XANA wa tsaka loko un’wana a ku endlela nchumu wo karhi lowunene?— Ina, vanhu van’wana va tsaka loko un’wana a va endlela nchumu lowunene. Hinkwerhu ha tsaka. Mudyondzisi Lonkulu a a swi tiva sweswo, naswona minkarhi hinkwayo a a endlela vanhu swilo. U te: ‘A ndzi telanga ku tirheriwa, kambe ndzi tele ku tirhela.’—Matewu 20:28.

Xana valandzeri va Yesu a va phikizana hi yini?

Kutani, xana hi fanele hi endla yini loko hi lava ku fana ni Mudyondzisi Lonkulu?— Hi fanele hi tirhela van’wana. Hi fanele hi va endlela swilo leswinene. Kambe vanhu vo tala a va swi endli leswi. Kahle-kahle, vanhu vo tala va lava leswaku ku tirheriwa vona minkarhi hinkwayo. Hambi ku ri valandzeri va Yesu va tshame va titwa hi ndlela leyi. Un’wana ni un’wana a a lava ku va lonkulu kumbe wa nkoka ku tlula van’wana.

Siku rin’wana Yesu a a ri karhi a famba ni vadyondzisiwa vakwe, lava a va ri valandzeri va yena. Endzhaku ka loko va nghene emutini wa Kapernawume, lowu a wu ri ekusuhi ni Lwandle ra Galeliya, hinkwavo va nghene endzeni ka yindlu. Yesu u va vutisile a ku: “I yini lexi a mi phikizana ha xona egondzweni?” Hiloko va ku whii, hikuva endleleni a va phikizana hileswaku i mani lonkulu exikarhi ka vona.—Marka 9:33, 34.

 Yesu a a swi tiva leswaku a swi fanelanga leswaku eka vadyondzisiwa va yena ku va ni loyi a ehleketaka leswaku hi yena lonkulu. Xisweswo, hilaha hi dyondzeke hakona eka ndzima yo sungula ya buku leyi, u teke xihlangi a xi yimisa exikarhi ka vona kutani a va byela leswaku va fanele va titsongahata ku fana na xona. Hambiswiritano, a va dyondzanga nchumu eka leswi. Kutani loko a ri ekusuhi ni ku fa, Yesu u va dyondzise dyondzo leyi a va nga ta pfuka va yi rivarile. Xana u endle yini?—

Loko hinkwavo va ri karhi va dya, Yesu u suke etafuleni kutani a hluvula nguvu ya yena ya le handle. A teka thawula, kutani a ri boha exisutini. Hiloko a chela mati exibavhanini. Valandzeri va yena va fanele va tivutisile leswaku se u lava ku endla yini. Loko va ha langutile, Yesu u korhamile a sungula ku va hlambisa milenge hinkwavo ka vona. Kutani a va sula milenge hi thawula. Vona mhaka yo hlamarisa swonghasi! Ku vuriwa yini loko a wu ri kwalaho? Xana a wu ta va u titwe njhani?—

Hi yihi dyondzo leyi Yesu a a yi dyondzisa valandzeri vakwe?

Valandzeri va yena a va vona swi nga fanelanga leswaku Mudyondzisi Lonkulu a va tirhela hi ndlela leyi. Va khomiwe hi tingana. Kahle-kahle, Petro u arile leswaku Yesu a n’wi endlela ntirho lowu wa xiyimo xa le hansi. Kambe Yesu u vule leswaku a swi ri swa nkoka leswaku a wu endla.

Namuntlha a hi tolovelanga ku hlambisana milenge. Kambe leswi a a swi endliwa, loko Yesu a ha ri emisaveni. Xana wa swi tiva leswaku ha yini a a swi endliwa?— Phela, endhawini leyi Yesu ni valandzeri vakwe a a va tshama eka yona, vanhu a va ambala mamphaxani. Kutani loko va famba laha ku nga ni ritshuri, milenge ya vona a yi thyaka. A swi kombisa musa ku hlantswa milenge ya munhu loyi a endzeke emutini.

Kambe enkarhini lowu, a nga kona ni un’we eka vadyondzisiwa va Yesu loyi a kombeleke ku hlambisa van’wana milenge. Hiloko Yesu a va hlambisa hi yexe. Hi ku endla leswi, Yesu a a dyondzisa valandzeri va yena dyondzo ya nkoka. A yi laveka dyondzo leyi eka vona. Ninamuntlha dyondzo leyi ya laveka eka hina.

