SIKU rin’wana Mudyondzisi Lonkulu u vutise xivutiso lexi hlamarisaka. A xi ku: “I mani mana wa mina, naswona i vamani vamakwerhu?” (Matewu 12:48) Xana u nga xi hlamula xivutiso xexo?— Swi nga ha endleka u swi tiva leswaku vito ra mana wa Yesu a ku ri Mariya. Kambe wa ma tiva mavito ya vamakwavo?— Xana a a ri na vona vamakwavo va xisati?—

Bibele yi vula leswaku mavito ya vamakwavo wa Yesu a ku ri “Yakobo na Yosefa na Simoni na Yudasi.” Naswona Yesu a a ri ni vamakwavo va xisati lava a va hanya loko a ri karhi a chumayela. Leswi Yesu a a ri mativula, hinkwavo ka vona a va ri vatsongo eka yena.—Matewu 13:55, 56; Luka 1:34, 35.

Xana vamakwavo wa Yesu na vona a va ri vadyondzisiwa?— Bibele yi vula leswaku eku sunguleni “a va nga ri kombisi ripfumelo eka yena.” (Yohane 7:5) Hambiswiritano, hi ku famba ka nkarhi, Yakobo na Yudasi (loyi nakambe a a vuriwa Yudha) va ve vadyondzisiwa va yena, naswona va tsale tibuku ta Bibele. Xana wa ti tiva tibuku leti va ti tsaleke?— Ina, i buku ya Yakobo ni ya Yudha.

Hambileswi mavito ya vamakwavo va xisati va Yesu ma nga boxiwangiki eBibeleni, ha swi tiva leswaku a a ri na vambirhi. Kambe swi nga endleka leswaku a va ri kona van’wana. Xana na vona va ve vadyondzisiwa vakwe?— Bibele a yi hi byeli nchumu, kutani a hi swi tivi. Kambe, xana wa swi tiva leswaku hikwalaho ka yini Yesu a vutise xivutiso lexi nge, “I mani mana wa mina, naswona i vamani vamakwerhu?”— A hi vone.

Yesu a a ri karhi a dyondzisa vadyondzisiwa vakwe loko un’wana a n’wi kavanyeta a ku: “Mana wa wena ni vamakwenu va yime hala handle, va  lava ku vulavula na wena.” Kutani Yesu u tirhise nkarhi lowu ku dyondzisa dyondzo ya nkoka hi ku vutisa xivutiso xexo lexi hlamarisaka, a ku: “I mani mana wa mina, naswona i vamani vamakwerhu?” U tshambulutele voko eka vadyondzisiwa va yena, kutani a hlamula a ku: “Maswivo! Mana wa mina ni vamakwerhu hi lava!”

Hiloko Yesu a hlamusela leswi a a swi vula, a ku: “Mani na mani la endlaka ku rhandza ka Tata wa mina la nge tilweni, hi yena a nga makwerhu wa xinuna, hi yena a nga makwerhu wa xisati, hi yena a nga manana.” (Matewu 12:47-50) Leswi swi kombisa ndlela leyi Yesu a a rhandza vadyondzisiwa va yena ha yona. U hi dyondzisa leswaku vadyondzisiwa va yena a va fana ni vamakwavo va xinuna ni va xisati ni vamanana va nyama eka yena.

I vamani lava Yesu a vuleke leswaku i vamakwavo wa yena va xinuna ni va xisati?

Hi nkarhi wolowo vamakwavo wa Yesu—ku nga Yakobo, Yosefa, Simoni na Yudasi—a va nga kholwi leswaku Yesu i N’wana wa Xikwembu. Va fanele va nga swi kholwanga leswi ntsumi Gabriyele yi swi byeleke mana wa vona. (Luka 1:30-33) Kutani swi nga endleka leswaku a va khoma Yesu hi ndlela yo biha. Un’wana ni  un’wana la endlaka tano a nga vi makwerhu wa xiviri wa xinuna kumbe wa xisati. Xana u tiva un’wana loyi a khomeke makwavo wa xinuna kumbe wa xisati hi ndlela yo biha?—

Bibele yi hi byela hi Esawu na Yakobe ni ndlela leyi Esawu a hlundzukeke ha yona lerova a ku: “Ndzi ta dlaya Yakobe makwerhu.” Sweswo swi n’wi chavise ngopfu Raveka, mana wa vona lerova a rhumela Yakobe ekule leswaku Esawu a nga n’wi dlayi. (Genesa 27:41-46) Kambe endzhaku ka malembe yo tala Esawu u cincile naswona u angarhe Yakobe a tlhela a n’wi tswontswa.—Genesa 33:4.

Hi ku famba ka nkarhi Yakobe u ve ni vana va 12. Kambe vana lavakulu va Yakobe a va nga n’wi rhandzi makwavo lontsongo Yosefa. A va n’wi vengile hileswi tata wa vona a a n’wi rhandza ku va tlula. Hiloko va n’wi xavisa eka vanhu lava xavaka mahlonga va ya ma xavisa, lava a va ri endleleni yo ya aEgipta. Kutani va byela tata wa vona leswaku Yosefa u dlayiwe hi xivandzana. (Genesa 37:23-36) Sweswo a swi bihile, a swi tano ke?—

Hi ku famba ka nkarhi vamakwavo wa Yosefa va tisorile hileswi va swi endleke. Kutani Yosefa u va rivalerile. Xana wa yi vona ndlela leyi Yosefa a faneke na Yesu ha yona?— Vaapostola va Yesu va baleke va n’wi siya loko a ri ekhombyeni  naswona Petro u n’wi landzurile a vula leswaku a nga n’wi tivi. Kambe, ku fana na Yosefa, Yesu u va rivalele hinkwavo.

