Nghena endzeni

Hundzela eka leswi nga endzeni

Timbhoni Ta Yehovha

Hlawula ririmi Xitsonga

 NDZIMA 34

Xana Ku Ta Humelela Yini Loko Hi Fa?

Xana Ku Ta Humelela Yini Loko Hi Fa?

HI LAHA u swi tivaka hakona, namuntlha vanhu va dyuhala, va vabya va tlhela va fa. Hambi ku ri vana vanene va fa. Xana swi fanerile ku chava ku fa kumbe ku chava munhu la feke?— Xana wa swi tiva leswaku ku humelela yini loko hi fa?—

Namuntlha a nga kona munhu loyi a nga tshama a fa kutani a tlhela a vuya a ta hi byela leswaku ku humelela yini loko munhu a file. Kambe loko Yesu, Mudyondzisi Lonkulu, a ha ri emisaveni, a a ri kona munhu wo tano. Loko ho dyondza ha yena, hi ta swi tiva leswi humelelaka eka lava va faka. Wanuna loyi a a ri munghana wa Yesu naswona a a tshama eBetaniya, ximutana lexi nga ekusuhi na Yerusalema. Vito ra yena i Lazaro, naswona a a ri ni vamakwavo vambirhi va xisati, ku nga Marta na Mariya. A hi vone leswaku Bibele yi ri ku humelele yini.

Siku rin’wana Lazaro a a vabyela ku fa. Hi nkarhi wolowo Yesu a a nga ri kona ekusuhi. Hiloko Marta na Mariya va rhumela munhu a ya byela Yesu leswaku makwavo wa vona Lazaro wa vabya. Va endle leswi hi ku tiva leswaku Yesu a nga fika a n’wi hanyisa. Yesu a hi dokodela, kambe u ni matimba yo huma eka Xikwembu naswona a nga hanyisa muxaka wihi na wihi wa vuvabyi.—Matewu 15:30, 31.

Hambiswiritano, loko Yesu a nga si ya a ya vona Lazaro, Lazaro u vabye swinene lerova a kala a fa. Kambe Yesu u byele vadyondzisiwa vakwe leswaku Lazaro u etlele nileswaku U ta ya, a ya n’wi pfuxa. Vadyondzisiwa a va nga swi twisisi leswi Yesu a swi vuleke. Kutani Yesu u va byele hi ku kongoma a ku: “Lazaro u file.” Xana leswi swi kombisa yini malunghana ni rifu?— Ina, swi kombisa leswaku rifu ri fana ni vurhongo lebyikulu. I vurhongo lebyikulu swinene lerova byi endla munhu a nga koti ni ku lorha.

 Endzhaku ka sweswo Yesu u endzele Marta na Mariya. Vanghana vo tala va ndyangu lowu na vona ana se a va fikile. A va tele ku ta chavelela vamakwavo lava va xisati hikwalaho ka leswi buti wa vona a feke. Loko Marta a twa leswaku Yesu wa ta, u n’wi hlanganisile. Ku nga ri khale, Mariya na yena u yile a ya vona Yesu. A a karhatekile swinene naswona a a rila, kutani u fike a wela emilengeni ya yena. Vanghana van’wana lava landzeleke Mariya na vona a va rila.

Mudyondzisi Lonkulu u va vutise leswaku va n’wi veke kwihi Lazaro. Hi nkarhi wolowo, vanhu va fambe na Yesu ebakweni leri Lazaro a lahliweke eka rona. Loko Yesu a vona vanhu hinkwavo va ri karhi va rila, na yena u sungule ku rila. A a swi tiva leswaku swi vava njhani ku feriwa hi munhu loyi u n’wi rhandzaka.

A ku ri ni ribye enyangweni wa bako, kutani Yesu u te: “Susani ribye.” Xana a swi fanerile leswaku va ri susa?— Marta a a vona swi nga fanelanga. U te: “Hosi, u fanele se a nun’hwa hikuva swi endla mune wa masiku.”

Kambe Yesu u n’wi byele a ku: “Xana a ndzi ku byelanga leswaku loko u kholwa u ta vona ku vangama ka Xikwembu?” Yesu a a vula leswaku Marta u ta vona nchumu lowu nga ta endla leswaku Xikwembu xi dzunisiwa. Xana Yesu a a ta endla yini? Loko ribye ri susiwile, Yesu u khongele hi rito leri tlakukeke eka Yehovha. Kutani Yesu u huwelele hi rito lerikulu a ku: “Lazaro, huma!” Xana a a ta huma? Xana u humile?—

Xana u nga n’wi pfuxa munhu la etleleke?— Ina, loko wo n’wi huwelela hi rito lerikulu, u ta pfuka. Kambe, xana u nga swi kota ku pfuxa munhu loyi a etleleke vurhongo bya rifu?— Doo! Ku nga khathariseki leswaku u n’wi huwelela njhani, munhu loyi a feke a nge ku twi. A xi kona lexi mina kumbe wena kumbe munhu wo karhi wa laha misaveni namuntlha, a nga xi endleka leswaku a pfuxa munhu la feke.

I yini leswi Yesu a swi endleleke Lazaro?