 Wa swi tiva leswaku dyondzo ya kona hi yihi?— Endzhaku ka loko Yesu a tlhele a ambala nguvu ya yena ya le handle niloko se a tlhelele etafuleni, u hlamuserile a ku: “Xana ma swi tiva leswi ndzi mi endleke swona? Mi ndzi vula, ‘Mudyondzisi,’ ni ‘Hosi,’ naswona ma vurisa, hikuva ndzi tano. Hikokwalaho, loko mina, hambileswi ndzi nga Hosi ni Mudyondzisi, ndzi mi hlambise milenge, na n’wina mi fanele ku hlambisana milenge.”—Yohane 13:2-14.

I yini lexi u nga xi endlaka leswaku u pfuna van’wana?

Laha Mudyondzisi Lonkulu a a kombisa leswaku u lava valandzeri va yena va pfunana. A a nga lavi leswaku va anakanya hi swilaveko swa vona ntsena. A a nga lavi leswaku va tivona onge va antswa ngopfu lerova van’wana va fanele va tirhela vona minkarhi hinkwayo. Kambe a a lava leswaku va tiyimisela ku tirhela van’wana.

Xana leyi a ku nga ri dyondzo leyinene?— Xana u ta fana ni Mudyondzisi Lonkulu kutani u tirhela vanhu van’wana?— Hinkwerhu hi nga va endlela van’wana swilo. Leswi swi ta va tsakisa. Kambe ku tlula hinkwaswo, swi ta tsakisa Yesu ni Tata wakwe.

A swi tiki ku endlela vanhu van’wana swilo. Loko wo xiya-xiya, u ta vona swilo swo tala leswi u nga ha swi endlelaka van’wana. Anakanya  hi xivutiso lexi: Xana xi kona lexi u nga pfunaka mana wa wena hi xona? Wa swi tiva leswaku u ku endlela swilo swo tala wena ni ndyangu hinkwawo. Xana u nga n’wi pfuna?— Ha yini u nga n’wi vutisi?

Kumbexana u nga ha lunghisa tafula hi nkarhi wa swakudya swa ndyangu. Kumbexana u nga ha susa swibye swa thyaka etafuleni loko ndyangu wu heta ku dya. Vana van’wana va teka thyaka va ya ri cukumeta ehandle, masiku hinkwawo. Xin’wana ni xin’wana lexi u nga xi endlaka u ta va u pfuna van’wana, hilaha Yesu a endleke hakona.

Xana u na tona tindzisana leti u nga ti pfunaka? Tsundzuka, Yesu Mudyondzisi Lonkulu, u tirhele valandzeri vakwe. Loko u tirhela tindzisana ta wena u ta va u tekelela Yesu. Xana u nga va endlela yini?— Kumbexana u nga ha va dyondzisa ku ya veka tithoyi ta vona laha ti tshamaka kona loko va heta ku  tlanga. Kumbexana u nga ha va pfuna ku ambala. Kumbexana u nga ha va pfuna ku songa. Xana swi kona swin’wana leswi u nga ha va endlelaka swona?— Va ta ku rhandza loko u va endlela swilo leswi, hilaha valandzeri va Yesu a va n’wi rhandza hakona.

Ni le xikolweni u nga pfuna van’wana. Ku nga ha va ku ri vadyondzi-kulobye kumbe mudyondzisi wa wena. Loko un’wana a weriwa hi tibuku, u ta va u kombisa musa loko wo n’wi pfuna ku ti rhwalela. U nga ha basisa bodo yo tsalela eka yona kumbe u endlela mudyondzisi wa wena nchumu wo karhi. Hambi ku ri ku pfulela un’wana rivanti i xiendlo xa musa.

Minkarhi yin’wana vanhu a va nge hi nkhensi loko hi va pfuna. Xana u ehleketa leswaku sweswo swi fanele swi hi tshikisa ku endla swilo leswinene?— Doo! Vanhu vo tala a va n’wi nkhensanga Yesu hi mintirho leyinene leyi a yi endleke. Kambe sweswo a swi n’wi tshikisanga ku endla leswinene.

Kutani hi nga tshiki ku tirhela van’wana. A hi tsundzukeni Yesu, Mudyondzisi Lonkulu naswona minkarhi hinkwayo hi ringeta ku landzelela xikombiso xa yena.

Loko u lava ku kuma matsalwa lama engetelekeke lama vulavulaka hi ku pfuna vanhu van’wana, hlaya Swivuriso 3:27, 28; Varhoma 15:1, 2; na Vagalatiya 6:2.