XANA wa swi tiva leswaku xihlawuhlawu i yini?— Phela xihlawuhlawu i ku venga munhu ntsena hileswi a nga faniki na wena kumbe hileswi a vulavulaka ririmi leri hambaneke ni ra wena. Kahle-kahle ku va ni xihlawuhlawu i ku venga munhu kumbe ku n’wi ehleketelela swo biha u nga si n’wi tiva ni ku n’wi tiva.

Xana u ehleketa leswaku i swinene ku venga munhu u nga si tiva leswaku i munhu wa njhani kumbe u n’wi venga ntsena hileswi a nga faniki na wena?— Doo, a hi swinene naswona swi bihe ngopfu. A hi fanelanga hi venga munhu un’wana ntsena hileswi a nga faniki na hina.

Tivutise: Xana ku ni munhu wa rixaka rin’wana kumbe loyi a vulavulaka ririmi leri hambaneke ni ra wena, loyi u n’wi tivaka?— Kumbexana va kona vanhu lava u va tivaka lava nga faniki na wena hikwalaho ka leswi va vavisekeke kumbe hikwalaho ka leswi va vabyaka. Xana wa va rhandza ni ku va kombisa musa vanhu lava nga faniki na wena?—

Xana hi fanele hi va khoma njhani vanhu van’wana?

Loko hi yingisa Mudyondzisi Lonkulu, Yesu Kreste, hi ta va ni musa eka vanhu hinkwavo. A hi fanelanga hi venga munhu hileswi a humaka etikweni rin’wana kumbe hileswi a nga wa rixaka rin’wana. Hi fanele hi n’wi rhandza. Hambileswi vanhu van’wana va nga swi voniki hi ndlela yoleyo, kambe hi swona leswi Yesu a swi dyondziseke. A hi bule ha swona.

Muyuda loyi a a ri ni xihlawuhlawu, u te eka Yesu kutani a n’wi vutisa a ku: ‘Xana ndzi nga endla yini leswaku ndzi hanya hilaha ku nga heriki?’ Yesu a a swi tiva leswaku wanuna loyi a a lava ku vula leswaku hi fanele hi va ni musa eka vanhu va rixaka ra ka hina kumbe va tiko ra ka hina ntsena. Ematshan’weni yo hlamula xivutiso lexi hi ku kongoma,  Yesu u vutise wanuna loyi a ku: ‘Xana Nawu wa Xikwembu wu ri yini?’

Wanuna loyi u hlamurile: ‘U fanele u rhandza Yehovha Xikwembu xa wena hi mbilu ya wena hinkwayo, naswona u fanele ku rhandza warikwenu hilaha u tirhandzaka hakona.’ Yesu u te: ‘U be kona. Hambeta u endla sweswo kutani u ta kuma vutomi lebyi nga heriki.’

Hambiswiritano, wanuna loyi a a nga swi lavi ku va ni musa, kumbe ku rhandza vanhu va rixaka rin’wana. Hiloko a ringeta ku balekela ntiyiso. Kutani a vutisa Yesu a ku: “Xana kahle-kahle warikwerhu i mani?” Swi nga ha endleka leswaku a a lava Yesu a ku: “Varikwenu i vanghana va wena,” kumbe “I vanhu va rixaka ra ka n’wina.” Yesu u hlamule xivutiso xexo hi ku rungula hi xitori xa Muyuda ni Musamariya. Hi lexi xitori xa kona.

Munhu un’wana a a rhelela a suka eYerusalema a ya eYeriko. Munhu loyi a a ri Muyuda. Loko a ri karhi a famba, u khomiwe hi swigevenga. Hiloko swi n’wi ba a wela ehansi kutani swi n’wi tekela mali ni swiambalo swa yena. Swigevenga leswi swi n’wi bukuterile kutani swi n’wi siya etlhelo ka pato a ri ekusuhi ni ku fa.

Endzhakunyana, ku te muprista a ri karhi a famba hi ndlela yoleyo. U  vone munhu loyi, loyi a a vavisekile swinene. Xana wena a wu ta va u endle yini?— Muprista loyi u lo hundza hi le tlhelo lerin’wana ra pato. U hundze onge a nga n’wi voni. A nga n’wi pfunanga.

Ku tlhele ku ta wanuna un’wana loyi a a rhandza vukhongeri. A a ri Mulevhi loyi a a tirha etempeleni eYerusalema. Xana a a ta yima a pfuna munhu yoloye?— A nga yimanga. Na yena u hundzile ku fana ni muprista.