Kambe Yesu a nga tano. U ni matimba lama hlawulekeke yo huma eka Xikwembu. Kutani, loko Yesu a vitana Lazaro, ku humelele nchumu  lowu hlamarisaka. Wanuna loyi, loyi se a a ri ni masiku ya mune a file u humile ebakweni! U pfuxiwile eku feni! Se a a swi kota ku hefemula, ku famba ni ku vulavula! Ina, Yesu u pfuxe Lazaro eku feni.—Yohane 11:1-44.

Sweswi anakanya hi mhaka leyi: Xana ku humelele yini hi Lazaro loko a fa? Xana xiphemu xo karhi xakwe—moya-xiviri kumbe moya—wu humile emirini wa yena kutani wu ya hanya endhawini yin’wana? Xana moya-xiviri wa Lazaro wu ye etilweni? Xana a a ri ni Xikwembu swin’we ni tintsumi to kwetsima etilweni eka masiku lawa ya mune?—

Doo! Tsundzuka, Yesu u vule leswaku Lazaro u etlele. Xana loko u etlele u va u ri eka xiyimo xa njhani? Loko u khomiwe hi vurhongo lebyikulu, a wu swi tivi leswi humelelaka laha u nga kona, a swi tano ke?— Naswona loko u pfuka, a wu swi tivi leswaku u etlele nkarhi wo tanihi kwihi kukondza u languta nkarhi.

Swi tano ni hi vanhu lava feke. A va tivi nchumu. A va twi nchumu. Naswona a va swi koti ku endla nchumu. Lazaro a a ri eka xiyimo xexo  loko a file. Rifu ri fana ni vurhongo lebyikulu lebyi loko munhu a khomiwe hi byona a nga kotiki ku tsundzuka nchumu. Bibele yi ri: “Loko ku ri lava feke, a va tivi nchumu nikatsongo.”—Eklesiasta 9:5, 10.

Hi xihi xiyimo lexi Lazaro a a ri eka xona loko a file?

Anakanya hi mhaka leyi: Loko ku ri leswaku Lazaro a a ri etilweni eka masiku wolawo ya mune, xana a a ta va a nga vulavulanga ha yona mhaka leyi?— Naswona loko ku ri leswaku a a ri etilweni, xana Yesu a a ta n’wi sindzisa ku vuya laha misaveni a suka endhawini yoleyo leyi tsakisa?— Doo!

Kambe, vanhu vo tala va vula leswaku hi ni moya-xiviri naswona va vula leswaku moya-xiviri wu hambeta wu hanya endzhaku ka loko miri wu file. Va vula leswaku moya-xiviri wa Lazaro a wu hanya endhawini yo karhi. Kambe Bibele a yi swi vuli sweswo. Yi vula leswaku Xikwembu xi endle munhu wo sungula Adamu a va “moya-xiviri lowu hanyaka.” Adamu a a ri moya-xiviri. Bibele yi tlhela yi vula leswaku loko Adamu a dyohile, u file. U hundzuke “moya-xiviri . . . lowu feke” naswona u tlhelele entshurini lowu a vumbiweke hi wona. Bibele yi vula leswaku vatukulu hinkwavo va Adamu va tswariwa va ri ni xidyoho naswona va fa ku fana na yena.—Genesa 2:7; 3:17-19; Tinhlayo 6:6; Varhoma 5:12.

 Kutani swi le rivaleni leswaku moya-xiviri wa hina a wu sali wu hanya loko miri wa hina wu fa. Un’wana ni un’wana wa hina i moya-xiviri. Naswona tanihi leswi vanhu va kumeke xidyoho eka munhu wo sungula Adamu, Bibele yi ri: ‘Moya-xiviri lowu dyohaka wu ta fa.’—Ezekiyele 18:4.

Ha yini xi nga ri kona xivangelo xo chava vafi?

Vanhu van’wana va chava vafi. A va yi emasirheni hikuva va ehleketa leswaku vafi va ni mimoya-xiviri leyi salaka yi hanya loko mimiri ya vona yi fa, leyi nga vavisaka lava hanyaka. Kambe, xana munhu la feke a nga n’wi vavisa munhu la hanyaka?— Nikatsongo!

Vanhu van’wana va tshemba leswaku lava feke va nga vuya va ri mimoya, va ta endzela lava hanyaka. Kutani va veka swakudya, va swi vekela vanhu lava feke. Kambe vanhu lava endlaka sweswo, a va swi tshembi leswi Xikwembu xi swi vulaka malunghana ni lava feke. Loko hi tshemba leswi Xikwembu xi swi vulaka, a hi nge va chavi vafi. Naswona loko hakunene hi tlangela leswi Xikwembu xi hi nyikeke vutomi, hi ta swi kombisa hi ku endla swilo leswi Xikwembu xi swi amukelaka.

Kambe u nga ha tivutisa: ‘Xana Xikwembu xi ta va pfuxa vana lava feke? Xana xa swi lava ku va pfuxa?’ A hi bule hi mhaka leyi eka ndzima leyi landzelaka.

A hi hlaye leswi engetelekeke eBibeleni malunghana ni xiyimo lexi vafi va nga eka xona ni leswaku munhu i moya-xiviri, eka Pisalema 115:17; 146:3, 4; na Yeremiya 2:34.