Hi dyondza yini eka leswi Kayini a swi endleke eka Avele?

Kutani ku ni van’wana vambirhi lava a va ri vamakwavo, ku nga Kayini na Avele. Ni le ka vona hi nga dyondza swo karhi. Xikwembu xi vone mbilu ya Kayini kutani xi swi xiya leswaku a nga rhandzi makwavo hi mbilu hinkwayo. Kutani Xikwembu xi byele Kayini leswaku a hundzuka emahanyelweni ya yena. Loko Kayini a a rhandza Xikwembu hi mbilu ya yena hinkwayo a a ta va a yingisile. Kambe a a nga xi rhandzi Xikwembu. Siku rin’wana Kayini u byele Avele a ku: “A hi ye enhoveni.” Avele u fambe na Kayini. Loko va ri voxe le nhoveni, Kayini u hime makwavo a n’wi vavisa lerova a n’wi dlaya.—Genesa 4:2-8.

Bibele yi hi byela leswaku ku ni dyondzo ya nkoka leyi hi faneleke hi yi dyondza emhakeni leyi. Xana wa yi tiva dyondzo ya kona?— ‘Leri i rungula leri mi ri tweke ku sukela eku sunguleni: Hi fanele hi rhandzana; hi nga fani na Kayini, loyi a humeke eka lowo homboloka.’ Kutani vamakwerhu va xinuna ni va xisati va fanele va rhandzana. Va nga fani na Kayini.—1 Yohane 3:11, 12.

Ha yini hi nga fanelanga hi fana na Kayini?— Hikuva Bibele yi vula leswaku u ‘hume eka lowo homboloka,’ ku nga Sathana Diyavulosi. Leswi Kayini a endleke ku fana na Diyavulosi, swi fana ni leswaku a a ri n’wana wa Diyavulosi.

Xana wa swi vona leswaku ha yini swi ri swa nkoka ku rhandza vamakwenu va xinuna ni va xisati?— Loko u nga va rhandzi, u ta va u tekelela vana va mani?— U ta va u tekelela vana va Diyavulosi. A wu swi lavi ku va n’wana wakwe, a swi tano ke?— Kutani u nga kombisa hi ndlela yihi leswaku u lava ku va n’wana wa Xikwembu?— U nga swi kombisa hi ku rhandza vamakwenu va xinuna ni va xisati hi mbilu hinkwayo.

Kambe rirhandzu i yini?— Rirhandzu i ntlhaveko lowukulu lowu hi nga na wona, lowu hi susumetelaka ku endlela van’wana swilo leswinene. Hi kombisa leswaku hi rhandza vanhu van’wana loko hi va tsakela niloko hi va endlela swilo leswinene. Kutani i vamani vamakwerhu va xinuna ni va xisati lava hi faneleke hi va rhandza?— Tsundzuka leswaku Yesu  u dyondzise leswaku hi vona va vumbaka ndyangu lowukulu wa Vukreste.

U nga kombisa hi ndlela yihi leswaku u rhandza vamakwenu?

Xana i swa nkoka ku fikela kwihi leswaku hi rhandza vamakwerhu lava va xinuna ni va xisati lava va nga Vakreste?— Bibele yi ri: “Loyi a nga rhandziki makwavo, [wa xinuna kumbe wa xisati] la n’wi vonaka, a nge swi koti ku rhandza Xikwembu lexi a nga si tshamaka a xi vona.” (1 Yohane 4:20) Kutani a hi fanelanga hi rhandza van’wana, hi venga van’wana endyangwini wa Vukreste. Hi fanele hi va rhandza hinkwavo. Yesu u te: “Hinkwavo va ta tiva leswaku mi vadyondzisiwa va mina, loko mi rhandzana.” (Yohane 13:35) Xana u va rhandza hinkwavo vamakwerhu va xinuna ni va xisati?— Tsundzuka leswaku loko u nga va rhandzi, a wu nge swi koti ku rhandza Xikwembu hi mbilu hinkwayo.

Hi nga kombisa hi ndlela yihi leswaku hi rhandza vamakwerhu va xinuna ni va xisati hi mbilu hinkwayo?— Phela loko hi va rhandza, hi nge va papalati hikwalaho ka leswi hi nga laviki ku vulavula na vona. Hi ta va na musa eka vona hinkwavo. Minkarhi hinkwayo hi ta va endlela leswinene naswona hi tiyimisela ku avelana na vona leswi hi nga na swona. Kutani loko vo tshuka va va ekhombyeni hi ta va pfuna hikuva hi ndyangu wun’we lowukulu wa xiviri.

Xana hi ta va hi kombisa yini loko hi rhandza vamakwerhu va xinuna ni va xisati hi mbilu hinkwayo?— Hi ta va hi kombisa leswaku hi vadyondzisiwa va Yesu, Mudyondzisi Lonkulu. Kutani hi leswi hi lavaka ku va swona, a swi tano ke?—

Ndlela yo kombisa rirhandzu eka vamakwerhu va xinuna ni va xisati yi hlamuseriwile nakambe eka Vagalatiya 6:10 na 1 Yohane 4:8, 21. Ha yini u nga pfuli Bibele ya wena u hlaya matsalwa wolawo?