LOKO ho fa, xana Xikwembu xi ta swi lava ku hi pfuxa eku feni?— Wanuna lonene, Yobo, a a tshemba leswaku Xikwembu xa swi lava. Kutani loko Yobo a vona leswaku u le kusuhi ni ku fa, u byele Xikwembu a ku: “U ta vitana, mina ndzi ta ku hlamula.” Yobo u vule leswaku Yehovha Xikwembu u ta swi navela kumbe u ta swi rhandza ku n’wi pfuxa.—Yobo 14:14, 15.

Yesu u fana na Yehovha Xikwembu, Tata wakwe. Yesu wa swi lava ku hi pfuna. Loko wanuna loyi a nga ni nhlokonho a n’wi byele leswaku, “loko u swi lava, u nga ndzi basisa,” Yesu u n’wi hlamule a ku: “Ndza swi lava.” Kutani u horise wanuna loyi a khomiweke hi nhlokonho.—Marka 1:40-42.

Xana Yehovha u swi kombise njhani leswaku wa va rhandza vana lavatsongo?

Yesu u dyondzisiwe hi Tata wakwe leswaku a rhandza vana. Eka swiendlakalo swimbirhi leswi humeleleke khale swinene, Yehovha u tirhise malandza yakwe leswaku ma pfuxa vana lavatsongo. Eliya u kombele Yehovha leswaku a pfuxa n’wana wa wansati loyi a kombiseke Eliya malwandla. Naswona Yehovha u n’wi pfuxile. Yehovha u tlhele a tirhisa nandza wakwe Elixa leswaku a pfuxa xifanyetana xin’wana.—1 Tihosi 17:17-24; 2 Tihosi 4:32-37.

 Xana a swi tsakisi ku tiva leswaku Yehovha wa hi rhandza swinene?— A nga hi tsundzuki loko ha ha hanya ntsena. U tlhela a hi tsundzuka ni loko hi file. Yesu u vule leswaku eka Tata wakwe, vanhu lava A va rhandzaka, va hanya hambiloko se va file! (Luka 20:38) Bibele yi vula leswaku ‘rifu ni vutomi ni swilo leswi nga laha sweswi ni swilo leswi taka, a swi nge swi koti ku hi hambanisa ni rirhandzu ra Xikwembu.’—Varhoma 8:38, 39.

Loko Yesu a ha ri laha misaveni, u swi kombisile leswaku Yehovha wa va rhandza vana lavatsongo. Tsundzuka leswaku Yesu u tinyike nkarhi wo vulavula ni vana a va byela hi Xikwembu. Xana a wu swi tiva leswaku Xikwembu xi nyike Yesu matimba yo pfuxa vana lavatsongo lava feke?— A hi vulavule hi nkarhi lowu ha wona Yesu a pfuxeke n’wana wa nhwanyana, wa wanuna la vitaniwaka Yayiro, wa malembe ya 12 hi vukhale.

Yayiro a a tshama ni nsati wakwe swin’we ni n’wana wa vona la nga un’we, ekusuhi ni Lwandle ra Galeliya. Siku rin’wana nhwanyana loyi u sungule ku vabya swinene lerova Yayiro a swi vona leswaku n’wana wakwe u ta fa. U sungule ku ehleketa hi Yesu, wanuna wo hlamarisa loyi Yayiro a tweke ha yena, loyi a kotaka ku hanyisa vanhu. Hiloko Yayiro a famba a n’wi lava. U kume Yesu eribuweni ra Lwandle ra Galeliya a ri karhi a dyondzisa vanhu vo tala.

Yayiro u manyukute exikarhi ka ntshungu kutani a wela emilengeni ya Yesu. U byele Yesu a ku: ‘Xinhwanyetana xa mina xi vabya ngopfu. Ndzi kombela u ta u ta xi pfuna. Ndzi kombela u ta.’ Hiloko Yesu a famba na Yayiro hi ku hatlisa. Ntshungu lowu teke wu ta vona Mudyondzisi Lonkulu na wona wu landzele hi le ndzhaku. Kambe endzhaku ka loko va fambe mpfhukanyana, vavanuna van’wana lava humaka ekaya ra Yayiro va tile eka yena kutani va ku: ‘N’wana wa wena u file! Wa ha n’wi karhatela yini mudyondzisi?’

Yesu u swi twile loko vavanuna lava va vula sweswo. A a ku tiva ku vava loku Yayiro a ku tweke hikwalaho ko lahlekeriwa hi n’wana wakwe la nga un’we. Hiloko A n’wi byela a ku: ‘U nga chavi. Ntsena  vana ni ripfumelo eka Xikwembu kutani n’wana wa wena u ta hanyisiwa.’ Va ye emahlweni va famba kukondza va ya fika ekaya ra Yayiro. Kwalaho vanghana va ndyangu lowu a va ri karhi va rila. A va ri ni gome hikuva munghana wa vona lontsongo a a file. Kambe Yesu u te eka vona: ‘Tshikani ku rila. Xinhwanyetana lexi a xi fanga, kambe xi etlele.’

Loko Yesu a vula marito lawa, vanhu va sungule ku hleka hikuva a va swi tiva leswaku nhwanyana loyi u file. Kutani u anakanya leswaku ha yini Yesu a vule leswaku u etlele?— Hi yihi dyondzo leyi u ehleketaka leswaku a a lava ku yi dyondzisa vanhu?— A a lava va tiva leswaku rifu ri nga ha fana ni vurhongo lebyikulu. A a lava ku va dyondzisa leswaku hikwalaho ka matimba ya Xikwembu, swi nga n’wi olovela ku pfuxa munhu la feke, hilaha na hina hi nga n’wi pfuxaka hakona munhu la etleleke.