Eku heteleleni ku te Musamariya. Xana wa n’wi vona a ri karhi a ta hile njhikweni wa pato?— U vone Muyuda loyi a lo lakahla, a vavisekile swinene. Phela Vasamariya ni Vayuda vo tala a va nga rhandzani nikatsongo. (Yohane 4:9) Kambe, xana Musamariya loyi a a ta hundza munhu loyi a nga n’wi pfunanga? Xana u te: ‘Ndzi n’wi pfunela yini  Muyuda loyi? Xana a a ta ndzi pfuna loko ndzi vavisekile’?

Hikwalaho ka yini Musamariya a ve warikwavo eka munhu loyi?

Loko Musamariya a vona munhu loyi a a etlele etlhelo ka pato, u n’wi twele vusiwana. A a nga ta n’wi tshika a fela kwalaho. Hiloko a chika eka xifuwo xa yena, a ya eka munhu loyi kutani a sungula ku n’wi tshungula timbanga. U tote timbanga leti hi mafurha a ti chela ni vhinyo. Sweswo a swi ta endla leswaku timbanga teto ti hola. Hiloko a bandicha timbanga teto.

Musamariya u tlakule munhu loyi hi vukheta a n’wi khandziyisa xifuwo xa yena. Hiloko a famba na yena hi ku nonoka kukondza va fika endlwini leyi hirhiwaka hi vafambi. Loko va fika kwalaho, Musamariya u n’wi hirhele kamara leswaku a tshama eka rona kutani a n’wi khathalela a ri kwalaho.

Kutani Yesu u vutise wanuna loyi a a vulavula na yena a ku: ‘I mani eka lavanharhu loyi u vonaka leswaku u tikombise a ri warikwavo eka munhu loyi?’ Wena u vona onge i mani? Xana i muprista, i Mulevhi kumbe i Musamariya?—

Wanuna yoloye u hlamule a ku: ‘Loyi a fikeke a yima kutani a pfuna munhu la vavisekeke hi yena la tikombiseke a ri warikwavo.’ Yesu u te: ‘U tiyisile. Famba kutani u ya endla tano na wena.’—Luka 10:25-37.

 Xitori lexi xa dyondzisa, a swi tano ke? Xi hi endla hi vona leswaku i vamani varikwerhu. A hi lava va nga maxaka ya hina ntsena. Naswona a hi vanhu va rixaka ra ka hina ntsena kumbe lava vulavulaka ririmi ra ka hina. Yesu u hi dyondzise leswaku hi va ni musa eka vanhu hinkwavo ku nga khathariseki leswaku va huma kwihi, i va njhani kumbe va vulavula ririmi rihi.

Hi leswi Yehovha Xikwembu a nga xiswona. A nga na xihlawuhlawu. Yesu u te: ‘Tata wa n’wina la nge matilweni u tsuvukisa dyambu ra yena eka vanhu vo homboloka ni lavanene. Naswona u nisa mpfula eka vanhu lava lulameke ni lava nga lulamangiki.’ Kutani, hi fanele hi va ni musa eka vanhu hinkwavo, ku fana ni Xikwembu.—Matewu 5:44-48.

Xana u nga endlisa ku yini leswaku u va muakelani lonene?

Kambe u ta endla yini loko u vona munhu a vavisekile?— Xana u ta endla yini loko munhu wa kona a huma eka tiko rin’wana kumbe a ri wa rixaka rin’wana? Na yena i warikwenu, naswona u fanele u n’wi pfuna. Loko u vona leswaku a wu nge swi koti ku n’wi pfuna hileswi u nga xihlangi, u nga ha kombela munhu lonkulu leswaku a ta pfuna. Kumbexana u nga ha vitana phorisa kumbe mudyondzisi. Loko u endla sweswo, u ta va u kombisa musa ku fana ni wanuna wa Musamariya.

Mudyondzisi Lonkulu u lava leswaku hi va ni musa. U lava leswaku hi pfuna vanhu hinkwavo. Hi yona mhaka leyi endleke leswaku a rungula xitori xa Musamariya wa musa.

Malunghana ni dyondzo leyi ya ku hi pfuna leswaku hi kombisa musa eka vanhu ku nga khathariseki rixaka ra vona kumbe tiko leri va humaka eka rona, hlaya Swivuriso 19:22; Mintirho 10:34, 35; na 17:26.