

Xana u ehleketa leswaku Yehovha u titwise ku yini hi ku tshembeka ka Yobo?— U tsakile hikuva Yehovha u byele Sathana a ku: ‘Wa n’wi vona Yobo! U ndzi tirhela hi ku swi rhandza.’ Xana na wena u ta fana na Yobo, munhu loyi Yehovha a nga vulaka leswaku i xikombiso lexinene, loyi a kombiseke leswaku Sathana i muhembi?— Kunene, i lunghelo ku tirhisiwa tanihi loyi a nga angulaka eka leswi Sathana a swi vuleke, swa leswaku a nga tshikisa vanhu hinkwavo ku tirhela Yehovha. Kunene Yesu u swi teke ku ri lunghelo.

Mudyondzisi Lonkulu a nga pfumelanga leswaku Sathana a N’wi endlisa nchumu wihi ni wihi lowu hoxeke. Anakanya ndlela leyi xikombiso xa yena xi endleke leswaku Tata wa yena a titwa ha yona! Yehovha u kombetele eka Yesu kutani a hlamula Sathana a ku: ‘Vona N’wananga! U tshame a tshembekile eka mina hi ku helela hikuva wa ndzi rhandza!’ Nakambe, anakanya ntsako lowu Yesu a wu kumeke hileswi a tsakiseke mbilu ya Tata wakwe. Ntsako wolowo wu endle leswaku Yesu a tiyiselela mhandzi ya nxaniso.—Vaheveru 12:2.

Xana wa swi lava ku fana ni Mudyondzisi wa hina Lonkulu, u tsakisa Yehovha?— Kutani hambeta u dyondza hi Yehovha ni leswi a lavaka leswaku u swi endla naswona u n’wi tsakisa hi ku swi endla!

Hlaya leswi Yesu a swi endleke leswaku a tsakisa Xikwembu nileswi na hina hi faneleke hi swi endla, eka Swivuriso 23:22-25; Yohane 5:30; 6:38; 8:28; na 2 Yohane 4.