Xana hi dyondza yini emhakeni ya Yesu ya ku pfuxa n’wana wa Yayiro wa nhwanyana?

Yesu u humese vanhu hinkwavo endlwini handle ka vaapostola va yena ku nga Petro, Yakobo na Yohane swin’we ni tata wa nhwanyana loyi ni mana wa kona. Hiloko a ya laha xinhwanyetana xi nga kona. U xi khome hi voko kutani a ku: ‘Nhwanyana, pfuka!’ Hiloko a pfuka kutani a sungula ku famba! Tata wakwe ni mana wakwe va tsakile swinene.—Marka 5:21-24, 35-43; Luka 8:40-42, 49-56.

 Sweswi anakanya hi mhaka leyi. Leswi Yesu a pfuxeke xinhwanyetana lexi, lexi feke, xana a nga endla leswi fanaka eka vanhu van’wana?— Xana u ehleketa leswaku u ta swi endla hakunene?— Ina, u ta swi endla. Yesu hi byakwe u te: “Nkarhi wa ta lowu hinkwavo lava nga eka masirha-bako ya xitsundzuxo va nga ta twa rito ra [mina] kutani va huma.”—Yohane 5:28, 29.

Xana u ehleketa leswaku Yesu wa swi lava ku pfuxa vanhu lava feke?— Xikombiso xin’wana lexi nga eBibeleni xa hi pfuna ku hlamula xivutiso lexi. Leswi swi humeleleke siku rin’wana ekusuhi ni muti wa Nayini swi kombisa ndlela leyi Yesu a titwaka ha yona loko a vona vanhu va rila enkosini.

Wansati la feriweke hi n’wana wakwe wa jaha a a ri exikarhi ka vakhandli-va-nhlonge loko ntshungu wu huma eNayini. Nuna wa yena a a ha ku fa kutani se a ku fe n’wana wakwe wa jaha la nga un’we. A a ri ni gome lerikulu hakunene! Vanhu vo tala va le Nayini va landzelele hi le ndzhaku loko va ya eku lahleni ka ntsumbu wa n’wana wakwe ehandle ka muti. Wansati loyi a a ri eku rileni naswona a xi kona lexi vanhu a va ta xi endla leswaku va n’wi chavelela.

Hi rona siku rero, Yesu ni vadyondzisiwa vakwe a va ri karhi va ta emutini wa Nayini. Loko va nghena emutini wolowo, va hlangane ni ntshungu wu ri karhi wu ya lahla jaha ra wansati loyi. Loko Yesu a vona wansati loyi a ri karhi a rila, u n’wi twele vusiwana. Mbilu yakwe yi khumbekile hikwalaho ka gome lerikulu leri wansati loyi a a ri na rona. U lave ku n’wi pfuna.

Kutani hi ntwela-vusiwana ni hi xivindzi lexi endleke leswaku wansati loyi a yingisa, u te: “Tshika ku rila.” Ndlela leyi a swi endleke ha yona yi endle leswaku un’wana ni un’wana a n’wi languta. Loko Yesu a ya laha ntsumbu wu nga kona, handle ko kanakana hinkwavo a va hlamele leswaku u lava ku endla yini. Yesu u lerisile, a ku: “Jaha, ndzi ri eka wena, Pfuka!” Hiloko ri pfuka hi ku hatlisa! Kutani ri sungula ku vulavula.—Luka 7:11-17.

 Anakanya ndlela leyi wansati loyi a faneleke a titwe ha yona! Xana u nga titwa njhani loko wo pfuxeriwa munhu la feke, loyi u n’wi rhandzaka?— Xana leswi a swi kombisi swona leswaku Yesu wa va rhandza vanhu nileswaku wa swi lava ku va pfuna?— Anakanya ndlela leyi swi nga ta tsakisa ha yona emisaveni leyintshwa ya Xikwembu loko hi amukela vanhu lava pfuxiweke eku feni!—2 Petro 3:13; Nhlavutelo 21:3, 4.

Xana ku pfuxiwa ka n’wana wa wansati loyi, loyi a nga swakwe, swi kombisa yini?

Hi nkarhi wolowo, van’wana va lava va pfuxiweke ku ta va ku ri vanhu lava hi va tivaka, ku katsa ni vana. Hi ta swi tiva leswaku i vamani, tanihi leswi Yayiro na yena a a n’wi tiva n’wana wakwe wa nhwanyana loko Yesu a n’wi pfuxile. Van’wana ku ta va ku ri vanhu lava feke eka madzana kumbe magidi ya malembe lama hundzeke. Kambe Xikwembu a xi nge va rivali hambileswi va hanyeke khale swinene.

Xana a swi tsakisi ku tiva leswaku Yehovha Xikwembu ni N’wana wakwe, Yesu, va hi rhandza swinene?— Va lava leswaku hi hanya hilaha ku nga heriki, ku nga ri ku hanya malembe ma nga ri mangani ntsena!

Leswaku u twa hi ta ntshembo wa Bibele lowu hlamarisaka malunghana ni lava feke, hlaya Esaya 25:8; Mintirho 24:15; na 1 Vakorinto 15:20-22.